Daniel 11 - ŊMALƐ KRƆŊKRƆŊ LƐ

¹ “Maŋtsɛ Dario, Medianyo lɛ, klɛŋklɛŋ afi lɛ mli lɛ, mi hu midamɔ shi, ni mifi Mikael sɛɛ kɛwo lɛ hewalɛ.

² Nɔ ni magba bo agbɛnɛ nɛɛ lɛ anɔkwale ni.” Kɛkɛ ni bɔfo lɛ tee nɔ ni ekɛɛ akɛ, “Naa, maŋtsɛmɛi etɛ̃ krokomɛi baaba abaye Persia shikpɔŋ lɛ nɔ. Maŋtsɛ mɔ ni baanyiɛ amɛsɛɛ akɛ maŋtsɛ ni ji ejwɛ lɛ, ebaana nii fe mɛi krokomɛi lɛ fɛɛ. Ni kɛji etsɔ̃ enii ni ena lɛ nɔ ena hewalɛ lɛ, ebaawo majimaji ayiŋ, ni abaate shi awo Hela maŋtsɛyeli lɛ.

Ijipt Maŋtsɛyeli lɛ kɛ Siria Maŋtsɛyeli lɛ

³ “Maŋtsɛ kãkãlɔ ko baate shi nɛkɛ be mli, ni emaŋtsɛyelihe lɛ baada kpeteŋkple, ni ebaaye etsuinaa sane.

⁴ Shi be mli ni egbojee lɛ ehe shi jogbaŋŋ lɛ mli nɔŋŋ ni emaŋtsɛyeli lɛ baagbee shi. Emli baagbala srɔtoi ejwɛ kɛya jeŋ koji ejwɛ lɛ. Mligbalamɔi nɛɛ anɔyeli baaya ayaje mɛi ni amɛjeee maŋtsɛ nɛɛ shwiei adɛŋ; shi moŋ nɔyelɔi hei nɛɛ ahewalɛ kɛ maŋtsɛ lɛ hewalɛ yeŋ hegbɔ; ni abaashɔ̃ maŋtsɛyeli lɛ ekoŋŋ yɛ mɛi nɛɛ adɛŋ ahã mɛi krokomɛi.

⁵ “Wuoyigbɛ, ni ji Ijipt, maŋtsɛ lɛ he baawa, shi eshishi lumɛi lɛ ateŋ mɔ kome ko baana hewalɛ fe lɛ maŋtsɛ lɛ diɛŋtsɛ, ni naagbee mli lɛ gbɔmɔ nɛɛ baatsɔ̃ shikpɔŋ kpeteŋkple nɔyelɔ.

⁶ Shi afii komɛi asɛɛ lɛ, Ijipt maŋtsɛ lɛ kɛ kooyigbɛ maŋtsɛ, ni ji Siria maŋtsɛ lɛ, baakpãŋ amɛfee ekome, ni Ijipt maŋtsɛ lɛ kɛ ebiyoo baahã Siria maŋtsɛ lɛ gbãlã yɛ toiŋjɔlɛ namɔ hewɔ. Shi ekomefeemɔ nɛɛ sɛɛ etsɛŋ, ni abaamɔ maŋtsɛ biyoo lɛ kɛ etsuji kɛ ebi lɛ kɛ ewu lɛ fɛɛ ni abaagbe amɛ.

⁷ Nɛkɛ be mli nɔŋŋ lɛ, maŋtsɛ biyoo lɛ wekunyo ko baate shi, ni ebaaye maŋtsɛ. Gbɔmɔ nɛɛ baafã ta kɛbatua Siria maŋtsɛ lɛ kɛ etabilɔi lɛ kɛyabote maŋtsɛ lɛ mɔɔ wulu lɛ mli, ni ebaaye amɛnɔ kunim.

⁸ Ebaaloo Siriabii anyɔŋmɔi lɛ kɛ dade amãgãi lɛ kɛ jwiɛtɛi kɛ shika nibii ni jara wa lɛ fɛɛ kɛya Ijipt. Ijipt maŋtsɛ nɛɛ baahi shi afii komɛi ni efãaa ta ewooo Siria maŋtsɛ lɛ.

⁹ Shi Siria maŋtsɛ lɛ moŋ ni baafã ta be ko kɛbatua Ijipt; shi abaashwie lɛ, ni ebaaku esɛɛ kɛaatee eshikpɔŋ lɛ nɔ ekoŋŋ.

¹⁰ “Siria maŋtsɛ lɛ bihii baabua tabilɔi babaoo anaa amɛkɛsaa amɛhe amɛhã ta. Ta ku lɛ eko baafã, ni ebaakpãtã nɔ fɛɛ nɔ ni yɔɔ egbɛ nɔ hiɛ, tamɔ faa ni eyi kɛteke nɔ. Abaawu ta lɛ aahu kɛyanina Ijipt maŋtsɛ mɔɔ lɛ diɛŋtsɛ.

¹¹ Ijipt maŋtsɛ lɛ kɛ mlila baafã kɛbanina Siria maŋtsɛ lɛ, ni ekɛ lɛ baawu, ni ebaaye enɔ. Siria maŋtsɛ lɛ kɛ ta kpele baaya ta lɛ, shi abaaye enɔ kunim.

¹² Ijipt maŋtsɛ lɛ nine baatsɔ̃ Siria tabilɔi akpei nyɔŋmai abɔ lɛ anɔ. No baahã maŋtsɛ lɛ awo ehe nɔ akɛ ekpãtã tabilɔi babaoo ahiɛ; shi ekunimyeli nɛɛ sɛɛ etsɛŋ.

¹³ Ejaakɛ Siria maŋtsɛ lɛ baaya esɛɛ eyabua tabilɔi babaoo fe tsutsubii lɛ anaa, ni afii komɛi asɛɛ lɛ ebaaku esɛɛ eba ekoŋŋ kɛ ta kpele kɛ tawuu nibii.

¹⁴ Nɛkɛ be nɛɛ mli lɛ mɛi babaoo baate shi ashi Ijipt maŋtsɛ lɛ. Bo diɛŋtsɛ omaŋbii lɛ ateŋ kakawuai komɛi hu aaate shi awo Ijipt maŋtsɛ lɛ koni ninaa nɛɛ aba mli; shi amɛyeŋ kunim.

¹⁵ Siria maŋtsɛ lɛ baafã ta kɛba, ni ebaaba ebasa maŋ ni atswa gbogbo awo ehe yi. Ebaaye maŋ nɛɛ nɔ kunim, ni ebaaŋɔ maŋ lɛ. Ijipt tabilɔi lɛ nyɛŋ ehiɛ adamɔ. Etabilɔi kakabãŋi lɛ tete naŋ hewalɛ amɛkɛdamɔ shi amɛkɛ lɛ awu.

¹⁶ Siria maŋtsɛ ni batua shikpɔŋ lɛ baafee Ijipt tabilɔi lɛ bɔ ni lɛ esumɔɔ, ni mɔ ko mɔ ko nyɛŋ shi ate awo lɛ. Ebaaba ebahi shiwoo shikpɔŋ lɛ nɔ, ni shikpɔŋ tso muu lɛ fɛɛ baahi lɛ ehewalɛ shishi.

¹⁷ Siria maŋtsɛ lɛ baato eyiŋ akɛ ekɛ emaŋtsɛyeli lɛ mli tabilɔi bluublu baaba abatua Ijipt. Shi ebaatsɔ̃ ŋaa, ni ekɛ Ijipt baakpãŋ, ni ebaaŋɔ ebiyoo ehã Ijipt maŋtsɛ lɛ gbãlã koni ekɛgbɔjɔ Ijipt maŋtsɛyeli lɛ; shi moŋ eyiŋtoo nɛɛ yeŋ omanye.

¹⁸ Enɛ sɛɛ lɛ Siria maŋtsɛ lɛ baatsɔ̃ ehiɛ ewo ŋshɔnaa shikpɔji lɛ. Ebaaye shikpɔji nɛɛ babaoo anɔ kunim. Shi tatsɛ ko hu baate shi awo lɛ, ni ebaaye enɔ kunim, ni ebaafo Siria maŋtsɛ lɛ henɔwomɔ lɛ sɛɛ. Enɛ baahã Siria maŋtsɛ lɛ henɔwomɔ lɛ atsɔ̃ hiɛgbele ahã lɛ.

¹⁹ Siria maŋtsɛ nɛɛ baaku esɛɛ eyatua mɔji ni yɔɔ lɛ diɛŋtsɛ eshikpɔŋ lɛ nɔ; shi abaaye enɔ kunim yɛ jɛi, ni biɛ enaagbee baaba yɛ.

²⁰ “Maŋtsɛ ko baaba yɛ esɛɛ. Maŋtsɛ nɛɛ baawo etsulɔ gbɛ akɛ eyanyɛ maŋbii lɛ anɔ koni etsu amɛ onia pii ewo maŋtsɛ fotro lɛ mli. Shi be kukuoo ko sɛɛ nɔŋŋ ni abaagbe lɛ, jeee yɛ mlifu naa loo ta mli.”

Siria Maŋtsɛ fɔŋ lɛ

²¹ Bɔfo lɛ tee ewiemɔ lɛ nɔ, ni ekɛɛ akɛ, “Mɔ ni baanyiɛ sɛɛ ebaye Siria maŋtsɛ agbɛnɛ lɛ ji gbɔmɔ gbonyo ko ni bɛ hegbɛ akɛ eyeɔ maŋtsɛ; shi be ni aaahɛle shi lɛ etsɔ̃ juukɛfɔ̃ kɛ naadɔkɔmɔ nɔ enine eshɛ maŋtsɛyeli lɛ nɔ.

²² Tabilɔi fɛɛ ni aaate shi awo lɛ lɛ, ebaabɛɛ amɛ eshwie. Nakai nɔŋŋ ebaafee kpãŋmɔ lɛ lumɔ lɛ diɛŋtsɛ.

²³ Ekɛ majimaji baakpãŋ, shi eyeŋ anɔkwa. Ebaana hewalɛ kpele, tsɛbelɛ emaŋbii ayi faaa.

²⁴ Ebaafã ta trukaa kɛya shikpɔŋ ko ni hi jogbaŋŋ nɔ, ni ebaaya eyafee nii ni etsɛmɛi kɛ eniimɛi tete efeko eko dã yɛ jɛi. Nii ni ebaaha yɛ jɛi lɛ, ebaajara ehã tabilɔi ni nyiɛ esɛɛ lɛ. Kɛfee sɛɛ lɛ ebaato eyiŋ akɛ ebaafãfãa tai kɛyatua maji tamɔ mɔji; shi eyeŋ omanye.

²⁵ “Hewalɛ kɛ ekãa ni yɔɔ emli lɛ baakãnya lɛ koni ebua ta kpele naa koni ekɛ Ijipt maŋtsɛ lɛ ayawu. Ijipt maŋtsɛ lɛ hu kɛ ta kpele baaba ekɛ lɛ abawu; shi Ijipt maŋtsɛ lɛ yeŋ kunim, ejaakɛ abaato eshigbeemɔ he ŋai srɔtoi ashi lɛ.

²⁶ Mɛi po ni naa edɛŋ niyenii jurɔ amɛyeɔ lɛ tete baagbee lɛ shi eko. Etabilɔi lɛ babaoo baanyɔnyɔɔ, ni abaabɛɛ eta lɛ ashwie.

²⁷ Maŋtsɛmɛi enyɔ nɛɛ baatara shi yɛ okplɔ̃ kome he amɛye nii, shi amɛteŋ mɔ fɛɛ mɔ yɛ yiŋsha yɛ enyɛmi he; ni amɛaalaka amɛhe yɛ niyenii lɛ shishi tete. Amɛteŋ mɔ ko mɔ ko yiŋtoo lɛ baŋ mli haŋ lɛ, ejaakɛ be ni ato lɛ shɛko.

²⁸ Siria maŋtsɛ lɛ kɛ nii babaoo ni ena, yɛ taitai ni ewu lɛ amli, lɛ baaku esɛɛ ekɛya eshikpɔŋ lɛ nɔ; shi etsui baasu jamɔ krɔŋkrɔŋ lɛ nɔ. Ebaafee nɔ ni lɛ diɛŋtsɛ esumɔɔ, kɛkɛ lɛ eku esɛɛ kɛtee lɛ diɛŋtsɛ eshikpɔŋ nɔ.

²⁹ “Kɛji be ni ato lɛ shɛ lɛ, ebaaba ebatua Ijipt shikpɔŋ lɛ ekoŋŋ; shi nibii ejaŋ haŋ lɛ tamɔ tsuutsu lɛ,

³⁰ ejaakɛ Romabii kɛ lɛji baaba abatua lɛ, ni ebaashe gbeyei. Ebaagbala ehe shi, ni ebaaku esɛɛ kɛ mlila, ni ebaaya ni eyaka akɛ eeefite jamɔ krɔŋkrɔŋ lɛ. Ebaabo mɛi ni ekwa jamɔ krɔŋkrɔŋ lɛ moŋ aŋaawoo toi.

³¹ Ebaawo etabilɔi lɛ ekomɛi agbɛ koni amɛyabule Sɔlemɔ we Krɔŋkrɔŋ lɛ kɛ mɔɔ lɛ hu. Amɛbaagu daa gbi afɔlei ni ashãa lɛ, ni amɛkɛ amãgã ni buleɔ Sɔlemɔ we lɛ baama jɛi.

³² Ekɛ naadɔkɔmɔ baalaka mɛi ni ekwa jamɔ lɛ; shi mɛi ni miiye amɛNyɔŋmɔ lɛ anɔkwa lolo lɛ baadamɔ shi kpɛŋŋ amɛshi lɛ.

³³ Maŋbii lɛ ateŋ nilelɔi lɛ ekomɛi baatsɔ̃ɔ maŋbii lɛ nii, tsɛbelɛ amɛteŋ mɛi komɛi baanyɔnyɔɔ yɛ klante naa, abaashãshãa mɛi komɛi, abaaha amɛteŋ mɛi komɛi anii, ni abaaŋɔ mɛi komɛi nom kɛyashi be ko.

³⁴ Be mli nɔŋŋ ni agbeɔ Nyɔŋmɔ webii lɛ, abaaye abua amɛ fioo ko kɛ̃, ni mɛi pii baaba abafata amɛhe, shi jeee kɛ amɛtsui fɛɛ.

³⁵ Abaagbe maŋbii lɛ ateŋ nilelɔi lɛ ekomɛi; shi akɛ amɛgbele lɛ baatsuu Nyɔŋmɔ webii lɛ ahe koni amɛyɛ futafuta. Nii nɛɛ baaya nɔ kɛyashi naagbee be lɛ baashɛ, ni ji be ni Nyɔŋmɔ eto lɛ.

³⁶ “Siria maŋtsɛ lɛ baafee nɔ ni lɛ etsui taoɔ, ni ebaawo ehe nɔ. Ebaatsɛ ehe agbo fe nyɔŋmɔ fɛɛ nyɔŋmɔ, ni eeewie hepupuumɔ wiemɔ tete eshi nyɔŋmɔi aNyɔŋmɔ Ofe lɛ. Ebaaya nɔ nɛkɛ aahu kɛyaashi Nyɔŋmɔ emiŋ ŋɔɔ dɔŋŋ, ni agbɛnɛ Nyɔŋmɔ baagbala etoi. Nɔ ni Nyɔŋmɔ eto akɛ ebaafee lɛ lɛ, ebaana efee lɛ.

³⁷ Maŋtsɛ nɛɛ ebuŋ nyɔŋmɔ ni etsɛmɛi lɛ ja lɛ tete loo nyɔŋmɔ ni yei sumɔɔ lɛ hu. Ebuŋ nyɔŋmɔ ko nyɔŋmɔ ko, ejaakɛ ebaawo ehe nɔ yɛ fɛɛ nɔ.

³⁸ Shi moŋ ebaabu nyɔŋmɔ ni buɔ maji ahe. Ebaahiɛ edɛŋ shika kɛ jwiɛtɛi kɛ tɛi ni jara wa kɛ nikeenii ni jara wa ekɛyahã nyɔŋmɔ ko ni etsɛmɛi lɛ tete leee koni ekɛwo nakai nyɔŋmɔ lɛ hiɛ nyam.

³⁹ Nakai ebaafee yɛ mɔji ni wala lɛ amli ehã maŋsɛɛ nyɔŋmɔ ko ni eeekpɛlɛ̃ ehewalɛ nɔ. Mɛi fɛɛ ni buɔ lɛ akɛ amɛnɔyelɔ lɛ, ebaawo amɛhiɛ nyam, ni eeehã amɛye mɛi pii anɔ; ebaajara shikpɔji lɛ amli ehã amɛ akɛ amɛnyɔmɔwoo.

⁴⁰ “Kɛji Siria maŋtsɛ lɛ naagbee be lɛ shɛ lɛ, Ijipt maŋtsɛ lɛ baaya eyatua lɛ. Siria maŋtsɛ lɛ baafã tamɔ ahum ekɛ Ijipt maŋtsɛ lɛ abakpe kɛ tayaa shwiilii kɛ okpɔŋɔtalɔi kɛ lɛji babaoo. Ebaatua shikpɔji babaoo, ni ebaatsɔ̃ amɛnɔ kɛho tamɔ faa ni eje ŋa.

⁴¹ Ebaatua Shiwoo Shikpɔŋ lɛ tete, ni mɛi akpei nyɔŋmai abɔ baanyɔnyɔɔ; shi hei ni baaje edɛŋ nɛ: Edom kɛ Moab kɛ Amonbii ashikpɔŋ lɛ kpotoo.

⁴² Kɛji efã ta nɛɛ ewo nakai shikpɔji lɛ, Ijipt diɛŋtsɛ po yeŋ ehe.

⁴³ Ebaaloo Ijipt shika kɛ jwiɛtɛi kɛ ejwetri fɛɛ kɛya. Ebaaye Libia kɛ Etiopia hu fɛɛ nɔ.

⁴⁴ Shi saji ni baajɛ bokãgbɛ kɛ kooyigbɛ aba lɛ baawo ehe gbeyei; ni ekɛ mlila kpele baaya eyakpãtã gbɔmɛi babaoo ahiɛ butuu.

⁴⁵ Ebaamamɔ abladei abui ni eyɔɔ lɛ yɛ ŋshɔ lɛ kɛ Gɔŋ Krɔŋkrɔŋ lɛ teŋ shikpɔŋ lɛ nɔ; shi moŋ jɛi enaagbee baaba yɛ, ni mɔ ko mɔ ko yeŋ ebuaŋ lɛ.”