Daniel 8 - ŊMALƐ KRƆŊKRƆŊ LƐ

Gwantɛŋ kɛ Abotia he ninaa

¹ Maŋtsɛ Belshazar yinɔ afi ni ji etɛ̃ lɛ nɔ lɛ, ajie ninaa ko ekoŋŋ atsɔ̃ɔ mi, Daniel, yɛ klɛŋklɛŋ ninaa lɛ sɛɛ.

² Mina yɛ ninaa nɛɛ mli akɛ miyɛ maŋtsɛmaŋ ni atsɛɔ lɛ Susa ni yɔɔ Elam kpokpai anɔ shikpɔŋ lɛ nɔ lɛ mli. Midamɔ Ulai Faa lɛ naa.

³ Be ni miwo mihiɛ nɔ lɛ, mina gwantɛŋ nuu agbo ko damɔ faa lɛ naa. Eyɛ aklontoi enyɔ; aklontoi nɛɛ kwɔlɔ naakpa, ni ekome kwɔ fe ekome; shi aklontoi lɛ ateŋ nɔ ni kwɔ lɛ no moŋ ji aklonto ni gwantɛŋ nuu lɛ je sɛɛkpee.

⁴ Mina akɛ gwantɛŋ nuu nɛɛ miishi kɛmiiya anaigbɛ kɛ kooyigbɛ kɛ wuoyigbɛ. Kooloo ko kooloo ko kwraa nyɛɛɛ ehiɛ edamɔ; mɔ ko hu nyɛɛɛ nɔ ko ashɔ̃ yɛ edɛŋ. No hewɔ lɛ, efee nɔ ni lɛ esumɔɔ, ni efee ehe agbo.

⁵ Miisusu ninaa nɛɛ he nɔŋŋ kɛkɛ lɛ naa too kpakpo ko epue kɛjɛ anaigbɛ kɛmiiba. Efo mli kɛ foi waa kɛtsɔ̃ shikpɔŋ tso muu lɛ fɛɛ nɔ, ni enane diɛŋtsɛ esaaa shikpɔŋ. Aklonto agbo kome ma too kpakpo nɛɛ hiŋmɛii ateŋ.

⁶ Etsɛ̃ kɛbanina gwantɛŋ nuu ni yɔɔ aklontoi enyɔ lɛ ni mina akɛ edamɔ faa lɛ naa lɛ. Kɛkɛ ni ekɛ ehewalɛ kɛ hiɛdɔɔ fɛɛ tua lɛ.

⁷ Be ni too kpakpo lɛ bɛŋkɛɔ gwantɛŋ nuu lɛ, emli ewo lɛ la naakpa. Eshi gwantɛŋ nuu lɛ, ni ekumɔ eklontoi enyɔ lɛ wɔtsɔwɔtsɔ. Gwantɛŋ lɛ nyɛɛɛ too kpakpo lɛ hiɛ adamɔ. Too kpakpo lɛ tsi gwantɛŋ nuu lɛ etswa shi, ni enaanaa enɔ. Mɔ ko kwraa bɛ hewalɛ ni ekɛaashɔ̃ gwantɛŋ nuu lɛ yɛ edɛŋ.

⁸ Kɛkɛ ni too kpakpo nɛɛ bɔ̃i ehenɔwomɔ, ejaakɛ esusu akɛ eje agbo. Shi be ni ehe kɛɛ ewaa kwraa lɛ, aku eklonto agbo lɛ. Kɛkɛ ni aklontoi ejwɛ krokomɛi je kpo faŋŋ yɛ aklonto agbo kome lɛ najiaŋ ni amɛmiikwɛ jeŋ koji ejwɛ lɛ fɛɛ.

⁹ Aklonto bibioo kome ko kwɛ̃ kɛjɛ aklontoi ejwɛ lɛ ateŋ ekome mli. Aklonto nɛɛ bada kpeteŋkple, ni ekpã emli kɛtee wuoyigbɛ kɛ bokãgbɛ kɛ shiwoo shikpɔŋ lɛ nɔ gbɛ fɛɛ.

¹⁰ Ebada aahu kɛyashɛ ŋulamiiaŋ, ni etserɛ ŋulamii lɛ ekomɛi etswia shikpɔŋ, ni enaanaa amɛnɔ.

¹¹ Ewo ehe nɔ aahu kɛyashɛ ŋwɛi asafo lɛ lumɔ lɛ tete nɔ; ni eshɔ̃ daa gbi afɔle ni ashãa lɛ yɛ edɛŋ, ni efite He Krɔŋkrɔŋ lɛ.

¹² Aŋɔ asafo lɛ ahã lɛ kɛ daa gbi afɔle ni ashãa lɛ hu; ni enɛ lɛ eji tɔ̃mɔ; ashɛ anɔkwale afɔ̃; ni nɔ fɛɛ nɔ ni aklonto lɛ fee lɛ shwere.

¹³ Kɛkɛ ni minu mɔ krɔŋkrɔŋ ko gbee miiwie, ni minu ni mɔ krɔŋkrɔŋ kroko hu bi mɔ krɔŋkrɔŋ ni wie lɛ akɛ, “Mɛɛ beyinɔ nɔŋŋ ninaa nɛɛ baakã he kɛyashi? Mɛɛ be mlatɔ̃mɔ nɛɛ baatsĩ daa gbi afɔleshãa krɔŋŋ lɛ naa kɛyashi? Ni mɛɛ be nɔŋŋ abaanaanaa ŋwɛi asafo lɛ nɔ, ni abaabule He Krɔŋkrɔŋ lɛ kɛyashi.”

¹⁴ Ejie naa, ni ekɛɛ akɛ, “Ebaaya nɔ kɛyashi gbii akpe kɛ oha kɛ nyɔŋmai enumɔ. Kɛkɛ lɛ abaatsuu He Krɔŋkrɔŋ lɛ he koni etsɔ̃ bɔ ni eyɔɔ sa lɛ.”

Bɔfo Gabriel tsɔ̃ɔ ninaa lɛ shishi

¹⁵ Be ni mi, Daniel, mina nɛkɛ ninaa nɛɛ, ni miitao eshishi male lɛ, mina mɔ ko tamɔ gbɔmɔ badamɔ mihiɛ.

¹⁶ Kɛkɛ ni minu gbɔmɔ gbee bo kɛjɛ Ulai Faa lɛ teŋgbɛ, ni ekɛɛ akɛ, “Gabriel ei! Tsɔ̃ɔmɔ mɔnɛ ninaa lɛ shishi.”

¹⁷ Gabriel tsi eba he ni midamɔ lɛ; shi gbeyei mɔ mi, ni mikɛ mihiɛ bu shi. Kɛkɛ ni Gabriel kɛɛ mi akɛ, “Ao! Gbɔmɔ Adesa bi, na ole akɛ je lɛ naagbee he ninaa nɛ.”

¹⁸ Ekɛ mi hiɛ wiemɔ lɛ nɔŋŋ kɛkɛ ni wɔ ni tsii banyɔ minɔ. Shi Gabriel ta mihe, ni ewo minɔ edamɔ shi,

¹⁹ ni ekɛɛ mi akɛ, “Naa, mibatsɔ̃ɔ bo nɔ ni baaba yɛ mlifu lɛ naagbee gbii lɛ amli. Je lɛ naagbee be ni ato lɛ he ninaa nɛ.

²⁰ “Gwantɛŋ nuu agbo ni ona kɛ eklontoi enyɔ lɛ damɔ shi hã Media kɛ Persia maŋtsɛmɛi lɛ.

²¹ Hela maŋtsɛyeli lɛ he okadi ji too kpakpo lɛ; ni aklonto wulu kome lɛ ni ma ehiŋmɛii ateŋ lɛ ji eklɛŋklɛŋ maŋtsɛ lɛ.

²² Bɔ ni aklonto kome nɛɛ kũ, ni aklontoi ejwɛ baye enajiaŋ lɛ, nakai Hela maŋtsɛyeli lɛ mli baagbala ejwɛ; shi amɛteŋ eko eko hewalɛ shɛŋ klɛŋklɛŋ maŋtsɛyeli lɛ hewalɛ lɛ.

²³ “Kɛji maŋtsɛyelii ejwɛ nɛɛ anaagbee be lɛ bɛŋkɛ, ni yiwalɛ saji ni amɛyeyee hewɔ lɛ esa akɛ agbala amɛtoi lɛ, maŋtsɛ hiɛwalɔ ko ni le ŋaa fɔŋ baate shi.

²⁴ Ebaana hewalɛ kpele; shi ehewalɛ lɛ jɛŋ lɛ diɛŋtsɛ emli. Ebaakpãtã nibii ahiɛ butuu, ni nɔ fɛɛ nɔ ni eeefee lɛ, ebaaye omanye yɛ mli. Ebaakpãtã hewalɔi kɛ Nyɔŋmɔ webii lɛ tete ahiɛ.

²⁵ Eŋaalee lɛ hewɔ lɛ, kɛtsɔ̃ enɔ lɛ lakamɔ baafa pii, ni ebaawo ehe nɔ. Ebaakpãtã mɛi babaoo ahiɛ, be mli ni amɛleee amɛhe be. Ebaate shi ewo jeŋ fɛɛ Lumɔi alumɔ lɛ; shi abaakpãtã ehiɛ, be mli ni adesa nine etako ehe tete.

²⁶ Naa, daa leebi kɛ gbɛkɛ afɔle ni ashãa lɛ he ninaa ni agbala mli atsɔ̃ɔ bo lɛ, anɔkwale ni. Shi bo lɛ okɛto onakutsoŋ, ejaakɛ be kplaŋŋ baaho aya dani sane nɛɛ baaba mli.”

²⁷ Sane nɛɛ hã, mi Daniel, mifee vii; ni mihe ye be saŋŋ; kɛkɛ ni mite shi, ni mitee miyatsa nitsumɔ ni maŋtsɛ kɛwo midɛŋ lɛ nɔ. Mihe jɔ̃ mihe yɛ ninaa nɛɛ hewɔ; ni minuuu shishi.