Bɔfoi 9 - ŊMALƐ KRƆŊKRƆŊ LƐ

Saul tsuitsakemɔ

¹ Shi Saul kã he ekɛ gbele miiwo Nuŋtsɔ lɛ kaselɔi lɛ ahe gbeyei lolo, ni eyiŋ kɛtee osɔfonukpa lɛ ŋɔɔ,

² ni eyabi lɛ woji ni ekɛya Damasko kpeehei lɛ, bɔ ni afee ni kɛji ena mɛi komɛi ni hiɛ nɛkɛ tsɔ̃ɔmɔ nɛɛ mli lɛ, hii jio, yei jio, ni efimɔ amɛ ni ekpala amɛ kɛba Yerusalɛm.

³ Shi be ni enyiɛ gbɛ lɛ nɔ ni eebɛŋkɛ Damasko lɛ, trukaa lɛ la kpɛ kɛjɛ ŋwɛi kɛbabɔle lɛ,

⁴ ni eflɛo egbee shi, ni enu gbee ko ni miikɛɛ lɛ akɛ, “Saul, Saul, mɛɛba owaa mi yi?”

⁵ Ni ekɛɛ, “Bo namɔŋ, Nuŋtsɔ?” Shi Nuŋtsɔ lɛ kɛɛ, “Mi Yesu, mɔ ni owaa lɛ yi lɛ. Ewa hã bo akɛ ooofã ntia oshi kooloi akpalamɔtso lɛ naa dade lɛ.”

⁶ Ni ekɛ hekpokpomɔ kɛ ŋmiŋmi kɛɛ akɛ, “Nuŋtsɔ, mɛni otaoɔ akɛ mifee?” Ni Nuŋtsɔ lɛ kɛɛ lɛ akɛ, “Tee shi ni oya maŋ lɛ mli, ni aaatsɔ̃ɔ bo nɔ ni sa akɛ ofee.”

⁷ Shi hii ni kɛ lɛ nyiɛ lɛ etɔ mu kɛdamɔ shi, amɛmiinu gbee lɛ moŋ, shi amɛnaaa mɔ ko mɔ ko.

⁸ Ni Saul te shi; shi be ni egbele ehiŋmɛii lɛ, enaaa nii; ni amɛmɔ enine mli, ni amɛkɛ lɛ tee Damasko.

⁹ Ni enaaa nii, ni asaŋ eyeee nii ni enuuu nɔ ko hu gbii etɛ̃.

¹⁰ Shi kaselɔ ko yɛ Damasko ni atsɛɔ lɛ Anania; ni Nuŋtsɔ lɛ kɛɛ lɛ yɛ ninaa mli akɛ, “Anania!” Ni ekɛɛ, “Naa mi, Nuŋtsɔ.”

¹¹ Ni Nuŋtsɔ lɛ kɛɛ lɛ akɛ, “Tee shi ni oya blohu ni atsɛɔ lɛ Trɔmɔɔ lɛ mli, ni oyabi mɔ ko ni atsɛɔ lɛ Saul ni jɛ Tarso lɛ shi yɛ Yuda we lɛ; ejaakɛ naa, eesɔle,

¹² ni Saul na yɛ ninaa mli akɛ nuu ko ni atsɛɔ lɛ Anania lɛ miiba eŋɔɔ, ni ekɛ enine miiŋmɛ enɔ, bɔ ni afee ni ena nii ekoŋŋ.”

¹³ Shi Anania here nɔ ni ekɛɛ, “Nuŋtsɔ, minu nɛkɛ nuu nɛɛ he sane yɛ mɛi pii anaa, akɛ efee omɛi krɔŋkrɔŋi ni yɔɔ Yerusalɛm lɛ efɔŋ babaoo;

¹⁴ ni biɛ hu tete ena hegbɛ kɛjɛ osɔfonukpai lɛ adɛŋ akɛ ebafimɔ mɛi fɛɛ ni tsɛɔ ogbɛi lɛ.”

¹⁵ Shi Nuŋtsɔ lɛ kɛɛ lɛ akɛ, “Yaa, ejaakɛ mɔ nɛ ji midɛŋ dade ni mihala mihã mihe koni ehiɛ migbɛi lɛ kɛya jeŋmaji lɛ kɛ maŋtsɛmɛi kɛ Israelbii lɛ hu ahiɛ.

¹⁶ Mibatsɔ̃ɔ lɛ amanehului abɔ ni sa akɛ ena yɛ migbɛi lɛ hewɔ.”

¹⁷ Kɛkɛ ni Anania yiŋ etee ni eyabote shĩa lɛ, ni ekɛ eniji shwie enɔ ni ekɛɛ, “Anyɛmi Saul! Nuŋtsɔ Yesu, mɔ ni jie ehe kpo etsɔ̃ɔ bo be ni obaa yɛ gbɛ lɛ nɔ lɛ, etsu mi oŋɔɔ, bɔ ni afee ni ona nii ekoŋŋ ni oyi obɔ̃ kɛ Mumɔ Krɔŋkrɔŋ lɛ.”

¹⁸ Ni amrɔ lɛ nibii komɛi jɛ ehiŋmɛii anɔ shwie shi tamɔ loototoi, ni ena nii, ni ete shi ni abaptisi lɛ;

¹⁹ ni eye nii, ni ehe wa lɛ.

Saul shiɛmɔ yɛ Damasko

²⁰ Ni amrɔ lɛ nɔŋŋ eshiɛ yɛ kpeehei lɛ akɛ Yesu ji Nyɔŋmɔ Bi lɛ.

²¹ Ni mɛi fɛɛ ni nu lɛ anaa kpɛ amɛhe, ni amɛkɛɛ, “Ani jeee mɔ nɛ kpãtã mɛi ni tsɛɔ Yesu gbɛi lɛ ahiɛ yɛ Yerusalɛm lɛ, ni jeee no hewɔ nɔŋŋ eba biɛ hu tete koni ebafimɔ amɛ ni ekpala amɛ kɛya osɔfonukpai lɛ aŋɔɔ?”

²² Shi Saul lɛ, ena hewalɛ babaoo, ni ehã Yudafoi ni yɔɔ Damasko lɛ anaa tã, ejaakɛ etsɔ̃ɔ amɛ faŋŋ akɛ mɔ nɛ ji Kristo lɛ.

Saul je Yudafoi lɛ adɛŋ

²³ Shi gbii kplaŋŋ sɛɛ lɛ, Yudafoi lɛ to eyi nɔ apam akɛ amɛaagbe lɛ.

²⁴ Ni Saul banu amɛkpãŋmɔ lɛ he. Shi amɛbuɔ maŋ agboi lɛ anaa daa shwane kɛ nyɔɔŋ, bɔ ni afee ni amɛgbe lɛ.

²⁵ Shi ekaselɔi lɛ kɛ lɛ wo kafu mli nyɔɔŋ, ni amɛshiu lɛ kɛtsɔ̃ gbogbo lɛ nɔ kɛyayi shi.

Saul yɛ Yerusalɛm

²⁶ Ni be ni Saul ba Yerusalɛm lɛ, eka kaselɔi lɛ ahe kpɛtɛmɔ, shi amɛ fɛɛ amɛmiishe lɛ gbeyei, amɛheee amɛyeee akɛ kaselɔ ji lɛ.

²⁷ Shi Barnaba ŋɔ lɛ kɛtee bɔfoi lɛ aŋɔɔ, ni eyagba amɛ bɔ ni ena Nuŋtsɔ lɛ yɛ gbɛ lɛ nɔ ni ekɛ lɛ wie, kɛ bɔ ni efee ekãa yɛ Yesu gbɛi lɛ mli yɛ Damasko.

²⁸ Ni ekɛ amɛ yaa baa yɛ Yerusalɛm, ni eshiɛ kɛ ekãa yɛ Nuŋtsɔ lɛ gbɛi lɛ mli.

²⁹ Ni ekɛ Helenibii lɛ wie ni ekɛ amɛ taa naa; shi amɛka lɛ gbee.

³⁰ Be ni nyɛmimɛi lɛ nu he lɛ amɛkɛ lɛ tee Kaisarea, ni amɛwo lɛ gbɛ kɛtee Tarso.

³¹ Agbɛnɛ asafo lɛ na hejɔlɛ yɛ Yudea kɛ Galilea kɛ Samaria fɛɛ, ni enane mɔ shi, ni enyiɛɔ yɛ Nuŋtsɔ lɛ gbeyeishemɔ mli, ni ekɛ Mumɔ Krɔŋkrɔŋ miishɛjemɔ lɛ shwereɔ.

Petro tsa Ainea yɛ Lida

³² Shi eba mli akɛ, be ni Petro eyakpa hei lɛ fɛɛ lɛ, eba mɛi krɔŋkrɔŋi ni yɔɔ Lida lɛ hu aŋɔɔ.

³³ Ni ebana nuu ko yɛ jɛi ni atsɛɔ lɛ Ainea ni ekɛ kuumɔhela ekã saa nɔ afii kpaanyɔ sɔŋŋ.

³⁴ Ni Petro kɛɛ lɛ akɛ, “Ainea, Yesu Kristo miitsa bo; tee shi ni bo diɛŋtsɛ oŋmɛ osaa lɛ!” Ni amrɔ lɛ ete shi.

³⁵ Ni mɛi fɛɛ ni yɔɔ Lida kɛ Sharon lɛ na lɛ, ni amɛtsake ni amɛba Nuŋtsɔ lɛ ŋɔɔ.

Petro tee Dorka shi yɛ Yopa

³⁶ Shi yoo kaselɔ ko yɛ Yopa ni atsɛɔ lɛ Tabita, eshishi ji Dorka. Nitsumɔi kpakpai kɛ ejurɔfeemɔ eyi yoo nɛɛ obɔ̃.

³⁷ Shi eba mli akɛ nakai bei lɛ amli lɛ, ehe baye ni egbo. Ni amɛju ehe ni amɛkɛ lɛ yaŋmɛ ŋwɛitsu ko mli.

³⁸ Lida kɛ Yopa jɛkɛɛɛ kwraa, ni be ni kaselɔi lɛ nu akɛ Petro yɛ Lida lɛ, amɛtsu hii enyɔ kɛtee eŋɔɔ amɛyakpa lɛ fai akɛ ekashashao shi, shi eba amɛŋɔɔ oya.

³⁹ Ni Petro te shi ni ekɛ amɛ tee. Ni be ni eshɛ jɛi lɛ, amɛkɛ lɛ tee ŋwɛitsu lɛ mli, ni yei okulafoi lɛ fɛɛ badamɔdamɔɔ emasɛi amɛmiifofoi, ni amɛkɛ flakai kɛ atadei ni Dorka fee be ni ekɛ amɛ yɔɔ lolo lɛ miitsɔ̃ɔ lɛ.

⁴⁰ Ni Petro shwie amɛ fɛɛ kɛje kpo, ni ekula shi esɔle, ni etsɔ̃ ehiɛ ehã gbonyo lɛ ni ekɛɛ, “Tabita, tee shi!” Ni egbele ehiŋmɛii, ni be ni ena Petro lɛ, ete shi eta shi.

⁴¹ Ni Petro mɔ enine mli, ni ewo enɔ; ni etsɛ mɛi krɔŋkrɔŋi lɛ kɛ okulafoi lɛ kɛba, ni ekɛ lɛ damɔ amɛhiɛ hiɛkãalɔ.

⁴² Ni anu he yɛ Yopa fɛɛ, ni mɛi pii he Nuŋtsɔ lɛ nɔ amɛye.

⁴³ Ni Petro hi Yopa gbii kplaŋŋ yɛ wolokpoolɔ ko ni atsɛɔ lɛ Simon lɛ ŋɔɔ.