Bɔfoi 11 - ŊMALƐ KRƆŊKRƆŊ LƐ

Petro yabɔ Yerusalɛm asafo lɛ amaniɛ

¹ Agbɛnɛ bɔfoi lɛ kɛ nyɛmimɛi ni yɔɔ Yudea lɛ fɛɛ nu akɛ jeŋmajiaŋbii lɛ hu emɔ Nyɔŋmɔ wiemɔ lɛ mli.

² Ni be ni Petro ba Yerusalɛm lɛ, mɛi ni jɛ ketiafolɔi ateŋ lɛ kɛ lɛ ná

³ amɛkɛɛ, “Otee hii foolɔi aŋɔɔ ni okɛ amɛ yaye nii.”

⁴ Shi Petro je shishi ni egba amɛ nibii lɛ fɛɛ ekomekome ekɛɛ,

⁵ “Miyɛ Yopa maŋ lɛ mli miisɔle, ni efee tamɔ nɔ ni nɔ enyɔ minɔ, ni mina ninaa ko akɛ nɔ ko jɛ ŋwɛi tamɔ mama kpele ni ahiɛ ekoji ejwɛ lɛ mli aashi kɛmiiba shi, ni eba miŋɔɔ kpaakpa.

⁶ Ni be ni mitɛ̃je mihiɛ ni mikwɛ mli lɛ, mina shikpɔŋ nɔ kooloi naji ejwɛjwɛɛjwɛtsɛmɛi kɛ ŋaŋ kooloi kɛ kooloi ni wamɔɔ kɛ ŋwɛi loofɔji yɛ mli.

⁷ Ni minu gbee ko hu kɛɛ mi akɛ, ‘Petro, tee shi, gbee ni oye!’

⁸ Shi mikɛɛ, ‘Dabida, Nuŋtsɔ, ejaakɛ nɔ ko ni buleɔ mɔ aloo nɔ ko ni he tseee eyako midaaŋ dã.’

⁹ Shi gbee ni jɛ ŋwɛi lɛ here mi nɔ nɔ ni ji shii enyɔ akɛ, ‘Nɔ ni Nyɔŋmɔ etsuu he lɛ, kaabu lɛ nɔ ni he tseee.’

¹⁰ Afee nakai shii etɛ̃, ni agbala fɛɛ kɛtee ŋwɛi ekoŋŋ.

¹¹ Ni amrɔ lɛ nɔŋŋ hii etɛ̃ badamɔ shĩa he ni miyɔɔ lɛ agbo lɛ naa ní atsu amɛ kɛjɛ Kaisarea kɛba miŋɔɔ.

¹² Ni Mumɔ lɛ kɛɛ mi akɛ mikɛ amɛ aya, ni mikashashao shi kwraa; ni nyɛmimɛi ekpaa hu kɛ mi tee, ni wɔyabote nuu lɛ we lɛ.

¹³ Ni egba wɔ bɔ ni ena bɔfo lɛ yɛ ewe lɛ ni edamɔ shi eekɛɛ lɛ akɛ, ‘Tsu kɛya Yopa ni oyakpee Simon ni atsɛɔ lɛ Petro hu lɛ kɛba,

¹⁴ ni eeebakɛɛ bo wiemɔi ni aaatsɔ̃ nɔ ahere bo kɛ owe lɛ fɛɛ yiwala.’

¹⁵ Shi be ni mibɔ̃i wiemɔ lɛ, Mumɔ Krɔŋkrɔŋ lɛ bayi amɛnɔ, tamɔ bɔ ni eyi wɔ hu wɔnɔ tsutsu lɛ.

¹⁶ Ni mikai Nuŋtsɔ lɛ wiemɔ lɛ ni ekɛɛ akɛ, ‘Yohane lɛ ekɛ nu baptisi, shi nyɛ lɛ akɛ Mumɔ Krɔŋkrɔŋ aaabaptisi nyɛ lɛ.’

¹⁷ Agbɛnɛ kɛ Nyɔŋmɔ ehã amɛ nakai nɔkeenɔ lɛ nɔŋŋ ni ehã wɔ ni wɔheɔ Nuŋtsɔ Yesu Kristo lɛ nɔ wɔyeɔ lɛ hu lɛ, namɔ ji mi ni manyɛ Nyɔŋmɔ naa matsi?”

¹⁸ Shi be ni amɛnu wiemɔi nɛɛ lɛ, amɛmua amɛnaa, ni amɛwo Nyɔŋmɔ hiɛ nyam moŋ amɛkɛɛ, “Belɛ jeŋmaji lɛ hu Nyɔŋmɔ ehã amɛ tsuitsakemɔ ni akɛhere amɛyiwala!”

Antiokia Asafo lɛ

¹⁹ Mɛi ni gbɛ shwa yɛ Stefano amanehulu lɛ mli lɛ fo mli kɛtee Foinikia kɛ Kipro kɛ Antiokia tɔ̃ɔ, shi amɛjajeee wiemɔ lɛ amɛtsɔ̃ɔɔ mɔ ko mɔ ko akɛ ja Yudafoi lɛ kɛkɛ.

²⁰ Shi amɛteŋ mɛi komɛi lɛ, Kiprobii kɛ Kirenebii ji amɛ, ni amɛba Antiokia amɛbawie amɛtsɔ̃ɔ Helabii lɛ hu, ni amɛjaje Nuŋtsɔ Yesu he Sanekpakpa lɛ amɛtsɔ̃ɔ amɛ.

²¹ Ni Nuŋtsɔ lɛ hewalɛ fata amɛhe, ni mɛi babaoo he ye, ni amɛkpale kɛba Nuŋtsɔ lɛ ŋɔɔ.

²² Ni amɛhe sane lɛ bashɛ Yerusalɛm asafo lɛ toiŋ, ni amɛtsu Barnaba kɛtee Antiokia.

²³ Ni be ni ebashɛ jɛi ni ebana Nyɔŋmɔ dromɔ lɛ, emii shɛ ehe, ni ewo amɛ fɛɛ ekãa akɛ amɛkɛ tsui ni fiɔ shi akpɛtɛ Nuŋtsɔ lɛ he.

²⁴ Gbɔmɔ kpakpa ji Barnaba ni eyi obɔ̃ kɛ Mumɔ Krɔŋkrɔŋ kɛ hemɔkɛyeli. Ni ana mɛi babaoo afata Nuŋtsɔ lɛ asafo lɛ he.

²⁵ Ni Barnaba yiŋ etee Tarso ni eyatao Saul, ni be ni ena lɛ lɛ, ekɛ lɛ ba Antiokia.

²⁶ Ni eba mli akɛ amɛkɛ asafo lɛ hi shi afi naakplɔ, ni amɛtsɔ̃ɔ mɛi babaoo anii, ni Antiokia klɛŋklɛŋ awo kaselɔi lɛ agbɛi yɛ akɛ Kristofoi.

²⁷ Shi nɛkɛ bei nɛɛ amli lɛ, gbalɔi komɛi jɛ Yerusalɛm ba Antiokia.

²⁸ Ni amɛteŋ mɔ ko ni atsɛɔ lɛ Agabo lɛ te shi damɔ shi, ni etsɔ̃ɔ yɛ Mumɔ lɛ naa akɛ hɔmɔ waa baaba jeŋ fɛɛ, ni eba mli nakai yɛ Kaisare Klaudio yinɔ.

²⁹ Shi kaselɔi lɛ kpɛ mli akɛ amɛaabua nɔ ko naa amɛkɛyahã nyɛmimɛi ni yɔɔ Yudea lɛ bɔ ni mɔ fɛɛ mɔ aaanyɛ.

³⁰ Ni amɛfee nakai, ni amɛkɛmaje onukpai lɛ kɛtsɔ̃ Barnaba kɛ Saul nine nɔ.