Bɔfoi 5 - ŊMALƐ KRƆŊKRƆŊ LƐ

Anania kɛ Safira

¹ Shi nuu ko ni atsɛɔ lɛ Anania kɛ eŋa Safira lɛ yahɔ̃ɔ shikpɔŋ ko,

² ni nuu lɛ kɛ yinii lɛ eko to sɛɛ, ni eŋa hu le he eko, ni ekɛ fã lɛ ba ni ekɛbashwie bɔfoi lɛ anajianaa.

³ Shi Petro kɛɛ, “Anania, mɛɛba Satan yi otsuiŋ obɔ̃, ni omale otsɔ̃ɔ Mumɔ Krɔŋkrɔŋ lɛ, ni okɛ shikpɔŋ lɛ yinii lɛ eko to sɛɛ?

⁴ Ani be ni eyɔɔ lɛ, jeee bo onɔ ni? Ni be ni ohɔ̃ɔ hu lɛ, shika lɛ jee bo diɛŋtsɛ onɔ ni? Mɛɛba oto nɛkɛ yiŋ? Jeee gbɔmɛi omale otsɔ̃ɔ nɛɛ, shi Nyɔŋmɔ moŋ.”

⁵ Ni be ni Anania nu nɛkɛ wiemɔi nɛɛ, egbee shi, ni egbo. Ni gbeyei kpele mɔmɔ mɛi fɛɛ ni nu lɛ.

⁶ Ni oblahii lɛ te shi, ni amɛbasaa lɛ kɛhã fuu, ni amɛwo lɛ kɛje kpo ni amɛyafu lɛ.

⁷ Ni aaafee ŋmɛlɛtswai etɛ̃ sɛɛ lɛ, eba mli akɛ eŋa ni leee nɔ sane ni eba lɛ hu ba jɛi.

⁸ Ni Petro bi lɛ akɛ, “Ani bɔ ni nyɛhɔ̃ɔ shikpɔŋ lɛ nyɛhe nɛ? Kɛɛmɔ mi.” Ni ekɛɛ, “Hɛɛ, nɛkɛŋ.”

⁹ Kɛkɛ ni Petro kɛɛ lɛ akɛ, “Te fee tɛŋŋ ni nyɛfee naabu kome koni nyɛkɛka Nuŋtsɔ lɛ Mumɔ lɛ nɛɛ? Naa, mɛi ni yafu owu lɛ anaji yɔɔ shinaa lɛ naa lɛ, ni amɛaawo bo hu kɛaatee.”

¹⁰ Kɛkɛ ni amrɔ lɛ nɔŋŋ egbee shi yɛ Petro najianaa, ni egbo. Ni be ni oblahii lɛ ba lɛ amɛbana akɛ egbo ni amɛwo lɛ kɛje kpo, ni amɛyafu lɛ yɛ ewu lɛ masɛi.

¹¹ Ni gbeyei kpeteŋkple mɔ asafo muu lɛ fɛɛ kɛ mɛi fɛɛ ni nu nii nɛɛ.

Okadii kɛ naakpɛɛnii

¹² Shi atsɔ̃ bɔfoi lɛ anine nɔ afee okadii kɛ naakpɛɛnii pii yɛ maŋ lɛ mli; ni amɛ fɛɛ amɛkɛ jwɛŋmɔ kome hi Solomon Ablanaa lɛ nɔ.

¹³ Shi mɛi ni eshwɛ lɛ ateŋ mɔ ko mɔ ko ekaaa akɛ ekɛ yiŋ flɛflɛ aaayakpɛtɛ amɛhe, shi maŋ lɛ buɔ amɛ naakpa.

¹⁴ Ni asaŋ akɛ mɛi ni heɔ Nuŋtsɔ lɛ nɔ yeɔ, hii kɛ yei babaoo, bafata amɛhe,

¹⁵ aahu po ni aholeɔ helatsɛmɛi kɛbaa blohui amli abashwieɔ sai kɛ saatsei anɔ, koni kɛ Petro miiho lɛ, ehɔɔŋ kɛkɛ atsɔ̃ amɛteŋ mɛi komɛi anɔ.

¹⁶ Ni mɛi pii jɛ maji ni jwere Yerusalɛm hewɔ lɛ amli babua amɛhe naa, ni amɛhiɛ helatsɛmɛi kɛ mɛi ni mumɔi fɔ̃ji haoɔ amɛ kɛba, ni atsa amɛ fɛɛ.

Awa bɔfoi lɛ ayi

¹⁷ Kɛkɛ ni osɔfonukpa lɛ te shi kɛ mɛi fɛɛ ni kɛ lɛ yɔɔ ni ji Sadukifoi lɛ akuu lɛ, ni amɛhiɛ edɔ diɛŋtsɛ,

¹⁸ ni amɛbamɔmɔ bɔfoi lɛ, ni amɛyawo amɛ maŋ kpabuŋ.

¹⁹ Shi nyɔɔŋ lɛ Nuŋtsɔ lɛ bɔfo bagbele tsu lɛ shinai lɛ, ni ejie amɛ ekɛɛ,

²⁰ “Nyɛyaa nyɛyadamɔa Sɔlemɔ we lɛ nyɛjajea nɛkɛ wala nɛɛ wiemɔi lɛ fɛɛ nyɛtsɔ̃a maŋ lɛ!”

²¹ Ni be ni amɛnu lɛ, amɛyiŋ leebi maŋkpa amɛtee Sɔlemɔ we lɛ amɛyatsɔ̃ɔ nii. Agbɛnɛ osɔfonukpa lɛ kɛ mɛi ni kɛ lɛ yɔɔ lɛ ba ni amɛbatsɛ akwaashɔŋ lɛ kɛ Israelbii lɛ anukpai lɛ fɛɛ kɛkpe, ni amɛtsu kɛtee tsu lɛ mli koni ayajie bɔfoi lɛ kɛba.

²² Shi be ni tsuji lɛ ba jɛi lɛ, amɛnaaa amɛ yɛ tsu lɛ mli, ni amɛku amɛsɛɛ amɛbagba

²³ akɛ, “Tsu lɛ wɔna akɛ aŋa naa kpɛŋŋ, ni bulɔi lɛ hu damɔ shinai lɛ anaa; shi be ni wɔgbele lɛ, wɔnaaa mɔ ko yɛ mli.”

²⁴ Shi be ni osɔfo lɛ kɛ Sɔlemɔ we lɛ asafoiatsɛ lɛ kɛ osɔfonukpai lɛ nu nɛkɛ wiemɔi nɛɛ, amɛfee yaa yɛ bɔfoi lɛ ahe [ni amɛbi] akɛ, “Te enɛ naa yaakpa tɛŋŋ?”

²⁵ Ni mɔ ko ba bagba amɛ akɛ, “Naa, hii lɛ ni nyɛwo amɛ tsuŋ lɛ damɔ shi yɛ Sɔlemɔ we lɛ amɛmiitsɔ̃ɔ maŋ lɛ nii.”

²⁶ Kɛkɛ ni asafoiatsɛ lɛ kɛ tsuji lɛ yiŋ ni amɛyaŋɔ amɛ kɛba, jeee nɔnyɛɛ naa, ejaakɛ amɛmiishe maŋ lɛ gbeyei, ni akabatswia amɛ tɛi.

²⁷ Ni be ni amɛkɛ amɛ ba lɛ, amɛkɛ amɛ badamɔ akwaashɔŋ lɛ hiɛ; ni osɔfonukpa lɛ bi amɛ

²⁸ akɛ, “Ani wɔwooo nyɛ kitã kadikadi akɛ nyɛkatsɔ̃ɔ nii yɛ nɛkɛ gbɛi nɛɛ mli? Nyɛkwɛa bɔ ni nyɛhã Yerusalɛm eyi obɔ̃ kɛ nyɛtsɔ̃ɔmɔ lɛ, ni nyɛmiitao akɛ nyɛkɛ nɛkɛ nuu nɛɛ lá lɛ baa wɔnɔ.”

²⁹ Shi Petro kɛ bɔfoi lɛ here nɔ ni amɛkɛɛ, “Esa akɛ aboɔ Nyɔŋmɔ moŋ toi fe gbɔmɛi.

³⁰ Yesu ni nyɛsɛŋ lɛ yɛ tso nɔ ni nyɛgbe lɛ lɛ, wɔtsɛmɛi aNyɔŋmɔ lɛ tee lɛ shi;

³¹ lɛ enɔ Nyɔŋmɔ wo kɛtee eninejurɔ nɔ, ni ewo lɛ lumɔ kɛ yiwalaherelɔ, koni ehã Israel ana tsuitsakemɔ kɛ eshaifaa.

³² Ni wɔji saji nɛɛ ahe odasefoi, nakai nɔŋŋ ji Mumɔ Krɔŋkrɔŋ lɛ hu ni Nyɔŋmɔ kɛhã mɛi ni boɔ lɛ toi lɛ.”

³³ Shi be ni amɛnu lɛ ewo amɛmli la ni amɛto amɛyiŋ akɛ amɛaagbe amɛ.

³⁴ Shi Farisifonyo ko ni atsɛɔ lɛ Gamaliel, mlatsɔɔlɔ ni maŋ lɛ fɛɛ buɔ lɛ lɛ, te shi damɔ shi yɛ akwaashɔŋ lɛ teŋ, ni efã akɛ akɛ bɔfoi lɛ aje kpo fioo,

³⁵ ni ekɛɛ, “Ataamɛi Israelbii, nyɛkwɛa jogbaŋŋ yɛ nɛkɛ gbɔmɛi nɛɛ ahe, bɔ ni nyɛkɛ amɛ aaaye ahã.

³⁶ Ejaakɛ nyɛsɛɛ nɛɛ Teuda te shi ni ekɛɛ akɛ mɔ ko ji lɛ, ni hii aaafee ohai ejwɛ kɛ amɛhe yakpɛtɛ ehe; shi agbe lɛ, ni mɛi abɔ ni bo lɛ toi lɛ fɛɛ gbɛ shwã ni amɛyi hɛ shi.

³⁷ Mɔ nɛ sɛɛ lɛ Yuda, Galileanyo lɛ, te shi yɛ mɛi akanemɔ be lɛ mli, ni egbala asafo babaoo eshwie esɛɛ; lɛ hu ehiɛ kpãtã ni mɛi ni bo lɛ toi lɛ fɛɛ hu gbɛ shwã.

³⁸ No hewɔ lɛ, miikɛɛ nyɛ akɛ, nyɛŋmɛa gbɔmɛi nɛɛ ahe ni nyɛkadia amɛsɛɛ; ejaakɛ kɛ gbɔmɛi adɛŋ nɛkɛ yiŋtoo nɛɛ loo nɛkɛ nitsumɔ nɛɛ jɛ lɛ, ebaafite;

³⁹ shi kɛ Nyɔŋmɔ dɛŋ ejɛ lɛ, nyɛnyɛŋ lɛ nyɛfite, koni nyɛkabafee nyɛhe tamɔ mɛi ni kɛ Nyɔŋmɔ wuɔ.”

⁴⁰ Ni amɛbo lɛ toi, ni amɛtsɛ bɔfoi lɛ kɛba, ni amɛyi amɛ, ni amɛwo amɛ kitã akɛ amɛkawie yɛ Yesu gbɛi lɛ mli; ni amɛŋmɛɛ amɛhe.

⁴¹ Kɛkɛ ni amɛje akwaashɔŋ lɛ hiɛ amɛtee kɛ miishɛɛ, akɛ Yesu gbɛi lɛ hewɔ lɛ abu amɛ mɛi ni sa akɛ abɔ amɛ ahora.

⁴² Ni gbi fɛɛ gbi lɛ amɛfɔ̃ɔɔ nitsɔɔmɔ kɛ Yesu Kristo shiɛmɔ yɛ Sɔlemɔ we lɛ kɛ shĩai.