Amos 3 - ŊMALƐ KRƆŊKRƆŊ LƐ

¹ Israelbii, nyɛboa nɛkɛ wiemɔ nɛɛ ni Yehowa wie yɛ nyɛhe lɛ toi, nyɛ ni nyɛ ji jaku muu ni eyajie kɛjɛ Ijipt shikpɔŋ lɛ nɔ kɛba lɛ,

² “Jeŋ maji fɛɛ ateŋ lɛ, nyɛ pɛ ji maŋ ni mile, ni no hewɔ lɛ, mibawo nyɛ nibii gbohii ni nyɛfee lɛ ahe nyɔmɔ.”

Gbalɔ gbɛnaa nitsumɔ

³ Ani mɛi enyɔ feɔ ekome kɛnyiɛɔ gbɛ kɛji amɛkpãŋko he?

⁴ Ani jata hũuɔ yɛ koo mli be mli ni enako kooloo ko ni eeemɔ lo? Ani jata oblayoo woɔ egbee yɛ ebu mli kɛji emɔko loo ko lo?

⁵ Ani loofɔlɔ duɔ tsɔne yɛ shikpɔŋ kɛji atsɔ̃ko lɛ tsɔne yɛ jɛi lo? Ani tsɔne fɛɔ yɛ shikpɔŋ be mli ni eduko nɔ ko?

⁶ Ani tɛtɛrɛmantɛrɛ gbɛɔ yɛ maŋ ni maŋbii lɛ hɛleee shi lo? Ani amane baa maŋ ko nɔ ni jeee Yehowa dɛŋ ejɛ lo?

⁷ Eji anɔkwale akɛ Nuŋtsɔ Nyɔŋmɔ efeee nɔ ko ni ejieee eyiŋtoo lɛ kpo etsɔ̃ɔɔ etsuji gbalɔi lɛ.

⁸ Kɛji jata miihuu lɛ, namɔ sheee gbeyei? Kɛji Nuŋtsɔ Nyɔŋmɔ ewie lɛ, namɔ baakwa akɛ eshiɛɛɛ gbalɛ ni akɛhã lɛ lɛ?

Samaria hiɛkpãtãmɔ

⁹ Kɛɛmɔ mɛi fɛɛ ni yɔɔ Ashdod kɛ Ijipt mɔji lɛ amli lɛ akɛ, “Nyɛyabuaa nyɛhe naa yɛ Samaria gɔji lɛ anɔ koni nyɛkwɛa basabasa ni afeɔ kɛ niseniianii ni yaa nɔ yɛ Samaria.”

¹⁰ Yehowa kɛɛ akɛ, “Amɛkɛ yiwalɛ kɛ juu buaa nibii anaa yɛ mɔji lɛ amli. Amɛleee nɔ ni ja gbɛ feemɔ tete.

¹¹ No hewɔ lɛ, Yehowa kɛɛ akɛ, ‘Henyɛlɔi aaabɔle shikpɔŋ lɛ kɛaakpe, ni amɛaakumɔ nibii ni akɛfãa shikpɔŋ lɛ he lɛ amɛshwie shi, ni amɛaaha mɔji lɛ amli nii ofɔ̃ kɛya.’ ”

¹² Yehowa kɛɛ akɛ, “Bɔ ni tookwɛlɔ shɔ̃ɔ too shuɔji enyɔ loo etoi kuku kɛkɛ po yɛ jata daaŋ lɛ, nakai kɛji eshwɛ saatso tso kuku kɛkɛ loo saashwɛ tete akɛbaahere Israelbii ni yɔɔ Samaria lɛ ayiwala.”

¹³ Nuŋtsɔ Nyɔŋmɔ, Taiatsɛ lɛ, kɛɛ akɛ, “Nyɛboa toi, ni nyɛkɛa Yakob shwiei lɛ

¹⁴ akɛ, gbi nɔ ni mibagbala Israelbii atoi yɛ amɛtoigbele hewɔ lɛ, mibakpãtã Betel afɔleshãa latɛi lɛ hu ahiɛ. Abaakumɔ akloŋtoi ni yɔɔ afɔleshãa latɛi nɛɛ akoji lɛ ashwie shi.

¹⁵ Shĩa ni ama ato fɛ̃i be kɛ nɔ ni ama ato latsaa be hu mibakpãtã fɛɛ hiɛ shi kome; shĩai ni akɛ shuɔ wu esaa amɛmli fɛɛ baatsɔ̃ amaŋfɔ̃; ni shĩa wulu fɛɛ shĩa wulu hiɛ baakpãtã,” Yehowa kɛɛ.