Bɔfoi 6 - ŊMALƐ KRƆŊKRƆŊ LƐ

Ohiafoi akwɛlɔi kpawo lɛ ahalamɔ

¹ Nakai bei lɛ amli, be ni kaselɔi lɛ ayi faa lɛ, Helenibii lɛ wie huhuuhu amɛshi Hebribii lɛ, ejaakɛ Hebribii lɛ ahiɛ jeɔ Helenibii lɛ okulafoi lɛ anɔ yɛ daa kwɛmɔ lɛ gbɛfaŋ.

² Kɛkɛ ni kaselɔi nyɔŋma kɛ enyɔ lɛ tsɛ asafo lɛ kɛba, ni amɛkɛɛ, “Esaaa akɛ wɔshiɔ Nyɔŋmɔ wiemɔ lɛ ni wɔyasɔ̃mɔɔ yɛ okpɔlɔi ahe.

³ No hewɔ lɛ, anyɛmimɛi, nyɛtaoa nyɛteŋ hii kpawo ni yɔɔ gbɛi kpakpa ni Mumɔ Krɔŋkrɔŋ kɛ nilee eyi amɛ obɔ̃, koni wɔkɛ amɛ ato nɛkɛ nitsumɔ ni he hiaa nɛɛ nɔ;

⁴ shi wɔ lɛ wɔɔhiɛ sɔlemɔ kɛ wiemɔ lɛ he sɔ̃ɔmɔ lɛ mli.”

⁵ Ni wiemɔ lɛ sa asafo muu lɛ fɛɛ hiɛ; ni amɛfamɔ Stefano, nuu ko ni hemɔkɛyeli kɛ Mumɔ Krɔŋkrɔŋ eyi lɛ obɔ̃, kɛ Filipo kɛ Prokoro kɛ Nikanora kɛ Timon kɛ Parmena kɛ Nikolao ni emɔ Yudafoi ajamɔ mli ni ejɛ Antiokia lɛ,

⁶ ni amɛkɛ mɛnɛɛmɛi badamɔ bɔfoi lɛ ahiɛ; ni amɛsɔle ni amɛkɛ amɛniji shwie amɛnɔ.

⁷ Ni Nyɔŋmɔ wiemɔ lɛ shwere, ni kaselɔi lɛ ayi bafa diɛŋtsɛ yɛ Yerusalɛm, ni osɔfoi lɛ tete ateŋ mɛi pii mɔ hemɔkɛyeli lɛ mli.

Stefano mɔ̃mɔ

⁸ Ni Stefano, mɔ ni dromɔ kɛ hewalɛ eyi lɛ obɔ̃ lɛ, fee naakpɛɛnii kɛ okadii wuji yɛ maŋ lɛ mli.

⁹ Shi mɛi komɛi ni jɛ kpeehe ni atsɛɔ lɛ “Mɛi ni eye amɛhe” akpeehe lɛ, kɛ Kirenemɛi kɛ Aleksandriamɛi kɛ mɛi ni jɛ Kilikia kɛ Asia lɛ ateŋ mɛi komɛi te shi ni amɛkɛ Stefano taa naa;

¹⁰ shi amɛnyɛɛɛ Stefano nilee kɛ mumɔ ni ekɛwieɔ lɛ naa amɛdamɔ.

¹¹ Kɛkɛ ni amɛkɛ mɛi komɛi yafi ni amɛbakɛɛ akɛ, “Wɔnu akɛ ewie musubɔɔ wiemɔi eshi Mose kɛ Nyɔŋmɔ.”

¹² Ni amɛwo maŋbii lɛ kɛ maŋ onukpai lɛ kɛ mlatsɔɔlɔi lɛ ayiŋ, ni amɛte shi kɛba enɔ amɛbamɔ lɛ ni amɛkpala lɛ kɛtee akwaashɔŋ lɛ hiɛ.

¹³ Ni amɛkɛ amale odasefoi badamɔ shi, ni mɛnɛɛmɛi kɛɛ akɛ, “Be fɛɛ be lɛ nɛkɛ gbɔmɔ nɛɛ miiwie miishi he krɔŋkrɔŋ lɛ kɛ Mose Mla lɛ,

¹⁴ ejaakɛ wɔnu akɛ ekɛɛ akɛ Yesu, Nazarenyo lɛ, aaafite biɛ, ni eeetsake kusumi ni Mose kɛhã wɔ lɛ.”

¹⁵ Ni mɛi ni tara akwaashɔŋ lɛ mli lɛ fɛɛ tsu amɛhiŋmɛii amɛshwie enɔ, ni amɛna ehiɛ tamɔ Nyɔŋmɔ bɔfo hiɛ.