Daniel 1 - ŊMALƐ KRƆŊKRƆŊ LƐ

DANIEL KƐ ENANEMƐI LƐ AHE SANE LƐ ( 1.1—6.28 ) Oblahii lɛ yɛ Nebukadnezar koishi

¹ Yuda Maŋtsɛ Yehoiakim maŋtsɛyeli afi ni ji etɛ̃ lɛ nɔ lɛ, Babilon Maŋtsɛ Nebukadnezar fã ta kɛba, ni ebasa Yerusalɛm maŋ lɛ yi.

² Nuŋtsɔ lɛ hã eye Maŋtsɛ Yehoiakim nɔ kunim. Kɛkɛ ni emɔ Yehoiakim kɛ nomii komɛi hu, ni eloo Nyɔŋmɔ We lɛ mli nibii lɛ ekomɛi, ni ekɛ nomii lɛ kɛ nibii nɛɛ tee Babilon shikpɔŋ lɛ nɔ, ni ekɛ nibii lɛ yawo enyɔŋmɔ lɛ we lɛ mli nitoohe lɛ.

³ Kɛkɛ ni Maŋtsɛ Nebukadnezar fã Ashpenaz, epiafonyonukpa ni fe fɛɛ lɛ, akɛ ehala Israelbii nomii lɛ ateŋ maŋtsɛmɛiabii lɛ kɛ abladei ashwiei lɛ ateŋ oblahii komɛi.

⁴ Esa akɛ oblahii nɛɛ ahe yɛ fɛo, kpa ko kpa ko akahi amɛgbɔmɔtsei ahe; amɛyɛ tsɔsemɔ, amɛyɛ jwɛŋmɔ, ni amɛjwɛŋmɔŋ kã shi kɛhã nikasemɔ, koni atsɔse amɛ ni amɛsɔ̃mɔ yɛ maŋtsɛwe lɛ mli. Efã hu akɛ atsɔ̃ɔ amɛ Babilonbii awiemɔ lɛ kɛ amɛwoloŋ hu.

⁵ Maŋtsɛ Nebukadnezar to akɛ daa gbi lɛ ahã oblahii nɛɛ lɛ diɛŋtsɛ eniyenii kɛfɔkɛfɔ ni eyeɔ kɛ wain hu ni enuɔ lɛ eko. Ekɛɛ akɛ atsɔ̃ɔ amɛ nii afii etɛ̃; ni no sɛɛ lɛ akɛ oblahii lɛ aba abatsɔ̃ɔ lɛ.

⁶ Oblahii ni ahala lɛ ateŋ mɛi komɛi ji Daniel kɛ Hanania kɛ Mishael kɛ Azaria. Amɛ fɛɛ amɛjɛ Yuda akutso lɛ mli.

⁷ Piafonyonukpa fe fɛɛ lɛ wo oblahii ejwɛ nɛɛ gbɛii krokomɛi. Ewo Daniel Belteshazar, ni ewo Hanania Shadrak, ni ewo Mishael Meshak, ni ewo Azaria Abednego.

⁸ Shi Daniel tswa efai shi akɛ eyeŋ maŋtsɛ niyenii ni ewo fɔ lɛ, ni enuŋ maŋtsɛ wain lɛ hu koni ekabule ehe. No hewɔ lɛ, ekpa Ashpenaz, piafonyonukpa fe fɛɛ lɛ, fai akɛ eŋmɛ lɛ gbɛ koni ekabule ehe.

⁹ Nyɔŋmɔ hã Ashpenaz hiɛ sɔ Daniel, ni emusuŋ tsɔ̃ lɛ yɛ ehe.

¹⁰ Shi moŋ ekɛɛ Daniel akɛ, “Miishe gbeyei akɛ aleee nɔ minuŋtsɔ maŋtsɛ, ni eto niyenii kɛ wain ni akɛhã nyɛ lɛ, baana akɛ nyɛgbɔmɔtsei bɛ akɔnɔ tamɔ nyɛtipɛŋfoi oblahii krokomɛi lɛ agbɔmɔtsei. Enɛ aaahã miwala atɔ̃ yɛ maŋtsɛ lɛ hiɛ.”

¹¹ No hewɔ lɛ, Daniel kɛɛ mɔ ni piafonyonukpa lɛ efã akɛ ekwɛ lɛ Daniel lɛ kɛ Hanania kɛ Mishael kɛ Azaria nɔ lɛ akɛ,

¹² “Ofainɛ, hã wɔ tsei ayibii kɛ baibai kɛkɛ koni wɔye kɛ nu folo hu kɛkɛ ni wɔnu kɛyashi biɛ gbii nyɔŋma koni okɛka wɔ, otsuji, okwɛ;

¹³ koni no sɛɛ lɛ okɛ wɔ ato oblahii ni yeɔ maŋtsɛwe lɛ niyenii ni ewo fɔ lɛ ahe. Bɔ ni ooona lɛ odamɔ no nɔ koni ofee wɔ bɔ ni osumɔɔ.”

¹⁴ Nuu lɛ kpɛlɛ̃ sane ni Daniel kɛfɔ̃ ehiɛ lɛ nɔ, ni eka Daniel kɛ enyɛmimɛi lɛ aniyenii hamɔ lɛ gbii nyɔŋma lɛ ekwɛ.

¹⁵ Gbii nyɔŋma lɛ sɛɛ lɛ ana akɛ Daniel kɛ enanemɛi lɛ ahiɛ efee fɛo, ni amɛgbɔmɔtsei eshwishwii fe oblahii krokomɛi lɛ ni yeɔ maŋtsɛwe lɛ mli niyenii kpakpai ni ewo fɔ lɛ agbɔmɔtsei.

¹⁶ No hewɔ lɛ, amɛkwɛlɔ lɛ shi niyenii kɛ wain ni ato akɛ akɛhã amɛ lɛ sɛɛ, ni ehã amɛ tsei ayibii kɛ baibai lɛ kɛkɛ, ni amɛye.

¹⁷ Nyɔŋmɔ duro nɛkɛ oblahii ejwɛ nɛɛ jwɛŋmɔ, ni amɛnyɛ amɛkase woloŋ kɛ nii fɛɛ ni atsɔ̃ɔ amɛ lɛ. Yɛ Daniel gbɛfaŋ lɛ Nyɔŋmɔ hã enu ninaa fɛɛ ninaa kɛ lamɔ fɛɛ lamɔ hu shishi efata he.

¹⁸ Be ni be ni maŋtsɛ lɛ eto lɛ shɛ lɛ, Ashpenaz, piafonyo lɛ, kɛ oblahii lɛ fɛɛ tee Maŋtsɛ Nebukadnezar hiɛ ekɛ amɛ yatsɔ̃ɔ lɛ.

¹⁹ Maŋtsɛ lɛ kɛ amɛ fɛɛ wie, ni Daniel kɛ Hanania kɛ Mishael kɛ Azaria ji mɛi ni maŋtsɛ lɛ hiɛ sɔ fe fɛɛ yɛ oblahii lɛ ateŋ. No hewɔ lɛ, ehala amɛ koni amɛsɔ̃mɔ yɛ maŋtsɛwe lɛ mli.

²⁰ Nilee fɛɛ nilee kɛ sane fɛɛ sane ni maŋtsɛ lɛ bi Daniel kɛ enyɛmimɛi lɛ, ena akɛ amɛle nii shii nyɔŋma toi abɔ fe emaŋtsɛyeli lɛ mli shikpɔji lɛ anɔ ninalɔi kɛ ashwãifeelɔi lɛ fɛɛ.

²¹ Daniel sɔ̃mɔ yɛ maŋtsɛwe lɛ mli aahu kɛyashi afi nɔ ni Persia Maŋtsɛ Koresh baye Babilon nɔ kunim lɛ.