Bɔfoi 28 - ŊMALƐ KRƆŊKRƆŊ LƐ

Paulo yɛ Malita ŋshɔkpɔ lɛ nɔ

¹ Ni be ni wɔje mli sɔŋŋ lɛ, no dani wɔbale akɛ ŋshɔkpɔ lɛ gbɛi ji Malita.

² Jɛibii lɛ fee wɔ ejurɔ pii, ejaakɛ amɛshɛre la, ni amɛhere wɔ fɛɛ tswɛm hiɛmɛɛ yɛ nunɛmɔ babaoo kɛ fɛ̃i lɛ hewɔ.

³ Shi be ni Paulo bua lai ŋmɛŋmlɛbii anaa ni ekɛyawo la lɛ mli lɛ, shinɔ ko jɛ la grigri lɛ mli kpɛtɛ enine he.

⁴ Be ni jɛibii lɛ na kooloo lɛ kpɛtɛ enine he lɛ, amɛkɛɛkɛɛ amɛhe akɛ, “Bɔ fɛɛ bɔ ni fee lɛ, nɛkɛ nuu nɛɛ awuyelɔ ni, ni ahere eyiwala kɛjɛ ŋshɔ lɛ mli moŋ nɛ, shi oweletɔɔ eŋmɛ̃ɛɛ lɛ gbɛ ni eyi ana wala.”

⁵ Ni ehwanya kooloo lɛ ewo la lɛ mli, ni eyeee lɛ awui ko.

⁶ Amɛhiɛ kã nɔ akɛ eeefuufuu loo eeetswa shi egbo trukaa. Shi be ni amɛkwɛ aahu ni amɛna akɛ nɔ ko srɔto ko efeee lɛ lɛ, amɛtsake amɛjwɛŋmɔ ni amɛkɛɛ akɛ nyɔŋmɔ ko ji lɛ.

⁷ Ŋshɔkpɔ lɛ nɔ onukpa ni atsɛɔ lɛ Publio lɛ yɛ shikpɔji yɛ jɛi niiaŋ; gbɔmɔ nɛɛ here wɔ hiɛmɛɛ ni ekɛ tsuijurɔ fee wɔ gbɔ gbii etɛ̃ sɔŋŋ.

⁸ Eba mli akɛ Publio tsɛ kã shi kɛ atridii kɛ fɔ kɛ la wamɔ; ni Paulo tee eŋɔɔ, ni esɔle ekɛ eniji shwie enɔ ni etsa lɛ.

⁹ Be ni afee enɛ lɛ, mɛi krokomɛi hu ni he yeɔ yɛ ŋshɔkpɔ lɛ nɔ lɛ ba, ni atsa amɛ.

¹⁰ Ni amɛ hu amɛwo wɔhiɛ nyam babaoo, ni be ni wɔfã yɛ jɛi lɛ, amɛhã wɔ nibii ni he hiaa wɔ.

Paulo jɛ Malita kɛtee Roma

¹¹ Ni nyɔji etɛ̃ sɛɛ lɛ wɔyabote Aleksandria lɛlɛ ko ni ekadimɔ ji Dioskurioi (loo nyɔŋmɔi hãaji) ni ebaye fɛ̃ibe lɛ yɛ ŋshɔkpɔ lɛ nɔ lɛ mli, ni wɔfã kɛtee.

¹² Wɔyadamɔ Sirakusa ni wɔhi jɛi gbii etɛ̃.

¹³ Ni wɔjɛ jɛi lɛ, wɔlɔgɔ shi kɛba Regio; ni enɔ jetsɛremɔ lɛ, be ni wuoyigbɛ kɔɔyɔɔ lɛ bɔ̃i tswaa lɛ, wɔyi mli, ni gbi ni ji enyɔ lɛ nɔ lɛ wɔshɛ Puteoli.

¹⁴ Jɛi wɔbana nyɛmimɛi komɛi yɛ; ni amɛkpa wɔ fai akɛ wɔkɛ amɛ ahi shi gbii kpawo. Kɛkɛ ni wɔyashɛ Roma.

¹⁵ Nyɛmimɛi ni yɔɔ jɛi lɛ nu wɔhe, ni amɛbakpee wɔ yɛ Apio jara nɔ kɛ Gbɔiatoohei Etɛ̃ lɛ; ni be ni Paulo na amɛ lɛ, eda Nyɔŋmɔ shi ni etsui nyɔ emli.

¹⁶ Ni be ni wɔbashɛ Roma lɛ, aŋmɛ Paulo gbɛ akɛ ekome ehi shi kɛ asraafonyo kome ni miibu ehe.

Paulo shiɛ yɛ Roma

¹⁷ Gbii etɛ̃ sɛɛ lɛ Paulo hã atsɛ Yudafoi lɛ anukpai ni yɔɔ lɛ kɛbakpe; ni be ni amɛnaa ebakpe shi lɛ, ekɛɛ amɛ akɛ, “Ataamɛi kɛ anyɛmimɛi, mitɔ̃ko maŋ lɛ loo wɔtsɛmɛi lɛ akusumi lɛ anɔ; kɛ̃lɛ akɛ mi wo Romabii lɛ adɛŋ yɛ Yerusalɛm akɛ gboklɛfonyo.

¹⁸ Be ni amɛtao misane lɛ mli lɛ, amɛsumɔ akɛ amɛŋmɛɛ mihe, ejaakɛ sane ko bɛ mihe kwraa ni sa gbele.

¹⁹ Shi akɛni Yudafoi lɛ ekpɛlɛ̃ɛɛ hewɔ lɛ, efi akɛ maŋɔ misane lɛ mahã Kaisare yeli, shi jeee akɛ miyɛ nɔ ko ni mikɛbaafolɔ mimaŋ lɛ naa.

²⁰ Nɛkɛ sane nɛɛ hewɔ mitsɛ nyɛ kɛba koni mana nyɛ ni mikɛ nyɛ awie ejaakɛ Israel hiɛnɔkãmɔ lɛ hewɔ ni awo mi nɛkɛ kɔsɔŋkɔsɔ nɛɛ.”

²¹ Shi amɛkɛɛ lɛ akɛ, “Wɔ lɛ wɔnako woji komɛi kɛjɛko Yudea yɛ ohe, ni asaŋ nyɛmimɛi lɛ ateŋ mɔ ko bako biɛ ebagbako ohe sane ko, ni mɔ ko ebawieko ohe wiemɔ fɔŋ ko.

²² Shi wɔmiisumɔ akɛ wɔle ojwɛŋmɔ, ejaakɛ nɛkɛ kuu nɛɛ wɔle akɛ he fɛɛ he lɛ awieɔ ashiɔ.”

²³ Ni be ni amɛto lɛ gbi lɛ, amɛteŋ mɛi pii ba eŋɔɔ yɛ etoohe lɛ, ni kɛjɛ leebi kɛyashi gbɛkɛ lɛ, ejaje Nyɔŋmɔ maŋtsɛyeli lɛ he sane etsɔ̃ɔ amɛ, ni eye he odase faŋŋ, ni ejɛ Mose Mla lɛ kɛ gbalɔi lɛ amli etao ni amɛyiŋ atsɔ̃ kɛba Yesu gbɛfaŋ.

²⁴ Ni mɛi komɛi he wiemɔi ni ewie lɛ amɛye, shi mɛi komɛi hu heee yeee.

²⁵ Ni akɛni amɛyakpãaa gbee hewɔ lɛ, amɛyiŋ amɛtee be ni Paulo wie wiemɔ nɛɛ, “Ojogbaŋŋ ni Mumɔ Krɔŋkrɔŋ lɛ kɛ wɔtsɛmɛi lɛ wie yɛ gbalɔ Yesaia naa

²⁶ akɛ, ‘Yaa maŋ nɛɛ ŋɔɔ ni oyakɛɛ, nu lɛ nyɛbaanu nɛ, shi nyɛnaŋ shishi. Ni na lɛ nyɛbaana nɛ, shi nyɛyoŋ sɛɛ.

²⁷ Ejaakɛ maŋ nɛɛ tsui ekpliŋ, ni amɛtoi wa kɛ ninumɔ, ni amɛmiamia amɛhiŋmɛii, koni amɛkana kɛ amɛhiŋmɛii ni amɛkanu kɛ amɛtoii. Ni amɛtsui hu akana shishi, ni amɛkpale ni mitsa amɛ.’

²⁸ “No hewɔ lɛ, nyɛnaa nyɛlea akɛ, atsu akɛ Nyɔŋmɔ yiwalaheremɔ lɛ eyahã jeŋmaji lɛ, ni amɛ lɛ amɛaabo toi hu.” [

²⁹ Ni be ni ewie wiemɔ nɛɛ lɛ, Yudafoi lɛ yi mli amɛtee, ni amɛjejee ŋwane babaoo yɛ amɛteŋ.]

³⁰ Ni Paulo hi shĩa ni lɛ diɛŋtsɛ eyaŋɔ mli afii enyɔ ni ehereɔ mɛi fɛɛ ni baa eŋɔɔ lɛ,

³¹ ni eshiɛɔ Nyɔŋmɔ Maŋtsɛyeli lɛ he sane lɛ, ni ekɛ ekãa fɛɛ jajeɔ Nuŋtsɔ Yesu Kristo he saji lɛ etsɔ̃ɔ amɛ, ni mɔ ko mɔ ko etsiii lɛ gbɛ.