Bɔfoi 22 - ŊMALƐ KRƆŊKRƆŊ LƐ

Paulo jie enaa

¹ “Ataamɛi kɛ anyɛmimɛi, nyɛboa minaa ni mibajie matsɔ̃ɔ nyɛ nɛɛ toi.”

² Ni be ni amɛnu akɛ Hebri wiemɔ ekɛ amɛ wieɔ lɛ, amɛfee diŋŋ fe tsutsu lɛ. Ni ekɛɛ,

³ “Yudanyo ji mi, ni afɔ mi yɛ Tarso yɛ Kilikia moŋ, shi maŋ nɛɛ mli alɛ mi yɛ, ni Gamaliel naji anaa atsɔse mi yɛ, yɛ wɔtsɛmɛi lɛ amla lɛ naa fitsofitso, ni mihiɛ dɔɔ Nyɔŋmɔ sane he, tamɔ bɔ ni nyɛ fɛɛ nyɛfeɔ ŋmɛnɛ nɛɛ;

⁴ ni miwaa nɛkɛ tsɔ̃ɔmɔ nɛɛ yi kɛyashiɔ gbele mli, ni mifimɔ̃ɔ hii kɛ yei fɛɛ mihãa ni ayawoɔ amɛ tsuŋ,

⁵ bɔ ni osɔfonukpa lɛ tete kɛ onukpai lɛ fɛɛ aaanyɛ aye mi odase. Amɛdɛŋ miŋɔ woji kɛjɛ ni kulɛ mikɛyaahã nyɛmimɛi ni yɔɔ Damasko lɛ, ni miyafimɔ mɛi ni yɔɔ jɛi lɛ hu kɛba Yerusalɛm koni agbala amɛ toi.

⁶ “Shi eba mli akɛ, be ni minyiɛ gbɛ lɛ nɔ ni mibabɛŋkɛ Damasko aaafee huludãamɔ mli lɛ, trukaa lɛ la ko ni kpɛmɔ naa wa jɛ ŋwɛi babɔle mi;

⁷ ni miflɛo migbee shi ni minu gbee ko kɛɛ mi akɛ, ‘Saul, Saul, mɛɛba owaa mi yi?’

⁸ Ni mihere nɔ akɛ, ‘Bo namɔŋ, Nuŋtsɔ?’ Ni ekɛɛ mi akɛ, ‘Mi Yesu, Nazarenyo lɛ ni owaa lɛ yi lɛ ni.’

⁹ Shi mɛi ni kɛ mi nyiɛ lɛ na la lɛ, shi mɔ ni kɛ mi wieɔ lɛ, amɛnuuu egbee.

¹⁰ Ni mikɛɛ, ‘Mɛni mafee, Nuŋtsɔ?’ Ni Nuŋtsɔ lɛ kɛɛ mi akɛ, ‘Tee shi ni oya Damasko, ni jɛi aaatsɔ̃ɔ bo nibii fɛɛ ni ato akɛ ofee lɛ yɛ.’

¹¹ Ni akɛni minaaa nii dɔŋŋ yɛ nakai la lɛ kpɛmɔ hewɔ lɛ, mɛi ni kɛ mi nyiɛ lɛ mɔ minine mli amɛyawa mi Damasko.

¹² “Shi nuu ko yɛ jɛi ni atsɛɔ lɛ Anania ni esheɔ Nyɔŋmɔ gbeyei yɛ Mla lɛ naa, ni Yudafoi lɛ fɛɛ ni yɔɔ jɛi lɛ wieɔ ehe ekpakpa.

¹³ Lɛ eba miŋɔɔ, ni ebadamɔ mimasɛi ekɛɛ mi akɛ, ‘Anyɛmi Saul, naa nii!’ Ni nakai ŋmɛlɛtswaa lɛ nɔ nɔŋŋ mina lɛ faŋŋ.

¹⁴ Ni ekɛɛ, ‘Wɔtsɛmɛi aNyɔŋmɔ lɛ ehala bo eto, ni ole esuɔmɔnaanii, ni ona Nyɔŋmɔ Jalɔ lɛ, ni onu edaaŋ gbee;

¹⁵ ejaakɛ obaatsɔ ehe odasefonyo koni oye nii fiaa ni ona ni onu lɛ ahe odase otsɔ̃ɔ gbɔmɛi fɛɛ.

¹⁶ Ni agbɛnɛ mɛɛba oshashaoɔ shi? Tee shi ni ohã abaptisi bo, ni afɔ ohe eshai lɛ ashwie ahã bo, ni osɔle otsɛ Nuŋtsɔ lɛ.

¹⁷ “Ni eba mli akɛ, be ni miku misɛɛ kɛba Yerusalɛm ekoŋŋ ni misɔleɔ yɛ Sɔlemɔ we lɛ, efee tamɔ nɔ ni nɔ enyɔ minɔ,

¹⁸ ni mina Nuŋtsɔ lɛ ni ekɛɛ mi akɛ, ‘Feemɔ kpa ni oje Yerusalɛm oya, ejaakɛ amɛboŋ mihe odase ni oyeɔ lɛ toi.’

¹⁹ Ni mikɛɛ, ‘Nuŋtsɔ, amɛ diɛŋtsɛ amɛle akɛ mi ji mɔ nɔŋŋ ni sa lɛ miwoɔ mɛi ni heɔ onɔ yeɔ lɛ tsuŋ, ni miyiɔ amɛ yɛ kpeehe fɛɛ kpeehe lɛ.

²⁰ Ni be ni ashwie Stefano, ohe odaseyelɔ lɛ, lá shi lɛ, mi hu midamɔ jɛi, ni mina egbele lɛ he tsui, ni mibu mɛi ni gbe lɛ lɛ atadei lɛ ahe.’

²¹ Ni ekɛɛ mi akɛ, ‘Yaa, ejaakɛ mibatsu bo jeŋmaji lɛ ni yɔɔ shɔŋŋ lɛ aŋɔɔ.’ ”

Paulo, Romanyo lɛ

²² Ni amɛbo lɛ toi kɛbashi nɛkɛ wiemɔ nɛɛ nɔ, ni amɛwo amɛgbee nɔ amɛkɛɛ, “Akɛ nɛkɛ gbɔmɔ aje shikpɔŋ lɛ nɔ! Ejaakɛ esaaa akɛ ehiɔ jeŋ.”

²³ Shi be ni amɛbolɔɔ ni amɛkpɔlɔɔ amɛhe atadei ni amɛgbɛɔ mlu amɛshwãa kɔɔyɔɔ mli lɛ,

²⁴ asafoiatsɛnukpa lɛ fã akɛ akɛ lɛ aya mɔɔ lɛ mli, ni ekɛɛ akɛ akɛ kpelebii atao eyitsoŋ koni ena ele nɔ sane hewɔ ni Yudafoi bolɔɔ amɛwoɔ lɛ nɛkɛ nɛɛ.

²⁵ Shi be ni afi lɛ ni abaayi lɛ lɛ, Paulo bi asafoiatsɛ ni damɔ shi lɛ akɛ, “Nyɛyɛ hegbɛ akɛ nyɛyiɔ Romanyo ko ni abuko lɛ fɔ kɛ kpelebii lo?”

²⁶ Be ni asafoiatsɛ lɛ nu enɛ lɛ, etee asafoiatsɛnukpa lɛ ŋɔɔ ni eyakɛɛ lɛ akɛ, “Mɛni obaafee nɛɛ? Ejaakɛ nɛkɛ gbɔmɔ nɛɛ Romanyo ni.”

²⁷ Ni asafoiatsɛnukpa lɛ ba ni ebabi lɛ akɛ “Kɛɛmɔ mi, ani Romanyo ji bo lo?” Ni ekɛɛ, “Hɛɛ.”

²⁸ Ni asafoiatsɛnukpa lɛ here nɔ akɛ, “Shika pii mikɛhe nɛkɛ maŋnyotsɔmɔ nɛɛ.” Ni Paulo kɛɛ, “Shi mi lɛ, fɔ akɛfɔ mi.”

²⁹ Kɛkɛ ni amrɔ lɛ nɔŋŋ mɛi ni yaatao eyitsoŋ lɛ je emasɛi ni asafoiatsɛnukpa lɛ hu, akɛni efi lɛ hewɔ lɛ, be ni ena ele akɛ Romanyo ji Paulo lɛ, eshe gbeyei.

³⁰ Shi akɛni eetao ele nɔ hewɔ krɛdɛɛ ni Yudafoi lɛ folɔɔ enaa hewɔ lɛ, enɔ jetsɛremɔ lɛ efɛne lɛ, ni efã akɛ osɔfonukpai lɛ kɛ akwaashɔŋ lɛ fɛɛ aba, ni ekɛ Paulo kpeleke shi, ni ekɛ lɛ yadamɔ amɛhiɛ.