Bɔfoi 14 - ŊMALƐ KRƆŊKRƆŊ LƐ

Paulo kɛ Barnaba yɛ Ikonium

¹ Yɛ Ikonium nɛɛ hu Paulo kɛ Barnaba tee Yudafoi lɛ akpeehe lɛ ni amɛyawie amɛtsɔ̃ɔ amɛ bɔ ni ehã Yudafoi lɛ kɛ Helabii lɛ ateŋ mɛi babaoo he ye.

² Shi Yudafoi ni heee wiemɔ lɛ yeee lɛ wo jeŋmajiaŋbii lɛ ayiŋ koni amɛte shi amɛwo nyɛmimɛi lɛ.

³ No hewɔ lɛ, bɔfoi lɛ tsɛ yɛ jɛi ni amɛkɛ ekãa wie Nuŋtsɔ lɛ he, ni lɛ hu ehã atsɔ̃ amɛnine nɔ afee okadii kɛ naakpɛɛnii pii ekɛye edromɔ wiemɔ lɛ he odase.

⁴ Shi maŋ lɛ mli bii lɛ amli gba enyɔ, fã fata Yudafoi lɛ ahe, ni fã hu fata bɔfoi lɛ ahe.

⁵ Shi be ni jeŋmajiaŋbii lɛ kɛ Yudafoi lɛ kɛ amɛnukpai lɛ bu kɛba ni amɛbafee amɛ niseniianii koni amɛbatswia amɛ tɛ lɛ,

⁶ bɔfoi lɛ na le ni amɛjo foi kɛtee Likaonia maji lɛ amli, Listra kɛ Derbe kɛ jɛi niiaŋ,

⁷ ni jɛi hu amɛjaje Sanekpakpa lɛ amɛtsɔ̃ɔ.

Paulo kɛ Barnaba yɛ Listra

⁸ Nuu ko yɛ Listra ni eji obubuafo kɛjɛ enyɛ musuŋ beebe ni enyiɛko dã, shi shi etaa.

⁹ Ni be ni Paulo wieɔ lɛ, ebo toi. Paulo kwɛ lɛ gãa ni ena akɛ eyɛ hemɔkɛyeli akɛ aaatsa lɛ,

¹⁰ hewɔ lɛ ekɛ gbee ni wa kɛɛ lɛ akɛ, “Tee shi odamɔ onaji lɛ anɔ trɔmɔɔ!” Ni ehuru eyi shi ni enyiɛ.

¹¹ Ni be ni asafoi lɛ na nɔ ni Paulo efee lɛ, amɛwo amɛgbee nɔ yɛ Likaonia wiemɔ lɛ mli amɛkɛɛ, “Nyɔŋmɔi lɛ etsɔ̃mɔ amɛhe gbɔmɛi kɛyimɔ shi kɛba wɔŋɔɔ!”

¹² Ni amɛtsɛ Barnaba akɛ Dio, kɛ Paulo hu akɛ Herme, ejaakɛ lɛ ji mɔ ni wieɔ amɛnaa.

¹³ Shi Dio amãgã ni yɔɔ amɛmaŋ lɛ mli agbo lɛ naa lɛ osɔfo lɛ hiɛ tsinahii kɛ nyanyrã akekrei kɛba agbo lɛ naa, lɛ kɛ asafo lɛ miitao amɛshã afɔle.

¹⁴ Shi be ni bɔfoi lɛ ni ji Barnaba kɛ Paulo nu he lɛ, amɛgbala amɛtadei ni amɛsha foi amɛyabote asafo lɛ teŋ amɛhiɛ blɔmɔ akɛ,

¹⁵ “Ataamɛi, mɛni nyɛfeɔ nɛɛ? Wɔ hu gbɔmɛi adesai ji wɔ tamɔ nyɛ nɔŋŋ, ni wɔmiijaje Sanekpakpa wɔmiitsɔ̃ɔ nyɛ, koni nyɛku nyɛsɛɛ kɛjɛ nɛkɛ yakayakanii nɛɛ ahe kɛba Nyɔŋmɔ hiɛkãalɔ lɛ ŋɔɔ, mɔ ni fee ŋwɛi kɛ shikpɔŋ kɛ ŋshɔ kɛ nii fɛɛ ni yɔɔ amɛmli lɛ.

¹⁶ Yinɔi ni eho lɛ amli lɛ ehã jeŋmaji lɛ fɛɛ nyiɛ amɛ diɛŋtsɛ amɛgbɛi lɛ anɔ,

¹⁷ Shi kɛ̃lɛ efɔɔɔ lɛ diɛŋtsɛ ehe odaseyeli, shi moŋ efeɔ ejurɔ ni ehãa nu jɛɔ ŋwɛi nɛɔ hãa nyɛ, kɛ bei ni nii baa pii hu, ni ehãa nyɛtɔrɔɔ, ni miishɛɛ yiɔ nyɛtsuiiaŋ obɔ̃bɔ̃.”

¹⁸ Ni ekpakpa ko dani amɛkɛ wiemɔ nɛɛ tsi afɔle ni kulɛ mɛi lɛ baashã ahã amɛ lɛ naa.

¹⁹ Shi Yudafoi komɛi jɛ Antiokia kɛ Ikonium ba jɛi bawo asafoi lɛ ayiŋ, ni amɛtswia Paulo tɛi, ni amɛgbala lɛ kɛjɛ maŋ lɛ mli ejaakɛ amɛsusu akɛ egbo.

²⁰ Shi be ni kaselɔi lɛ babɔle ehe kɛkpe lɛ, ete shi ni etee maŋ lɛ mli. Ni enɔ jetsɛremɔ lɛ, ekɛ Barnaba yiŋ kɛtee Derbe.

Paulo kɛ Barnaba ba Antiokia ekoŋŋ

²¹ Ni be ni amɛjaje Sanekpakpa lɛ amɛtsɔ̃ɔ yɛ Derbe ni amɛfee mɛi pii kaselɔi lɛ, amɛku amɛsɛɛ kɛtee Listra kɛ Ikonium kɛ Antiokia.

²² Amɛsaa amɛwo kaselɔi lɛ amumɔŋ hewalɛ, ni amɛwie amɛtsɔ̃ɔ amɛ, akɛ amɛhiɛ hemɔkɛyeli lɛ mli, ni asaŋ esa akɛ wɔtsɔ̃ɔ amanehului pii amli kɛboteɔ Nyɔŋmɔ Maŋtsɛyeli lɛ mli.

²³ Ni amɛfãmɔ onukpai amɛto asafo fɛɛ asafo nɔ, ni amɛkɛ sɔlemɔ kɛ ŋmaahilɛ tu amɛ amɛwo Nuŋtsɔ, mɔ nɔ ni amɛhe amɛye lɛ dɛŋ.

²⁴ Ni amɛfo mli kɛtsɔ̃ Pisidia kɛba Pamfilia.

²⁵ Ni be ni amɛjaje wiemɔ lɛ amɛtsɔ̃ɔ yɛ Perga lɛ, amɛkɛshwie nɔ kɛba Atalia.

²⁶ Ni amɛbote lɛlɛ mli yɛ jɛi, ni amɛfã kɛba Antiokia, he ni atu amɛ awo Nyɔŋmɔ dromɔ lɛ dɛŋ kɛhã nitsumɔ ni amɛtsu amɛgbe naa nɛɛ yɛ lɛ.

²⁷ Shi be ni amɛba jɛi ni amɛbabua asafo lɛ naa lɛ, amɛgba amɛ nii ni Nyɔŋmɔ kɛ amɛ eyatsu lɛ fɛɛ, kɛ bɔ ni egbele gbɛ ehã jeŋmaji lɛ ni amɛhe amɛye lɛ.

²⁸ Ni amɛkɛ kaselɔi lɛ hi shi gbii kplaŋŋ.