Abe̱i 25 - ŊMALƐ KRƆŊKRƆŊ LƐ

Solomon Abɛi lɛ anɔtsamɔ

¹ Solomon abɛi lɛ ekrokomɛi hu ni Yuda maŋtsɛ Hezekia webii lɛ ŋmala nɛ:

² Nyɔŋmɔ anunyam ji akɛ ekɛ sane atee; shi maŋtsɛmɛi anunyam ji akɛ amɛtao sane mli.

³ Bɔ ni ŋwɛi kwɔ, ni shikpɔŋ hu mli kwɔ lɛ, nakai maŋtsɛmɛi ayitsoŋ kwɔ; anyɛɛɛ ana emli nii.

⁴ Jiemɔ jwiɛtɛi fei lɛ kɛje jwiɛtɛi lɛ mli, ni ŋaalɔ lɛ baana jwiɛtɛi krɔŋŋ ni ekɛtsu nii lɛ.

⁵ Jiemɔ mɔ fɔŋ lɛ kɛje maŋtsɛ he, ni jalɛ sane aaahi sɛi lɛ he.

⁶ Kɛji oyɛ maŋtsɛ hiɛ lɛ, kaafee pupuupu; ni kaadamɔ mɛi wuji agbɛhe.

⁷ Ejaakɛ ehi moŋ akɛ aaakɛɛ bo akɛ, “Ba yitsogbɛ nɛɛ,” fe nɔ ni aaatsi bo kɛaatee najiashigbɛ ni lumɔ lɛ miikwɛ.

⁸ Kaaye oyai ni okɛ nɔ ni okɛ ohiŋmɛi kɛkɛ na tee saneyelihe, ejaakɛ naagbee mli kɛji onaanyo lɛ wo bo hiɛgbele lɛ, te obaafee tɛŋŋ?

⁹ Kɛji okɛ onaanyo na sane lɛ, bo kɛ lɛ sɔŋŋ atao naa; shi kaajie mɔ kroko teemɔŋ sane kpo;

¹⁰ koni mɔ ni aaanu he lɛ akabawo bo hiɛgbele ni ogbɛi gbonyo lɛ miika ohe.

¹¹ Wiemɔ ni aaawie be ni sa mli lɛ, etamɔ shika kpɔbii ni tara jwiɛtɛi mli.

¹² Bɔ ni shika ga kɛ shika ŋmiiŋmi hewulamɔnii yɔɔ hã mɔ lɛ, nakai kãlɔ ni le nii yɔɔ hã toibolɔi.

¹³ Bɔ ni snoo mli jɔɔ ŋanii yɛ nikpamɔ be mli lɛ, nakai nɔŋŋ ji bɔfo anɔkwafo hã mɛi ni tsu lɛ lɛ. Ehãa enuŋtsɔmɛi lɛ atsui nyɔɔ amɛmli.

¹⁴ Mɔ ni woɔ nikee he shi, tsɛ, eyeee shiwoo lɛ nɔ lɛ, etamɔ oblɔtu kɛ kɔɔyɔɔ ni nu bɛ mli.

¹⁵ Aaanyɛ akɛ tsuishitoo blɛoo atsake nɔyelɔ jwɛŋmɔ; ni naajɔlɛ wiemɔ kuɔ wu.

¹⁶ Kɛ ona wo lɛ, kaaye fe nine, koni eti bo, ni oshwe oshwie.

¹⁷ Kaafɔ onaanyo we shwɛmɔ koni osane miije etsine, ni ehe miitsɛ̃ bo.

¹⁸ Mɔ ni yeɔ amale odase yɛ enaanyo he lɛ, etamɔ tsokpoti loo klante loo gãimlibi ni naa ba.

¹⁹ Hiɛ ni akɛfɔ̃ɔ kutumpɔfo nɔ yɛ fimɔ be mli lɛ, etamɔ nyanyɔŋ ni ewɔtsɔ loo nane ni elɔŋe.

²⁰ Mɔ ni jieɔ mɔ he atade yɛ fɛ̃i be mli, aloo ekɛ ashiŋ toɔ pilamɔ nɔ lɛ, etamɔ mɔ ni laa lalai kɛshɛjeɔ mɔ mii, shi jeee kɛ etsui mli fɛɛ.

²¹ Kɛji hɔmɔ miiye ohenyɛlɔ lɛ, hã lɛ nii eye, ni kɛji kumai miiye lɛ lɛ, hã lɛ nu enu.

²² Ejaakɛ kɛji ofee nakai lɛ, ooowo lɛ hiɛgbele kpɔtɔɔ, ni Yehowa aaawo bo he nyɔŋmɔ.

²³ Bɔ ni kooyigbɛ kɔɔyɔɔ kɛ nunɛmɔ baa lɛ, nakai nɔŋŋ mɔhewiemɔ kɛ hiɛtumɔ baa.

²⁴ Faŋ nɔ ni oyahi tsu yiteŋ kpokplobiiaŋ, fe nɔ ni okɛ yoo beilɔ aaahi shĩa kome mli.

²⁵ Bɔ ni nu hɔɔŋ yɔɔ hã mɔ ni kumai yeɔ lɛ lɛ, nakai ji sanekpakpa ni akɛjɛ maŋsɛɛ shɔŋŋ kɛba.

²⁶ Jalɔ ni nyɛɛɛ shi afi yɛ mɔ fɔŋ hiɛ lɛ, etamɔ nuhiŋmɛi ní anyiɛ mli kɛ nubu ni akpɔtɔ lɛ.

²⁷ Woyeli tsɔ̃ ehiii, hiɛtaomɔ tsɔ̃ hu ehiii.

²⁸ Mɔ ni nyɛɛɛ ehe nɔ eye lɛ, etamɔ maŋ ni akumɔ ehe gbogboi ashwie shi.