Daniel 9 - ŊMALƐ KRƆŊKRƆŊ LƐ

Daniel sɔle ehã emaŋbii lɛ

¹ Ahashwerosh bi Dario, Media fɔmɔbi lɛ, ye Kaldeabii amaŋtsɛ.

² Eklɛŋklɛŋ afi lɛ mli, be ni, mi Daniel, mihiɛ woji amli kwɛmɔ lɛ, mina akɛ afii abɔ ni Yehowa kɛɛ Gbalɔ Yeremia akɛ Yerusalɛm baakã shi amaŋfɔ̃ kɛyashi lɛ ji afii nyɔŋmai kpawo.

³ Mihi ŋmãa, ni mibu kpekpe, ni mita lamlu mli kɛmiitao Nuŋtsɔ Nyɔŋmɔ lɛ hiɛgbɛ yɛ sɔlemɔ kɛ faikpamɔ mli.

⁴ Mikpa Yehowa miNyɔŋmɔ lɛ fai, ni mijaje tɔ̃mɔi mikɛɛ, “Ao! Nuŋtsɔ, bo ji Nyɔŋmɔ kpeteŋkple ni he yɔɔ gbeyei ni yeɔ ekpãŋmɔ nɔ, mɔ ni suɔmɔ sɛɛ efooo hã mɛi ni sumɔɔ lɛ, ni amɛyeɔ ekitãi lɛ anɔ lɛ.

⁵ “Wɔfee esha, ni wɔtɔ̃; wɔfee yitsoŋwalɛ nibii, ni wɔtse ohiɛ atua, ni wɔyeee okitãi kɛ omlai lɛ anɔ.

⁶ Wɔboko otsuji gbalɔi lɛ ni kɛ wɔmaŋtsɛmɛi lɛ kɛ wɔlumɛi lɛ kɛ wɔtsɛmɛi lɛ kɛ wɔjaku muu lɛ fɛɛ wie yɛ ogbɛi mli lɛ toi.

⁷ Ao! Nuŋtsɔ, bo lɛ onɔ ji jalɛ; shi wɔ lɛ wɔnɔ ji hiɛgbele tamɔ eyɔɔ wɔnɔ ŋmɛnɛ nɛɛ lɛ, wɔ mɛi ni ji Yudabii kɛ Yerusalɛmbii lɛ kɛ Israelbii fɛɛ, mɛi ni bɛŋkɛ kɛ mɛi hu ni eyaje shɔŋŋ yɛ shikpɔji anɔ ni ogbɛ amɛ oshwã, yɛ anɔkwa ni amɛyayeee bo hewɔ lɛ.

⁸ Nuŋtsɔ, hiɛgbele nɛɛ sa wɔ, wɔ kɛ wɔmaŋtsɛmɛi lɛ kɛ wɔlumɛi lɛ kɛ wɔtsɛmɛi lɛ, ejaakɛ wɔfee esha wɔshi bo.

⁹ Nuŋtsɔ, wɔNyɔŋmɔ, musuŋtsɔlɔ ji bo, ni okɛ esha faa tsɛbelɛ wɔtse ohiɛ atua,

¹⁰ ni wɔbooo bo Nuŋtsɔ, wɔNyɔŋmɔ lɛ, owiemɔ toi, ni wɔhiii shi bɔ ni otsɔ̃ otsuji gbalɔi lɛ anɔ owo wɔ mla akɛ wɔhi shi lɛ.

¹¹ Israel tso muu fɛɛ etɔ̃ omla lɛ, ni amɛyeee omla lɛ nɔ; no hewɔ lɛ, amɛgba afã. Enɛ ehã amɛloo musu ni aŋmã yɛ Mose, otsulɔ lɛ, Mla Wolo lɛ mli lɛ, ejaakɛ wɔfee esha wɔshi bo.

¹² Ekɛ amanehulu kpeteŋkple ni eba wɔnɔ nɛɛ lɛ ema wiemɔ ni ewie eshi wɔ lɛ nɔ mi. Ogbalako maŋ ko toi nɛkɛ pɛŋ dã, yɛ je nɛɛ mli fɛɛ, tamɔ ogbala Yerusalɛm toi nɛɛ.

¹³ Nɛkɛ efɔŋ nɛɛ eba wɔnɔ tamɔ bɔ ni aŋma yɛ Mose Mla lɛ mli lɛ. Kɛ̃lɛ wɔkpako bo Yehowa fai, ni wɔkpaleko kɛjeko wɔnifɔ̃ɔjianii lɛ ahe, ni wɔboko anɔkwale wiemɔ lɛ toi.

¹⁴ No hewɔ lɛ, Yehowa, wɔNyɔŋmɔ, enɛ hewɔ ni ohã efɔŋ nɛɛ eba wɔnɔ nɛɛ, ejaakɛ bo lɛ jalɔ ji bo yɛ nii fɛɛ ni ofeɔ gbɛfaŋ; shi wɔ lɛ wɔbooo bo toi.

¹⁵ “Ao! Nuŋtsɔ, wɔNyɔŋmɔ ni okɛ nineshiwalɛ jie wɔ, omaŋ lɛ, kɛje Ijipt shikpɔŋ lɛ nɔ, ni okɛna gbɛi kɛbashi ŋmɛnɛ, wɔfee esha, ni wɔwa yi.

¹⁶ Ao! Nuŋtsɔ, yɛ ojalɛ saneyeli hewɔ lɛ, ofainɛ, foo omli ni efu Yerusalɛm kɛ omli ni ewo lɛ la lɛ sɛɛ. Bo diɛŋtsɛ omaŋ kɛ gɔŋ krɔŋkrɔŋ ni. Eshai ni wɔfee kɛ eshai hu ni wɔtsɛmɛi lɛ fee lɛ hewɔ lɛ, omaŋ Yerusalɛm kɛ omaŋbii lɛ ahiɛ eshwie shi yɛ majimaji ni bɔle wɔ lɛ ahiɛ.

¹⁷ No hewɔ lɛ, agbɛnɛ, wɔNyɔŋmɔ, bo otsulɔ sɔlemɔ kɛ faikpamɔ nɛɛ pɛ toi. Nuŋtsɔ, ohiɛ aba nyam ekoŋŋ yɛ ogbɛi lɛ hewɔ.

¹⁸ Ao! MiNyɔŋmɔ, ofainɛ ni obo mi toi; wo ohiɛ nɔ koni okwɛ wɔmaŋfɔ̃i lɛ kɛ maŋ ni akɛ ogbɛi ewo lɛ lɛ. Ejaakɛ wɔbaaa ohiɛ kɛ wɔfaikpamɔ yɛ wɔjalɛ naa; shi moŋ wɔmiikpa bo fai yɛ omusuŋtsɔlɛ kpeteŋkple lɛ hewɔ.

¹⁹ Ao! Yehowa, bo wɔ toi koni ofee he eko ohã wɔ. Ao! MiNyɔŋmɔ, ofainɛ, kaatsɛ kwraa ni ofee he eko ohã wɔ yɛ ogbɛi lɛ hewɔ, ejaakɛ ogbɛi kpɛtɛ omaŋ lɛ kɛ omaŋbii lɛ ahe.”

Gabriel tsɔ̃ɔ gbalɛ lɛ shishi

²⁰ Be ni misɔleɔ, ni mijajeɔ mihe eshai lɛ kɛ mimaŋbii, Israelbii lɛ, hu ahe eshai lɛ, ni mikpaa Yehowa, miNyɔŋmɔ lɛ, fai yɛ gɔŋ krɔŋkrɔŋ lɛ hewɔ lɛ,

²¹ mihiɛ mli miisɔle lolo kɛkɛ lɛ naa bɔfo Gabriel, mɔ ni mina yɛ klɛŋklɛŋ ninaa lɛ mli lɛ ni efiliki kɛba mimasɛi trukaa. No mli lɛ eshɛ be mli ni ashãa gbɛkɛnaashi afɔle lɛ.

²² Ekɛɛ mi akɛ, “Daniel, miba koni mibatsɔ̃ɔ bo gbalɛ lɛ shishi.

²³ Be ni oje shishi ni obɔi Nyɔŋmɔ faikpamɔ lɛ, afã mi, ni no hewɔ miba koni mibatsɔ̃ɔ bo shishi nɛɛ, ejaakɛ Nyɔŋmɔ sumɔɔ bo naakpa. No hewɔ lɛ, jwɛŋmɔ wiemɔ lɛ he koni onu ninaa lɛ shishi.

²⁴ “Be ni Nyɔŋmɔ eto ni ekɛbaafo omaŋbii lɛ kɛ omaŋ krɔŋkrɔŋ lɛ eshai kɛ nifɔɔjianii ni afee lɛ sɛɛ lɛ ji afii nyɔŋmai kpawo toi kpawo; abaafo eshafeemɔ sɛɛ; abaakpãtã eshafeelɔ kɛ Nyɔŋmɔ teŋ; ni jalɛ saneyeli aaabaye nɔ kɛya naanɔ; abaawo ninaa kɛ gbalɛ fɛɛ obɔ̃; ni abaasaa ajɔɔ He Krɔŋkrɔŋ lɛ nɔ ekoŋŋ.

²⁵ Na ole, ni onu shishi, akɛ kɛjɛ beyinɔ ni afã akɛ ayatswa Yerusalɛm maŋ lɛ kɛyaashi beyinɔ ni hiɛnyiɛlɔ ni Nyɔŋmɔ ehala, ni efɔ lɛ mu lɛ aaashɛ shi lɛ, afii kpawo toi kpawo baaho. Abaasaa atswa Yerusalɛm maŋ lɛ, ni abaasaa emli gbɛjegbɛi lɛ, ni abaasaa atswa egbogboi lɛ. Ebaahi shi nɛkɛ kɛyashi afii nyɔŋmai ekpaa kɛ enyɔ toi kpawo; shi nɛkɛ be nɛɛ baafee fimɔ bei.

²⁶ Nɛkɛ be nɛɛ naagbee mli lɛ, abaagbe hiɛnyiɛlɔ ni Nyɔŋmɔ efɔ lɛ mu lɛ trukaa, ni enaŋ mɔ ko; ni lumɔ ni baa abaye nɔ lɛ webii lɛ baafite Yerusalɛm maŋ lɛ kɛ He Krɔŋkrɔŋ lɛ. Ta kɛ nibii ahiɛkpãtãmɔ baaba tamɔ nu afua yɛ be lɛ naagbee nɛɛ mli, tamɔ bɔ ni Nyɔŋmɔ ewo shi eto lɛ.

²⁷ Lumɔ nɛɛ kɛ mɛi babaoo baakpãŋ kɛyashi afii kpawo; shi afii etɛ̃ kɛ fã sɛɛ lɛ, lumɔ nɛɛ baagu shãa afɔle kɛ niyenii afɔle shãa kwraa. Abaafee amãgã ni buleɔ He Krɔŋkrɔŋ lɛ ama he ni yɔɔ grɔŋŋ fe fɛɛ yɛ Sɔlemɔ we lɛ mli; ni amãgã nɛɛ baama jɛi kɛyaashi beyinɔ ni Nyɔŋmɔ eto kɛbaagbala mɔ ni kɛ amãgã lɛ bama jɛi lɛ toi aaashɛ.”