Abe̱i 7 - ŊMALƐ KRƆŊKRƆŊ LƐ

¹ Mibi, ye miwiemɔi lɛ anɔ, ni okɛ mikitãi lɛ ato.

² Ye mikitãi lɛ anɔ ní oyi ana wala; ni obu mitsɔ̃ɔmɔi lɛ tamɔ ohiŋmɛi mli ajaŋmalaatɛ.

³ Hã ehi owaobii anaa. Ŋmãa yɛ otsuiŋ tao lɛ nɔ.

⁴ Tsɛ nilee akɛ, “Minyɛmi yoo,” koni otsɛ sanesɛɛkɔmɔ akɛ oshieŋnyɛ.

⁵ Amɛ amɛaabaa oyi kɛjɛ yoo ni bɛ jeŋba dɛŋ, amɛaakpɔ̃ bo kɛjɛ yoo ni naa yɔɔ dɔkɔbii lɛ dɛŋ.

Yoo ni bɛ jeŋba lɛ

⁶ Ejaakɛ mitsɔ̃ miwe lɛ samflɛ lɛ mli mikwɛ,

⁷ ni mina oblanyo ko ni bɛ yitsoŋ, yɛ oblahii komɛi ni ajwɛŋmɔ esako komɛi ateŋ.

⁸ Oblanyo lɛ nyiɛ gbɛjegbɛ ko ni tsɔ̃ɔ yoo nɛɛ shĩa lɛ koŋ lɛ nɔ; ni eyi yoo lɛ we lɛ gbɛ.

⁹ Gbɛkɛ ni, ni hiɛ efee tuutuu, ni duŋ kpii miihe awo.

¹⁰ Ni naa, yoo ko kɛ oblanyo lɛ bakpe. Yoo lɛ wo ajwamãŋ atade, ni etsui esa.

¹¹ Enaa wa, ni etoi egbo, ni etaaa shĩa.

¹² Bianɛbianɛ etee agbo lɛ naa; bianɛbianɛ etee jara lɛ nɔ, ni ewoɔ ka yɛ tsu koŋ fɛɛ tsu koŋ.

¹³ Yoo nɛɛ mɔ oblanyo lɛ ni eshwɔ enaa, ni yoo lɛ mia ehiɛ ni ekɛɛ lɛ akɛ,

¹⁴ “Kulɛ esa akɛ mashã afɔle, shi ŋmɛnɛ nɔŋŋ lɛ miyawo mishiwoonii lɛ.

¹⁵ No hã mije kpo koni mabɔ mɔdɛŋ matao bo ni mikɛ bo akpe, ni trukaa mibana bo nɛɛ.

¹⁶ Mikɛ saanɔboi ni akɛ kpãi sui srɔtoi ni akɛjɛ Ijipt loo eha misaa lɛ nɔ.

¹⁷ Mikɛ mire kɛ aloe kɛ sinamon ewo misaa lɛ mli ŋma.

¹⁸ Ba ni wɔkɛ suɔmɔ ajie wɔkɔnɔ kɛyashi leebi. Wɔkɛ suɔmɔ anya kɛ miishɛɛ.

¹⁹ Ejaakɛ miwu bɛ, efã gbɛ kɛtee shɔŋŋ.

²⁰ Ehiɛ shika pii kɛ kotoku kɛtee. Nyɔɔŋtsere lɛ baaye emuu dani ebaaba.”

²¹ Yoo lɛ kɛ ewiemɔ kɛ ŋɔɔmɔ lɛ kɔne oblanyo lɛ yiŋ, ni eyitsoŋ tsɔ̃. Ekɛ enaa dɔkɔbii lɛ kpala lɛ kɛtee ewe.

²² Oblanyo lɛ nyiɛ yoo lɛ sɛɛ amrɔ nɔŋŋ kɛtee ewe lɛ tamɔ tsina ni ayaagbe lɛ, aloo ofrote ni tsɔne edu lɛ kpɛŋŋ

²³ kɛyashi beyinɔ ni gãimlibi tsuɔ emusuŋ nii amli. Etamɔ loofɔlɔ ni shaa foi kɛyaduɔ tsɔne ni eleee akɛ lɛ ewala hewɔ atsɔ̃ tsɔne lɛ.

²⁴ Oo, mibii, nyɛboa mi toi agbɛnɛ. Nyɛfea toi nyɛhãa midaaŋ wiemɔi lɛ.

²⁵ Kaahã otsui mɔ nɛkɛ yoo. Kaadu gbɛ kɛyaje egbɛ nɔ;

²⁶ ejaakɛ yoo ni tamɔ nɛkɛ lɛ ekpãtã mɛi pii ahiɛ, mɛi ni egbe lɛ ayi fa naakpa.

²⁷ Ewe lɛ, gbohiiaje gbɛ ni, ekã kɛmiiya gbele piai amli tɔ̃ɔ.