Bɔfoi 10 - ŊMALƐ KRƆŊKRƆŊ LƐ

Nyɔŋmɔ jie ehe kpo etsɔ̃ɔ Kornelio

¹ Shi nuu ko yɛ Kaisarea ni atsɛɔ lɛ Kornelio ni ji asraafoiohaatsɛ yɛ asraafoi akuu ni atsɛɔ lɛ Italia kuu lɛ mli.

² Nyɔŋmɔ jalɔ ni, ni ekɛ ewe lɛ fɛɛ sheɔ Nyɔŋmɔ gbeyei, ni efeɔ maŋbii lɛ ejurɔ pii, ni ekpaa Nyɔŋmɔ fai daa.

³ Aaafee gbɛkɛ ŋmɛji etɛ̃ mli lɛ, ena yɛ ninaa mli faŋŋ akɛ Nyɔŋmɔ bɔfo ko ba eŋɔɔ bakɛɛ lɛ akɛ, “Kornelio!”

⁴ Ni ekwɛ lɛ gãa ni eshe gbeyei ni ekɛɛ; “Mɛni, Nuŋtsɔ?” Ni ekɛɛ lɛ akɛ, “Osɔlemɔi kɛ onijuji ni ofeɔ lɛ eshɛ ŋwɛi ni efee kaimɔnɔ yɛ Nyɔŋmɔ hiɛ.

⁵ Ni agbɛnɛ lɛ tsu mɛi kɛya Yopa ni ayakpee Simon mɔ ni atsɛɔ lɛ Petro hu lɛ kɛba;

⁶ eyato Simon, wolokpoolɔ ko ni shĩa yɔɔ ŋshɔ lɛ naa lɛ ŋɔɔ.”

⁷ Be ni bɔfo ni kɛ lɛ bawie lɛ etee lɛ, etsɛ ewebii lɛ ateŋ mɛi enyɔ kɛ asraafonyo ko ni sheɔ Nyɔŋmɔ gbeyei ni ji mɛi ni sɔ̃mɔɔ lɛ lɛ ateŋ mɔ kome,

⁸ ni egba amɛ nibii nɛɛ fɛɛ, ni etsu amɛ Yopa.

Petro na ninaa ko

⁹ Enɔ jetsɛremɔ, be ni amɛnyiɛ gbɛ lɛ nɔ ni amɛbɛŋkɛ maŋ lɛ, Petro tee sɔlemɔ yɛ tsu yiteŋ aaafee shwane ŋmɛlɛ nyɔŋma kɛ enyɔ mli.

¹⁰ Ni hɔmɔ ye lɛ naakpa, ni eetao nɔ ko eye. Shi be ni afeɔ niyenii lɛ, efee tamɔ nɔ enyɔ enɔ,

¹¹ ni ena akɛ ŋwɛi egbele, ni nɔ ko miikpeleke shi ni tamɔ mama kpeteŋkple, ni ahiɛ ekoji ejwɛ lɛ mli aashi kɛmiiba shikpɔŋ;

¹² ni shikpɔŋ nɔ kooloi naji ejwɛjwɛɛjwɛ kɛ waamɔnii kɛ ŋwɛi loofɔji srɔtoi lɛ fɛɛ eko yɛ mli.

¹³ Ni gbee ko kɛɛ lɛ akɛ, “Petro, tee shi, gbee ni oye.”

¹⁴ Shi Petro kɛɛ, “Dabida, Nuŋtsɔ, ejaakɛ miyeko nɔ ko ni buleɔ mɔ loo nɔ ko ni he tseee dã.”

¹⁵ Ni gbee lɛ saa kɛɛ lɛ nɔ ni ji shii enyɔ akɛ, “Nɔ ni Nyɔŋmɔ etsuu he lɛ, kaabu lɛ akɛ bulemɔnɔ.”

¹⁶ Shi afee nakai shii etɛ̃; ni awo nɔ lɛ kɛtee ŋwɛi ekoŋŋ.

¹⁷ Be ni Petro efee yaa akɛ te nii ni ena nɛɛ shishiŋ lɛ, hii lɛ ni Kornelio tsu lɛ miibibii Simon we lɛ gbɛ; ni amɛbadamɔ agbo lɛ naa

¹⁸ amɛtsɛ ni amɛbi akɛ, “Ani biɛ Simon ni atsɛɔ lɛ Petro hu lɛ bato lɛ?”

¹⁹ Shi be ni Petro jwɛŋɔ ninaa lɛ he lɛ, Mumɔ lɛ kɛɛ lɛ akɛ, “Naa, hii etɛ̃ komɛi miitao bo;

²⁰ no hewɔ lɛ, tee shi ni okpeleke shi okɛ amɛ aya, ni okaje ŋwane ko, ejaakɛ mi mitsu amɛ.”

²¹ Kɛkɛ ni Petro kpeleke shi, ni eyakɛɛ hii lɛ akɛ, “Naa, mi ji mɔ ni nyɛtaoɔ lɛ; mɛɛ sane hewɔ nyɛba?”

²² Ni amɛkɛɛ, “Asraafoiohaatsɛ Kornelio, ni ji nuu jalɔ kɛ Nyɔŋmɔ gbeyeishelɔ ni Yudafoi amaŋ muu lɛ fɛɛ yeɔ ehe odase lɛ, lɛ ŋwɛi bɔfo krɔŋkrɔŋ ko kɛɛ lɛ akɛ etsu ni abakpee bo kɛba ewe lɛ, koni ebo onaa toi.”

²³ Kɛkɛ ni etsɛ amɛ kɛba shĩa lɛ ni ebafee amɛ gbɔ. Ni enɔ jetsɛremɔ lɛ ekɛ amɛ yiŋ kɛtee ni nyɛmimɛi ni yɔɔ Yopa lɛ ateŋ mɛi komɛi fata ehe kɛtee.

Petro yɛ Kornelio we lɛ

²⁴ Ni enɔ jetsɛremɔ ekoŋŋ lɛ amɛyashɛ Kaisarea. Shi Kornelio miikwɛ amɛ gbɛ, ni etsɛ ewekumɛi kɛ enanemɛi juji kɛkpe.

²⁵ Ni be ni Petro boteɔ shĩa lɛ, Kornelio kɛ lɛ bakpe, ni eho egbee enaji anaa ni eja lɛ.

²⁶ Shi Petro wo enɔ, ni ekɛɛ, “Tee shi, shi mi diɛŋtsɛ hu gbɔmɔ ji mi.”

²⁷ Ni ekɛ lɛ hiɛ sanegbaa kɛbote shĩa lɛ, ni eyana mɛi pii ni ebabua amɛhe naa lɛ.

²⁸ Ni ekɛɛ amɛ akɛ, “Nyɛ diɛŋtsɛ nyɛle bɔ ni Yudanyo bɛ hegbɛ akɛ ekɛ mɔ ko ni ji maŋ kroko nɔ nyo bɔɔ aloo ebaa eŋɔɔ; shi mi lɛ Nyɔŋmɔ etsɔ̃ɔ mi akɛ mikatsɛ mɔ ko mɔ ni he tseee loo mɔ ni buleɔ mɔ.

²⁹ No hewɔ hu ni be ni atsu abatsɛ mi lɛ, mijieee naa ni miba nɛɛ. Ni agbɛnɛ miibi nyɛ, ‘Mɛɛ sane hewɔ nyɛbakpee mi nɛɛ?’ ”

³⁰ Ni Kornelio kɛɛ akɛ, “Ŋmɛnɛ ji gbii ejwɛ aaafee ŋmɛji etɛ̃ mli nɛkɛ pɛ, miisɔle yɛ mishĩa nɛɛ; ni naa, nuu ko ni wo atade kaŋkaŋ badamɔ mihiɛ,

³¹ ni ekɛɛ, ‘Kornelio, abo osɔlemɔ lɛ toi, ni onijuji ni ofeɔ lɛ hu Nyɔŋmɔ ena.

³² No hewɔ lɛ, tsu kɛya Yopa, ni ayatsɛ Simon ni atsɛɔ lɛ Petro hu lɛ kɛba; eyato Simon wolokpoolɔ lɛ ni shĩa kã ŋshɔ naa lɛ ŋɔɔ.’

³³ Kɛkɛ ni amrɔ lɛ nɔŋŋ mitsu oŋɔɔ, ni ofee jogbaŋŋ akɛ oba. No hewɔ lɛ, agbɛnɛ wɔ fɛɛ wɔyɛ biɛ yɛ Nyɔŋmɔ hiɛ koni wɔbo nibii fɛɛ ni Nyɔŋmɔ efã bo akɛ okɛɛ lɛ toi.”

Petro shiɛ etsɔ̃ɔ Kornelio kɛ eshĩabii lɛ

³⁴ Kɛkɛ ni Petro gbele enaa ni ekɛɛ, “Lɛɛlɛŋ, miyoo akɛ Nyɔŋmɔ jeee mɛiahĩɛiaŋkwɛlɔ;

³⁵ Shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛnii lɛ, lɛ ji mɔ ni saa ehiɛ.

³⁶ Nyɔŋmɔ tsu akɛ wiemɔ lɛ yahã Israelbii ni etsɔ̃ Yesu Kristo nɔ ejaje hejɔlɛ Sanekpakpa etsɔ̃ɔ amɛ. Yesu nɛɛ ji mɛi fɛɛ aNuŋtsɔ.

³⁷ Nyɛ diɛŋtsɛ nyɛle sane lɛ ni ba Yudea ni eje shishi kɛjɛ Galilea, yɛ baptisimɔ ni Yohane shiɛ lɛ sɛɛ lɛ,

³⁸ bɔ ni Nyɔŋmɔ kɛ Mumɔ Krɔŋkrɔŋ kɛ hewalɛ fɔ Yesu ni jɛ Nazaret lɛ mu, ni ekpaa shi efeɔ ekpakpa ni etsaa mɛi fɛɛ ni abonsam haoɔ amɛ lɛ, ejaakɛ Nyɔŋmɔ kɛ lɛ yɛ.

³⁹ Ni wɔji nibii fɛɛ ni efee yɛ Yudafoi ashikpɔŋ lɛ nɔ kɛ Yerusalɛm lɛ he odasefoi. Amɛsɛŋ lɛ yɛ tso nɔ ni amɛgbe lɛ.

⁴⁰ Shi Nyɔŋmɔ tee lɛ shi gbi ni ji etɛ̃ lɛ, ni ehã ejie ehe kpo etsɔ̃ɔ faŋŋ;

⁴¹ jeee mɛi lɛ fɛɛ ejie ehe kpo etsɔ̃ɔ, shi moŋ odasefoi ni Nyɔŋmɔ ehala eto momo lɛ, ni ji wɔ mɛi ni wɔkɛ lɛ ye nii ni wɔkɛ lɛ nu, be ni ete shi kɛjɛ gbohii ateŋ lɛ sɛɛ lɛ.

⁴² Ni ewo wɔ kitã akɛ wɔshiɛ wɔtsɔ̃ɔ maŋ lɛ ni wɔye odase akɛ lɛ ji mɔ ni Nyɔŋmɔ efã akɛ hiɛkãalɔi kɛ gbohii fɛɛ akojolɔ lɛ.

⁴³ Lɛ ehe odase gbalɔi lɛ fɛɛ yeɔ, akɛ mɔ fɛɛ mɔ ni heɔ enɔ yeɔ lɛ aaana ehe eshai faa yɛ egbɛi lɛ hewɔ.”

Jeŋmajiaŋbii ni asɔle klɛŋklɛŋ

⁴⁴ Be ni Petro wieɔ nɛkɛ wiemɔi nɛɛ lolo lɛ, Mumɔ Krɔŋkrɔŋ lɛ ba mɛi fɛɛ ni nu wiemɔ lɛ anɔ.

⁴⁵ Ni heyelɔi abɔ ni jɛ ketiafolɔi ateŋ ni kɛ Petro ba lɛ anaa kpɛ amɛhe akɛ afɔse Mumɔ Krɔŋkrɔŋ nɔkeenɔ lɛ ashwie jeŋmajiaŋbii hu anɔ,

⁴⁶ ejaakɛ amɛnu akɛ amɛmiiwie wiemɔi srɔtoi ni amɛmiijaje Nyɔŋmɔ agbojee lɛ. Kɛkɛ ni Petro here nɔ akɛ,

⁴⁷ “Ani mɔ ko aaanyɛ nu naa atsi, ni akabaptisi mɛnɛɛmɛi ni na Mumɔ Krɔŋkrɔŋ lɛ tamɔ wɔ nɔŋŋ lɛ?”

⁴⁸ Ni efã akɛ abaptisi amɛ yɛ Yesu Kristo gbɛi lɛ mli. Kɛkɛ ni amɛkpa lɛ fai akɛ ekɛ amɛ ahi shi gbii fioo ko.