Daniel 3 - ŊMALƐ KRƆŊKRƆŊ LƐ

Nebukadnezar fã akɛ aja shika amãgã

¹ Maŋtsɛ Nebukadnezar hã afee shika amãgã ko ni ekwɔlɛ ji ninetalɔi nyɔŋmai ekpaa, kɛ elɛɛmɔ hu ninetalɔi ekpaa. Afee amãgã nɛɛ ama shi yɛ Dura ŋa lɛ nɔ yɛ Babilon kpokpai lɛ anɔ.

² Kɛkɛ ni Maŋtsɛ Nebukadnezar fã akɛ atsu koni atsɛ maŋ nitsulɔi blublu kɛba: amraloi kɛ lumɛi kɛ amraloi asɛɛmɛi kɛ akutsei anɔkwɛlɔi, kɛ maŋtsɛ he ŋaawolɔi kɛ kojolɔi kɛ nitoohei anɔkwɛlɔi, kɛ kpokpai lɛ fɛɛ anɔ nitsulɔi koni amɛbaye amãgã lɛ naagbelemɔ kɛ ekpojiemɔ lɛ he odase.

³ Amraloi lɛ kɛ lumɛi lɛ kɛ amraloi asɛɛmɛi lɛ kɛ akutsei anɔkwɛlɔi lɛ kɛ maŋtsɛ he ŋaawolɔi lɛ kɛ kojolɔi kɛ nitoohei anɔkwɛlɔi lɛ kɛ kpokpai lɛ anɔ nitsulɔi lɛ fɛɛ ba amãgã ni Maŋtsɛ Nebukadnezar ehã afee lɛ naagbelemɔ kɛ ekpojiemɔ lɛ. Be ni gbɔmɛi nɛɛ eyabua shi yɛ amãgã lɛ hiɛ lɛ,

⁴ sɔ̃ɔlɔ ko bo waa ni ekɛɛ akɛ, “Shikpɔji kɛ maji srɔtoi anɔ bii kɛ nyɛ mɛi ni nyɛwieɔ wiemɔi srɔtoi fɛɛ,

⁵ nyɛbaanu tɛtɛrɛmantɛrɛ gbɛɛmɔ he, kɛkɛ lɛ koofɛŋ kɛ saŋku kɛ kete kɛ obenta kɛ bɛji kɛ lalai srɔtoi baagbɛɛ kɛnyiɛ sɛɛ. Lalai lɛ he ni nyɛaanu nɔŋŋ lɛ, nyɛkulaa shi nyɛjaa amãgã lɛ ni Maŋtsɛ Nebukadnezar efee ema shi lɛ.

⁶ Mɔ fɛɛ mɔ ni kulaaa shi koni eja amãgã lɛ, nakai ŋmɛlɛtswaa lɛ mli nɔŋŋ lɛ abaashɛ lɛ afɔ̃ flɔnɔɔ kɛ emli la ni miitso grigri mli.”

⁷ No hewɔ lɛ, amrɔ pɛ ni asafo lɛ fɛɛ nu koofɛŋ kɛ saŋku kɛ kete kɛ obenta kɛ bɛji kɛ lalai srɔtoi lɛ agbɛɛmɔ lɛ, amɛho amɛkula shi, ni amɛja shika amãgã ni Maŋtsɛ Nebukadnezar kɛma shi lɛ.

Afo Daniel nanemɛi etɛ̃ lɛ anaa akɛ amɛgbo toi

⁸ Babilonbii komɛi tsɔ̃ amãgã nɛɛ jamɔ lɛ nɔ, ni amɛfo Yudafoi lɛ anaa.

⁹ Amɛyakɛɛ Maŋtsɛ Nebukadnezar akɛ, “Nii yi ana wala kɛya naanɔ.

¹⁰ Nii, bɛ owo akpɔ akɛ be fɛɛ be ni tɛtɛrɛmantɛrɛi kɛ koofɛŋ kɛ bɛji kɛ saŋkui kɛ obentai kɛ lalai srɔtoi lɛ aaagbɛɛ pɛ, mɔ fɛɛ mɔ akula shi koni eja shika amãgã lɛ,

¹¹ ni mɔ fɛɛ mɔ ni kulaaa shi koni eja lɛ lɛ, abaashɛ lɛ afɔ̃ flɔnɔɔ kɛ emli la ni miitso grigri mli?

¹² Yudafoi lɛ ni oŋɔ amɛ oto Babilon kpokpai lɛ anɔ nitsumɔi lɛ anɔ lɛ yeee okpɔ nɛɛ nɔ. Gbɔmɛi nɛɛ ji Shadrak kɛ Meshak kɛ Abednego.”

¹³ Maŋtsɛ Nebukadnezar kɛ mlifu kɛ mlila fã akɛ ayaŋɔ Shadrak kɛ Meshak kɛ Abednego kɛba; ni ayaŋɔ gbɔmɛi nɛɛ kɛba maŋtsɛ lɛ hiɛ.

¹⁴ Maŋtsɛ Nebukadnezar kɛɛ amɛ akɛ, “Shadrak kɛ Meshak kɛ Abednego, ani eyɛ mli anɔkwale akɛ nyɛsɔmɔ̃ɔɔ minyɔŋmɔi lɛ, ni nyɛjaaa shika amãgã lɛ ni mifee mima shi lɛ lo?

¹⁵ Agbɛnɛ kɛji nyɛfee kralo nyɛto akɛ kɛji nyɛnu koofɛŋ lɛ kɛ blɛ kɛ saŋku kɛ kete kɛ obenta kɛ lalai srɔtoi lɛ agbɛɛmɔ lɛ, nyɛaaho nyɛkula shi, ni nyɛja amãgã ni mifee lɛ, belɛ no lɛ sane etã. Shi kɛji nyɛjaaa lɛ lɛ, amrɔ lɛ nɔŋŋ lɛ abaashɛrɛ nyɛ ashwie flɔnɔɔ kɛ emli la ni miitso grigri lɛ mli! Mɛɛ nyɔŋmɔ nyɛsusuɔ akɛ aaanyɛ nyɛyiwala ahere yɛ mi midɛŋ?”

¹⁶ Kɛkɛ ni Shadrak kɛ Meshak kɛ Abednego here nɔ, ni amɛkɛɛ Maŋtsɛ Nebukadnezar akɛ, “Nii, ehĩaaa akɛ wɔhã nɛkɛ sane nɛɛ hetoo.

¹⁷ Kɛji wɔNyɔŋmɔ lɛ ni wɔsɔ̃mɔɔ lɛ miisumɔ akɛ ehere wɔ yɛ flɔnɔɔ kɛ emli la ni miitso grigri lɛ mli lɛ, ebaahere wɔ; ni ebaahere wɔ yɛ odɛ̃ŋ hu.

¹⁸ Shi kɛji ehereee wɔ po, Nii, na ole akɛ wɔsɔmɔŋ onyɔŋmɔi lɛ, ni wɔjaŋ shika amãgã ni ofee oma shi lɛ.”

Abu Daniel nanemɛi etɛ̃ lɛ gbele fɔ

¹⁹ Kɛkɛ ni Maŋtsɛ Nebukadnezar mli wo la fe nine, ni ehiɛ tsake ewo Shadrak kɛ Meshak kɛ Abednego. Amrɔ nɔŋŋ pɛ ni efã akɛ awo flɔnɔɔ lɛ mli la koni edɔ toi kpawo fe bɔ ni ahãa edɔɔ daa lɛ.

²⁰ Efã asraafoi hewalɔi komɛi hu akɛ amɛfimɔ Shadrak kɛ Meshak kɛ Abednego koni amɛyashɛrɛ amɛ amɛshwie flɔnɔɔ kɛ emli la ni tsoɔ grigri lɛ mli.

²¹ No hewɔ lɛ, afimɔ amɛ kɛ amɛheboi kɛ flakai kɛ faii kɛ atadei krokomɛi lɛ fɛɛ ni ashɛrɛ amɛ ashwie flɔnɔɔ kɛ emli la grigri lɛ mli.

²² Akɛni yɛ maŋtsɛ lɛ famɔ naa lɛ ahã flɔnɔɔ lɛ edɔ waa naakpa hewɔ lɛ, flɔnɔɔ lɛ mli lalilɛii lɛ gbe hii lɛ ni hole gbɔmɛi lɛ amɛyawo flɔnɔɔ lɛ mli lɛ.

²³ Nɛkɛ gbɔmɛi etɛ̃, ni ji Shadrak kɛ Meshak kɛ Abednego, nɛɛ yashwie flɔnɔɔ kɛ emli la ni tsoɔ grigri lɛ mli bɔ ni afimɔ amɛ lɛ nɔŋŋ.

²⁴ Maŋtsɛ Nebukadnezar naa kpɛ ehe, ni ete shi oya, ni ebi ejinafoi lɛ akɛ, “Ani jeee gbɔmɛi etɛ̃ wɔfimɔ ni wɔshɛrɛ amɛ wɔshwie la lɛ mli lɛ?” Ajinafoi lɛ here nɔ, ni amɛkɛɛ maŋtsɛ lɛ akɛ, “Nii, nakai ni.”

²⁵ Nebukadnezar kɛɛ amɛ akɛ, “Miina gbɔmɛi ejwɛ yɛ la lɛ mli. Afimɔko amɛ, ni la lɛ efeee amɛ nɔ ko nɔ ko; ni mɔ ni gbe yi fee ejwɛ lɛ, su tamɔ bɔfo.”

Ajie Hii etɛ̃ lɛ ni aha amɛ gbɛnaa

²⁶ Kɛkɛ ni Maŋtsɛ Nebukadnezar tsi bɛŋkɛ flɔnɔɔ kɛ emli la grigri lɛ naa. Kɛkɛ ni ewo enaa nɔ, ni ekɛɛ, “Shadrak kɛ Meshak kɛ Abednego, Nyɔŋmɔ ŋwɛi flooflonyo lɛ tsuji, nyɛjea kpo yɛ la lɛ mli kɛbaa.” Kɛkɛ ni Shadrak kɛ Meshak kɛ Abednego je kpo yɛ la lɛ mli kɛba.

²⁷ Amraloi lɛ kɛ lumɛi lɛ kɛ akutsei anɔkwɛlɔi lɛ kɛ maŋtsɛ lɛ ajinafoi lɛ bua amɛhe naa koni amɛbakwɛ nɛkɛ gbɔmɛi etɛ̃ nɛɛ. Amɛyiteŋ tsɔi ŋalako lɛ, amɛtadei lɛ he ko eshãko lɛ, lasu tete po ejeee fu yɛ amɛhe.

²⁸ Maŋtsɛ Nebukadnezar kɛɛ akɛ, “Ajie Shadrak kɛ Meshak kɛ Abednego Nyɔŋmɔ lɛ yi, ejaakɛ etsu ebɔfo, ni ebahere etsuji lɛ ni kɛ amɛhiɛ fɔ̃ enɔ lɛ kɛje gbele mli. Amɛtse mifãmɔ lɛ hiɛ atua, ni amɛkã kitã akɛ nɔ ni amɛaaja he ko bii anyɔŋmɔ fe amɛNyɔŋmɔ lɛ amɛkɛ amɛwala moŋ baatse.

²⁹ “No hewɔ lɛ, miiwo akpɔ akɛ mɔ fɛɛ mɔ ni aaawie Shadrak kɛ Meshak kɛ Abednego Nyɔŋmɔ lɛ he wiemɔ fɔŋ ko lɛ, he fɛɛ he maŋ loo shikpɔŋ nɔ ni mɔ lɛ jɛ, loo wiemɔ fɛɛ wiemɔ ni mɔ lɛ wieɔ lɛ, atserɛ egbɔmɔtso mli mɛnyɛmɛnyɛ, asaŋ afite eshĩa hu koni jɛi atsɔ tumo. AmɛNyɔŋmɔ lɛ sɛɛ lɛ nɔ ko kwraa bɛ dɔŋŋ ni baanyɛ ehere gbɔmɔ yiwala tamɔ nɛkɛ.”

³⁰ Kɛkɛ ni maŋtsɛ lɛ hã Shadrak kɛ Meshak kɛ Abednego gbɛnaa yɛ Babilon kpokpai lɛ anɔ.