Bɔfoi 20 - ŊMALƐ KRƆŊKRƆŊ LƐ

Paulo tee Makedonia kɛ Hela

¹ Be ni gidigidifeemɔ lɛ sɛɛ efo lɛ, Paulo tsu ayatsɛ kaselɔi lɛ kɛba eŋɔɔ ni ewie etsɔ̃ɔ amɛ ni ekɛ amɛ ye shɛɛ, ni eyi mli kɛmiiya Makedonia.

² Ni be ni eyatsɔ̃ jɛi niiaŋ ni ekɛ wiemɔi pii wo amɛŋaa lɛ, eba Akaia.

³ Ni eye nyɔji etɛ̃ yɛ jɛi, ni akɛni Yudafoi lɛ ewo lɛ ka be ni eheɔ efã kɛya Siria hewɔ lɛ, eto eyiŋ akɛ eeeku esɛɛ eyatsɔ̃ Makedonia ekoŋŋ.

⁴ Ni Sopatre, Beroianyo lɛ ni ji Pirho bi lɛ, kɛ Aristarko kɛ Sekundo, Tesalonikabii lɛ, kɛ Gaio, Derbenyo lɛ, kɛ Timoteo, kɛ Asiabii ni ji Tihiko kɛ Trofimo lɛ, kɛ lɛ tee Asia.

⁵ Mɛnɛɛmɛi tsɔ̃ hiɛ, ni amɛyamɛ wɔ yɛ Troia.

⁶ Ni wɔ lɛ wɔfã kɛjɛ Filipi yɛ Akpiti Gbii lɛ asɛɛ, ni gbii enumɔ sɛɛ lɛ wɔyashɛ amɛŋɔɔ yɛ Troia, ni wɔhi jɛi gbii kpawo.

Paulo kɛ Troia asafo lɛ ye shɛɛ

⁷ Shi otsi lɛ klɛŋklɛŋ gbi lɛ nɔ be ni wɔbabua wɔhe naa koni amɛye suɔmɔ niyenii lɛ, Paulo wie tsɔ̃ɔ amɛ, ni ekã wiemɔ lɛ he kɛyashi nyɔɔŋteŋ, ejaakɛ kɛ je tsɛre lɛ ebaayi mli.

⁸ Ni asu kanei pii yɛ ŋwɛitsu lɛ mli he ni amɛbua amɛhe naa yɛ lɛ.

⁹ Shi oblanyo ko ni atsɛɔ lɛ Eutiko lɛ ta samflɛ naa, ni wɔ ni tsii loo lɛ, ejaakɛ Paulo wiemɔ lɛ sɛɛ jɛkɛ, ni wɔ ni emɔ lɛ lɛ sɔŋŋ hã ekpa kɛjɛ sɔɔdoi etɛ̃ lɛ nɔ ebagbee shi, ni ayawo lɛ ni egbo.

¹⁰ Ni Paulo kpeleke shi, ni eyabu enɔ, ni efua lɛ ekɛɛ, “Nyɛkafea hoo, ejaakɛ wala yɛ emli.”

¹¹ Ni be ni ekwɔ kɛba ekoŋŋ lɛ, ebakumɔ aboloo lɛ, ni eye eko, ni ekã he ewie aahu kɛyashi jetsɛremɔ wɛlɛŋŋ, kɛkɛ ni eyi mli.

¹² Ni amɛkɛ gbekɛ lɛ tee shĩa ni ehiɛ kã, ni amɛmii shɛ amɛhe naakpa.

Paulo jɛ Troia Kɛtee Mileto

¹³ Shi wɔ lɛ wɔtsɔ̃ hiɛ kɛtee lɛlɛ mli, ni wɔfã kɛtee Aso ni wɔyaŋɔ Paulo yɛ jɛi, ejaakɛ Paulo lɛ, lɛ lɛ ebaatsɔ̃ shikpɔŋ hewɔ lɛ bɔ ni eto ji no.

¹⁴ Ni be ni ebanina wɔ yɛ Aso lɛ, wɔwo lɛ ni wɔba Mitilene.

¹⁵ Ni wɔfa yɛ jɛi, ni enɔ jetsɛremɔ lɛ wɔbashɛ Kio ŋlɛnɔ. Ni enɔ jetsɛremɔ ekoŋŋ lɛ wɔbashɛ Samo, ni enɔ jetsɛremɔ lɛ wɔba Mileto.

¹⁶ Ejaakɛ Paulo ekpɛ mli akɛ eeeho Efeso he, bɔ ni afee ni ekatsɛ yɛ Asia; ejaakɛ eeye oyai ni kɛ aaaho lɛ, eyashɛ Yerusalɛm Pentekoste gbi lɛ.

Paulo kɛ Efeso onukpai lɛ ye shɛɛ

¹⁷ Ni ejɛ Mileto etsu Efeso ayakpee asafo lɛ mli onukpai lɛ abahã lɛ.

¹⁸ Ni be ni amɛba eŋɔɔ lɛ, ekɛɛ amɛ akɛ, “Nyɛle bɔ ni mitsɔ̃ mikɛ nyɛ hi shi be muu lɛ fɛɛ, kɛjɛ klɛŋklɛŋ gbi nɔ ni miba Asia nɛɛ,

¹⁹ ni mikɛ heshibaa jwɛŋmɔ fɛɛ kɛ yaafonui pii kɛ kai ni ba minɔ yɛ Yudafoi akawoi lɛ amli lɛ sɔmɔ̃ Nuŋtsɔ lɛ;

²⁰ bɔ ni mishiuuu nɔ ko nɔ ko ni he yɔɔ sɛɛnamɔ hã nyɛ nɔ, ni mijaje mitsɔ̃ɔ nyɛ yɛ faŋŋ kɛ shĩa fɛɛ shĩa hu;

²¹ ni miye odase mitsɔ̃ɔ Yudafoi kɛ Helabii fɛɛ akɛ amɛkpale kɛba Nyɔŋmɔ ŋɔɔ ni amɛhe wɔNuŋtsɔ Yesu nɔ amɛye.

²² Ni agbɛnɛ lɛ, naa, efi mi yɛ mumɔ mli hewɔ lɛ miiya Yerusalɛm, ni mileee nɔ ni baaba minɔ yɛ jɛi,

²³ akɛ ja nɔ ni Mumɔ Krɔŋkrɔŋ lɛ yeɔ odase faŋŋ yɛ maŋ fɛɛ maŋ nɔ ekɛɔ akɛ tsuŋwoo kɛ amanehului mɛɔ mi lɛ.

²⁴ Shi kɛ̃lɛ mibuuu miwala akɛ ejara wa hã mi, bɔ ni afee ni mikɛ miishɛɛ agbe migbɛnyiɛmɔ lɛ kɛ sɔ̃ɔmɔ ni mina yɛ Nuŋtsɔ Yesu dɛŋ akɛ miye Nyɔŋmɔ dromɔ lɛ he Sanekpakpa lɛ he odase faŋŋ lɛ naa.

²⁵ “Ni agbɛnɛ lɛ naa, mile akɛ, nyɛ mɛi fɛɛ ni minyiɛ nyɛteŋ mishiɛ Nyɔŋmɔ Maŋtsɛyeli lɛ he sane lɛ, nyɛnaŋ mihiɛ dɔŋŋ.

²⁶ No hewɔ lɛ, ŋmɛnɛ gbi nɛɛ miiye odase miitsɔ̃ɔ nyɛ, akɛ miyeee nyɛteŋ mɔ ko mɔ ko lá yi sɔ̃;

²⁷ ejaakɛ mijaje Nyɔŋmɔ yiŋtoo muu lɛ fɛɛ mitsɔ̃ɔ nyɛ ni mishiuuu eko nɔ.

²⁸ No hewɔ lɛ, nyɛlea nyɛhenɔkwɛmɔ kɛ toiku lɛ fɛɛ ni Mumɔ Krɔŋkrɔŋ lɛ ewo nyɛ amɛnɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ elá he lɛ.

²⁹ Ejaakɛ mile akɛ, kɛ mikpa mihe lɛ, klãji fulɔi baabote nyɛteŋ, ni amɛbaŋ toiku lɛ yi.

³⁰ Ni nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ.

³¹ No hewɔ lɛ, nyɛsaraa, ni nyɛkaia akɛ afii etɛ̃ sɔŋŋ mikɛ yaafonui efɔ̃ɔɔ nyɛteŋ mɔ fɛɛ mɔ kɔkɔbɔɔ nyɔɔŋ kɛ shwane lɛ.

³² “Ni agbɛnɛ lɛ, anyɛmimɛi, miitu nyɛ miiwo Nyɔŋmɔ kɛ edromɔ wiemɔ lɛ dɛŋ; lɛ eyɔɔ hewalɛ ni ekɛaahã nyɛnane amɔ shi ni ekɛ gboshinii lɛ ahã nyɛ yɛ mɛi fɛɛ ni atsuu amɛhe lɛ ateŋ.

³³ Mihiɛ ekɔ̃ɔɔ nyɛteŋ mɔ ko jwiɛtɛi loo shika loo atade nɔ.

³⁴ Nyɛ diɛŋtsɛ nyɛle akɛ nii ni hiaa mi kɛ mɛi ni kɛ mi yɔɔ lɛ, nɛkɛ niji nɛɛ nɔŋŋ tsu he nii.

³⁵ Mikɛ fɛɛ tsɔ̃ɔ nyɛ akɛ nakai sa akɛ atsu nii ni akɛye abua mɛi ni bɛ hewalɛ, ni akai Nuŋtsɔ Yesu wiemɔi ni lɛ diɛŋtsɛ ewie lɛ akɛ, ‘Nɔhãmɔ mli yɛ jɔɔmɔ fe hemɔ.’ ”

³⁶ Be ni ewie nɛkɛ lɛ, ekula shi ni ekɛ amɛ fɛɛ sɔle.

³⁷ Ni amɛ fɛɛ amɛfo bloblo naakpa, ni amɛgbeegbee Paulo kuɛ nɔ, ni amɛshwɔshwɔɔ enaa.

³⁸ Ni nɔ ni dɔ amɛ titri ji wiemɔ ni ewie akɛ amɛnaŋ ehiɛ dɔŋŋ lɛ. Ni amɛyajie lɛ gbɛ yɛ lɛlɛ lɛ mli.