Abe̱i 8 - ŊMALƐ KRƆŊKRƆŊ LƐ

Nilee yijiemɔ

¹ Ani jeee blɔmɔ nilee bolɔɔ kɛtsɛɔ lɛ; ni jeee niiashishinumɔ hu woɔ egbee lɛ?

² Edamɔ hei grɔŋŋi lɛ yɛ gbɛ lɛ he yɛ ŋmaŋmashai lɛ.

³ Ebolɔɔ gegeege yɛ maŋ lɛ agboi lɛ anaa yɛ maŋ lɛ klotia yɛ shinaa lɛ shi akɛ,

⁴ “Oo, nyɛ hii, nyɛ mibolɔɔ mitsɛɔ, ni nyɛ gbɔmɛi abii, nyɛ miwoɔ migbee nɔ mihãa.

⁵ Oo, nyɛ mɛi ni nyɛnako jwɛŋmɔ, nyɛkasea hiɛtɛ̃ɛ. Oo, nyɛ hii kwashiai hu, nyɛboa toi jogbaŋŋ.

⁶ Nyɛboa toi, ejaakɛ mibawie wiemɔi wuji ni he jaraa; ni minaa ni magbele nɛɛ, wiemɔi ni ja sɔŋŋ aaajɛ mli.

⁷ Ejaakɛ anɔkwale wiemɔ aaajɛ midaaŋ; minaabu miihi nɔ fɔŋ.

⁸ Midaaŋ wiemɔi fɛɛ lɛ, jalɛ ni, ekoeko bɛ mli ni ji amale loo kutumpɔo.

⁹ Fɛɛ kã shi faŋŋ hã mɔ ni kɔɔ sane sɛɛ lɛ, ni amɛja yɛ nilelɔ hiɛ.

¹⁰ Nyɛmɔa mitsɔsemɔ lɛ moŋ mli fe jwiɛtɛi, kɛ nilee hu mli fe shika ŋmiiŋmi.

¹¹ Ejaakɛ nilee hi fe tɛ̃ŋlɛ̃o, ni nɔ ko bɛ ni obaatao ni kɛ lɛ ye hegbɔ.

¹² Mi, nilee, mihiɛ tɛ̃; mile nii, ni mibuɔ atɛŋ kpakpa.

¹³ Yehowa gbeyeishemɔ ji ohi nɔ fɔŋ. Hewoo kɛ hetsɔ̃ɔmɔ kɛ jeŋba fɔŋ kɛ kutumpɔo wiemɔ lɛ miihi.

¹⁴ Minɔ ji ŋaawoo kɛ nilee kpakpa, miyɛ sanesɛɛkɔmɔ; miyɛ hewalɛ hu.

¹⁵ Minɔ maŋtsɛmɛi tsɔ̃ɔ yeɔ maŋtsɛ, ni nɔyelɔi hu woɔ jalɛ mla.

¹⁶ Minɔ lumɛi tsɔ̃ɔ yeɔ lumɔ, ni abladei yeɔ shikpɔŋ lɛ nɔ.

¹⁷ Misumɔɔ mɛi ni sumɔɔ mi; ni mɛi ni bɔɔ mɔdɛŋ taoɔ mi lɛ, naa mi.

¹⁸ Ninamɔ kɛ anunyam fɛɛ yɛ midɛŋ; ninamɔ ni sɛɛ tsɛɔ kɛ shweremɔ fɛɛ yɛ midɛŋ.

¹⁹ Miyibii hi fe shika, efe shika ŋmiiŋmi; ni minibaanii lɛ hu hi fe jwiɛtɛi krɔŋŋ.

²⁰ Minyiɛɔ jalɛ gbɛ nɔ, ni mikojoɔ jalɛ naa.

²¹ Ni mɛi ni sumɔɔ mi lɛ, mifeɔ amɛ niiatsɛmɛi, ni miwoɔ amɛfotroi lɛ obɔ̃bɔ̃.

²² Mi Yehowa bɔ kɛje enitsumɔ shishi; mi ji klɛŋklɛŋ nɔ yɛ eblema nitsumɔi lɛ ateŋ.

²³ Kɛjɛ naanɔ beebe abɔ mi klɛŋklɛŋ dani aje jeŋbɔɔ shishi.

²⁴ Be ni ŋshɔ tete po bɛ lɛ, afɔ mi momo, be ni nuhiŋmɛi bɛ lɛ, miyɛ momo.

²⁵ Dani ashɔ̃ gɔji lɛ kɛ gɔ̃ŋkpɔi lɛ, afɔ mi momo.

²⁶ Be ni Nyɔŋmɔ nako ebɔ shikpɔŋ kɛ enɔ jwɛii kɛ je lɛ mli mlu tete lɛ, mi lɛ, abɔ mi momo.

²⁷ Be ni ebɔ ŋwɛi lɛ, miyɛ jɛi; be ni efo ŋshɔ he akrabatsa lɛ, miyɛ.

²⁸ Be ni eŋɔ atatui lɛ esɛŋ shi shiŋŋ yɛ ŋwɛi, ní etsi ŋshɔ lɛ mli nu lɛ naa lɛ, miyɛ.

²⁹ Be ni efo husu ewo ŋshɔ lɛ he, ni nu akaku ekitã lɛ nɔ, be ni eto shikpɔŋ lɛ shishi lɛ,

³⁰ miyɛ emasɛi akɛ ŋaawolɔ. Ni mi ji emiishɛjelɔ daa. Ni mimii shɛɔ mihe yɛ ehiɛ.

³¹ Minaa je lɛ he miishɛɛ, minaa gbɔmɛiabii ahe tsuijurɔ.

³² No hewɔ lɛ, mibii nyɛboa mi toi! Ajɔɔ mɛi ni yeɔ mimlai anɔ lɛ!

³³ Nyɛboa tsɔsemɔ toi koni nyɛle nii; ni nyɛkakwaa lɛ kwraa.

³⁴ Ajɔɔ gbɔmɔ ni boɔ mi toi ni ebuɔ migboi lɛ anaa daa ní emɛɔ daa yɛ mishinai lɛ anaa lɛ.

³⁵ Ejaakɛ mɔ ni aaaná mi lɛ, ena wala ni ehiɛ aaaba nyam yɛ Yehowa hiɛ.

³⁶ Shi mɔ ni nine shɛɛɛ minɔ lɛ, eeye lɛ diɛŋtsɛ esusuma awui. Mɛi fɛɛ ni nyɛɔ mi lɛ, amɛmiisumɔ gbele.”