Daniel 6 - ŊMALƐ KRƆŊKRƆŊ LƐ

Akɛ Daniel wo Jatai abu mli

¹ Esa Maŋtsɛ Dario hiɛ, ni eto amraloi oha kɛ nyɔŋmai enyɔ akɛ amɛkwɛ emaŋtsɛyeli muu lɛ fɛɛ nɔ.

² Eto maŋ onukpai nɔkwɛlɔi wuji etɛ̃ hu koni amraloi lɛ abu amɛ amɛnitsumɔi lɛ ahe akɔntaa, bɔ ni afee ni maŋtsɛ lɛ nɔ ko hiɛ akakpãtã. Onukpai etɛ̃ nɛɛ ateŋ mɔ kome ji Daniel.

³ Daniel mumɔ kɛ emɔdɛŋbɔɔ naa wa, ni ana akɛ ehe esa fe onukpai krokomɛi lɛ fɛɛ. No hewɔ lɛ, maŋtsɛ lɛ to eyiŋ akɛ ebaaŋɔ Daniel eto emaŋtsɛyeli muu lɛ fɛɛ nɔ.

⁴ Kɛkɛ ni onukpai nɔkwɛlɔi krokomɛi lɛ kɛ amraloi lɛ bɔ mɔdɛŋ akɛ amɛaana tɔ̃mɔ ko yɛ Daniel he lo, koni amɛkɛfolɔ enaa. Shi akɛni Daniel yeɔ anɔkwa hewɔ lɛ amɛnaaa sane ko loo tɔ̃mɔ ko yɛ ehe.

⁵ Kɛkɛ ni gbɔmɛi nɛɛ kɛɛkɛɛ amɛhe akɛ, “Wɔnaŋ sane ko sane ko wɔkɛshi nɛkɛ Daniel nɛɛ akɛ ja yɛ eNyɔŋmɔ lɛ jamɔ mla lɛ gbɛfaŋ kɛkɛ wɔɔna eko yɛ.”

⁶ No hewɔ lɛ, onukpai lɛ kɛ amraloi lɛ bua amɛhe naa kɛba maŋtsɛ lɛ ŋɔɔ, ni amɛbakɛɛ lɛ akɛ, “Maŋtsɛ Dario yi ana wala kɛya naanɔ!

⁷ Nii, wɔ, omaŋtsɛyeli lɛ mli onukpai nɔkwɛlɔi lɛ kɛ lumɛi lɛ kɛ akutseiatsɛmɛi lɛ kɛ amraloi lɛ kɛ ajinafoi lɛ, wɔtee ajina, ni wɔkpɛ mli akɛ Nii, awo akpɔ ko, ni akwɛ akɛ aye akpɔ nɛɛ nɔ pɛpɛɛpɛ. Akpɔ nɛɛ afee akɛ kɛyaashi gbii nyɔŋmai etɛ̃ lɛ, mɔ fɛɛ mɔ ni baashi bo, Nii, osɛɛ, ni esɔle ebi nyɔŋmɔ ko loo gbɔmɔ adesa ko dɛŋ nɔ ko lɛ, ashɛ nakai mɔ lɛ afɔ̃ jatai abu lɛ mli.

⁸ Agbɛnɛ, Maŋtsɛ, ofainɛ ni owo akpɔ nɛɛ, ni aŋmã awo woloŋ, ni osɔo naa koni etsɔ̃ tamɔ Mediabii kɛ Persiabii amla ni atsakeee hiɛ lɛ.”

⁹ Maŋtsɛ Dario hã aŋmã akpɔ lɛ awo woloŋ, ni esɔo naa.

¹⁰ Be ni Daniel na ele akɛ maŋtsɛ lɛ kɛ enine ewo akpɔ ni aŋmã lɛ shishi lɛ, eyiŋ etee ewe. Eŋwɛi pia lɛ he samfɛji lɛ kwɛɔ Yerusalɛm gbɛ kɛji agbele. Ekulaa shi esɔleɔ shii etɛ̃ daa gbi, ni edaa eNyɔŋmɔ lɛ shi. Gbi ko lɛ Daniel yasɔle nakai nɔŋŋ.

¹¹ Daniel henyɛlɔi lɛ bua amɛhe naa kɛba, ni amɛbanina Daniel ni eesɔle eekpa eNyɔŋmɔ lɛ fai.

¹² Kɛkɛ ni gbɔmɛi nɛɛ bua amɛhe naa kɛtee maŋtsɛ lɛ ŋɔɔ, ni amɛyakɛɛ lɛ akɛ, “Nii, bɛ owo akpɔ ko akɛ kɛyaashi biɛ gbii nyɔŋmai etɛ̃ lɛ, mɔ fɛɛ mɔ ni baashi bo osɛɛ, ni eeebi nyɔŋmɔ ko loo gbɔmɔ adesa ko nii lɛ ashɛ nakai gbɔmɔ lɛ afɔ̃ jatai abu lɛ mli?” Maŋtsɛ lɛ to he akɛ, “Nakai ni. Mediabii kɛ Persiabii amla ni, ni atsakeee hiɛ kɔkɔɔkɔ.”

¹³ Amɛhere nɔ, ni amɛkɛɛ maŋtsɛ lɛ akɛ, “Naa, Daniel, Yuda nomii lɛ ateŋ mɔ kome lɛ, ebuuu bo, Nii, kɛ akpɔ ni owo lɛ fɛɛ; ni no hewɔ lɛ, esɔleɔ shii etɛ̃ daa gbi.”

¹⁴ Edɔ maŋtsɛ lɛ naakpa be ni enu sane nɛɛ, ni esusu he bɔ ni eeefee ehere Daniel yiwala. Esusu sane lɛ he aahu kɛyashi hulushinyɔɔ mli.

¹⁵ Kɛkɛ ni gbɔmɛi lɛ bua amɛhe naa kɛbanina maŋtsɛ lɛ, ni amɛbakɛɛ lɛ akɛ, “Nii, na ole akɛ yɛ Mediabii kɛ Persiabii amla naa lɛ akpɔ loo kitã ni maŋtsɛ ena ewo lɛ atsakeee.”

¹⁶ No hewɔ lɛ, maŋtsɛ lɛ fã, ni atee ayaŋɔ Daniel kɛba, ni ashɛ lɛ afɔ̃ jatai abu lɛ mli. Maŋtsɛ lɛ kɛɛ Daniel akɛ, “ONyɔŋmɔ lɛ ni osɔmɔɔ anɔkwale mli lɛ; lɛ eeejie bo.”

¹⁷ Ayawo tɛ kɛba, ni akɛbatsi jatai abu lɛ naa. Kɛkɛ ni maŋtsɛ lɛ kɛ lɛ diɛŋtsɛ ewolonaasɔomɔ ga lɛ sɔo tɛ lɛ naa; elumɛi lɛ hu sɔosɔoo bu lɛ naa kɛ amɛwolonaasɔomɔ gai lɛ koni akatsake yiŋ ni ato yɛ Daniel he lɛ.

¹⁸ Maŋtsɛ lɛ ku esɛɛ kɛtee emaŋtsɛ we lɛ mli. Ehi ŋmãa nyɔɔŋ lɛ mli fɛɛ, ni ehãaa akɛ hiɛtserɛjiemɔ nɔ ko abɛŋkɛ lɛ. Wɔ tserɛ kwrakwra yɛ ehiŋmɛiaŋ.

¹⁹ Be ni hiɛ bɔ̃i gbelemɔ lɛ, maŋtsɛ lɛ te shi mra, ni ehe fee oya kɛtee jatai abu lɛ naa.

²⁰ Be ni ebɛŋkɛ bu lɛ naa he ni Daniel yɔɔ lɛ, ewo egbee nɔ, ni ekɛ awerɛho gbee bo ekɛɛ akɛ, “Ao! Daniel, Nyɔŋmɔ hiɛkãalɔ lɛ tsulɔ, ani oNyɔŋmɔ lɛ ni osɔ̃mɔɔ lɛ daa lɛ enyɛ ejie bo yɛ jatai lɛ adɛŋ lo?”

²¹ Daniel here maŋtsɛ lɛ nɔ, ni ekɛɛ lɛ akɛ, “Ao! Nii, oyi ana wala kɛya naanɔ!

²² MiNyɔŋmɔ lɛ etsu ebɔfo lɛ kɛba, ni ebaŋamɔ jatai lɛ anaabu, ni no hewɔ lɛ, amɛyeko mi awui ko, ejaakɛ yɛ lɛ ehiɛ lɛ miyeɔ bem, ni bo Nii hu, mitɔ̃ko onɔ.”

²³ Maŋtsɛ lɛ mii shɛ ehe naakpa, ni efã akɛ ajie Daniel yɛ bu lɛ mli. Ajie Daniel yɛ bu lɛ mli ni apilako ehe ko he ko, ejaakɛ ekɛ ehiɛ fɔ̃ eNyɔŋmɔ lɛ nɔ.

²⁴ Kɛkɛ ni maŋtsɛ lɛ fã, ni ayamɔmɔ mɛi ni yafolɔ Daniel naa hã maŋtsɛ lɛ kɛba, ni ashɛrɛ amɛ ashwie jatai abu lɛ mli, amɛ kɛ amɛbii kɛ amɛŋamɛi fɛɛ. Gbɔmɛi nɛɛ shɛɛɛ bu lɛ shishi tete ni jatai lɛ mɔmɔ amɛ ni amɛjwara amɛwui amli.

²⁵ Enɛ sɛɛ lɛ Maŋtsɛ Dario ŋmã wolo ekɛmaje majimaji kɛ asafoi kɛ je lɛ mli wiemɔi srɔtoi ashikpɔji anɔ bii fɛɛ akɛ, “Nyɛhea omanye!

²⁶ Miiwo kitã akɛ mɔ fɛɛ mɔ ni yɔɔ minɔyeli nɛɛ he fɛɛ he lɛ, ehe akpokpo, ni eshe Daniel Nyɔŋmɔ lɛ gbeyei.” “Lɛ ji Nyɔŋmɔ hiɛkãalɔ lɛ, mɔ ni yɛ kɛmiiya naanɔ lɛ; anyɛŋ emaŋtsɛyeli hiɛ akpãtã, ni ehewalɛ lɛ sɛɛ efoŋ.

²⁷ Jielɔ kɛ herelɔ ji lɛ; etoɔ okadii, ni efeɔ naakpɛɛ nii yɛ ŋwɛi kɛ shikpɔŋ lɛ nɔ. Ehere Daniel yɛ jatai lɛ adɛŋ.”

²⁸ Daniel nɛɛ shwere yɛ Maŋtsɛ Dario yinɔ kɛ Maŋtsɛ Koresh, Persianyo lɛ, hu yinɔ.