Daniel 7 - ŊMALƐ KRƆŊKRƆŊ LƐ

DANIEL GBA ENINAI ETSƆ̃Ɔ ( 7.1—12.13 ) Kooloi Ejwɛ ahe ninaa

¹ Babilon Maŋtsɛ Belshazar klɛŋklɛŋ afi lɛ nɔ lɛ, Daniel la lamɔ ko, ni ena ninaa ko be mli ni ekã shi ewɔ. Eŋma lamɔ lɛ efɔ̃ shi; ni lamɔ nɛɛ mli saji titrii ji enɛ.

² Daniel ŋma akɛ, “Mina yɛ mininaa lɛ mli akɛ nyɔɔŋ kɔɔyɔɔ efã kɛjɛ jeŋ koji ejwɛ lɛ fɛɛ, ni ehã ŋshɔ fee hamahama.

³ Kɛkɛ ni kooloi wuji ejwɛ ni soro amɛteŋ eko fɛɛ eko famɔ kpo kɛjɛ ŋshɔ lɛ mli.

⁴ Klɛŋklɛŋ kooloo lɛ tamɔ jata, shi eyɛ fiji tamɔ okropɔŋ fiji. Mihiɛ kooloo nɛɛ kwɛmɔ kɛkɛ ni akplɔ efiji lɛ yɛ ehe, ni awo enɔ, ni akɛ lɛ damɔ enaji enyɔ nɔ tamɔ gbɔmɔ damɔɔ shi. No sɛɛ lɛ, ahã lɛ gbɔmɔ jwɛŋmɔ.

⁵ Kooloo ni ji enyɔ lɛ tamɔ oshishibrishi. Awo lɛ adamɔ efã kome nɔ; ŋmawutsei etɛ̃ kɔ̃ enaa yɛ enyanyɔji ateŋ. Kɛkɛ ni gbee ko kɛɛ lɛ akɛ, “Yaa nɔ ni oye loo babaoo bɔ ni obaanyɛ.”

⁶ Enɛ sɛɛ lɛ mihiɛ kwɛmɔ kɛkɛ ni kooloo kroko ko hu fã kpo. Etamɔ kootsɛ; shi eyɛ fiji ejwɛ, ni etamɔ nɔ ko ni aŋɔ nɔyeli hewalɛ kpeteŋkple ahã lɛ.

⁷ Mihiɛ kwɛmɔ nɔŋŋ kɛkɛ ni kooloo ni ji ejwɛ lɛ fã kpo. Ehe yɛ gbeyei kɛ naakpɛɛ fɛɛ; eyɛ hewalɛ naakpa. Eyɛ dade nyanyɔji kpakpatakpakpataa, ni ekɛjwara eniyenii lɛ amli dukuduku ni eye; ni fufuji ni shwɛ lɛ ekɛ enaji naanaa nɔ. Esoro lɛ kwraa yɛ kooloi krokomɛi ni tsɔ̃ hiɛ ba lɛ ateŋ. Lɛ lɛ eyɛ aklontoi nyɔŋma.

⁸ Mihiɛ aklontoi lɛ kwɛmɔ kɛkɛ lɛ naa aklonto hee bibioo ko ekwɛ̃ kɛje kpo yɛ amɛteŋ. Aklonto bibioo nɛɛ fãmɔ aklontoi memeji lɛ ateŋ etɛ̃ kɛ amɛshishi fɛɛ eshwie. Aklonto nɛɛ yɛ hiŋmɛii tamɔ gbɔmɔ hiŋmɛii ni eyɛ naabu, ni ekɛmiiwie shwãa wiemɔi agboiagboi.

Mɔ ko ni yɛ kɛjɛ blema he ninaa

⁹ Mihiɛ ninaa lɛ kwɛmɔ aahu kɛyashi beyinɔ ni akɛ maŋtsɛ sɛii bamamɔ shi. Kɛkɛ ni mɔ ko ni onaa akɛ afɔ lɛ etsɛ naakpa baho eta shi. Etade yɛɔ futaa, ni eyiteŋ waŋ hu yɛɔ futaa. Emaŋtsɛ sɛi lɛ miitso kɛ la, ni sɛi lɛ naji ahe kokolonto lɛ hu miitso grigri.

¹⁰ La miiho yɛ ehiɛ tamɔ faa hoɔ. Gbɔmɛi akpeiakpei akpei abɔ sɔ̃mɔɔ gbɔmɔ nɛɛ, ni mɛi huuhaa abɔ hu damɔ ehiɛ. Kɛkɛ ni kojolɔi lɛ batara shi, ni agbele woji lɛ anaa, ni abɔi kojomɔ.

¹¹ Mitee nɔ mikwɛ ninaa lɛ, yɛ wiemɔi agboiagboi ni minuɔ aklonto bibioo lɛ wieɔ lɛ hewɔ. Mihiɛ kwɛmɔ aahu kɛyashi mina akɛ agbe kooloo ni ji ejwɛ lɛ, ni afite egbɔmɔtso lɛ, ni ashɛ lɛ afɔ̃ la lɛ mli koni eshã.

¹² Kooloi krokomɛi lɛ ni shwɛ lɛ, ashɔ̃ hewalɛ ni amɛyɔɔ lɛ yɛ amɛdɛŋ; shi akɛ amɛhe ke amɛ kɛyashi be kɛ ŋmɛlɛtswaa pɔtɛ̃ɛ ko.

¹³ Mina yɛ nyɔɔŋ ninaa lɛ mli nɔ ko ni tamɔ gbɔmɔ adesa. Ekpeleke shi kɛjɛ ŋwɛi ni atatu ebɔle ehe kɛba mɔ ni Etsɛ Naakpa lɛ ŋɔɔ, ni ebadamɔ ehiɛ.

¹⁴ Ahã lɛ nɔyeli kɛ anunyam kɛ maŋtsɛyeli hewalɛ koni majimaji kɛ asafoi srɔtoi kɛ wiemɔi srɔtoi ashikpɔji anɔ bii fɛɛ asɔ̃mɔ lɛ. Emaŋtsɛyeli lɛ naanɔ maŋtsɛyeli ni, ni esɛɛ efoŋ; ni mɔ ko mɔ ko nyɛŋ hiɛ akpãtã.

Ninai lɛ ashishitsɔ̃ɔmɔ

¹⁵ Ninai lɛ wo mihe gbeyei, ni mimumɔ hao yɛ mi, Daniel, mimli.

¹⁶ Mitsi mibɛŋkɛ mɛi ni damɔ jɛi lɛ ateŋ mɔ kome, ni mibi lɛ koni etsɔ̃ɔ mi ninaa lɛ shishi kɛ anɔkwale krɛdɛɛ ni yɔɔ mli lɛ; ni etsɔ̃ɔ mi nibii lɛ ashishi.

¹⁷ Ekɛɛ mi akɛ, “Nɛkɛ kooloi gbeyeigbeyei ejwɛ nɛɛ damɔ shi ha maŋtsɛmɛi ejwɛ komɛi ni baate shi yɛ shikpɔŋ lɛ nɔ wɔsɛɛ.

¹⁸ Shi Nyɔŋmɔ Ofe lɛ bii hetselɔi lɛ anine baashɛ maŋtsɛyeli lɛ nɔ, ni eeehi amɛdɛŋ kɛya naanɔi anaanɔ.”

¹⁹ Kɛkɛ ni mitao akɛ male kooloo ni ji ejwɛ lɛ, nɔ ni esoro lɛ kwraa yɛ kooloi krokomɛi lɛ ateŋ lɛ he sane. No he yɔɔ gbeyei naakpa kɛ enyanyɔji ni wa tamɔ dade kɛ ewaobii tamɔ akɔɔble ni ekɛjwara kooloi ni ena ebaaye lɛ amli dukuduku lɛ, ni fufuji ni shwɛ lɛ hu ekɛ enaji naanaa nɔ lɛ.

²⁰ Mitao hu akɛ male aklontoi nyɔŋma ni mamɔ kooloo lɛ yitso he lɛ ahe sane. Mitao hu akɛ male aklonto kome lɛ nɔ ni fã kpo, ni be ni eje kpo lɛ efãmɔ aklontoi lɛ ateŋ etɛ̃ kɛ amɛshishifãi fɛɛ eshwie lɛ hu he sane. Lɛ eyɔɔ hiŋmɛii, ni eyɛ naabu, ni ekɛwieɔ wiemɔi agboiagboi tamɔ nɔ ni efe aklontoi krokomɛi lɛ fɛɛ lɛ.

²¹ Mihiɛ kwɛmɔ nɔŋŋ kɛkɛ ni nɛkɛ aklonto nɛɛ fã ta ewo Nyɔŋmɔ webii krɔŋkrɔŋi lɛ, ni eye amɛnɔ kunim,

²² kɛyashi beyinɔ ni mɔ ni Etsɛ Naakpa lɛ ba, ni ebabu Ŋwɛi Flooflonyo lɛ mɛi krɔŋkrɔŋi lɛ bem. Kɛkɛ ni be bashɛ, ni aŋɔ nɔyeli hewalɛ awo mɛi krɔŋkrɔŋi lɛ adɛŋ.

²³ Mɔ ni kɛ mi wieɔ lɛ kɛɛ mi akɛ, “Kooloo ni ji ejwɛ lɛ damɔ shi hã maŋtsɛyeli ni ji ejwɛ ko ni baaba abaye nɔ yɛ shikpɔŋ lɛ nɔ. Ebaasoro lɛ yɛ maŋtsɛyeli krokomɛi lɛ fɛɛ ahe. Ebaafite shikpɔŋ tso muu lɛ fɛɛ, ni ebaanaanaa nɔ, ni ebaakpãtã hiɛ.

²⁴ Aklontoi nyɔŋma lɛ damɔ shi hã maŋtsɛmɛi nyɔŋma komɛi ni baate shi yɛ maŋtsɛyeli nɛɛ yinɔ. Amɛsɛɛ lɛ maŋtsɛ kome kroko hu ko baate shi. Ebasoro lɛ yɛ maŋtsɛmɛi ni tsɔ̃ hiɛ lɛ ahe, ni ebaaba maŋtsɛmɛi etɛ̃ komɛi ãshi.

²⁵ Maŋtsɛ nɛɛ baawie eshi Nyɔŋmɔ Ofe lɛ, ni ebaahã etɔ Ŋwɛi Flooflonyo lɛ mɛi krɔŋkrɔŋi lɛ jogbaŋŋ. Eeeto eyiŋ po akɛ eeetsake Ŋwɛi Flooflonyo lɛ mɛi krɔŋkrɔŋi lɛ ajamɔ mlai lɛ kɛ gbii juji ni amɛyeɔ lɛ fɛɛ, ni ebaaye amɛnɔ kɛyashi afii etɛ̃ kɛ fã.

²⁶ No sɛɛ lɛ, ŋwɛi kojolɔi aaatara shi akojo lɛ, ni abaashɔ̃ nɔyeli hewalɛ lɛ yɛ edɛŋ, ni aaakpãtã ehiɛ butubutu.

²⁷ Kɛkɛ lɛ abaatu shikpɔŋ tso muu lɛ fɛɛ nɔ maŋtsɛyeli hewalɛ lɛ kɛ egbojee lɛ fɛɛ awo Nyɔŋmɔ Ofe lɛ mɛi krɔŋkrɔŋi lɛ adɛŋ. Amɛmaŋtsɛyeli hewalɛ nɛɛ sɛɛ efoŋ, ni shikpɔŋ lɛ nɔ lumɛi fɛɛ baasɔ̃mɔ amɛ, ni amɛbaabo amɛ toi.”

²⁸ Sane lɛ naagbee nɛ. Sane nɛɛ gba, mi Daniel, minaa naakpa, ni ehã migbɔmɔtso tsake; shi mikɛ sane lɛ to minakutsoŋ.