Abe̱i 3 - ŊMALƐ KRƆŊKRƆŊ LƐ

Ŋaawoo kɛhã oblahii kɛ oblayei

¹ Mibi, ohiɛ akakpa mimlai lɛ anɔ, shi moŋ okɛ mikitãi lɛ ato otsui mli,

² ejaakɛ mitsɔ̃ɔmɔi lɛ baahã owala sɛɛ atsɛ afii babaoo, ni obaashwere yɛ wala mli.

³ Kaahã mlihilɛ kɛ anɔkwayeli miishi bo; ŋɔɔ ofi okuɛ, ŋmãa yɛ otsuiŋ tao lɛ nɔ;

⁴ no dani ooona nyam kɛ bulɛ kpakpa yɛ Nyɔŋmɔ kɛ gbɔmɛi ahiɛ.

⁵ Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ;

⁶ kaimɔ lɛ yɛ ogbɛi fɛɛ amli, ni lɛ eeetsɔ̃ɔ bo gbɛ ni ja ni onyiɛ nɔ.

⁷ Kaabu ohe nilelɔ; she Yehowa gbeyei, ni owi ohe kɛje efɔŋ he.

⁸ Enɛ aaafee tsamɔ ahã bo, ni eeewo owui amli hewalɛ.

⁹ Okɛ onii ni oyɔɔ kɛ onibaanii fɛɛ mli klɛŋklɛŋ nɔ awo Yehowa hiɛ nyam;

¹⁰ no dani aaahã oboŋoi lɛ ayimɔ obɔ̃bɔ̃ kɛ ŋmãa, ni owain gbɛi lɛ hu aaayimɔ obɔ̃bɔ̃ kɛ wain.

¹¹ Mibi, kaagbe Yehowa tsɔsemɔ lɛ he guɔ, ni kaahã ekãmɔ hu miije otsine.

¹² Bɔ ni tsɛ kãa ebi ni eyɔɔ ehe tsuijurɔ lɛ, nakai pɛ Yehowa kãa ebi ni esumɔɔ lɛ hu.

¹³ Ajɔɔ gbɔmɔ ni leɔ nii, ni enaa niiashishinumɔ hu lɛ,

¹⁴ ejaakɛ sɛɛnamɔ ni yɔɔ no mli lɛ, ehi fe sɛɛnamɔ ni yɔɔ jwiɛtɛi kɛ shika mli.

¹⁵ Nilee kɛ niiashishinumɔ jara wa aahu fe tɛ̃ŋlɛ̃o; ni nɔ ko nɔ ko bɛ ni aaanyɛ akɛto nilee he.

¹⁶ Wala sɛɛtsɛlɛ yɛ eninejurɔ kɔkɔŋ, ni ninamɔ kɛ anunyam yɛ ebɛku kɔkɔŋ.

¹⁷ Miishɛɛ yɛ etɛmpɔŋi anɔ, ni toiŋjɔlɛ yɛ egbɛi anɔ.

¹⁸ Nilee lɛ wala tso ni hã mɛi ni kɛ amɛhe kpɛtɛɔ lɛ, ni mɛi ni hiɛ emli kpɛŋŋ lɛ, ajɔɔ amɛ.

¹⁹ Yehowa kɛ nilee to shikpɔŋ lɛ shishi, ni jwɛŋmɔ ni mli kwɔ ekɛhã ŋwɛi ma shi shiŋŋ.

²⁰ Enilee naa hãa fai tueɔ, ni ehãa atatui lɛ nyɔɔ bɔ shwieɔ shi.

²¹ Mibi, kɛ nilee kɛ sanesɛɛkɔmɔ ato; kaahã ohiɛ miije nɔ kwraa,

²² ni eeehã ona wala kɛ hewulamɔnii.

²³ No dani ooonyiɛ ogbɛ lɛ nɔ shweshweeshwe, ni otɛŋ onane.

²⁴ Kɛ oho okã shi lɛ, osheŋ gbeyei; shi moŋ oookã shi, ni owɔ lɛ aaaŋɔɔ.

²⁵ Kaashe kpatu nɔ ko ni baahã otsui afã, aloo bɔ ni ahum fɔŋ tswaa mɛi fɔ̃ji lɛ gbeyei,

²⁶ ejaakɛ Yehowa ji ohiɛnɔkãmɔ, ni lɛ eeebu ohe, ni ooofee shweshweeshwe.

²⁷ Mɛi ni esa amɛ ejurɔfeemɔ lɛ, kaakãmã amɛ, kɛji eyɛ ohewalɛ mli akɛ ooonyɛ ofee lɛ.

²⁸ Kɛji nɔ ko yɛ odɛ̃ŋ ni ooonyɛ okɛfee onaanyo lɛ ejurɔ lɛ, kaafee lɛ “Yaa ni oba, yaa ni oba”.

²⁹ Kaato onaanyo ko he ŋaa fɔŋ, be mli ni lɛ lɛ ehiɛ kã onɔ akɛ eyɛ shweshweeshwe yɛ omasɛi.

³⁰ Okɛ mɔ ko akabe yakatswaa, kɛji efeko bo efɔŋ ko.

³¹ Ohiɛ akakɔ̃ yiwalɔ ko nɔ, ni egbɛi fɔ̃ji lɛ hu kaakɔ amɛmli ekoeko;

³² ejaakɛ Yehowa miihi nɔfɔŋfeelɔ, shi jalɔi lɛ eheɔ amɛ eyeɔ.

³³ Yehowa loomɔ kã mɛi fɔ̃ji awe nɔ; shi jalɔi awe lɛ, ejɔɔ nɔ.

³⁴ Yehowa yeɔ hefɛoyelɔi ahe fɛo, shi mɛi ni baa amɛhe shi lɛ enaa amɛ mɔbɔ.

³⁵ Nilelɔi ahiɛ baa nyam, shi kwashiai naa hiɛshishwiemɔ.