Abe̱i 22 - ŊMALƐ KRƆŊKRƆŊ LƐ

¹ Gbɛi kpakpa hi fe ninamɔ babaoo, ni hiɛnyam hi fe jwiɛtɛi loo shika.

² Niiatsɛ kɛ ohiafo lɛ, Yehowa ji mɔ ni bɔ amɛ fɛɛ.

³ Hiɛtɛ̃lɔ naa osharã miiba ni eteɔ ehe; shi mɔ ni jwɛŋmɔ esako kɛ lɛ yakpeɔ, ni ehiɛ kpãtãa.

⁴ Heshibaa kɛ Yehowa gbeyeishemɔ he sɛɛnamɔ ji ninamɔ kɛ hiɛnyam kɛ wala.

⁵ Ŋmeii kɛ tsɔnei yɛ kutumpɔfo gbɛ nɔ; mɔ ni leɔ ehenɔkwɛmɔ lɛ ekɛ amɛteŋ aaajekɛ.

⁶ Tsɔsemɔ gbekɛ bɔ ni eba ejeŋ jogbaŋŋ ehã, ni edalɛ mli lɛ etsakeŋ.

⁷ Niiatsɛ yeɔ ohiafo nɔ; ni mɔ ni yafaa nii tsɔ̃ɔ nyɔŋ ehãa mɔ ni fa lɛ nii lɛ.

⁸ Mɔ ni yeɔ toikɔdɔmɔ sane lɛ, enaa amanehulu, ni eyitsoŋwalɛ lɛ sɛɛ foɔ.

⁹ Mɔ ni mli jɔ lɛ aaajɔɔ lɛ, ejaakɛ ekɛ eniyenii lɛ eko kumaa ohiafo.

¹⁰ Shwiemɔ hefɛoyelɔ, kɛkɛ lɛ blɔmɔ kɛ bei kɛ jɛmɔ sɛɛ aaafo.

¹¹ Mɔ ni tsui mli tse, ni ewiemɔ he tse lɛ, maŋtsɛ kɛ lɛ bɔɔ naanyo.

¹² Yehowa hiŋmɛii baa nilee yi; shi amalelɔi awiemɔi lɛ ebaaa yi.

¹³ Anihaolɔ kɛɔ akɛ, “Jata yɛ agbo lɛ naa; kɛji mije kpo kɛtee blohuŋ lɛ magbo.”

¹⁴ Yoo ni bɛ jeŋba lɛ edaa tamɔ bu kwɔŋkwɔŋ, mɔ ni Yehowa mli efu lɛ lɛ eeegbee mli.

¹⁵ Buulufeemɔ kpɛtɛ gbekɛ tsui he; shi tsɔsemɔ kpãa lɛ aaashwie buulufeemɔ lɛ kɛaaje ehe kɛya sɛɛ flooflo.

¹⁶ Mɔ ni yeɔ ohiafo amim koni ekɛna nii, shi ekeɔ niiatsɛ nii lɛ, lɛ diɛŋtsɛ lɛ ohia kɛ̃ hiaa lɛ.

Nilee wiemɔi nyɔŋmai etɛ̃

¹⁷ Ba otoi shi koni obo nilelɔi awiemɔi toi; ni okɛ ojwɛŋmɔ akase nii kɛjɛ minilee lɛ mli.

¹⁸ Ejaakɛ kɛji okɛto ojwɛŋmɔ mli, ni onyɛ okai yɛ owiemɔi amli lɛ, eyɛ fɛo pam.

¹⁹ Miihã bo tuuŋtu ole enɛɛmɛi ŋmɛnɛ, bɔ ni afee ni ona hiɛnɔkãmɔ yɛ Yehowa mli.

²⁰ Miŋma nilee wiemɔi kɛ ŋaawoi nyɔŋmai etɛ̃ miha bo.

²¹ Wiemɔi ni baatsɔ̃ɔ bo nɔ ni ja kɛ nɔ ni ji anɔkwale; koni okɛ anɔkwa hetoo ayahã mɛi ni tsu bo lɛ.

- 1 -

²² Kaatswa ohiafo ojo yɛ ohiafo ni eji lɛ hewɔ; asaŋ kaagba nɔnalɔ naa yɛ saneyelihe;

²³ ejaakɛ Yehowa yeɔ amɛsane ehãa amɛ; ni mɛi ni haoɔ amɛ lɛ amɛ hu Yehowa aaahao amɛ.

- 2 -

²⁴ Okɛ mlifutsɛ akabɔ naanyo, ni okɛ mlilatsɛ akanyiɛ;

²⁵ koni okɔ amɛjeŋba lɛ ni oyadu tsɔne.

- 3 -

²⁶ Kaafee ohe mɛi ni woɔ shi, loo mɛi ni damɔɔ nyɔmɔtsɛ sɛɛ lɛ eko;

²⁷ kɛji obɛ nɔ ko ni okɛaawo nyɔmɔ lɛ, aaashɔ̃ osaa tete yɛ odɛ̃ŋ.

- 4 -

²⁸ Kaatsi blema shikpɔŋ husu kadimɔ nɔ ni otsɛmɛi lɛ eto efɔ̃ shi lɛ kɛtee sɛɛ.

- 5 -

²⁹ Nuu ni bɔɔ mɔdɛŋ, ni ele ŋaa jogbaŋŋ yɛ enitsumɔ mli lɛ, maŋtsɛmɛi ahiɛ tete eeedamɔ; edamɔŋ mɛi ni abuuu amɛ ahiɛ.