Bɔfoi 2 - ŊMALƐ KRƆŊKRƆŊ LƐ

Mumɔ Krɔŋkrɔŋ fɔsemɔ

¹ Be ni Pentekoste gbi (loo gbi ni ji nyɔŋmai enumɔ) lɛ shɛ lɛ, amɛ fɛɛ amɛnaa bakpe shi yɛ he kome.

² Ni trukaa lɛ gbɛɛmɔ ko ni tamɔ ahum ni tswaa waa jɛ ŋwɛi ba, ni ebayi shĩa he ni amɛtara lɛ fɛɛ obɔ̃.

³ Ni lilɛii ni agbalagbalaa mli ni tamɔ la lilɛii pue; ni ebatara amɛyiteaŋ ekomekome;

⁴ ni Mumɔ Krɔŋkrɔŋ bayimɔ amɛ fɛɛ obɔ̃bɔ̃, ni amɛbɔ̃i wiemɔi krokomɛi awiemɔ tamɔ bɔ ni Mumɔ lɛ kɛwo amɛnaa lɛ.

⁵ Shi Yudafoi Nyɔŋmɔ gbeyeishelɔi komɛi yɛ Yerusalɛm, ni amɛjɛ jeŋ maji fɛɛ ni yɔɔ ŋwɛi shishi lɛ anɔ.

⁶ Ni be ni anu nɛkɛ gbɛɛmɔ nɛɛ, mɛi babaoo babua amɛhe naa, ni amɛhe jɔ̃ amɛhe, ejaakɛ mɔ fɛɛ mɔ nu akɛ amɛmiiwie lɛ diɛŋtsɛ emaŋwiemɔ.

⁷ Ni amɛ fɛɛ amɛnaa kpɛ amɛhe ni amɛhiɛ fee amɛ yaa, ni amɛkɛɛkɛɛ amɛhe akɛ, “Ani mɛi ni wieɔ nɛɛ fɛɛ lɛ, jeee Galileabii ni?

⁸ Shi te fee tɛŋŋ ni wɔteŋ mɔ fɛɛ mɔ nuɔ lɛ diɛŋtsɛ emaŋ he ni afɔ lɛ yɛ lɛ wiemɔ nɛɛ?

⁹ Partiabii kɛ Mediabii kɛ Elambii kɛ mɛi ni yɔɔ Mesopotamia kɛ Yudea kɛ Kapadokia, Ponto kɛ Asia,

¹⁰ Frigia kɛ Pamfilia, Ijipt kɛ Libia niiaŋ yɛ Kirene masɛi kɛ gbɔi ni jɛ Roma, Yudafoi kɛ mɛi ni etsɔ̃mɔ Yudafoi,

¹¹ Kretabii kɛ Arabiabii: wɔmiinu akɛ amɛmiijaje Nyɔŋmɔ nibii wuji lɛ yɛ wɔwiemɔi lɛ amli.”

¹² Ni amɛ fɛɛ amɛnaa kpɛ amɛhe ni amɛfee yaa, ni amɛkɛɛkɛɛ amɛhe akɛ, “Te enɛ shishiŋ?”

¹³ Shi mɛi komɛi hu ye fɛo amɛkɛɛ, “Dãa dɔkɔdɔkɔ etɔrɔ amɛ.”

Petro shiɛmɔ yɛ Mumɔ Krɔŋkrɔŋ fɔsemɔ gbi lɛ nɔ

¹⁴ Shi Petro kɛ mɛi nyɔŋma kɛ ekome lɛ te shi amɛdamɔ shi, ni ewo egbee nɔ ekɛ asafo lɛ wie ekɛɛ, “Yudahii kɛ mɛi fɛɛ ni yɔɔ Yerusalɛm, nyɛnaa nyɛlea enɛ, ni nyɛboa miwiemɔi lɛ atoi.

¹⁵ Jeee dãa mɛnɛɛmɛi etɔrɔ tamɔ bɔ ni nyɛsusuɔ lɛ, ejaakɛ leebi ŋmɛlɛ nɛɛhu kɛkɛ nɛ;

¹⁶ shi moŋ enɛ ji nɔ ni gbalɔ Yoel wie lɛ akɛ,

¹⁷ “Nyɔŋmɔ kɛɛ, ‘Ni aaaba mli yɛ naagbee gbii lɛ anɔ akɛ, mafɔse miMumɔ lɛ eko mashwie gbɔmɛi fɛɛ anɔ, ni nyɛbihii kɛ nyɛbiyei lɛ aaagba, ni nyɛblahii lɛ aaana ninai, ni nyɛnukpai lɛ aaala lamɔi.

¹⁸ Ni asaŋ mitsuji hii kɛ mitsuji yei lɛ anɔ hu mafɔse miMumɔ lɛ eko mashwie yɛ nakai gbii lɛ anɔ, ni amɛaagba.

¹⁹ Ni mahã naakpɛɛnii aba ŋwɛi, ni okadii hu aba shikpɔŋ lɛ nɔ, lá kɛ la kɛ lasu lamɔ.

²⁰ Hulu aaatsɔ̃ duŋ, ni nyɔɔŋtsere aaatsɔ̃ lá, dani Nuŋtsɔ lɛ gbi wulu ni yɔɔ nyam lɛ aaaba.

²¹ Ni aaaba mli akɛ mɔ fɛɛ mɔ ni aaabo atsɛ Nuŋtsɔ lɛ gbɛi lɛ, aaahere eyiwala.’

²² “Ataamɛi Israelbii, nyɛboa nɛkɛ wiemɔi nɛɛ atoi! Yesu Nazarenyo lɛ ji nuu ni Nyɔŋmɔ kɛ hewalɛ nitsumɔi kɛ naakpɛɛnii kɛ okadii ni etsɔ̃ enine nɔ efee yɛ nyɛteŋ lɛ ye ehe odase etsɔ̃ɔ nyɛ, tamɔ bɔ ni nyɛ diɛŋtsɛ nyɛle lɛ.

²³ Yesu nɛɛ ni ajie lɛ yɛ Nyɔŋmɔ yiŋtoo kɛ enii ni ele eto lɛ naa ahã lɛ, nyɛtsɔ̃ mɛi ni bɛ mla lɛ anine nɔ nyɛsɛŋ lɛ ni nyɛgbe lɛ.

²⁴ Shi Nyɔŋmɔ tee lɛ shi ni efɛne lɛ kɛjɛ gbele piŋmɔi lɛ amli, akɛni gbele nyɛŋ enaa etsi lɛ.

²⁵ Ejaakɛ David wie yɛ ehe ekɛɛ, ‘Minaa Nuŋtsɔ lɛ yɛ mihiɛ daa, ejaakɛ eyɛ mininejurɔ nɔ, koni mikadidãa.

²⁶ No hewɔ lɛ, mitsui nyɔ̃ mimli ni mililɛi nya, ni asaŋ migbɔmɔtso hu aaajɔɔ ehe yɛ hiɛnɔkãmɔ mli;

²⁷ ejaakɛ oshiŋ misusuma yɛ gbohiiaje, ni ohaŋ omɔ krɔŋkrɔŋ lɛ ana fitemɔ.

²⁸ Ohã mile wala gbɛ̃i lɛ, Ni ooowo mi obɔ̃ kɛ miishɛɛ yɛ ohiɛ.’

²⁹ “Anyɛmimɛi, makɛɛ nyɛ faŋŋ yɛ blematsɛ David lɛ he akɛ egbo ni afu lɛ, ni asaŋ eyɛ wɔteŋ kɛbashi ŋmɛnɛ.

³⁰ Akɛni gbalɔ ji lɛ ni ele akɛ Nyɔŋmɔ ekã lɛ kitã akɛ emusuŋbii lɛ eko baata esɛi lɛ nɔ hewɔ lɛ,

³¹ ena eto ni ewie Kristo shitee lɛ he akɛ ashiii esusuma yɛ gbohiiaje ni egbɔmɔtso hu fiteee.

³² Nɛkɛ Yesu nɛɛ Nyɔŋmɔ tee lɛ shi; no he odasefoi ji wɔ fɛɛ.

³³ Agbɛnɛ akɛni awo enɔ kɛtee Nyɔŋmɔ ninejurɔ nɔ ni ena Mumɔ Krɔŋkrɔŋ lɛ he shiwoo lɛ kɛjɛ Tsɛ lɛ dɛ̃ŋ hewɔ lɛ, efɔse nɔ ni nyɛnaa ni nyɛnuɔ nɛɛ eshwie shi.

³⁴ Ejaakɛ David eyaaa ŋwɛi, shi lɛ nɔŋŋ ekɛɛ, ‘Nuŋtsɔ lɛ kɛɛ miNuŋtsɔ lɛ akɛ, ta mininejurɔ nɔ,

³⁵ kɛyashi beyinɔ ni maŋɔ ohenyɛlɔi lɛ mafee onajiashi maaŋoo.’

³⁶ “No hewɔ lɛ, Israel we lɛ fɛɛ ale krɛdɛɛ akɛ Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuŋtsɔ kɛ Kristo fɛɛ.”

³⁷ Shi be ni amɛnu enɛ lɛ, etsurɔ amɛtsuiiaŋ, ni amɛkɛɛ Petro kɛ bɔfoi ni eshwɛ lɛ akɛ, “Anyɛmimɛi, te wɔɔfee tɛŋŋ?”

³⁸ Ni Petro kɛɛ amɛ akɛ, “Nyɛtsakea nyɛtsui ni nyɛteŋ mɔ fɛɛ mɔ ahã abaptisi lɛ awo Yesu Kristo gbɛi mli, koni akɛ nyɛhe eshai lɛ afa nyɛ, ni nyɛaana Mumɔ Krɔŋkrɔŋ nɔkeenɔ lɛ.

³⁹ Ejaakɛ shiwoo lɛ, nyɛ kɛ nyɛbii, kɛ mɛi fɛɛ ni yɔɔ shɔŋŋ, mɛi abɔ ni Nuŋtsɔ, wɔNyɔŋmɔ lɛ, aaatsɛ kɛaaba lɛ anɔ ni.”

⁴⁰ Ni ewie wiemɔi krokomɛi pii ekɛye odase ni ekɛwo amɛ ŋaa akɛ, “Nyɛhãa aherea nyɛyiwala kɛjea yinɔ kɔɔdɔŋ nɛɛ mli.”

⁴¹ Kɛkɛ ni abaptisi mɛi ni he ewiemɔ lɛ, ni nakai gbi lɛ nɔ nɔŋŋ lɛ akɛ susumai aaafee akpei etɛ̃ fata amɛhe.

Bɔ ni heyelɔi lɛ hi shi hã

⁴² Ni amɛhiɛ bɔfoi lɛ atsɔ̃ɔmɔ lɛ kɛ naanyobɔɔ lɛ kɛ abolookuumɔ lɛ kɛ sɔlemɔi lɛ amli.

⁴³ Ni gbeyei mɔ mɔ fɛɛ mɔ, ni atsɔ̃ bɔfoi lɛ anɔ afee naakpɛɛnii kɛ okadii pii.

⁴⁴ Ni mɛi ni heɔ yeɔ lɛ fɛɛ yɛ he kome, ni amɛfee amɛnii fɛɛ ni amɛyɔɔ lɛ fɛɛ ekome;

⁴⁵ amɛhɔ̃ɔhɔ̃ɔ amɛshikpɔji kɛ amɛhenii, ni amɛja shika lɛ amɛhã mɛi lɛ fɛɛ bɔ ni he hiaa mɔ fɛɛ mɔ.

⁴⁶ Ni daa gbi lɛ amɛkɛ jwɛŋmɔ kome yaa Sɔlemɔ we lɛ, ni amɛkumɔkumɔɔ aboloo yɛ shĩai, ni amɛkɛ miishɛɛ kɛ tsui krɔŋŋ yeɔ nii,

⁴⁷ ni amɛ jieɔ Nyɔŋmɔ yi, ni amɛhiɛ ba nyam yɛ maŋ muu lɛ fɛɛ hiɛ. Ni Nuŋtsɔ lɛ ŋɔɔ mɛi ni ahere amɛyiwala lɛ efataa asafo lɛ he gbi fɛɛ gbi.