Bɔfoi 13 - ŊMALƐ KRƆŊKRƆŊ LƐ

Atu shiɛmɔ nitsumɔ lɛ awo Barnaba kɛ Saul dɛŋ

¹ Shi gbalɔi kɛ tsɔɔlɔi komɛi yɛ Antiokia asafo lɛ mli, amɛ ji Barnaba kɛ Simeon, mɔ ni atsɛɔ lɛ Niger hu lɛ, kɛ Lukio, Kirenenyo lɛ, kɛ Manahen, mɔ ni alɛ lɛ kɛ lumɔ Herode lɛ kɛ Saul.

² Shi be ni amɛjaa Nuŋtsɔ lɛ ni amɛhiɔ ŋmaa lɛ, Mumɔ Krɔŋkrɔŋ lɛ kɛɛ, “Nyɛjiea Barnaba kɛ Saul nyɛhãa mi kɛhã nitsumɔ ni mitsɛ amɛ yɛ hewɔ lɛ.”

³ Kɛkɛ ni amɛhi ŋmaa ni amɛsɔle, ni amɛkɛ amɛniji ŋmɛ̃lɛ amɛnɔ ni amɛwo amɛ gbɛ.

Bɔfoi lɛ shiɛ yɛ Kipro

⁴ Akɛni Mumɔ Krɔŋkrɔŋ lɛ etsu Saul kɛ Barnaba akɛ amɛya lɛ, amɛyiŋ amɛtee Seleukia, ni amɛkɛ lɛlɛ jɛ jɛi kɛtee Kipro.

⁵ Ni be ni amɛshɛ Salami lɛ, amɛjaje Nyɔŋmɔ wiemɔ lɛ yɛ Yudafoi lɛ akpeehei lɛ. Amɛkɛ Yohane hu nyiɛ akɛ amɛsɔ̃ɔlɔ.

⁶ Ni be ni amɛfo mli kɛtsɔ̃ ŋshɔkpɔ muu lɛ fɛɛ nɔ kɛtee Pafo lɛ, amɛna Yudanyo ŋkunyaayelɔ ko ni ji amale gbalɔ ni atsɛɔ lɛ Bar-Yesu lɛ;

⁷ ekɛ amralo Sergio Paulo ni ji nuu nilelɔ lɛ yɔɔ. Amralo nɛɛ tsɛ Barnaba kɛ Saul kɛba eŋɔɔ, eetao akɛ enu Nyɔŋmɔ wiemɔ lɛ.

⁸ Shi Elima ŋkunyaayelɔ lɛ (egbɛi lɛ shishi yɛ Hela wiemɔ mli ji no) ku amɛnaa, ejaakɛ eetao ni ekpale amralo lɛ kɛjɛ hemɔkɛyeli lɛ he.

⁹ Shi Saul, mɔ ni atsɛɔ lɛ Paulo hu, ni Mumɔ Krɔŋkrɔŋ eyi lɛ obɔ̃ lɛ, kwɛ Elima gãa

¹⁰ ni ekɛɛ, “Ao, bo abonsam bi ni shishiumɔ kɛ kutumpɔo fɛɛ eyi bo obɔ̃, bo jalɛ fɛɛ henyɛlɔ, aso ofɔŋ Nuŋtsɔ lɛ gbɛi trɔmɔi lɛ akɔdɔmɔ̃?

¹¹ Naa, Nuŋtsɔ lɛ nine kã onɔ, ni oooshwila ni onaŋ hulu kɛyaashi be ko.” Ni amrɔ̃ lɛ nɔŋŋ lɛ afua kɛ duŋ baha enɔ, ni egbugbuu shi eetao mɔ ko amɔ enine mli ayajie lɛ gbɛ.

¹² Kɛkɛ lɛ, be ni amralo lɛ na nɔ ni afee lɛ, ehe eye, ni ehe jɔ̃ ehe yɛ nɔ ni atsɔ̃ɔ yɛ Nuŋtsɔ lɛ he lɛ hewɔ.

Paulo kɛ Barnaba yɛ Antiokia

¹³ Shi be ni Paulo kɛ emɛi lɛ fã kɛjɛ Pafo lɛ, amɛkɛ lɛlɛ ba Perga yɛ Pamfilia; ni Yohane shi amɛ, ni eku esɛɛ kɛtee Yerusalɛm ekoŋŋ.

¹⁴ Shi amɛ lɛ amɛfo mli kɛjɛ Perga kɛtee Antiokia ni yɔɔ Pisidia lɛ, ni amɛtee kpeehe lɛ yɛ hejɔɔmɔ gbi lɛ nɔ, ni amɛyatara shi.

¹⁵ Ni be ni akane Mose Mla lɛ kɛ gbalɔi lɛ sɛɛ lɛ, kpeehe lɛ onukpai lɛ tsu abakɛɛ amɛ akɛ, “Anyɛmimɛi, kɛji nyɛyɛ hewalɛwoo wiemɔ ko kɛhã mɛi lɛ, nyɛkɛ amɛ awiea.”

¹⁶ Kɛkɛ ni Paulo te shi edamɔ shi, ni efɔ̃ enine ekɛɛ, “Ataamɛi Israelhii kɛ nyɛ mɛi ni nyɛsheɔ Nyɔŋmɔ gbeyei, nyɛboa toi!

¹⁷ Nɛkɛ maŋ Israel nɛɛ Nyɔŋmɔ lɛ hala wɔtsɛmɛi lɛ, ni be ni amɛyato gbɔ yɛ Ijipt shikpɔŋ lɛ nɔ lɛ, ewo maŋ lɛ nɔ, ni ekɛ hewalɛ jie amɛ kɛjɛ jɛi.

¹⁸ Ni ekɛ tsuishitoo hiɛ amɛ yɛ ŋa lɛ nɔ aaafee afii nyɔŋmai ejwɛ,

¹⁹ ni ekpãtã jeŋmaji kpawo ahiɛ yɛ Kanaan shikpɔŋ lɛ nɔ, ni eja amɛshikpɔŋ lɛ ehã amɛ akɛ amɛnɔ.

²⁰ Enɛ fɛɛ ye aaafee afii ohai ejwɛ kɛ nyɔŋmai enumɔ. “Enɛ sɛɛ lɛ ehã amɛ kojolɔi kɛbashi gbalɔ Samuel nɔ.

²¹ Ni no sɛɛ lɛ amɛbi maŋtsɛ, ni Nyɔŋmɔ kɛ Kish bi Saul, nuu ko ni jɛ Benyamin akutso lɛ mli, hã amɛ afii nyɔŋmai ejwɛ.

²² Ni be ni ekpa lɛ lɛ, etee David shi ni ewo lɛ amɛnɔ maŋtsɛ, ni eye ehe odase ekɛɛ, ‘Mina David, Ishai bi lɛ, nuu ni miyɔɔ ehe tsui ni eeefee misuɔmɔnaanii lɛ fɛɛ lɛ.’

²³ Mɔ nɛ shwie mli Nyɔŋmɔ jie Yesu kɛjɛ yɛ shiwoo lɛ naa ehã Israel akɛ yiwalaherelɔ.

²⁴ Dani Yesu ba lɛ, Yohane eshiɛ etsɔ̃ɔ Israel maŋ muu lɛ fɛɛ akɛ amɛtsake amɛtsui ni abaptisi amɛ.

²⁵ Ni be ni Yohane egbe enitsumɔ lɛ naa etã lɛ, ekɛɛ, ‘Namɔ nyɛsusuɔ akɛ mi ji? Jeee mi ji lɛ; shi naa, mɔ ko miiba yɛ misɛɛ ni misaaa mɔ ni fɛneɔ etokotai yɛ enaji.’

²⁶ “Ataamɛi kɛ anyɛmimɛi, Abraham shwiei kɛ Nyɔŋmɔ gbeyeishelɔi ni yɔɔ nyɛteŋ, wɔ atsu akɛ nɛkɛ yiwalaheremɔ sane nɛɛ bahã.”

²⁷ Ejaakɛ mɛi ni yɔɔ Yerusalɛm lɛ kɛ amɛmaŋ onukpai lɛ, akɛni amɛleee Yesu, ni asaŋ amɛnuuu gbalɔi lɛ awiemɔi ni akaneɔ hejɔɔmɔ gbi fɛɛ hejɔɔmɔ gbi nɔ lɛ ashishi hewɔ lɛ, amɛkɛ amɛfɔ ni amɛbu lɛ lɛ ehã gbalɔi lɛ awiemɔi lɛ eba mli.

²⁸ Ni tsɛ amɛnaaa sane ko yɛ ehe ni amɛaadamɔ nɔ kɛbu lɛ gbele fɔ moŋ, kɛ̃lɛ amɛkpa Pilato fai akɛ agbe lɛ.

²⁹ Ni be ni amɛhã nibii fɛɛ ni aŋma yɛ ehe lɛ eba mli lɛ, amɛ jie lɛ yɛ tso lɛ nɔ, ni amɛyato lɛ yɛ gbonyobu ko mli.

³⁰ Shi Nyɔŋmɔ tee lɛ shi kɛjɛ gbohii ateŋ;

³¹ Ni ejie ehe kpo gbii pii etsɔ̃ɔ mɛi ni kɛ lɛ jɛ Galilea ba Yerusalɛm lɛ, ni amɛ ji odasefoi ha maŋ lɛ.

³² Ni wɔ lɛ, shi ni ewo wɔtsɛmɛi lɛ he Sanekpakpa lɛ wɔjajeɔ wɔtsɔ̃ɔ nyɛ nɛɛ,

³³ akɛ no nɔŋŋ Nyɔŋmɔ ehã eba mli ehã wɔ ni wɔji amɛbii lɛ, akɛni etee Yesu shi, tamɔ bɔ ni aŋma yɛ lala ni ji enyɔ lɛ mli hu akɛ, ‘Mi-Bi ji bo; ŋmɛnɛ mifɔ bo lɛ.’

³⁴ “Shi akɛni etee lɛ shi kɛjɛ gbohii ateŋ ni ekuŋ esɛɛ kɛyaŋ fitemɔ mli dɔŋŋ hewɔ lɛ ekɛɛ akɛ, ‘Maŋɔ David dromɔnii krɔŋkrɔŋi ni he shiwoo ma shi shiŋŋ lɛ mahã nyɛ.’

³⁵ No hewɔ hu ni ekɛɛ yɛ he kroko akɛ, ‘Ohaŋ omɔ krɔŋkrɔŋ lɛ ana fitemɔ’ lɛ.

³⁶ “Ejaakɛ David lɛ, be ni esɔ̃mɔ yɛ Nyɔŋmɔ yiŋtoo naa yɛ eyinɔ lɛ, etsɔ̃ mli ewɔ, ni aŋɔ lɛ afata etsɛmɛi lɛ ahe, ni ena fitemɔ.

³⁷ Shi mɔ ni Nyɔŋmɔ tee lɛ shi lɛ, enaaa fitemɔ.

³⁸ No hewɔ lɛ, anyɛmimɛi hii, nyɛnaa nyɛlea akɛ mɔ nɛ nɔŋŋ nɔ atsɔ̃ɔ ajajeɔ eshaifaa atsɔɔ nyɛ lɛ; ni nibii fɛɛ ni anyɛŋ abu nyɛ bem yɛ he yɛ Mose Mla lɛ naa lɛ,

³⁹ mɔ nɛ mli lɛ mɔ fɛɛ mɔ ni heɔ yeɔ lɛ, abuɔ lɛ bem.

⁴⁰ No hewɔ lɛ, nyɛkwɛa ni ahia, koni nɔ ni awie yɛ gbalɔi lɛ amli lɛ akaba nyɛnɔ akɛ,

⁴¹ ‘Nyɛkwɛa, nyɛ heguɔgbelɔi, ni nyɛhiɛ afea nyɛ yaa, ni nyɛhiɛ akpãtãa, ejaakɛ mibatsu nitsumɔ ko yɛ nyɛyinɔ, nitsumɔ ko ni kɛ mɔ ko gba nyɛ tete lɛ, nyɛheŋ nyɛyeŋ kɔkɔɔkɔ.’ ”

⁴² Shi be ni amɛje kpeehe lɛ, mɛi lɛ kpa amɛ fai akɛ amɛbajaje nɛkɛ wiemɔi nɛɛ amɛtsɔ̃ɔ amɛ ekoŋŋ yɛ hejɔɔmɔ gbi ni nyiɛ no sɛɛ lɛ nɔ.

⁴³ Ni be ni mɛi ni yɔɔ kpeehe lɛ ekpa lɛ, Yudafoi kɛ mɛi ni sheɔ Nyɔŋmɔ gbeyei ni emɔ Yudafoi lɛ ajamɔ lɛ mli lɛ ateŋ mɛi pii nyiɛ amɛsɛɛ, ni Paulo kɛ Barnaba wie tsɔ̃ɔ amɛ, ni amɛwo amɛ ŋaa akɛ amɛhi Nyɔŋmɔ dromɔ lɛ mli.

⁴⁴ Ni hejɔɔmɔ gbi ni nyiɛ sɛɛ lɛ nɔ lɛ, shwɛ fioo ni eba lɛ akɛ maŋ muu lɛ fɛɛ ji mɛi ni babua amɛhe naa ni amɛbo Nyɔŋmɔ wiemɔ lɛ toi lɛ.

⁴⁵ Shi be ni Yudafoi lɛ na asafoi lɛ, awuŋayeli yi amɛ obɔ̃, ni amɛkɛ musubɔɔ wiemɔi wie shi nii ni Paulo wieɔ lɛ.

⁴⁶ Ni Paulo kɛ Barnaba wie kɛ ekãa amɛkɛɛ, “Kulɛ nyɛ tsutsu esa akɛ ajaje Nyɔŋmɔ wiemɔ lɛ atsɔ̃ɔ; shi akɛni nyɛŋwã wiemɔ lɛ ni nyɛbuuu nyɛhe akɛ nyɛsa naanɔ wala lɛ hewɔ lɛ, naa, wɔdɔ wɔyi kɛmiiya jeŋmajiaŋbii lɛ aŋɔɔ.

⁴⁷ Ejaakɛ nakai Nuŋtsɔ lɛ wo wɔ kitã akɛ, ‘Miŋɔ bo midamɔ shi akɛ jeŋmaji lɛ ala, koni otsɔ̃ yiwalaheremɔ kɛyashi shikpɔŋ lɛ naagbee hei lɛ.’ ”

⁴⁸ Shi be ni jeŋmajiaŋbii lɛ nu enɛ lɛ amɛna miishɛɛ, ni amɛwo Nyɔŋmɔ wiemɔ lɛ hiɛ nyam, ni mɛi abɔ ni ajie ato naanɔ wala lɛ he ye.

⁴⁹ Ni Nuŋtsɔ lɛ wiemɔ lɛ gbɛ shwã yɛ jɛi niiaŋ fɛɛ.

⁵⁰ Shi Yudafoi lɛ wowoo yei Nyɔŋmɔ gbeyeishelɔi ni abuɔ amɛ lɛ kɛ maŋ lɛ mli hiɛnaanɔbii lɛ ayiŋ, ni amɛbɔ̃i Paulo kɛ Barnaba yiwaa ni amɛshwie amɛ kɛjɛ amɛkpokpai lɛ anɔ.

⁵¹ Shi amɛ lɛ amɛkpokpo amɛnajiashi mlu amɛshwie amɛnɔ, ni amɛyiŋ kɛtee Ikonium.

⁵² Ni kaselɔi lɛ yimɔ obɔ̃bɔ̃ kɛ miishɛɛ kɛ Mumɔ Krɔŋkrɔŋ.