Daniel 4 - ŊMALƐ KRƆŊKRƆŊ LƐ

Nebukadnezar lamɔ ni ji enyɔ lɛ

¹ Maŋtsɛ Nebukadnezar ŋma eyahã mɛi fɛɛ ni yɔɔ majimaji kɛ jakui fɛɛ ni yɔɔ shikpɔŋ muu lɛ fɛɛ nɔ, yɛ amɛwiemɔi amli akɛ, “Nyɛhea omanye!

² Esa mihiɛ akɛ okadii kɛ naakpɛɛ nibii ni Nyɔŋmɔ, ŋwɛi flooflonyo lɛ, efee yɛ mihe lɛ magba nyɛ.

³ “Kwɛ bɔ ni okadii ni Nyɔŋmɔ jieɔ etsɔ̃ɔ wɔ lɛ tsiitsii hã. Kwɛ bɔ ni enifeemɔ nii yɔɔ naakpɛɛ naakpa. Emaŋtsɛyeli lɛ, naanɔ maŋtsɛyeli ni, ni ejɛɔ yinɔ kɛyaa yinɔ!

⁴ “Mi, Nebukadnezar, miyɛ hejɔlɛ yɛ mishĩa lɛ mli, ni miishwere yɛ mimɔ̃ɔ lɛ mli hu.

⁵ Shi mila lamɔ ko ni wo mihe gbeyei, ejaakɛ nibii ni mina yɛ lamɔ lɛ mli, be mli ni mikã shi miwɔ lɛ, yɛ gbeyei.

⁶ No hewɔ lɛ, mifã akɛ atsɛ nilelɔi ni yɔɔ Babilon shikpɔŋ lɛ nɔ lɛ fɛɛ kɛba mihiɛ, koni amɛbatsɔ̃ɔ mi lamɔ lɛ shishi.

⁷ Kɛkɛ ni klamɔfoi lɛ kɛ ashwãifeelɔi lɛ kɛ ŋulamiiaŋkwɛlɔi lɛ bashɛ mihiɛ. Migba amɛ lamɔ lɛ, shi amɛnyɛɛɛ mi lamɔ lɛ shishi amɛtsɔ̃ɔ.

⁸ Be ni yi yaawula shi lɛ, Daniel, mɔ ni atsɛɔ lɛ Belteshazar tamɔ bɔ ni atsɛɔ minyɔŋmɔ lɛ, mɔ ni nyɔŋmɔi krɔŋkrɔŋi lɛ amumɔ yɔɔ emli lɛ ba mihiɛ, ni migba lɛ lamɔ ni mila lɛ. Mikɛɛ lɛ akɛ,

⁹ ‘Belteshazar, klalɔi fɛɛ atsɛ, mile akɛ nyɔŋmɔi krɔŋkrɔŋi lɛ amumɔ yɛ omli, ni teemɔŋ sane ko teemɔŋ sane ko waaa hãaa bo; lamɔ ni mila lɛ nɛ; tsɔ̃ɔmɔ mi eshishi.’

¹⁰ “Nɔ ni mina yɛ ninaa lɛ mli, yɛ wɔ lɛ mli, ji tso kpeteŋkple ko ni ma je lɛ teŋ. Tso nɛɛ kwɔ naakpa.

¹¹ Tso lɛ wo dalɛ nɔ, ni ekwɔ kɛtee kɛyashɛ ŋwɛi bɔ ni anaa lɛ yɛ je lɛ mli he fɛɛ he.

¹² Eyi bai yɛ fɛo, ni ewo yibii babaoo, ni mɛi fɛɛ naa eko amɛyeɔ. Ŋaŋ kooloi yabumɔɔ ehɔ̃ɔŋ lɛ mli, ni loofɔji hiɔ eniji lɛ anɔ; ni no gbɔmɛi adesai fɛɛ yeɔ.

¹³ “Mina yɛ ninaa lɛ mli ni bɔfo saralɔ krɔŋkrɔŋ ko jɛ ŋwɛi kpeleke shi.

¹⁴ Ebo waa, ni ekɛɛ akɛ, ‘Nyɛtoa tso lɛ nyɛfɔ̃a shi, ni nyɛfolɔa eniji lɛ; nyɛkpaa eyi bai lɛ nyɛshwiea shi, ni nyɛgbɛa eyibii lɛ nyɛshwãa koni ŋaŋ kooloi lɛ ajo foi yɛ shishi aya, ni loofɔji lɛ hu aje eniji lɛ anɔ aya.

¹⁵ Shi ashi etsoku kɛ eshishifãi lɛ yɛ su lɛ mli; akɛ dade kɛ akɔɔble kɔsɔŋkɔsɔ afi tsoku lɛ yɛ ŋa nɔ jwɛi fɔ lɛ mli. Ŋwɛi bɔ anyɔ enɔ; egbɛfaŋnɔ ayaje ŋaŋ kooloi ateŋ yɛ jwɛiaŋ koni ekɛ amɛ ahi shi.

¹⁶ Ebaaye afii kpawo, ni abaatsake egbɔmɔ adesa jwɛŋmɔ ni yɔɔ emli lɛ, ni abaahã lɛ kooloo jwɛŋmɔ.

¹⁷ Nɛkɛ ji bɔ ni ŋwɛi saralɔi lɛ ekpɛ mli ehã, ni mɛi krɔŋkrɔŋi lɛ hu kɛ amɛ kpãa gbee nakai nɔŋŋ, koni adesai fɛɛ kɛna amɛle akɛ mɔ ni yɔɔ ŋwɛi shɔŋŋ lɛ, eyɛ hewalɛ yɛ gbɔmɔ adesa nɔyeli fɛɛ nɔyeli nɔ, asaŋ akɛ eŋɔɔ hewalɛ ehãa mɔ ni lɛ esumɔɔ, ni ekɛ gbɔmɛi amliwoo tete po taa maŋtsɛ sɛi nɔ.’

¹⁸ “Lamɔ ni mi, Nebukadnezar mila nɛ; agbɛnɛ, Belteshazar, tsɔ̃ɔmɔ mi shishi, ejaakɛ mimaŋtsɛyeli nɛɛ mli nilelɔi fɛɛ nyɛɛɛ eshishi amɛtsɔ̃ɔ mi, shi bo lɛ obaanyɛ, ejaakɛ nyɔŋmɔi krɔŋkrɔŋi lɛ amumɔ yɛ omli.”

Daniel tsɔ̃ɔ lamɔ lɛ shishi

¹⁹ Daniel ni atsɛɔ lɛ Belteshazar hu lɛ he jɔ̃ ehe be kplaŋŋ, ni ehao. Maŋtsɛ lɛ kɛɛ lɛ akɛ, “Belteshazar, kaahã lamɔ lɛ loo eshishitsɔ̃ɔmɔ lɛ miihao bo.” Belteshazar here nɔ, ni ekɛɛ akɛ, “Minuŋtsɔ, mina ni kulɛ lamɔ nɛɛ kɛ eshishitsɔ̃ɔmɔ lɛ kɔɔ ohenyɛlɔi ahe, shi jeee bo.

²⁰ Tso lɛ ni ona ni eda mlɛmlɛ, ni ekwɔ kɛyashɛ ŋwɛi lɛ, anaa lɛ yɛ je lɛ mli hei fɛɛ.

²¹ Eyi baa yɛ fɛo, ni ewo yibii babaoo, ni mɛi naa eko amɛyeɔ, ni ŋaŋ kooloi yabumɔɔ ehɔ̃ɔŋ lɛ mli, ni loofɔji hiɔ eniji lɛ anɔ.

²² “Nii, bo ji nakai tso lɛ. Bo lɛ oda, ni ohe wa. Oda aahu kɛyashɛ ŋwɛi, ni ohewalɛ miiye je lɛ fɛɛ nɔ.

²³ Maŋtsɛ, ookwɛ ninaa lɛ kɛkɛ ni bɔfo saralɔ krɔŋkrɔŋ ko jɛ ŋwɛi kpeleke shi. Ekɛɛ bo akɛ, ‘Nyɛtoa tso lɛ koni afite lɛ! Shi ashi eshishifã kɛ etsoku yɛ su lɛ mli. Akɛ dade kɛ akɔɔble kɔsɔŋkɔsɔ afi tsoku lɛ, ni ashi lɛ yɛ ŋa nɔ jwɛfɔ mli koni bɔ anyɔ enɔ, ni ehi ŋaŋ kooloi ateŋ yɛ jwɛiiaŋ kɛyashi afii kpawo.’

²⁴ “Nii, ninaa lɛ shishi nɛ; ni no ji yiŋ ni mɔ ni yɔɔ ŋwɛi shɔŋŋ lɛ eto yɛ minuŋtsɔ maŋtsɛ he.

²⁵ Abaashwie bo kɛjɛ gbɔmɛi ateŋ, ni obaaya oyahi ŋaŋ kooloi ateŋ, ni obaakpe jwɛi tamɔ tsina. Ŋwɛi bɔ baanyɔ onɔ yɛ jwɛiaŋ, afii kpawo, kɛyaashi beyinɔ ni oooyoo akɛ Nyɔŋmɔ, Ŋwɛi Flooflonyo lɛ, yɛ hewalɛ yɛ adesa maŋtsɛyeli fɛɛ maŋtsɛyeli nɔ; asaŋ mɔ fɛɛ mɔ ni lɛ esumɔɔ lɛ, lɛ ekɛ maŋtsɛyeli hãa.

²⁶ Akɛ bɔfo saralɔ lɛ fã akɛ ashi tsoku kɛ eshishifã lɛ yɛ su lɛ mli lɛ, no tsɔ̃ɔ akɛ obaaku sɛɛ obaye omaŋtsɛ lɛ ekoŋŋ, kɛji ona oyoo akɛ Nyɔŋmɔ ji mɔ ni yeɔ je lɛ fɛɛ nɔ lɛ.

²⁷ No hewɔ lɛ, Maŋtsɛ, mɔ ŋaa ni mawo bo nɛɛ mli. Kpa eshafeemɔ koni ofee nɔ ni ja. Naa ohiafoi amɔbɔ akɛ aleenɔ no aaahã ohe ajɔ bo lo.”

²⁸ Enɛ fɛɛ ná ba Maŋtsɛ Nebukadnezar nɔ.

²⁹ Lamɔ nɛɛ sɛɛ nyɔji nyɔŋma kɛ enyɔ, be ni Nebukadnezar miishara shi yɛ Babilon maŋtsɛwe lɛ yiteŋ lɛ

³⁰ ekɛɛ akɛ, “Kwɛ Babilon maŋ nɛɛ dalɛ. Mikɛ mihewalɛ tswa lɛ ma shi akɛ maŋtsɛmaŋ; ni eeye mihewalɛ lɛ kɛ agbojee he odase.”

³¹ Maŋtsɛ lɛ naa enyɔ̃ɔɔ shi, ni gbee ko gbɛɛ kɛjɛ ŋwɛi, ni ekɛɛ akɛ, “Maŋtsɛ Nebukadnezar, bo nɔ ni mikɛɔ bo nɛɛ toi! Ashɔ̃ maŋtsɛyeli lɛ yɛ odɛ̃ŋ;

³² asaŋ aaashwie bo kɛje gbɔmɛi ateŋ kɛya ŋaŋ kooloi ateŋ koni okɛ amɛ ayahi shi. Obaakpe jwɛi tamɔ tsina afii kpaw, ni ooona oyoo akɛ Nyɔŋmɔ, Ŋwɛi Flooflonyo lɛ, yɛ hewalɛ yɛ gbɔmɛi amaŋtsɛyeli fɛɛ maŋtsɛyeli nɔ, asaŋ akɛ mɔ fɛɛ mɔ ni lɛ esumɔɔ lɛ lɛ ekɛ maŋtsɛyeli hãa.”

³³ Nɔ ni gbee lɛ wie lɛ ba mli yɛ Maŋtsɛ Nebukadnezar nɔ amrɔ lɛ nɔŋŋ. Ashwie lɛ kɛje gbɔmɛi ateŋ, ni ekpe jwɛi tamɔ tsina. Ŋwɛi bɔ nyɔ egbɔmɔtso nɔ kɛyashi beyinɔ ni eyi tsɔi tsa kusuu tamɔ okropɔŋ tsɛji, ni ewaobii anaa tsa oookɛɛ loofɔlɔ waobii anaa.

Nebukadnezar kafo Nyɔŋmɔ

³⁴ Maŋtsɛ Nebukadnezar he sane wolo lɛ tee nɔ ekɛɛ akɛ, “Afii kpawo sɛɛ lɛ, mi, Nebukadnezar, miwo mihiɛ nɔ mikwɛ ŋwɛi kɛ heshwamɔ. Kɛkɛ ni mijwɛŋmɔ ku sɛɛ eba mimli ekoŋŋ, ni mihiɛ tserɛ mi. Kɛkɛ ni mikafo Nyɔŋmɔ, Ŋwɛi Flooflonyo lɛ, ni miwo mɔ ni yɔɔ kɛyaashi naanɔ lɛ hiɛ nyam; ejaakɛ, Lɛ ebaaye nɔ kɛya naanɔ fɛɛ, ni emaŋtsɛyeli lɛ sɛɛ efoŋ.

³⁵ Shikpɔŋ lɛ nɔ gbɔmɛi jeee fɛifɛi yɛ ehiɛ, ŋwɛi bɔfoi kɛ adesai fɛɛ yɛ eshishi. Mɔ ko nyɛŋ enine etswa efɔ̃, loo eeebi lɛ akɛ, ‘Mɛni ofeɔ nɛɛ?’

³⁶ “Be ni mihiɛ etserɛ mi sɛɛ lɛ, woo ni awoɔ mi kɛ migbojee kɛ mimaŋtsɛyeli lɛ he anunyam te shi ekoŋŋ. Misɔ̃ɔlɔi kɛ maŋ onukpai lɛ tao misɛɛgbɛ, ni amɛhere mi atuu akɛ maŋtsɛ ekoŋŋ. Amɛkɛ maŋtsɛ hewalɛ lɛ wo midɛŋ ekoŋŋ, ni amɛbu mi akɛ lumɔ fe tsutsu lɛ po.

³⁷ “No hewɔ lɛ, mi, Nebukadnezar, miijie Ŋwɛi Maŋtsɛ lɛ yi, ni miiwo lɛ, ni miiwo ehiɛ nyam. Nɔ fɛɛ nɔ ni efeɔ hi, ni eja hu, ni mɔ fɛɛ mɔ ni woɔ ehe nɔ lɛ, enyɛɔ ebaa mɔ lɛ shi.”