Abe̱i 28 - ŊMALƐ KRƆŊKRƆŊ LƐ

¹ Mɛi fɔ̃ji joɔ foi be mli ni mɔ ko enyiɛɛɛ amɛsɛɛ, shi jalɔi lɛ amɛfeɔ ekãa tamɔ jata.

² Nɔsha hãa shikpɔŋ ko nɔ lumɛi ayi faa; shi kɛ emli mɛi lɛ yɛ niiashishinumɔ kɛ jwɛŋmɔ lɛ, lumɔyeli maa shi shiŋŋ, ni esɛɛ tsɛɔ.

³ Ohiafo ni waa enaanyo ohiafo yi lɛ, etamɔ nunɛmɔ ni loɔ nii kɛyaa, ni ehãaa niyenii aba.

⁴ Mɛi ni kwaa mla lɛ, amɛ jieɔ mɔ fɔŋ yi; shi mɛi ni yeɔ mla nɔ lɛ teɔ shi amɛwoɔ mɛi fɔ̃ji lɛ.

⁵ Mɛi fɔ̃ji nuuu jalɛ shishi; shi mɛi ni jaa Yehowa lɛ, amɛnuɔ shishi jogbaŋŋ.

⁶ Ohiafo ni baa ejeŋ jogbaŋŋ lɛ, ehi fe niiatsɛ ni bɛ jeŋba.

⁷ Mɔ ni yeɔ mla nɔ lɛ, bi nilelɔ ni; shi mɔ ni kɛ fulɔi bɔɔ naanyo lɛ, ewoɔ etsɛ hiɛgbele.

⁸ Mɔ ni kɛ hekpa ni fe nine kɛ wieyeli hãa enii faa lɛ, eebua naa ehã mɔ ni naa ohiafo mɔbɔ lɛ.

⁹ Mɔ ni booo mla toi ni eye nɔ lɛ, esɔlemɔ tete lɛ, nihiinii ni.

¹⁰ Mɔ fɛɛ mɔ ni hãa jalɔ nane tɔ̃tɔ̃ɔ kɛyaa gbɛ fɔŋ nɔ lɛ, eeegbee lɛ diɛŋtsɛ ebu mli; shi mɛi ni shwamɔ ko bɛ amɛhe lɛ aaana gboshinii kpakpa.

¹¹ Niiatsɛ buɔ ehe nilelɔ; shi ohiafo ni yɔɔ niiashishinumɔ kpaa lɛ shi.

¹² Kɛ jalɔi ye kunim lɛ, eyɛ nyam naakpa; shi kɛ mɛi fɔ̃ji wo amɛhe nɔ lɛ, mɛi teeteɔ amɛhe.

¹³ Mɔ ni tsimɔɔ etɔ̃mɔi anɔ lɛ, eshwereŋ; shi mɔ ni jajeɔ, ni efɔ̃ɔ efɔŋfeemɔ lɛ, anaa lɛ mɔbɔ.

¹⁴ Ajɔɔ mɔ ni sheɔ Yehowa gbeyei daa; shi mɔ ni wajeɔ etsui lɛ, egbeɔ haomɔ mli.

¹⁵ Nɔyelɔ fɔŋ ni yeɔ maŋbii ni anii yɔɔ mɔbɔ nɔ lɛ, etamɔ jata ni huuɔ loo oshishibrishi ni hiɛ ewo la.

¹⁶ Nɔyelɔ ni bɛ jwɛŋmɔ lɛ, yiwalɔ kpele ji lɛ; shi mɔ ni nyɛɔ hiɛjoomɔ lɛ, ehãa egbii asɛɛ tsɛɔ.

¹⁷ Kɛji mɔ ko eye mɔ ko lá yi sɔ̃ lɛ, etsɔ̃ kobɔfo kɛmiiya gbonyobu mli; mɔ ko akaye ebua lɛ.

¹⁸ Mɔ ni baa ejeŋ jogbaŋŋ lɛ, aaahere eyiwala; shi mɔ ni bɛ jeŋba lɛ, eeegbee bu mli.

¹⁹ Mɔ ni hũɔ eshikpɔŋ lɛ, eeena nii eye etɔ; shi mɔ ni nyiɛɔ yakayaka nii asɛɛ lɛ eeeye ohia kadikadi.

²⁰ Nuu anɔkwafo aaana jɔɔmɔ babaoo; shi mɔ ni yeɔ oyai koni ena nii lɛ, eyeŋ ehe.

²¹ Hiɛaŋkwɛmɔ ehiii, ejaakɛ aboloo atrɔma kome pɛ hewɔ lɛ, gbɔmɔ aaafee efɔŋ.

²² Kpɛkpɛɛlɔ yeɔ oya ni ena nii; shi eleee akɛ ohia miiba enɔ.

²³ Mɔ ni kãa mɔ lɛ, fee sɛɛ lɛ ehiɛ baa nyam fe mɔ ni kɛ ewiemɔ woɔ mɔ yiteŋ mlu.

²⁴ Mɔ ni tswaa etsɛ loo enyɛ ojo ni ekɛɔ akɛ, “Enɛ jeee esha” lɛ, mɔ hiɛkpãtãlɔ naanyo ji lɛ.

²⁵ Hiɛjoolɔ lɛ, ewoɔ bei; shi mɔ ni kɛ ehiɛ fɔ̃ɔ Yehowa nɔ lɛ, enaa nii.

²⁶ Mɔ ni kɛ ehiɛ fɔ̃ɔ lɛ diɛŋtsɛ ehe nɔ lɛ, kwashia ni; shi mɔ ni nyiɛɔ yɛ nilee mli lɛ, aaahere eyiwala.

²⁷ Mɔ ni hãa ohiafo nɔ lɛ, nɔ ko nɔ ko he ehiaŋ lɛ; shi mɔ ni tsɔ̃ɔ ehiɛ etoɔ afã lɛ, aaalomɔ lɛ babaoo.

²⁸ Kɛji yiwalɔi te shi lɛ, mɛi teeteɔ amɛhe; shi be ni amɛhiɛ kpãtãa lɛ, belɛ jalɔi ayi miifa.