Bɔfoi 1 - ŊMALƐ KRƆŊKRƆŊ LƐ

Mumɔ Krɔŋkrɔŋ lɛ he shiwoo

¹ Teofilo, miklɛŋklɛŋ wolo lɛ mli lɛ, migba nii fɛɛ ni Yesu babɔ̃i feemɔ kɛ enitsɔ̃ɔmɔ

² kɛyashi gbi nɔ ni aŋɔ lɛ kɛtee ŋwɛi, be ni etsɔ̃ Mumɔ Krɔŋkrɔŋ lɛ nɔ ewo ebɔfoi ni ehala lɛ akitãi sɛɛ lɛ.

³ Emanehulu lɛ sɛɛ lɛ, etsɔ̃ odaseyeli nibii pii anɔ ejie ehe kpo etsɔ̃ɔ bɔfoi nɛɛ akɛ ehiɛ kã, ni ehã amɛna lɛ gbii nyɔŋmai ejwɛ sɔŋŋ, ni ekɛ amɛ wie Nyɔŋmɔ maŋtsɛyeli lɛ he.

⁴ Ni be ni ekɛ amɛnaa kpe shi lɛ, ewo amɛ akpɔ akɛ, “Nyɛkajea Yerusalɛm, shi moŋ nyɛmɛa Tsɛ lɛ shiwoo lɛ ni nyɛnu yɛ minaa lɛ;

⁵ ejaakɛ Yohane lɛ, nu ekɛbaptisi, shi nyɛ lɛ eyeŋ gbii pii ko ni akɛ Mumɔ Krɔŋkrɔŋ aaabaptisi nyɛ.”

Yesu ŋwɛiyaa

⁶ No hewɔ lɛ, be ni amɛnaa bakpe shi lɛ amɛbi lɛ akɛ, “Nuŋtsɔ, ani nɛkɛ be nɛɛ mli obaatee maŋtsɛyeli lɛ shi oma shi ohã Israel lɛ?”

⁷ Shi Yesu kɛɛ amɛ akɛ, “Jeee nyɛnɔ ji akɛ nyɛaale bei loo gbii lɛ ni Tsɛ lɛ eto yɛ lɛ diɛŋtsɛ ehewalɛ mli lɛ.

⁸ Shi moŋ kɛ Mumɔ Krɔŋkrɔŋ lɛ na ba nyɛnɔ lɛ, nyɛaana hewalɛ ni nyɛaatsɔ̃mɔ midasefoi yɛ Yerusalɛm kɛ Yudea kɛ Samaria fɛɛ, kɛyashi jeŋ koji ejwɛ lɛ.”

⁹ Be ni ewie nii nɛɛ lɛ, amɛmiikwɛ lɛ nɔŋŋ ni awo lɛ, ni atatu ko ŋɔ lɛ kɛje amɛhiɛ kɛtee.

¹⁰ Ni be ni eyaa ni amɛkwɛɔ ŋwɛi gãa lɛ, naa, hii enyɔ ni wo atadei yɛji damɔ amɛmasɛi,

¹¹ ni amɛkɛɛ amɛ akɛ, “Nyɛ Galileabii, mɛɛba nyɛdamɔ shi nyɛkwɛɔ ŋwɛi nɛkɛ? Nɛkɛ Yesu nɛɛ ni aŋɔ lɛ kɛje nyɛŋɔɔ kɛtee ŋwɛi nɛɛ, ebaaba nakai nɔŋŋ, tamɔ bɔ ni nyɛna akɛ eyaa ŋwɛi nɛɛ.”

Ahala Matia ni eye Yuda najiaŋ

¹² Kɛkɛ ni amɛku amɛsɛɛ kɛjɛ gɔŋ ni atsɛɔ lɛ Mugɔŋ lɛ ni kɛ Yerusalɛm jɛkɛmɔ aaafee hejɔɔmɔ gbi gbɛfãa lɛ, nɔ amɛba Yerusalɛm ekoŋŋ.

¹³ Ni be ni amɛshɛ jɛi lɛ, amɛtee ŋwɛitsu ko mli, he ni Petro kɛ Yakobo kɛ Yohane kɛ Andrea kɛ Filipo kɛ Toma kɛ Bartolomeo kɛ Mateo kɛ Alfeo bi Yakobo kɛ Simon, maŋ he hiɛdɔlɔ lɛ, kɛ Yakobo bi Yuda hiɔ lɛ.

¹⁴ Mɛnɛɛmɛi fɛɛ kɛ yei lɛ kɛ Yesu nyɛ Maria kɛ enyɛmimɛi hii lɛ kɛ jwɛŋmɔ kome hiɛ sɔlemɔ mli waa.

¹⁵ Nɛkɛ be nɛɛ mli lɛ Petro te shi edamɔ nyɛmimɛi lɛ ateŋ (mɛi fɛɛ ni ebabua amɛhe naa lɛ aaafee oha kɛ nyɔŋmai enyɔ) ni ekɛɛ,

¹⁶ “Anyɛmimɛi, esa akɛ nɔ ni aŋma ni Mumɔ Krɔŋkrɔŋ lɛ ekɛɛ eto yɛ David naa yɛ Yuda, mɔ ni nyiɛ mɛi ni bamɔ Yesu lɛ ahiɛ lɛ, he lɛ aba mli,

¹⁷ ejaakɛ abu lɛ ashi wɔnɔ, ni eyɛ egbɛnaa yɛ nɛkɛ sɔ̃ɔmɔ nɛɛ mli.”

¹⁸ Shi nɛkɛ nuu nɛɛ ŋɔ enɔsha ni efee lɛ mli nyɔmɔwoo lɛ ehe abɔɔ, ni eyama eyi shi, ni emli gba enyɔ ni emlinii fɛɛ tue shwie shi.

¹⁹ Ni mɛi fɛɛ ni yɔɔ Yerusalɛm lɛ na le enɛ, no hewɔ lɛ, atsɛɔ nakai abɔɔ lɛ yɛ amɛ diɛŋtsɛ amɛwiemɔ mli akɛ Akeldama, eshishi ji “Lá-Abɔɔ”.

²⁰ Ejaakɛ aŋma yɛ Lalai Awolo lɛ mli akɛ, ‘Eshihilɛhe lɛ atsɔ̃ amaŋfɔ̃ ni mɔ ko mɔ ko akahi mli,’ kɛ ekoŋŋ akɛ, ‘Enɔkwɛmɔ nitsumɔ lɛ hu mɔ kroko aŋɔ.’

²¹ “No hewɔ lɛ, esa akɛ hii ni kɛ wɔ nyiɛ be mli fɛɛ ni Nuŋtsɔ Yesu yaa baa yɛ wɔteŋ,

²² kɛjɛ Yohane baptisimɔ lɛ nɔ kɛyashi gbi nɔ ni aŋɔ lɛ kɛje wɔŋɔɔ kɛtee ŋwɛi lɛ ateŋ mɔ kome atsɔ eshitee lɛ he odasefonyo afata wɔhe.”

²³ Ni amɛfamɔ mɛi enyɔ, Yosef ni atsɛɔ lɛ Barsaba ni awo lɛ Yusto hu lɛ, kɛ Matia, amɛdamɔ shi.

²⁴ Ni amɛsɔle amɛkɛɛ, “Bo, Nuŋtsɔ, ni ole gbɔmɛi fɛɛ atsuiiaŋ, tsɔ̃ɔmɔ mɛi enyɔ nɛɛ ateŋ mɔ ni ohala

²⁵ ni eŋɔ nɛkɛ sɔ̃ɔmɔ kɛ bɔfo nitsumɔ ni Yuda eje mli koni ekɔ lɛ diɛŋtsɛ egbɛ lɛ.”

²⁶ Ni amɛfɔ̃ amɛnɔ oshiki, ni oshiki lɛ yagbee Matia nɔ, ni abu lɛ ashi bɔfoi nyɔŋma kɛ ekome lɛ anɔ.