Amos 1 - ŊMALƐ KRƆŊKRƆŊ LƐ

¹ Amos, ni ji tookwɛlɔ ko ni jɛ Tekoa maŋ lɛ mli lɛ, gbalɛ wiemɔi nɛ. Naa Nyɔŋmɔ jie ninaa nɛɛ yɛ Israel he etsɔ̃ɔ Amos afii enyɔ dani shikpɔŋ hoso, be mli ni Uzia yeɔ Yuda maŋtsɛ, ni Yeroboam, Yehoash bi lɛ, hu yeɔ Israel maŋtsɛ lɛ.

² Amos kɛɛ akɛ, “Yehowa miihũu tamɔ jata yɛ Zion Gɔŋ lɛ nɔ, ni egbee miishi yɛ Yerusalɛm. Shikpɔji lɛ anɔ jwɛi fɔ aaaŋala, ni Karmel Gɔŋ lɛ yiteŋ aaagbi.”

Nyɔŋmɔ baagbala mɛi ni bɔle Israel he lɛ atoi

³ Bɔ ni Yehowa kɛɛ nɛ, “Tɔ̃mɔi babaoo ni Damaskobii etɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ amɛgbɛlɛ Gileadbii tamɔ akɛ dade gbɛlɛɔ nii.

⁴ No hewɔ lɛ, mibama Maŋtsɛ Hazael maŋtsɛ we lɛ naa la, ni la nɛɛ baashã Maŋtsɛ Ben-Hadad mɔji fɛɛfɛji lɛ fɛɛ.

⁵ Mibakumɔ Damasko maŋ lɛ naa agboi lɛ mashwie shi; mibaplene Aven Jɔɔ lɛ mli gbɔmɛi lɛ kɛ lumɔ ni yeɔ Bet-eden nɔ lɛ hu, ni mibaŋɔ Siria shikpɔŋ lɛ nɔ bii lɛ anom kɛya Kir shikpɔŋ lɛ nɔ. Yehowa ni kɛɛ.”

Filistia

⁶ Bɔ ni Yehowa kɛɛ nɛ, “Tɔ̃mɔi babaoo ni Gazabii etɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ amɛŋɔ jaku muu fɛɛ nom kɛtee amɛyahã Edombii.

⁷ No hewɔ lɛ, mibama Gaza maŋ lɛ he gbogbo lɛ naa la, ni ebaashã maŋ lɛ mli mɔji lɛ fɛɛ.

⁸ Mibaplene Ashdod maŋ lɛ mli bii kɛ lumɔ ni yeɔ Ashkelon nɔ lɛ hu; ni mibatsɔ̃ mihiɛ mawo Ekron hu, ni mibakpãtã Filistibii ni baashwɛ lɛ fɛɛ ahiɛ.”

Tiro

⁹ Bɔ ni Yehowa kɛɛ nɛ, “Tɔ̃mɔi babaoo ni Tiro etɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ amɛŋɔ maŋ muu lɛ fɛɛ amɛwo Edom dɛŋ, ni amɛkaiii kwraa nyɛmimɛi akpãŋmɔ ni yɔɔ amɛteŋ lɛ.

¹⁰ No hewɔ lɛ, mibama Tiro maŋ lɛ he gbogbo lɛ naa la, ni ebaashã maŋ lɛ mli mɔji fɛɛfɛji lɛ fɛɛ.”

Edom

¹¹ Bɔ ni Yehowa kɛɛ nɛ, “Tɔ̃mɔi babaoo ni Edombii tɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ amɛtse klante yɛ amɛnyɛmimɛi Israelbii lɛ anɔ, ni amɛgbe amɛ bɔ ni musuŋtsɔlɛ ko bɛ mli kwraa; amɛniŋ nii ahe aahu, ni amɛŋmɛɛɛ mlifu he kwrakwra.

¹² No hewɔ lɛ, mibama Teman maŋ lɛ naa la, ni la nɛɛ baashã Bazra mɔji lɛ fɛɛ.”

Amon

¹³ Bɔ ni Yehowa kɛɛ nɛ, “Tɔ̃mɔi babaoo ni Amonbii etɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ taitai ni amɛfãfãa bɔ ni afee ni amɛlɛɛ amɛshikpɔŋ lɛ husui amli hewɔ lɛ, amɛgbalagbalaa Gilead yeihɔlɔi amusui amli, ni bii lɛ je shwie shi.

¹⁴ No hewɔ lɛ, mibama Raba maŋ lɛ he gbogbo lɛ naa la, ni ebaashã emli mɔji lɛ. Gbi lɛ abaabɔ tawuu oshe, ni ta lɛ naa baawa tamɔ ahum ni efã.

¹⁵ Abaaŋɔ amɛmaŋtsɛ lɛ kɛ elumɛi lɛ fɛɛ nom kɛaatee. Yehowa ni kɛɛ.”