Bɔfoi 8 - ŊMALƐ KRƆŊKRƆŊ LƐ

Saul wa Asafo lɛ yi

¹ Shi gbe ni agbe Stefano lɛ ŋɔɔ Saul hu naa. Ni nakai gbi lɛ nɔ nɔŋŋ lɛ yiwaa kpele te shi wo asafo ni yɔɔ Yerusalɛm lɛ; ni amɛ fɛɛ amɛgbɛ amɛshwã Yudea kɛ Samaria shikpɔŋ lɛ nɔ; bɔfoi lɛ kɛkɛ shwɛ.

² Hii Nyɔŋmɔ gbeyeishelɔi komɛi yato Stefano, ni amɛfo lɛ pam.

³ Shi Saul bɔ mɔdɛŋ akɛ ekpãtã asafo lɛ hiɛ, ni ejɛɔ shĩa kɛyaa shĩa ni eyagbalaa hii kɛ yei ni eyawoɔ amɛ tsuŋ.

Ashiɛ Sanekpakpa lɛ yɛ Samaria

⁴ Kɛkɛ ni mɛi ni egbɛ eshwã lɛ yakpa shi, ni amɛjaje Sanekpakpa lɛ.

⁵ Ni Filipo tee Samaria maŋ ko nɔ, ni eyashiɛ Kristo he sane etsɔ̃ɔ jɛi bii lɛ.

⁶ Ni mɛi babaoo kɛ jwɛŋmɔ kome bo wiemɔi ni Filipo wieɔ lɛ toi be ni amɛnu ni amɛna okadii ni efee lɛ.

⁷ Ejaakɛ mɛi pii ni mumɔi fɔ̃ji yɔɔ amɛmli lɛ amumɔi lɛ bolɔ kɛ gbee ni wa ni amɛje amɛmli, ni atsa mɛi ni ekumɔ kɛ obubuafoi pii hu.

⁸ Ni miishɛɛ babaoo ba nakai maŋ lɛ mli.

Simon ŋkunyaayelɔ lɛ

⁹ Shi nuu ko yɛ maŋ lɛ mli momosa ni atsɛɔ lɛ Simon ni eyeɔ ŋkunyaa ni ehãa Samariabii lɛ anaa kpɛɔ amɛhe, etsɔ̃ɔ ehe akɛ gbɔmɔ agbo ji lɛ;

¹⁰ ni mɛi bibii kɛ mɛi wuji fɛɛ boɔ lɛ toi amɛkɛɔ akɛ, “Mɔ nɛ ji Nyɔŋmɔ hewalɛ ni atsɛɔ lɛ Hewalɛ Kpeteŋkple lɛ.”

¹¹ Ni akɛni ejɛ jeeŋmɔ beebe ekɛ ekunyaayeli lɛ ehã amɛnaa ekpɛ amɛhe hewɔ lɛ, amɛboɔ lɛ toi.

¹² Shi be ni amɛhe Filipo ni jaje Nyɔŋmɔ maŋtsɛyeli lɛ kɛ Yesu Kristo gbɛi lɛ he Sanekpakpa lɛ etsɔ̃ɔ amɛ lɛ amɛye lɛ, abaptisi hii kɛ yei fɛɛ.

¹³ Kɛkɛ ni Simon diɛŋtsɛ hu he ye, ni abaptisi lɛ, ni ekɛ ehe kpɛtɛ Filipo, ni be ni ena okadii ni afee kɛ hewalɛ nitsumɔi wuji ni atsu lɛ, enaa kpɛ ehe.

¹⁴ Be ni bɔfoi lɛ ni yɔɔ Yerusalɛm lɛ nu akɛ Samariabii emɔ Nyɔŋmɔ wiemɔ lɛ mli lɛ, amɛtsu Petro kɛ Yohane kɛtee amɛŋɔɔ.

¹⁵ Ni be ni amɛshɛ jɛi lɛ amɛkpa Nyɔŋmɔ fai amɛhã amɛ, bɔ ni afee ni amɛna Mumɔ Krɔŋkrɔŋ lɛ,

¹⁶ ejaakɛ ebako amɛteŋ mɔ ko mɔ ko nɔ, shi baptisimɔ kɛkɛ abaptisi amɛ awo Nuŋtsɔ Yesu gbɛi mli.

¹⁷ Kɛkɛ ni amɛkɛ amɛniji ŋmɛ̃lɛ amɛnɔ, ni amɛna Mumɔ Krɔŋkrɔŋ lɛ.

¹⁸ Shi be ni Simon na akɛ bɔfoi lɛ aniji kɛ mɛi anɔ ŋmɛ̃lɛmɔ lɛ hãa anaa Mumɔ Krɔŋkrɔŋ lɛ, ekɛ shika ba ebahã amɛ

¹⁹ ekɛɛ, “Nyɛhãa mi hu nɛkɛ hewalɛ nɛɛ koni mɔ fɛɛ mɔ ni mikɛ miniji aaaŋmɛ̃ enɔ lɛ ana Mumɔ Krɔŋkrɔŋ lɛ.”

²⁰ Shi Petro kɛɛ lɛ akɛ, “Okɛ oshika lɛ fɛɛ hiɛ akpãtã, ejaakɛ osusuɔ akɛ Nyɔŋmɔ nɔkeenɔ lɛ shika akɛheɔ!

²¹ Obɛ gbɛnaa loo gbɛfaŋ nɔ ko yɛ nɛkɛ sane nɛɛ mli; ejaakɛ otsui ejaaa yɛ Nyɔŋmɔ hiɛ.

²² No hewɔ lɛ, agbɛnɛ shwa ohe yɛ onɔsha nɛɛ hewɔ, ni okpa Nyɔŋmɔ fai, akɛ aleenɔ akɛ otsuiŋ jwɛŋmɔ lɛ aaafa bo lo.

²³ Ejaakɛ mina akɛ hiɛkɔ̃ɔ eyi bo obɔ̃ tamɔ kɔlikɔ joomɔ ni nɔ̃ sha kpãa lɛ mli oyɔɔ nɛɛ.”

²⁴ Ni Simon here nɔ ekɛɛ, “Nyɛ diɛŋtsɛ nyɛkpaa Nuŋtsɔ lɛ fai nyɛhãa mi koni nibii ni nyɛwie nɛɛ eko akaba minɔ.”

²⁵ Agbɛnɛ, be ni amɛye odase ni amɛshiɛ Nuŋtsɔ lɛ wiemɔ lɛ ni amɛku amɛsɛɛ kɛmiiba Yerusalɛm lɛ, amɛjaje Sanekpakpa lɛ amɛtsɔ̃ɔ yɛ Samariabii akrowai pii amli.

Filipo kɛ Etiopia piafonyo lɛ

²⁶ Shi Nuŋtsɔ lɛ bɔfo ko kɛ Filipo bawie akɛ, “Tee shi ni oya wuoyigbɛ yɛ tɛmpɔŋ ni kã shiaŋa lɛ nɔ kɛjɛ Yerusalɛm kɛyaa Gaza lɛ nɔ.”

²⁷ Ni ete shi ni eyiŋ etee. Ni naa, Etiopiabii amaŋnyɛ Kandake lɛ piafonyo ni ji esɔ̃ɔlɔnukpa ni kwɛɔ ejwetri fɛɛ nɔ lɛ nɛ; ebaho Yerusalɛm eyaja Nyɔŋmɔ,

²⁸ ni agbɛnɛ eku esɛɛ eta eshwiili mli kɛmiiya ni eekane gbalɔ Yesaia wolo lɛ.

²⁹ Mumɔ lɛ kɛɛ Filipo akɛ, “Yaa ni okɛ ohe ayakpɛtɛ shwiili lɛ he.”

³⁰ Shi be ni Filipo wo foi kɛtee lɛ, enu akɛ eekane Yesaia wolo lɛ, ni ebi lɛ akɛ, “Ani oonu nɔ ni okaneɔ lɛ shishi lo?

³¹ Ni ekɛɛ, “Te mafee tɛŋŋ ni manyɛ manu shishiŋ, akɛ ja mɔ ko tsɔ̃ɔ mi dã?” Kɛkɛ ni ekpa Filipo fai akɛ eba ni ekɛ lɛ abata shi.

³² Shi ŋmalɛ lɛ he ni ekaneɔ lɛ nɛ, “Akpala lɛ kɛtee tamɔ too gwantɛŋ ni ayaagbe lɛ, ni bɔ ni too gwantɛŋbi feɔ dioo yɛ ehetsɔikulɔ hiɛ lɛ, nakai nɔŋŋ etswaaa esɛŋ.

³³ Be ni aba lɛ shi lɛ akojooo lɛ jalɛ naa; shi eshwiei lɛ, namɔ aaagba amɛhe sane? Ejaakɛ afo ewala sɛɛ kɛjɛ shikpɔŋ lɛ nɔ.”

³⁴ Ni piafonyo lɛ bi Filipo akɛ, “Miikpa bo fai, namɔ he gbalɔ lɛ wieɔ nɛɛ, lɛ diɛŋtsɛ loo mɔ kroko?”

³⁵ Ni Filipo gbele enaa ni eje shishi kɛjɛ ŋmalɛ nɛɛ nɔ, ni ejaje Yesu he Sanekpakpa lɛ etsɔ̃ɔ lɛ.

³⁶ Ni be ni amɛnyiɛ gbɛ lɛ nɔ lɛ, amɛbashɛ nu ko he, ni piafonyo lɛ kɛɛ, “Naa nu; mɛni tsiɔ mibaptisimɔ gbɛ?” [

³⁷ Shi Filipo kɛɛ, “Kɛji ohe oye kɛ otsuiŋ fɛɛ lɛ, oyɛ hegbɛ.” Ni ehere nɔ ekɛɛ, “Miihe miiye akɛ Yesu Kristo ji Nyɔŋmɔ Bi lɛ.”]

³⁸ Ni efã akɛ shwiili lɛ awa, ni Filipo kɛ piafonyo lɛ fɛɛ yimɔ shi kɛtee nu lɛ mli, ni ebaptisi lɛ.

³⁹ Ni be ni amɛje nu lɛ mli lɛ Nuŋtsɔ lɛ Mumɔ lɛ sha Filipo kɛtee; ni piafonyo lɛ enaaa lɛ dɔŋŋ, shi eyi gbɛ kɛ nyamɔ.

⁴⁰ Shi Filipo lɛ, ana lɛ yɛ Azotu; ni be ni efoɔ mli lɛ, ejaje Sanekpakpa lɛ etsɔ̃ɔ yɛ maji lɛ fɛɛ mli kɛyashi ebashɛ Kaisarea.