Bɔfoi 18 - ŊMALƐ KRƆŊKRƆŊ LƐ

Paulo yɛ Korinto

¹ Nii nɛɛ asɛɛ lɛ, Paulo je Atene ni eyiŋ etee Korinto.

² Ni eyana Yudafonyo ko ni atsɛɔ lɛ Akwila, ni afɔ lɛ yɛ Ponto, kɛ eŋa Priskila. Akwila jɛ Italia ba etsɛko. Eba ejaakɛ Kaisare Klaudio efã akɛ Yudafoi fɛɛ aje Roma. Ni Paulo tee amɛŋɔɔ;

³ ni akɛni ekɛ lɛ fɛɛ tsuɔ nitsumɔ kome hewɔ lɛ, ekɛ amɛ hi shi, ni etsuɔ nii; amɛnitsumɔ nɛɛ ji buufeemɔ.

⁴ Shi daa Hejɔɔmɔ gbi lɛ, Paulo yawieɔ etsɔ̃ɔ mɛi yɛ kpeehe lɛ, ni ebɔɔ mɔdɛŋ akɛ etsake Yudafoi kɛ Helabii lɛ.

⁵ Shi be ni Sila kɛ Timoteo jɛ Makedonia ba lɛ, Paulo hiɛ dɔ yɛ wiemɔ lɛ he ni eye odase veveeve etsɔ̃ɔ Yudafoi lɛ akɛ Yesu ji Kristo lɛ.

⁶ Shi akɛni amɛkuɔ enaa ni amɛwieɔ musubɔɔ wiemɔi hewɔ lɛ, ekpala ehe eshwie amɛnɔ ni ekɛɛ amɛ akɛ, “Nyɛlá abua nyɛyiteŋ; mi lɛ sɔ̃ ko wulaaa mi. Kɛjɛ be nɛ nɔ kɛyaa nɛɛ, matee jeŋmajiaŋbii lɛ aŋɔɔ.”

⁷ Kɛkɛ ni eje jɛi ni etee Nyɔŋmɔ jalɔ ko ni atsɛɔ lɛ Titio Yusto ni eshĩa kpɛtɛ kpeehe lɛ ŋɔɔ.

⁸ Shi kpeehe lɛ onukpa lɛ ni atsɛɔ lɛ Krispo lɛ kɛ ewe muu lɛ fɛɛ he Nuŋtsɔ lɛ nɔ amɛye, ni Korintobii lɛ ateŋ mɛi pii hu ni nu wiemɔ lɛ, amɛhe amɛye, ni abaptisi amɛ.

⁹ Ni nyɔɔŋ lɛ Nuŋtsɔ lɛ kɛɛ Paulo yɛ ninaa mli akɛ, “Kaashe gbeyei, shi moŋ wiemɔ, ni okamua onaa,

¹⁰ ejaakɛ mikɛ bo yɛ, ni mɔ ko mɔ ko etaŋ ohe ni efeŋ bo efɔŋ ko, ejaakɛ miyɛ mɛi pii yɛ maŋ nɛɛ mli.”

¹¹ Ni ehi jɛi afi kome kɛ nyɔji ekpaa etsɔ̃ɔ Nyɔŋmɔ wiemɔ lɛ yɛ amɛteŋ.

¹² Shi be ni Galio yeɔ amralo yɛ Akaia lɛ, Yudafoi lɛ kɛ jwɛŋmɔ kome te shi wo Paulo, ni amɛkpala lɛ kɛtee kojomɔ sɛ̃i lɛ hiɛ,

¹³ amɛkɛɛ, “Nuu nɛɛ woɔ mɛi lɛ ayiŋ ni amɛshi mla lɛ sɛɛ amɛja Nyɔŋmɔ.”

¹⁴ Shi be ni Paulo baagbele enaa pɛ lɛ, Galio kɛɛ Yudafoi lɛ akɛ, “Yudafoi, eji juu kɛ fɔ̃ sane ko ni kulɛ, esa akɛ mabo nyɛ toi;

¹⁵ shi kɛji wiemɔi loo gbɛii loo nyɛmla lɛ he saji komɛi ni lɛ, no lɛ nyɛ diɛŋtsɛ nyɛkwɛa nɔ; ejaakɛ misumɔɔɔ akɛ mikojoɔ nɛkɛ saji.”

¹⁶ Ni eshwie amɛ kɛjɛ kojomɔ sɛ̃i lɛ hiɛ.

¹⁷ Kɛkɛ ni Helabii lɛ fɛɛ mɔ kpeehe lɛ onukpa ni atsɛɔ lɛ Sostene lɛ, ni amɛyi lɛ yɛ kojomɔ sɛ̃i lɛ hiɛ; shi Galio ebuuu enɛɛmɛi eko eko.

Paulo ku esɛɛ kɛtee Antiokia

¹⁸ Be ni Paulo ehi jɛi gbii kplaŋŋ sɛɛ lɛ, ekɛ nyɛmimɛi lɛ ye shɛɛ, ni ebote lɛlɛ mli kɛmiiya Siria; ni Priskila kɛ Akwila kɛ lɛ tee ni eyashɛ eyi yɛ Kenkrea, ejaakɛ ewo shi.

¹⁹ Ni amɛba Efeso, ni ekɛ amɛ gbala mli yɛ jɛi. Ni etee kpeehe lɛ, ni ekɛ Yudafoi lɛ yayiyii.

²⁰ Ni be ni amɛkpa lɛ fai akɛ etsɛ yɛ amɛŋɔɔ fioo lɛ, ekpɛlɛ̃ɛɛ;

²¹ shi moŋ ekɛ amɛ ye shɛɛ ekɛɛ, “Kɛji Nyɔŋmɔ miisumɔ lɛ, maku misɛɛ maba nyɛŋɔɔ ekoŋŋ.” Ni efã kɛjɛ Efeso.

²² Be ni eyakpeleke Kaisarea lɛ, etee Yerusalɛm ni eyaŋa asafo lɛ, ni eyiŋ etee Antiokia.

²³ Ni ehi jɛi fioo, ni no sɛɛ lɛ, eyi mli ekoŋŋ ni eyakpa Galatia kɛ Frigia shikpɔji lɛ anɔ ewo kaselɔi lɛ fɛɛ ahewalɛ.

Apolo yɛ Efeso kɛ Korinto

²⁴ Yudanyo ko ni atsɛɔ lɛ Apolo ni afɔ lɛ yɛ Aleksandria lɛ ba Efeso. Apolo nɛɛ enaa tse ni ele ŋmalɛi lɛ jogbaŋŋ hu.

²⁵ Atsɔ̃ɔ nuu nɛɛ Nuŋtsɔ lɛ gbɛ lɛ he nii, ni eyɛ ekãa yɛ mumɔ mli ni ewieɔ ni etsɔ̃ɔ Yesu he nii fitsofitso, tsɛ Yohane baptisimɔ lɛ kɛkɛ ele.

²⁶ Ni ebɔ̃i wiemɔ kɛ ekãa yɛ kpeehe lɛ. Shi be ni Akwila kɛ Priskila nu ehe lɛ, amɛŋɔ lɛ kɛba amɛŋɔɔ, ni amɛtsɔ̃ɔ lɛ Nyɔŋmɔ gbɛ lɛ fitsofitso.

²⁷ Agbɛnɛ etao akɛ eya Akaia, hewɔ lɛ nyɛmimɛi lɛ ŋma wolo amɛkɛwo kaselɔi lɛ aŋaa ni amɛhere lɛ atuu. Ni be ni eba jɛi lɛ, ewa mɛi ni etsɔ̃ dromɔ lɛ nɔ ehe eye lɛ babaoo.

²⁸ Ejaakɛ ekɛ hewalɛ ku Yudafoi lɛ anaa yɛ maŋ hiɛ ni ekɛ ŋmalɛi lɛ tsɔ̃ɔ amɛ faŋŋ akɛ Yesu ji Kristo lɛ.