Bɔfoi 27 - ŊMALƐ KRƆŊKRƆŊ LƐ

Akɛ Paulo tee Roma

¹ Ni be ni akpɛ mli akɛ wɔbaaya Italia lɛ, amɛŋɔ Paulo kɛ gboklɛfoi krokomɛi hu amɛwo asraafoiohaatsɛ ni atsɛɔ lɛ Yulio ni jɛ Augusto asafo lɛ mli lɛ dɛŋ.

² Shi be ni wɔbote Adramitio lɛlɛ ko ni baafã kɛyatsɔ̃ Asia ŋshɔnaa maji lɛ anɔ lɛ mli lɛ, wɔfã, ni Aristarko, Makedonianyo ni jɛ Tesalonika lɛ fata wɔhe.

³ Ni enɔ jetsɛremɔ lɛ wɔyamã Sidon, ni akɛni Yulio hiɛ Paulo dɔdɔɔdɔ hewɔ lɛ, eŋmɛ lɛ gbɛ akɛ eya eshieŋtsɛmɛi lɛ aŋɔɔ ni eyajɔɔ ehe.

⁴ Ni wɔfã yɛ jɛi lɛ wɔsharã Kipro meo lɛ ejaakɛ wɔmiikpee kɔɔyɔɔ.

⁵ Ni be ni wɔfo Kilikia kɛ Pamfilia ŋshɔ lɛ, wɔbamã Mira yɛ Likia.

⁶ Ni asraafoiohaatsɛ lɛ na Aleksandria lɛlɛ ko yɛ jɛi ni miiya Italia, ni ejie wɔ ewo no mli.

⁷ Wɔnyiɛ blɛoo gbii pii, ni ekpakpa ko dani wɔshɛ Knido ŋlɛnɔ, ni akɛni kɔɔyɔɔ lɛ eŋmɛɛɛ wɔ gbɛ hewɔ lɛ, wɔsharã Salmone meo lɛ kɛtsɔ̃ Kreta shishigbɛ;

⁸ ni ekpakpa ko dani wɔfo mli yɛ jɛi kɛba he ko ni atsɛɔ jɛi akɛ Lɛji adaamɔhe Fɛɛfɛo ni bɛŋkɛ Lasea maŋ lɛ.

⁹ Agbɛnɛ wɔfite be pii, ni akɛni buadayeli be lɛ hu eho momo hewɔ lɛ; ŋshɔhiɛnyiɛmɔ efee gbeyei. Hewɔ lɛ Paulo wo amɛ ŋaa

¹⁰ ekɛɛ, “Ataamɛi, mina akɛ amanehulu kɛ nilaajemɔ pii baaba gbɛfãa nɛɛ mli, ni jeee lɛlɛ mli nii lɛ kɛ lɛlɛ lɛ kɛkɛ hiɛ baakpãtã, shi moŋ wɔwala diɛŋtsɛ hu.”

¹¹ Shi asraafoiohaatsɛ lɛ heɔ kudɔɔtsɛ lɛ kɛ lɛlɛtsɛ lɛ eyeɔ fe wiemɔi ni Paulo wieɔ lɛ.

¹² Ni akɛni Lɛji adaamɔhe Fɛɛfɛo lɛ kãaa shi jogbaŋŋ bɔ ni aaanyɛ aye fɛ̃ibe lɛ yɛ jɛi hewɔ lɛ, amɛteŋ mɛi pii wo ŋaa akɛ afã yɛ jɛi koni akwɛ akɛ aaanyɛ ashɛ Foinike ni ji Kreta Lɛji adaamɔhe ni kwɛɔ wuoyi-anai kɛ kooyi-anai gbɛ lɛ lo, koni aye fɛ̃ibe lɛ yɛ jɛi.

Ahum fã yɛ ŋshɔ lɛ hiɛ

¹³ Shi be ni wuoyigbɛ kɔɔyɔɔ bɔ̃i tswaa nyrakee lɛ, efee amɛ akɛ nɔ ni amɛtaoɔ lɛ eba mli, ni amɛfã kɛsharã Kreta he kpaakpa.

¹⁴ Shi etsɛɛɛ kɛkɛ ni ahum ko ni atsɛɔ lɛ kooyi-bokã kɔɔyɔɔ lɛ fã kɛbakpee amɛ.

¹⁵ Ni be ni eta lɛlɛ lɛ mli ni enyɛɛɛ kɔɔyɔɔ lɛ ekpee lɛ, wɔhã ekpala.

¹⁶ Ni be ni wɔkɛ foi sharã ŋshɔkpɔ fioo ni atsɛɔ lɛ Kauda lɛ meo lɛ, ekpakpa ko dani wɔnyɛ bonto lɛ wɔmɔ.

¹⁷ Amɛwo lɛ, ni amɛkɛ kpãi fimɔ lɛlɛ lɛ, ni akɛni amɛmiishe gbeyei akɛ aleenɔ amɛaagbee shia nɔ hewɔ lɛ, amɛkpa abalaa lɛ, ni amɛkpala kɛkɛ.

¹⁸ Ni akɛni ahum lɛ miitswa wɔ gbeyeigbeyei naakpa hewɔ lɛ, enɔ jetsɛremɔ lɛ, amɛ jie lɛlɛ lɛ mli nii lɛ eko amɛshwie;

¹⁹ ni gbi ni ji etɛ̃ nɔ lɛ wɔkɛ wɔ diɛŋtsɛ wɔniji jie lɛlɛ he nibii lɛ wɔshwie.

²⁰ Wɔnaaa hulu loo ŋulamii gbii pii ni asaŋ jeee ahum fioo tswaa kɛkpeɔ wɔ lɛ, hewɔ lɛ agbɛnɛ wɔhiɛ kãaa wala nɔ dɔŋŋ.

²¹ Shi be ni gbii pii eho ni wɔyeko nɔ ko lɛ, Paulo te shi edamɔ amɛteŋ ni ekɛɛ, “Ataamɛi, kulɛ esa akɛ nyɛboɔ mi toi ni akafã yɛ Kreta ni wɔbana amanehulu ni nibii laaje nɛkɛ.

²² Ni agbɛnɛ hu miiwo nyɛ ŋaa akɛ nyɛna tsui, ejaakɛ nyɛteŋ mɔ ko yiwala tɔŋ, ja lɛlɛ lɛ kɛkɛ.

²³ Ejaakɛ nyɔɔŋ nɛɛ mli lɛ Nyɔŋmɔ mɔ nɔ ni mi ji kɛ mɔ hu ni misɔ̃mɔɔ lɛ bɔfo badamɔ mimasɛi

²⁴ ni ekɛɛ, ‘Kaashe gbeyei, Paulo! Ja akɛ bo yadãmɔ Kaisare hiɛ kɛ̃; ni naa, Nyɔŋmɔ eŋɔ mɛi fɛɛ ni kɛ bo yɔɔ lɛlɛ lɛ mli lɛ eke bo.’

²⁵ Hewɔ lɛ nyɛnaa tsui, Ataamɛi, ejaakɛ miheɔ Nyɔŋmɔ miyeɔ akɛ bɔ ni abakɛɛ mi lɛ, nakai baaba mli.

²⁶ Shi bɔ fɛɛ bɔ ni fee lɛ, wɔɔyasha ŋshɔkpɔ ko nɔ kɛ̃.”

²⁷ Shi gbi ni ji nyɔŋma kɛ ejwɛ lɛ nyɔɔŋ lɛ wɔmiikpala kɛmiiya kɛmiiba yɛ Adria Ŋshɔ lɛ nɔ. Ni aaafee nyɔɔŋteŋ lɛ amlakui lɛ ajwɛŋmɔ kɛɛ amɛ akɛ amɛbɛŋkɛ shikpɔŋ ko,

²⁸ ni amɛfɔ̃ susumɔ kpãa, ni amɛna abasaŋ nyɔŋmai enyɔ; ni be ni amɛtee amɛhiɛ fioo lɛ, amɛfɔ̃ ekoŋŋ ni amɛna abasaŋ nyɔŋma kɛ enumɔ.

²⁹ Kɛkɛ ni amɛshe gbeyei akɛ aleenɔ wɔɔyagbee tɛsai anɔ, ni amɛŋmɛ sɛkɛi ejwɛ yɛ lɛlɛ lɛ sɛɛgbɛ, ni amɛmiishwe ni je atsɛre.

³⁰ Shi be ni amlakui lɛ tao foi aje yɛ lɛlɛ lɛ mli ni amɛkwa amɛshi bonto lɛ amɛma ŋshɔ lɛ hiɛ tamɔ nɔ ni sɛkɛi amɛyaaŋmɛ yɛ lɛlɛ lɛ yitsogbɛ lɛ,

³¹ Paulo kɛɛ asraafoiohaatsɛ lɛ kɛ asraafoi lɛ akɛ “Kɛji mɛnɛɛmɛi ehiii lɛlɛ lɛ mli lɛ, no lɛ anyɛŋ nyɛyiwala ahere.”

³² Kɛkɛ ni asraafoi lɛ folɔ bonto lɛ he taŋkpei lɛ, ni amɛhã eyagbee shi.

³³ Shi kɛbaa jetsɛremɔ mli lɛ, Paulo kpa amɛ fɛɛ fai akɛ amɛye nɔ ko ni ekɛɛ, “Gbii nyɔŋma kɛ ejwɛ sɔŋŋ nɛ ni nɔ ko nɔ ko eyako nyɛdaaŋ.

³⁴ No hewɔ lɛ, miikpa nyɛ fai ni nyɛye nii ejaakɛ no aaahã nyɛyi ana wala, ejaakɛ nyɛteŋ mɔ ko yitsɔi kome ejeŋ eyiteŋ enyɔŋ shi.”

³⁵ Ni be ni ekɛɛ nakai lɛ, ekɔ aboloo, ni eda Nyɔŋmɔ shi yɛ amɛ fɛɛ amɛhiɛ, ni ekumɔ mli ebɔ̃i yeli.

³⁶ Kɛkɛ ni amɛ fɛɛ amɛna tsui, ni amɛ hu amɛye nii.

³⁷ Shi wɔ mɛi ni wɔyɔɔ lɛlɛ lɛ mli lɛ fɛɛ naa shiɔ mɛi ohai enyɔ kɛ nyɔŋmai kpawo kɛ ekpaa.

³⁸ Ni be ni amɛye nii ni amɛtɔrɔ lɛ, amɛshɛrɛ abele ni amɛwo lɛ amɛshwie ŋshɔ lɛ mli, ni amɛhã lɛlɛ lɛ fee huyɛhuyɛ.

Lɛlɛ lɛ sha shi

³⁹ Ni be ni je tsɛre lɛ amɛna akɛ amɛleee shikpɔŋ lɛ, shi amɛna ble ko kɛ enaa shia, ni amɛto amɛyiŋ akɛ, kɛ amɛaanyɛ lɛ, amɛaahã lɛlɛ lɛ ayasha shi yɛ jɛi.

⁴⁰ Ni amɛfolɔ sɛkɛi lɛ amɛwo ŋshɔ lɛ mli, ni amɛfɛne kudɔɔ lɛ he kpãi lɛ hu, ni amɛshi hiɛgbɛ abalaa lɛ kɛkpee kɔɔyɔɔ ni tswaa lɛ, ni amɛtsɔ̃ eyi amɛmã shianɔgbɛ.

⁴¹ Shi akɛni amɛyagbee ŋshɔi enyɔ alɛwu nɔ hewɔ lɛ, amɛkɛ lɛlɛ lɛ yasha shi; ni eyitsogbɛ lɛ yatsɛkɛ shi shiŋŋ, shi esɛɛgbɛ lɛ ŋshɔkei lɛ anaawalɛ lɛ jwara lɛ.

⁴² Shi asraafoi lɛ ayiŋtoo ji akɛ amɛaagbe gboklɛfoi lɛ, koni amɛteŋ mɔ ko akasere kɛmiiya ni ejo foi.

⁴³ Shi akɛni asraafoiohaatsɛ lɛ taoɔ Paulo yiwala ehere hewɔ lɛ, etsi amɛyiŋtoo lɛ naa, ni efã akɛ mɛi ni le seremɔ lɛ tsutsu atu agbee ŋshɔ lɛ mli, ni amɛya shikpɔŋ;

⁴⁴ shi mɛi ni eshwɛ lɛ ateŋ mɛi komɛi abumɔ ŋmoŋmolo nɔ, ni mɛi komɛi hu abumɔ lɛlɛ koi lɛ anɔ. Bɔ ni fee ni mɛi lɛ fɛɛ yashɛ shikpɔŋ shweshweeshwe ji no.