Amos 9 - ŊMALƐ KRƆŊKRƆŊ LƐ

Bɔ ni Nuŋtsɔ lɛ baagbala toi ehã

¹ Mina Yehowa damɔ afɔleshãa latɛ lɛ he. Ekɛɛ mi akɛ, “Okɛ nii atswia Sɔlemɔtsu lɛ akulashiŋi lɛ ayiteiaŋ kpɔbii lɛ waa koni kpokui lɛ ahoso, ni ewule eshwie mɛi lɛ fɛɛ anɔ. Mɛi ni ahe baaje mli lɛ mibagbe amɛ yɛ ta mli. Mɔ ko mɔ ko ejoŋ minaa foi lɛ, mɔ ko mɔ ko hu he ejeŋ mli.

² Kɛji amɛtsa shi kɛtee gbohiiaje tete lɛ, minine baashɛ amɛnɔ yɛ jɛi; ni amɛkwɔ kɛtee ŋwɛi hu, mibamɔmɔ amɛ kɛkpeleke shi kɛjɛ jɛi.

³ Kɛji amɛyatee amɛhe yɛ Karmel Gɔŋ lɛ yiteŋ tete lɛ, mibatao amɛ, ni mibamɔmɔ amɛ; ni kɛ amɛtee ŋshɔ shishi amɛyatee mi yɛ jɛi hu, mibafã ŋshɔŋ onufu gbeyeigbeyei lɛ, ni ebaakɔ̃mɔ amɛ.

⁴ Ni kɛji amɛhenyɛlɔi baŋɔ amɛ nom tete lɛ, mibafã, ni henyɛlɔi lɛ baafã klante yɛ amɛnɔ ni amɛaagbe amɛ. Mijie mihiɛ mika amɛ koni makpãtã amɛhiɛ; ejurɔ ko bɛ ni mibafee amɛ.”

⁵ Nuŋtsɔ Nyɔŋmɔ lɛ, mɔ ni kɛ́ enine sa je lɛ he kɛkɛ lɛ je lɛ miihoso, ni emli gbɔmɛi fɛɛ yeɔ awerɛhoo, mɔ ni hãa je lɛ yiɔ ni ekpɔ̃ŋɔ tamɔ Nilo Faa lɛ,

⁶ mɔ ni ŋwɛiniiaŋ ji he ni epiai yɔɔ, ni ekɛ ŋwɛi ebu shikpɔŋ lɛ nɔ, ni etsɛɔ ŋshɔŋ nu lɛ kɛyaa ŋwɛi, ni efɔseɔ eshwieɔ shikpɔŋ lɛ nɔ lɛ, Egbɛi ji Yehowa!

⁷ Yehowa kɛɛ akɛ, “Israelbii, mijwɛŋɔ nyɛhe tamɔ mijwɛŋɔ Etiopiabii ahe lɛ. Bɔ ni mijie Israelbii kɛje Ijipt shikpɔŋ lɛ nɔ lɛ, nakai mijie Filistibii lɛ kɛjɛ Kreta kɛ Siriabii lɛ hu kɛjɛ Kir.

⁸ Naa, mi, Yehowa Ofe, mijie mihiɛ mika Israel, maŋ ni feɔ esha lɛ, ni mibakpãtã ehiɛ kɛje shikpɔŋ lɛ nɔ. Shi moŋ mikpãtãŋ Yakob shwiei lɛ fɛɛ ahiɛ kwrakwra, Yehowa kɛɛ.

⁹ “Naa, mibafã, ni mibasha Israelbii lɛ amli yɛ je lɛ mli maji lɛ ateŋ tamɔ akɛ shaanii shaa ŋmaa mli lɛ, ni ŋmaa kuli nɛkɛ egbeŋ shi.

¹⁰ Mimaŋbii lɛ ateŋ gbɔmɛi eshafeelɔi ni kɛɔ akɛ, ‘Nyɔŋmɔ haŋ nɔ fɔŋ ko anina wɔ lɛ, amɛ fɛɛ amɛbaanyɔnyɔi yɛ ta mli.’ ”

Abaasaa Israel wɔsɛɛ

¹¹ Yehowa kɛɛ akɛ, “Be ko miiba, ni nakai gbi lɛ nɔ lɛ, mibatee David maŋtsɛyeli ni egbee shi lɛ shi mama shi ekoŋŋ. Mibatsimɔ fɔji ni eba maŋtsɛyeli lɛ mli lɛ, ni masaa matswa lɛ mama shi tamɔ eyɔɔ blema lɛ.

¹² Ni Israelbii lɛ baaku amɛsɛɛ amɛbashɔ̃ Edom shikpɔŋ ni eshwɛ lɛ, kɛ shikpɔji krokomɛi fɛɛ ni tsutsu ko lɛ migbɛi kã amɛnɔ lɛ.” Nɔ ni Yehowa, mɔ ni baatsu nɛkɛ nibii nɛɛ, ekɛɛ nɛ,

¹³ “Naa, gbii miiba,” Yehowa kɛɛ “ni nidulɔi kɛ nidumɔ baanina nikpalɔ ni ekpako nii egbeko naa; ni wain yibii baawo babaoo bɔ ni wainŋalɔ nyɛŋ fɛɛ eŋa, ni wain baatsere kɛbaajɛ gɔji lɛ amli, ni eeeho yɛ gɔŋkpɔi lɛ anɔ tamɔ faa.

¹⁴ Mibakpale mimaŋ Israelbii lɛ kɛjɛ nomŋɔɔ mli kɛba koni amɛbasaa amɛmaji ni efee koikoi lɛ ni amɛhi mli ekoŋŋ; amɛaafee wain tromi ni amɛaanu amɛmli wain; ni amɛaahu abɔi ni amɛaaye abɔi lɛ amli nii.

¹⁵ Mibadu amɛ yɛ amɛshikpɔŋ lɛ nɔ, ni anyɛŋ amɛ afã yɛ nɔ dɔŋŋ.” Yehowa, nyɛNyɔŋmɔ lɛ, ena ekɛɛ.