Bɔfoi 16 - ŊMALƐ KRƆŊKRƆŊ LƐ

Paulo kɛ Sila ŋɔ Timoteo

¹ Kɛkɛ ni Paulo ba Derbe kɛ Listra. Kaselɔ ko yɛ jɛi ni atsɛɔ lɛ Timoteo; enyɛ lɛ Yudayoo ko ni ehe wiemɔ lɛ eye ni, shi etsɛ lɛ Helanyo ni.

² Ni nyɛmimɛi lɛ ni yɔɔ Listra kɛ Ikonium lɛ yeɔ ehe odase kpakpa.

³ Paulo miitao ni ekɛ kaselɔ nɛɛ aya, ni eŋɔ lɛ efo lɛ ketia yɛ Yudafoi ni yɔɔ jɛi niiaŋ lɛ ahewɔ; ejaakɛ amɛ fɛɛ amɛle akɛ etsɛ lɛ Helanyo ni.

⁴ Shi be ni amɛkpaa maji lɛ anɔ lɛ, amɛkɛ mlai ni bɔfoi lɛ kɛ onukpai lɛ ni yɔɔ Yerusalɛm lɛ wo lɛ hã amɛ koni amɛye nɔ.

⁵ Agbɛnɛ asafoi lɛ na hewalɛ yɛ hemɔkɛyeli mli, ni amɛyi faa daa gbi.

Paulo ninaa yɛ Troia

⁶ Shi akɛni Mumɔ Krɔŋkrɔŋ lɛ etsi amɛ gbɛ akɛ amɛkawie wiemɔ lɛ amɛtsɔ̃ɔ yɛ Asia hewɔ lɛ, amɛfo mli yɛ Frigia kɛ Galatia shikpɔŋ lɛ nɔ;

⁷ ni amɛba Misia niiaŋ, ni amɛka akɛ amɛaatee Bitinia, shi Yesu Mumɔ lɛ eŋmɛɛɛ amɛ gbɛ.

⁸ Kɛkɛ ni amɛtsɔ̃ Misia ni amɛba Troia.

⁹ Ni nyɔɔŋ lɛ Paulo na yɛ ninaa mli akɛ nuu Makedonianyo ko damɔ shi miikpa lɛ fai akɛ, “Ba Makedonia ni obaye obua wɔ!”

¹⁰ Shi be ni ena nii lɛ pɛ lɛ, amrɔ lɛ wɔtao akɛ wɔya Makedonia, ejaakɛ wɔkɔ sɛɛ akɛ Nuŋtsɔ lɛ etsɛ wɔ kɛmiiya jɛi koni wɔyajaje Sanekpakpa lɛ wɔtsɔ̃ɔ amɛ.

Lidia tsuitsakemɔ

¹¹ No hewɔ lɛ, wɔfã kɛjɛ Troia ni wɔnyiɛ tɛ̃ɛ kɛtee Samotrake, ni enɔ jetsɛremɔ lɛ wɔba Neapoli.

¹² Wɔjɛ jɛi lɛ, wɔtee Filipi ni ji Makedonia shikpɔŋ lɛ nɔ maŋ wulu kɛ Romabii ashimɔmɔhe lɛ. Ni wɔhi nɛkɛ maŋ nɛɛ mli gbii kplaŋŋ.

¹³ Hejɔɔmɔ gbi lɛ nɔ lɛ, wɔjɛ maŋ lɛ mli wɔtee faa ko naa, he ni wɔjwɛŋmɔ kɛɛ wɔ akɛ asɔleɔ yɛ lɛ, ni wɔyatara shi, ni wɔkɛ yei ni ebabua amɛhe naa yɛ jɛi lɛ wie.

¹⁴ Ni yoo ko ni atsɛɔ lɛ Lidia ni ji kɔɔjaŋhɔ̃ɔlɔ ko ni jɛ Tiatira maŋ lɛ mli ni sheɔ Nyɔŋmɔ gbeyei lɛ hu nu; lɛ Nuŋtsɔ lɛ gbele etsui naa akɛ ebo nii ni Paulo wieɔ lɛ toi.

¹⁵ Ni be ni abaptisi lɛ kɛ ewe lɛ, ekpa wɔ fai akɛ, “Kɛji nyɛbu mi akɛ mihe Nuŋtsɔ lɛ miye anɔkwale mli lɛ, no lɛ nyɛbaa miwe lɛ, ni nyɛbahia jɛi.” Ni ehiɛ wɔ aahu, ni wɔkpɛ̃lɛ.

Paulo kɛ Sila tsuŋwoo

¹⁶ Shi gbi ko be ni wɔyaa he ni asɔleɔ yɛ lɛ, tsulɔ yoo ko ni klámɔ mumɔ yɔɔ emli kɛ wɔ bakpe; ekɛ eklámɔ lɛ hãa enuŋtsɔmɛi naa nii pii.

¹⁷ Enyiɛ wɔ kɛ Paulo sɛɛ ni ebolɔɔ akɛ, “Nɛkɛ gbɔmɛi nɛɛ, Nyɔŋmɔ ni yɔɔ ŋwɛi shɔŋŋ lɛ tsuji ji amɛ, ni amɛmiijaje yiwalaheremɔ gbɛ lɛ amɛmiitsɔ̃ɔ nyɛ.”

¹⁸ Ni efee nakai gbii pii. Shi efee Paulo ahuntoo kɛho he, ni etsɔ̃ ehe ni ekɛɛ mumɔ lɛ akɛ, “Miifã bo yɛ Yesu Kristo gbɛi mli akɛ oje emli.” Ni eje emli yɛ nakai ŋmɛlɛtswaa lɛ nɔ nɔŋŋ.

¹⁹ Be ni enuŋtsɔmɛi lɛ na akɛ amɛninamɔ nɔhiɛkãmɔnɔ lɛ elaaje lɛ, amɛmɔmɔ Paulo kɛ Sila ni amɛgbala amɛ kɛtee lumɛi lɛ ahiɛ yɛ jara lɛ nɔ;

²⁰ ni be ni amɛkpala amɛ kɛtee asafoiatsɛmɛi lɛ ahiɛ lɛ, amɛkɛɛ, “Nɛkɛ gbɔmɛi nɛɛ ni ji Yudafoi lɛ ewo wɔmaŋ lɛ mli hirihiri,

²¹ ni amɛmiitsɔ̃ɔtsɔ̃ɔ kusumi komɛi ni wɔ akɛ Romabii lɛ wɔbɛ hegbɛ akɛ wɔmɔɔ mli loo wɔyeɔ nɔ.”

²² Ni maŋbii lɛ hu te shi wo amɛ, ni asafoiatsɛmɛi lɛ hã akplɔ amɛtadei yɛ amɛhe, ni amɛfã akɛ ayi amɛ kpãa.

²³ Ni be ni amɛtswia amɛ kpãi pii lɛ, amɛwo amɛ tsuŋ, ni amɛwo gboklɛfoiakwɛlɔ lɛ kitã akɛ ekɛ amɛ ato shweshweeshwe;

²⁴ ni akɛni awo lɛ nɛkɛ kitã hewɔ lɛ, etsi amɛ ewo tsu ni yɔɔ sɛɛgbɛ lɛ mli tɔɔ, ni ebɔ amɛnaji apã.

²⁵ Shi nyɔɔŋ teŋ lɛ Paulo kɛ Sila miisɔle ni amɛmiila amɛmiijie Nyɔŋmɔ yi; ni gboklɛfoi lɛ miibo amɛ toi.

²⁶ Ni trukaa lɛ shikpɔŋ hoso waa, ni tsu lɛ shishitoo lɛ hoso, ni amrɔ lɛ, shinai lɛ fɛɛ gbelegbelee, ni amɛ fɛɛ amɛkpãi lɛ kpɔlɔke.

²⁷ Be ni gboklɛfoiakwɛlɔ lɛ hɛle shi kɛjɛ wɔ mli ni ena akɛ tsu lɛ naa shinai lɛ fɛɛ kãmɔ lɛ, egbala eklante ni kulɛ ebaagbe ehe, ejaakɛ esusu akɛ gboklɛfoi lɛ ejo foi.

²⁸ Shi Paulo bo kɛ gbee ni wa ekɛɛ akɛ, “Kaafee ohe efɔŋ ko, shi wɔ fɛɛ wɔyɛ biɛ.”

²⁹ Kɛkɛ ni etsɛ ni abahã lɛ kane, ni esha foi kɛbote tsu lɛ mli, ni ekɛ hekpokpomɔ ho egbee Paulo kɛ Sila hiɛ,

³⁰ ni ekɛ amɛ je kpo ni ekɛɛ, “Nuŋtsɔmɛi, mɛni sa ni mafee ni ahere miyiwala?”

³¹ Ni amɛkɛɛ, “Hemɔ Nuŋtsɔ Yesu Kristo lɛ nɔ oye, ni aaahere bo kɛ owe lɛ fɛɛ yiwala.”

³² Ni amɛjaje Nuŋtsɔ lɛ wiemɔ amɛtsɔ̃ɔ lɛ kɛ mɛi fɛɛ ni yɔɔ ewe lɛ.

³³ Ni eŋɔ amɛ nakai nyɔɔŋ lɛ mli ŋmɛlɛtswaa lɛ mli nɔŋŋ, ni efɔ amɛkpãi lɛ anaa ehã amɛ, ni abaptisi lɛ kɛ ewe lɛ mli bii fɛɛ amrɔ lɛ nɔŋŋ;

³⁴ ni ekɛ amɛ tee ewe lɛ, ni eyaŋmɛ amɛ okplɔ̃, ni emli fili lɛ kɛ ewe lɛ fɛɛ akɛ ehe Nyɔŋmɔ nɔ eye.

³⁵ Be ni je tsɛre lɛ, asafoiatsɛmɛi lɛ tsu asraafoi bakɛɛ, “Ŋmɛɛmɔ gbɔmɛi lɛ ahe ni amɛya.”

³⁶ Ni gboklɛfoiakwɛlɔ lɛ jaje nɛkɛ wiemɔi nɛɛ etsɔ̃ɔ Paulo akɛ, “Asafoiatsɛmɛi lɛ etsu kɛba akɛ aŋmɛɛ nyɛhe, no hewɔ lɛ, agbɛnɛ nyɛjea kpo, ni nyɛyabaa jogbaŋŋ.”

³⁷ Shi Paulo kɛɛ amɛ akɛ, “Wɔ ni Romabii ji wɔ ni abuko wɔ fɔ lɛ, amɛyi wɔ yɛ jara nɔ, ni amɛwo wɔ tsuŋ hu; ni kpaako amɛshwieɔ wɔ nigii lo? Dabida, shi moŋ amɛ diɛŋtsɛ amɛba ni amɛbajie wɔ.”

³⁸ Ni asraafoi lɛ yajaje nɛkɛ wiemɔi nɛɛ amɛtsɔ̃ɔ asafoiatsɛmɛi lɛ; ni be ni amɛnu akɛ Romabii ji amɛ lɛ, amɛshe gbeyei.

³⁹ Ni amɛba amɛbakpa amɛ fai, ni be ni amɛ jie amɛ lɛ, amɛtutɔ amɛ akɛ amɛje maŋ lɛ mli.

⁴⁰ Shi be ni amɛje tsu lɛ mli lɛ, amɛtee Lidia we lɛ mli. Amɛna nyɛmimɛi lɛ, ni amɛshɛje amɛmii, ni amɛyiŋ amɛtee.