Daniel 10 - ŊMALƐ KRƆŊKRƆŊ LƐ

Tigris Faa lɛ toi ninaa

¹ Persia Maŋtsɛ Koresh yinɔ afi ni ji etɛ̃ lɛ, ajie ninaa kpo atsɔ̃ɔ Daniel mɔ ni atsɛɔ lɛ Belteshazar hu lɛ. Sane lɛ yɛ mli anɔkwa, ni ekɔɔ haomɔ kpeteŋkple ko he. Atsɔ̃ɔ Daniel, ni enu sane lɛ shishi.

² Nakai be lɛ mli lɛ, mi Daniel, mina otsii etɛ̃ sɔŋŋ ni miiye ŋkɔmɔ.

³ Miyeee niyenii ni ŋɔɔ, miyeee loo lɛ, minuuu wain, ni mikpaaa mu hu kɛyashi otsii etɛ̃ lɛ fɛɛ shɛ.

⁴ Klɛŋklɛŋ nyɔŋ lɛ nɔ gbi ni ji nyɔŋmai enyɔ kɛ ejwɛ lɛ nɔ lɛ, midamɔ faa wulu ni gbɛi ji Tigris lɛ naa.

⁵ Miwo mihiɛ nɔ, ni mina nuu ko ni ewo klala atade, ni Ufaz shika kpãa fi emliteŋ.

⁶ Egbɔmɔtso miikpɛlɛ oookɛɛ ojarawatɛ, ni ehiɛ miikpɛlɛ nyramnyram tamɔ srawa; ehiŋmɛii tamɔ kɔtii ni asu. Eniji kɛ enaji ahe miikpɛlɛ tamɔ akɔɔble ni asha he; ni egbee jije tamɔ asafo yuu gbee.

⁷ Mi Daniel, mi koome mina ninaa lɛ. Hii ni fata mihe yɛ jɛi lɛ enaaa ninaa nɛɛ; shi kɛ̃lɛ ŋmiŋmi ni naa wa mɔmɔ amɛ, kɛkɛ ni amɛjojoo foi, ni amɛyateetee amɛhe.

⁸ No hewɔ lɛ, ebashwɛ mi, mi koome ni miikwɛ ninaa kpeteŋkple nɛɛ. Migbɔmɔtsoŋ hewalɛ fɛɛ tã, ni mihiɛ fɛɛ tsake, ni hewalɛ ko bɛ mimli dɔŋŋ.

⁹ Kɛkɛ ni minu nuu lɛ gbee ni eewie. Be ni minu ewiemɔ lɛ, ni migbee shi, ni mikɛ mihiɛ bu shi, ni nɔ nyɔ minɔ.

¹⁰ Kɛkɛ ni nine ko bata mihe, ni ewo minɔ. Mikula shi yɛ minakutsei anaa, ni mikɛ miniji nyɛmɔ shi, ni mikpokpo.

¹¹ Bɔfo lɛ kɛɛ mi akɛ, “Daniel, Nyɔŋmɔ miisumɔ bo naakpa. Tee shi ni odamɔ shi, koni obo wiemɔi ni mikɛ bo baawie lɛ toi, ejaakɛ atsu mi oŋɔɔ.” Be ni bɔfo lɛ kɛ mi ewie nɛkɛ sɛɛ lɛ, mite shi midamɔ shi kɛ hekpokpomɔ.

¹² Kɛkɛ ni ekɛɛ mi akɛ, “Daniel, kaashe gbeyei! Ejaakɛ Nyɔŋmɔ enu sɔlemɔi ni osɔle kɛjɛ klɛŋklɛŋ gbi nɔ ni okpɛ oyiŋ akɛ obaaba ohe shi ohã Nyɔŋmɔ. Anu osɔlemɔ lɛ, ni no hewɔ miba nɛɛ.

¹³ Be ni mibaa lɛ bɔfo ni buɔ Persia maŋtsɛyeli lɛ he lɛ batsi mi gbɛ gbii nyɔŋmai enyɔ kɛ ekome. Kɛkɛ ni bɔfoi onukpai lɛ ateŋ mɔ kome ni gbɛi ji Mikael lɛ ba, ni ebaye ebua mi. Mishi Mikael kɛ Persia maŋtsɛyeli lɛ bɔfo lɛ yɛ jɛi,

¹⁴ ni miba koni mibatsɔ̃ɔ bo nɔ ni baaba omaŋbii lɛ anɔ wɔsɛɛ, ejaakɛ nɔ ni baaba wɔsɛɛ shɔŋŋ he ninaa ona lɛ.”

¹⁵ Be ni bɔfo lɛ kɛ mi ewie nɛkɛ egbe naa lɛ, mima mihiɛ shi, ni mitɔ mu.

¹⁶ Kɛkɛ ni bɔfo lɛ ni esu tamɔ gbɔmɔ adesa lɛ kɛ enine sa minaabu he. Kɛkɛ ni mibɔi wiemɔ, ni mikɛɛ bɔfo ni damɔ mihiɛ lɛ akɛ, “Ninaa lɛ eha mihewojiaŋ fɛɛ miiwa mihe, ni mifee gbedee.

¹⁷ Te aaafee tɛŋŋ ni mi, minuŋtsɔ tsulɔ, kɛ minuŋtsɔ aaawie hu? Ejaakɛ gbɔmɔtsoŋ hewalɛ ni jio, mumɔŋ nɔ jio, eko fɛɛ eko etã yɛ mimli.”

¹⁸ Kɛkɛ ni bɔfo lɛ ba, ni ebata mihe, ni mina gbɔmɔtsoŋ hewalɛ ekoŋŋ.

¹⁹ Ekɛɛ mi akɛ, “Ao! Gbɔmɔ ni Naa Nyɔŋmɔ sumɔɔ bo pam, kaashe gbeyei; otsui anyɔ omli, ni ofee ekãa.” Be ni ekɛ mi wie nɛkɛ sɛɛ lɛ, mina ekãa, ni mikɛɛ lɛ akɛ, “Minuŋtsɔ, wiemɔ, ejaakɛ owo mi hewalɛ.”

²⁰ Bɔfo lɛ to he ni ekɛɛ, “Ole nɔ hewɔ ni miba oŋɔɔ nɛɛ lo? Miiku misɛɛ koni mikɛ bɔfo ni buɔ Persia maŋtsɛyeli lɛ he lɛ ayawu. Kɛji miye enɔ kunim sɛɛ lɛ, Hela maŋtsɛyeli bɔfo lɛ hu baaba koni ekɛ mi abawu.

²¹ Shi mibagba bo nɔ ni aŋmã yɛ Anɔkwale Ŋmalɛi lɛ amli lɛ. No ji akɛ mɔ ko kwraa bɛ ni waa mi ni mikɛ mɛnɛɛmɛi wuɔ akɛ ja Mikael, nyɛ Israel lumɔ lɛ.”