Daniel 5 - ŊMALƐ KRƆŊKRƆŊ LƐ

Maŋtsɛ Belshazar tsɛ okplɔ̃

¹ Gbi ko lɛ Maŋtsɛ Belshazar tsɛ enukpai lɛ ateŋ mɛi akpe okplɔ̃ kpeteŋkple ko, ni ekɛ amɛ fɛɛ nu dãa kutuu.

² Be mli ni anuɔ dãa lɛ, Belshazar fã akɛ ayahole shika kɛ jwiɛtɛi kpuji lɛ ni etsɛ Maŋtsɛ Nebukadnezar yaloo yɛ Yerusalɛm Sɔlemɔ we lɛ kɛba, koni lɛ, maŋtsɛ lɛ, kɛ enukpai lɛ kɛ eŋãmɛi lɛ kɛ ehemɛi lɛ kɛnu dãa.

³ Kɛkɛ ni ayahole shika kpuji lɛ kɛ jwiɛtɛi kpuji lɛ ni ayaloo yɛ Yerusalɛm Sɔlemɔ we, ni ji Nyɔŋmɔ We lɛ mli lɛ kɛba. Ni maŋtsɛ lɛ kɛ enukpai lɛ kɛ eŋãmɛi lɛ kɛ ehemɛi lɛ fɛɛ kɛnu dãa,

⁴ Be ni amɛnuɔ dãa lɛ, amɛkafo nyɔŋmɔi ni akɛ shika kɛ jwiɛtɛi kɛ akɔɔble kɛ dade kɛ tso kɛ tɛ efee lɛ fɛɛ.

⁵ Be ni amɛta niyeniiashi lɛ, trukaa lɛ gbɔmɔ nine je kpo, ni ebaŋma nii yɛ asa lɛ gbogbo lɛ he, he ni akɛ kaaloo esha lɛ, yɛ kanetso ni ma shi lɛ ŋlɛnɔ. Maŋtsɛ Belshazar miikwɛ nine lɛ be ni eŋmãa nii lɛ.

⁶ Maŋtsɛ lɛ hiɛ tsake amrɔ, ni etsui fã, ni eshe gbeyei bɔ sɔŋŋ ni etalɔiaŋ jɔ biɛɛ, ni enakutsei kpokpo.

⁷ Maŋtsɛ lɛ bo waa akɛ ayaŋɔ ashwãifeelɔi lɛ kɛ klalɔi lɛ kɛ ŋulamiiaŋkwɛlɔi lɛ abahã lɛ. Be ni Babilon nilelɔi nɛɛ ba lɛ, maŋtsɛ lɛ kɛɛ amɛ akɛ, “Mɔ ni baanyɛ gbogbo nɛɛ he niŋmaa nɛɛ ekane, ni asaŋ etsɔ̃ɔ mi eshishi lɛ, abaawula lɛ kɛ lumɔ atade afaseo kɛ shika kɔsɔŋkɔsɔ kuɛnii. Ebaatsɔ̃ nɔyelɔ ni ji etɛ̃ yɛ mimaŋtsɛyeli lɛ mli.”

⁸ Kɛkɛ ni maŋtsɛ lɛ nilelɔi lɛ fɛɛ ka niŋmaa lɛ kanemɔ kɛ eshishitsɔ̃ɔmɔ, shi amɛteŋ mɔ ko mɔ ko kwraa nyɛɛɛ.

⁹ Sane lɛ hao Maŋtsɛ Belshazar naakpa, ni ehã ehiɛ tsake. Ehe onukpai lɛ hu fee yaa.

¹⁰ Wiemɔ ni maŋtsɛ lɛ kɛ enukpai lɛ wieɔ yɛ asa lɛ nɔ lɛ hã jɛi fee hoo. Enɛ hã maŋnyɛ lɛ ba okplɔŋmɛɛ asa lɛ nɔ. Kɛkɛ ni maŋnyɛ lɛ wo enaa nɔ, ni ekɛɛ akɛ, “Nii, oyi ana wala kɛya naanɔ! Kaahao, ni kaahã nɔ ko miigba onaa.

¹¹ Nuu ko yɛ omaŋtsɛyeli nɛɛ mli ni nyɔŋmɔi krɔŋkrɔŋi lɛ amumɔ yɔɔ emli. Otsɛ yinɔ lɛ gbɔmɔ nɛɛ jie hiɛshikãmɔ kɛ nilee kɛ jwɛŋmɔ kpo tamɔ nyɔŋmɔi lɛ anilee yɔɔ lɛ. No hewɔ lɛ, otsɛ, Maŋtsɛ Nebukadnezar, wo lɛ woloŋlelɔi kɛ klamɔfoi kɛ ashwãifeelɔi kɛ ŋulamiiaŋkwɛlɔi fɛɛ anukpa.

¹² Enilee lɛ naa wa jogbaŋŋ. Ehiɛ kã shi, ni ele nii bɔ ni enyɛɔ lamɔi kɛ ajenui kɛ teemɔŋ saji fɛɛ ashishi etsɔ̃ɔ. No hewɔ lɛ, hã ayaŋɔ nuu nɛɛ ni egbɛi ji Daniel, ni otsɛ wo lɛ Belteshazar lɛ, kɛba. Ebaanyɛ etsɔ̃ɔ bo niŋmaa lɛ shishi.”

Daniel tsɔ̃ɔ Niŋmaa lɛ shishi

¹³ Ayaŋɔ Daniel oya abahã maŋtsɛ lɛ, ni maŋtsɛ lɛ kɛɛ lɛ akɛ, “Ani bo ji Daniel lɛ, Yudabii nomii ni mitsɛ yaŋɔ kɛjɛ Yuda shikpɔŋ lɛ nɔ kɛba lɛ ateŋ mɔ kome lɛ?

¹⁴ Minu ohe akɛ nyɔŋmɔi krɔŋkrɔŋi lɛ amumɔ ni yɔɔ omli lɛ naa wa naakpa; anaa akɛ ohiɛ kã shi, ni ole nii, ni oyɛ jwɛŋmɔ hu pam.

¹⁵ Mikpee nilelɔi kɛ ashwãifeelɔi nɛɛ kɛba biɛ koni amɛbakane nɛkɛ niŋmaa nɛɛ ni amɛtsɔ̃ɔ mi eshishi; shi amɛnyɛɛɛ niŋmaa lɛ shishi amɛtsɔ̃ɔ.

¹⁶ Minu ohe akɛ onyɛɔ onaa teemɔŋ nibii, ni otsɔ̃ɔ shishi. Kɛji ooonyɛ niŋmaa nɛɛ okane koni otsɔ̃ɔ mi eshishi lɛ, abaawula bo kɛ lumɔ atade afaseo kɛ shika kɔsɔŋkɔsɔ kuɛnii, ni obaatsɔ nɔyelɔ ni ji etɛ̃ yɛ maŋtsɛyeli lɛ mli.”

¹⁷ Daniel here maŋtsɛ lɛ nɔ ekɛɛ, “Nii, nikeenii lɛ ahi shi koni okɛhã mɔ kroko. Shi kɛ̃lɛ mibakane niŋmaa lɛ matsɔ̃ɔ Nii, koni matsɔ̃ɔ Nii eshishi hu.

¹⁸ “Maŋtsɛ, Nyɔŋmɔ mɔ ni yɔɔ ŋwɛi shɔŋŋ lɛ hã otsɛ Nebukadnezar tsɔ̃ maŋtsɛ wulu ni yɔɔ hewalɛ kɛ agbojee kɛ anunyam kpeteŋkple;

¹⁹ ni agbojee ni aduro lɛ naa hewɔ lɛ shikpɔji kɛ asafoi kɛ wiemɔi srɔtoi anɔ bii bluublu sheɔ lɛ gbeyei, ni mɛi ahe kpokpoɔ yɛ ehiɛ. Mɔ ni esumɔɔ akɛ egbe lɛ lɛ, egbeɔ lɛ, ni mɔ ni esumɔɔ akɛ ehi wala mli lɛ, ehãa ehiɔ wala mli. Mɔ ni esumɔɔ akɛ ewo enɔ lɛ, ewoɔ enɔ; ni mɔ hu ni esumɔɔ akɛ eba lɛ shi lɛ, ebaa lɛ shi.

²⁰ Shi be ni ewo ehe nɔ, ni ekpliŋ etsui, ni etsɛ ehe lɛ, akpa lɛ yɛ emaŋtsɛ sɛ̃i lɛ nɔ, ni enunyam lɛ bɔ lɛ.

²¹ Ashwie lɛ kɛje adesai ateŋ; ejwɛŋmɔ tsɔ̃ tamɔ kooloo jwɛŋmɔ, ni eyahi ŋaŋ tejii ateŋ, ni ekpe jwɛi tamɔ tsina. Ŋwɛi bɔ nyɔ egbɔmɔtso nɔ aahu kɛyashi beyinɔ ni eyoo akɛ Nyɔŋmɔ ni yɔɔ ŋwɛi shɔŋŋ lɛ, eyɛ hewalɛ yɛ maŋtsɛyeli nɔ, ni mɔ ni esumɔɔ lɛ, lɛ maŋtsɛ ewoɔ.

²² “Bo Belshazar, Maŋtsɛ Nebukadnezar bi lɛ, ole sane nɛɛ fɛɛ, shi fɛɛ sɛɛ lɛ obaaa ohe shi;

²³ shi moŋ owo ohe nɔ yɛ Nuŋtsɔ ni yɔɔ ŋwɛi lɛ hiɛ. Otee oyaloo kpuji kɛ okpolui ni yɔɔ ewe lɛ kɛba, ni bo kɛ onukpai lɛ kɛ oŋamɛi lɛ kɛ ohemɛi lɛ kɛbanu dãa. Enɛ sɛɛ hu lɛ nyɛjie wɔji srɔtoi ni akɛ shika kɛ jwiɛtɛi kɛ akɔɔble kɛ dade kɛ tso kɛ tɛ efee lɛ ayi, nibii ni amɛnãaa nii, ni amɛnuuu nii, ni amɛleee nɔ ko nɔ ko lɛ yi. Shi Nyɔŋmɔ lɛ, ni lɛ edɛŋ owala kɛ oyaakɛbaa fɛɛ yɔɔ lɛ, ojieee lɛ moŋ eyi.

²⁴ No hewɔ ni Nyɔŋmɔ etsu nine nɛɛ, ni ebaŋma nɛkɛ nii nɛɛ lɛ.

²⁵ “Ni nii ni aŋma lɛ nɛ, ‘MENE, MENE, TEKEL, PARSIN.’ Niŋmaa lɛ shishi ji akɛ, ‘Akane, akane, aŋmɛ akwɛ, ni aja mli’.

²⁶ Wiemɔi lɛ ashishitsɔ̃ɔmɔ diɛŋtsɛ nɛ: ‘Akane,’ lɛ miitsɔ̃ɔ akɛ, Nyɔŋmɔ ekane omaŋtsɛyeli gbii lɛ; oye omle otã.

²⁷ ‘Aŋmɛ akwɛ’ lɛ miitsɔ̃ɔ akɛ aŋmɛ bo yɛ nsɛni mli akwɛ, ni ana akɛ otsiimɔ shɛɛɛ nɔ ko;

²⁸ ni ‘aja mli’ lɛ miitsɔ̃ɔ akɛ aja omaŋtsɛyeli lɛ mli, ni akɛhã Medianbii lɛ kɛ Persiabii lɛ.”

²⁹ Maŋtsɛ Belshazar fã amrɔ lɛ nɔŋŋ, akɛ awula Daniel kɛ lumɔ atade afaseo, kɛ shika kɔsɔŋkɔsɔ kuɛnii hu; asaŋ ashiɛ akɛ Daniel ji nɔyelɔ ni ji etɛ̃ yɛ maŋtsɛyeli lɛ mli.

³⁰ Shi nakai nyɔɔŋ lɛ mli nɔŋŋ lɛ agbe Babilon Maŋtsɛ Belshazar;

³¹ ni Dario, Medianyo lɛ, ŋɔ maŋtsɛyeli lɛ. Nakai be mli lɛ Dario eye afii nyɔŋmai ekpaa kɛ enyɔ.