Bɔfoi 15 - ŊMALƐ KRƆŊKRƆŊ LƐ

Akpe yɛ Yerusalɛm

¹ Ni mɛi komɛi jɛ Yudea ba ni amɛbatsɔ̃ɔ nyɛmimɛi lɛ akɛ, “Kɛji afolɔɔɔ nyɛ ketia yɛ gbɛnaa ni Mose eto lɛ naa lɛ, anyɛŋ nyɛyiwala ahere.”

² Ni be ni Paulo kɛ Barnaba kɛ amɛ taa naa ni amɛkɛ amɛ je ŋwane aahu lɛ, nyɛmimɛi lɛ to akɛ Paulo kɛ Barnaba kɛ amɛteŋ mɛi krokomɛi hu aya bɔfoi lɛ kɛ onukpai lɛ ni yɔɔ Yerusalɛm lɛ aŋɔɔ yɛ nɛkɛ sane nɛɛ hewɔ.

³ No hewɔ lɛ, be ni asafo lɛ ebajie amɛ gbɛ lɛ, amɛtsɔ̃ Foinikia kɛ Samaria ni amɛgba jeŋmaji lɛ atsakemɔ lɛ, ni amɛkɛhã nyɛmimɛi lɛ fɛɛ na miishɛɛ naakpa.

⁴ Ni be ni amɛshɛ Yerusalɛm lɛ, asafo lɛ kɛ bɔfoi lɛ kɛ onukpai lɛ here amɛ atuu, ni mɛi ni atsu lɛ gba amɛ nibii ni Nyɔŋmɔ kɛ amɛ etsu lɛ fɛɛ.

⁵ Shi mɛi komɛi ni jɛ Farisifoi lɛ akuu lɛ mli ni ehe eye lɛ te shi amɛkɛɛ akɛ, “Ja afolɔ amɛ ketia ni awo amɛ kitã akɛ amɛye Mose Mla lɛ nɔ.”

⁶ Ni bɔfoi lɛ kɛ onukpai lɛ babua amɛhe naa, koni amɛtao nɛkɛ sane nɛɛ mli.

⁷ Shi be ni amɛyiyii aahu lɛ, Petro te shi damɔ shi, ni ekɛɛ amɛ akɛ, “Anyɛmimɛi hii, nyɛ diɛŋtsɛ nyɛle akɛ jeeŋmɔ beebe Nyɔŋmɔ hala wɔmli, ni eto akɛ minaa jeŋmaji lɛ anu Sanekpakpa lɛ yɛ ni amɛhe amɛye.

⁸ Ni Nyɔŋmɔ ni le tsuiiaŋ lɛ hã amɛ Mumɔ Krɔŋkrɔŋ lɛ tamɔ bɔ ni ehã wɔ lɛ kɛtsɔ̃ɔ akɛ ekpɛlɛ̃ nɔ,

⁹ ni ejieee niiaŋ yɛ wɔ kɛ amɛ teŋ, ejaakɛ ekɛ hemɔkɛyeli tsuɔ amɛtsuii ahe.

¹⁰ No hewɔ lɛ, agbɛnɛ mɛɛba nyɛkaa Nyɔŋmɔ, ni nyɛkɛ kɔŋtso ni wɔji o, wɔtsɛmɛi lɛ ji o, wɔnyɛɛɛ wɔtere lɛ fɔ̃ɔ kaselɔi lɛ akɔŋ?

¹¹ Shi wɔheɔ wɔyeɔ akɛ Nuŋtsɔ Yesu dromɔ lɛ nɔ atsɔ̃ɔ ahereɔ wɔyiwala tamɔ amɛ nɔŋŋ.”

¹² Kɛkɛ ni asafo muu lɛ fɛɛ fee diŋŋ ni amɛbo Barnaba kɛ Paulo ni gbaa amɛ okadii kɛ naakpɛɛnii abɔ ni Nyɔŋmɔ tsɔ̃ amɛnɔ efee yɛ jeŋmaji lɛ amli lɛ atoi.

¹³ Be ni amɛwie amɛgbe naa lɛ, Yakobo here nɔ ni ekɛɛ, “Anyɛmimɛi hii, nyɛboa mi toi.

¹⁴ Simeon egba bɔ ni Nyɔŋmɔ basara jeŋmaji lɛ tsutsu ko ni ehala maŋ kɛjɛ amɛteŋ ehã egbɛi lɛ.

¹⁵ Ni gbalɔi lɛ awiemɔi lɛ hu kɛ enɛ yeɔ hegbɔ pɛpɛɛpɛ, tamɔ bɔ ni aŋma lɛ akɛ,

¹⁶ ‘Nii nɛɛ asɛɛ lɛ maku misɛɛ maba, ni masaa David buu ni egbee shi lɛ mama shi; ni etsukoi lɛ hu matswa ekoŋŋ, ni matee lɛ shi mama shi.

¹⁷ Bɔ ni afee ni gbɔmɛi ni eshwɛ lɛ kɛ jeŋmaji lɛ fɛɛ ni akɛ migbɛi ewo amɛ lɛ atao Nuŋtsɔ lɛ sɛɛgbɛ.’

¹⁸ Nuŋtsɔ lɛ ni hã ale enɛ kɛjɛ teteete lɛ kɛɛ.

¹⁹ “No hewɔ lɛ, nɔ ni mikɛɔ ji akɛ akagba mɛi ni eku amɛsɛɛ kɛjɛ jeŋmaji lɛ amli kɛba Nyɔŋmɔ ŋɔɔ lɛ anaa tuutu;

²⁰ shi moŋ aŋma amɛ akɛ amɛhi nii fɛɛ ni wɔji ewo he muji; amɛhi ajwamãŋbɔɔ kɛ kooloi ni ashɔ̃tɔ̃ lɛ lá.

²¹ Ejaakɛ kɛjɛ blema beebe lɛ Mose yɛ mɛi ni shiɛɔ lɛ yɛ maŋ fɛɛ maŋ nɔ, ni daa hejɔɔmɔ gbi lɛ akaneɔ ewoji lɛ yɛ kpeehei lɛ.”

Wolo ni jɛ kpee lɛ mli

²² Kɛkɛ ni esa bɔfoi lɛ kɛ onukpai lɛ kɛ asafo muu lɛ fɛɛ hiɛ akɛ amɛaafãmɔ hii komɛi yɛ amɛ diɛŋtsɛ amɛteŋ, ni atsu amɛ kɛ Paulo kɛ Barnaba kɛya Antiokia. Hii nɛɛ ji Yuda, mɔ ni atsɛɔ lɛ Barsaba hu lɛ, kɛ Sila; gbɔmɛi nɛɛ ji hiɛnaanɔbii yɛ nyɛmimɛi lɛ ateŋ.

²³ Ni amɛŋma wolo amɛhã amɛ akɛ, “Bɔfoi lɛ kɛ onukpai lɛ kɛ nyɛmimɛi lɛ miibi nyɛmimɛi ni jɛ jeŋmaji lɛ ateŋ ni yɔɔ Antiokia kɛ Siria kɛ Kilikia lɛ jogbaŋŋ.

²⁴ Akɛni wɔnu akɛ wɔteŋ mɛi komɛi bagba nyɛnaa kɛ wiemɔi komɛi, ni amɛkɛfutu nyɛjwɛŋmɔ, tsɛ jeee wɔ wɔfã amɛ akɛ amɛbafee nakai hewɔ lɛ,

²⁵ esa wɔhiɛ akɛ, ni wɔnaa efee ekome nɛɛ, wɔfãmɔ mɛi wɔfata Barnaba kɛ Paulo ni wɔsumɔɔ

²⁶ ni ji gbɔmɛi ni kɛ amɛwala eŋmɛ shi yɛ wɔNuŋtsɔ Yesu Kristo gbɛi hewɔ lɛ he, ni wɔtsu amɛ nyɛŋɔɔ.

²⁷ No hewɔ lɛ, wɔtsu Yuda kɛ Sila, ni amɛ hu amɛkɛ amɛdaaŋ wiemɔ abajaje nibii nɛɛ amɛtsɔ̃ɔ nyɛ.

²⁸ Ejaakɛ esa Mumɔ Krɔŋkrɔŋ lɛ hiɛ, ni esa wɔ hu wɔhiɛ akɛ wɔkɛ jatsu kroko akatere nyɛ, akɛ ja nii ni he hiaa nɛɛ nɔŋŋ;

²⁹ akɛ nyɛhi loi ni agbe ahã wɔji kɛ lá kɛ kooloi ni ashɔ̃tɔ̃ kɛ ajwamãŋbɔɔ. Kɛji nyɛwi nyɛhe kɛjɛ enɛɛmɛi ahe lɛ, nyɛfee jogbaŋŋ. Nyɛhia shi jogbaŋŋ!”

³⁰ Be ni awo mɛi ni atsu lɛ gbɛ lɛ, amɛba Antiokia ni amɛbabua asafo muu lɛ naa ni amɛkɛ wolo lɛ hã amɛ.

³¹ Ni be ni amɛkane lɛ, amɛmii shɛ amɛhe yɛ hewalɛ ni ewo amɛ lɛ hewɔ.

³² Shi Yuda kɛ Sila lɛ, akɛni amɛ diɛŋtsɛ hu gbalɔi ji amɛ hewɔ lɛ, amɛwie saŋŋ kɛshɛje nyɛmimɛi lɛ amii ni amɛkɛwo amɛ hewalɛ.

³³ Ni be ni amɛye be fioo yɛ jɛi lɛ, nyɛmimɛi lɛ wo amɛ gbɛ yɛ hejɔlɛ mli kɛtee mɛi ni tsu amɛ lɛ aŋɔɔ. [

³⁴ Shi Sila lɛ, esa ehiɛ akɛ eeehi jɛi.]

³⁵ Shi Paulo kɛ Barnaba hi Antiokia amɛtsɔ̃ɔ nii ni amɛjaje Nuŋtsɔ lɛ Sanekpakpa lɛ, ni mɛi krokomɛi pii hu fee nakai nɔŋŋ.

Paulo kɛ Barnaba gbala mli

³⁶ Shi gbii komɛi asɛɛ lɛ, Paulo kɛɛ Barnaba akɛ, “Hã wɔku wɔsɛɛ wɔyasara wɔnyɛmimɛi lɛ yɛ maŋ fɛɛ maŋ ni wɔjaje Nuŋtsɔ lɛ wiemɔ lɛ yɛ mli lɛ mli, ni wɔkwɛ bɔ ni amɛyɔɔ.”

³⁷ Ni Barnaba tao akɛ amɛŋɔ Yohane ni atsɛɔ lɛ Marko lɛ amɛfata amɛhe.

³⁸ Shi Paulo lɛ, lɛ lɛ esusu akɛ esaaa akɛ amɛaaŋɔ mɔ ni kpale yɛ amɛsɛɛ yɛ Pamfilia ni ekɛ amɛ eyaaa nitsumɔ lɛ amɛfata amɛhe.

³⁹ No hewɔ lɛ, efee bei aahu po ni ehã amɛmli gbala, ni Barnaba ŋɔ Marko efata ehe ni amɛtsɔ lɛlɛ mli kɛtee Kipro.

⁴⁰ Shi Paulo lɛ, efã Sila efata ehe, ni be ni nyɛmimɛi lɛ tu lɛ wo Nyɔŋmɔ dromɔ lɛ dɛŋ lɛ Paulo yi mli.

⁴¹ Ni etsɔ̃ Siria kɛ Kilikia eyawo asafoi lɛ ahewalɛ.