Abe̱i 29 - ŊMALƐ KRƆŊKRƆŊ LƐ

¹ Mɔ ni afɔɔ lɛ kãmɔ, shi loloolo lɛ ekuɛŋ ti lɛ, trukaa ni aaakumɔ lɛ bɔ ni anaŋ ehe tsabaa.

² Kɛji jalɔi miiye maŋ nɔ lɛ, maŋbii lɛ nyaa; shi kɛji mɛi fɔ̃ji miiye nɔ lɛ, maŋbii lɛ dɔ̃mɔɔ ŋtsɔi.

³ Mɔ ni sumɔɔ nilee lɛ, ehãa etsɛ naa miishɛɛ; shi mɔ ni kɛ ajwamãŋi bɔɔ lɛ, ekpãtãa enii ahiɛ.

⁴ Maŋtsɛ kɛ jalɛ saneyeli hãa maŋ damɔɔ shi, mɔ ni balaa maŋbii adɛŋ nii lɛ, ebutuɔ maŋ.

⁵ Mɔ ni woɔ enaanyo yiteŋ mlu lɛ, eeŋmɛ yaa ehã mɔ lɛ.

⁶ Efɔŋfeelɔ lɛ, lɛ diɛŋtsɛ ehe esha nɔŋŋ duɔ lɛ tsɔne; shi jalɔ lɛ, elaa, ni enyaa.

⁷ Jalɔ le ohiafoi agbɛnaa; shi mɔ fɔŋ lɛ, enuuu ohiafoi agbɛnaa nɛɛ shishi.

⁸ Hefɛoyelɔi woɔ maŋ bei; shi nilelɔi kuɔ mlifu naa.

⁹ Kɛji nilelɔ kɛ buulu gba kadaa lɛ, buulu lɛ griɔ ni eŋmɔɔ kɛkɛ, ni hejɔlɛ baaa.

¹⁰ Lashishwielɔi nyɛɔ mɔ ni tɔ̃mɔ ko bɛ ehe; ni efɔŋfeelɔi taoɔ egbele.

¹¹ Kwashia jieɔ emlifu fɛɛ kpo; shi nilelɔ miɔ ŋɔɔ.

¹² Nɔyelɔ ni boɔ amale toi lɛ, etsuji fɛɛ tsɔ̃mɔɔ mɛi fɔ̃ji.

¹³ Ohiafo kɛ yiwalɔ kpeɔ; Yehowa ni hãa amɛyi enyɔ lɛ fɛɛ amɛhiŋmɛii naa nii.

¹⁴ Maŋtsɛ ni kojoɔ ohiafo yɛ jalɛ naa lɛ, emaŋtsɛsɛi lɛ aaama shi kɛaatee naanɔ.

¹⁵ Kpãa kɛ kãmɔ hãa mɔ leɔ nii; shi gbekɛ ni akpoo ejeŋ ahã lɛ lɛ, ewoɔ enyɛ hiɛgbele.

¹⁶ Kɛji mɛi fɔ̃ji miiye mɛi anɔ lɛ, efɔŋfeemɔ faa: shi jalɔi aaana amɛshigbeemɔ lɛ kɛ amɛhiŋmɛi.

¹⁷ Tsɔsemɔ obi, ni eeehã ohe ajɔ bo; eeehã otsui anyɔ omli.

¹⁸ He ni gbalɛ wiemɔ ko bɛ lɛ, maŋbii ebuuu nɔ; shi ajɔɔ mɔ ni yeɔ mla nɔ.

¹⁹ Akɛ wiemɔ kɛkɛ tsɔseee tsulɔ; ejaakɛ enuɔ shishi moŋ, shi ebuuu.

²⁰ Ani ona nuu ni enaa yɔɔ blɛblɛ kɛ wiemɔ lo? Hiɛnɔkãmɔ yɛ hã kwashia fe lɛ.

²¹ Mɔ ni hiɛɔ etsulɔ fɔfɔɔle kɛjɛ egbekɛbiiashi lɛ, naagbee lɛ ebuuu nɔ.

²² Mɔ ni mli fuɔ lɛ, eteɔ bei shi; ni mɔ ni mli etsɛɛɛ fumɔ lɛ, etɔ̃ɔ babaoo.

²³ Gbɔmɔ hewoo nɔŋŋ aaaba lɛ shi; shi mɔ ni baa ehe shi yɛ mumɔ mli lɛ, aaawo ehiɛ nyam.

²⁴ Mɔ ni kɛ julɔ jaa nii lɛ, eenyɛ lɛ diɛŋtsɛ ewala; enuɔ akɛ aalomɔ nɛ, shi enyɛɛɛ ejaje.

²⁵ Gbɔmɔ gbeyeishemɔ lɛ, etsɔ̃ɔ tsɔne ehãa mɔ; shi mɔ ni kɛ ehiɛ fɔ̃ɔ Yehowa nɔ lɛ, eyɛ shweshweeshwe.

²⁶ Mɛi pii taoɔ mɔbɔnalɛ kɛjɛɔ nɔyelɔi adɛŋ; shi jalɛ saneyeli lɛ Yehowa dɛŋ ejɛɔ.

²⁷ Jalɔi miihi mɛi fɔ̃ji; ni mɛi fɔ̃ji hu miihi jalɔi.