Abe̱i 15 - ŊMALƐ KRƆŊKRƆŊ LƐ

¹ Naajɔlɛ hetoo kuɔ mlila naa; shi mlila wiemɔ teɔ mlifu shi.

² Nilelɔi wieɔ nilee wiemɔi; shi buului awiemɔi jɛɔ kwashiai adaaŋ.

³ Yehowa hiŋmɛi yɛ he fɛɛ he; ni ekwɛɔ mɛi fɔ̃ji kɛ mɛi kpakpai fɛɛ.

⁴ Naajɔlɛ wiemɔ lɛ walatso ni; shi kutumpɔo wiemɔ lɛ efiteɔ mɔ mumɔ.

⁵ Kwashia gbeɔ etsɛ tsɔsemɔ he guɔ; shi mɔ ni kpɛlɛ̃ɔ kãmɔ lɛ ehiɛ tɛ̃ɔ.

⁶ Jwetri babaoo yɛ jalɔ we, shi mɔ fɔŋ ninamɔ lɛ, ehiɛ kpãtãa.

⁷ Nilelɔi awiemɔ gbɛɔ nilee shwãa; shi kwashiai anɔ efeee nakai.

⁸ Mɛi fɔ̃ji afɔle lɛ, Yehowa miihi; shi jalɔi asɔlemɔ lɛ, enaa he miishɛɛ.

⁹ Mɔ fɔŋ jeŋba lɛ, Yehowa miihi; shi mɔ ni tiuɔ jalɛ sɛɛ lɛ, esumɔɔ lɛ.

¹⁰ Toigbalamɔ kpele kã shi hã mɔ ni tɔ̃ɔ, ni mɔ ni ekpɛlɛ̃ɛɛ kãmɔ lɛ, gbo eeegbo.

¹¹ Gbohiiaje kɛ hiɛkpãtãmɔ bu lɛ tete po naa kã yɛ Yehowa hiɛ; aahu ni gbɔmɛi adesai atsuii.

¹² Hefɛoyelɔ yɔɔ nɛɛ, esumɔɔɔ akɛ akãa lɛ; ni ebɛŋkɛɛɛ nilelɔi hu.

¹³ Tsui ni eyi kɛ miishɛɛ lɛ, ehãa mɔ tseɔ ehiɛ; shi tsui ni eyi kɛ awerɛho lɛ ehãa mɔ feɔ gblinii.

¹⁴ Gbɔmɔ ni yɔɔ niiashishinumɔ jwɛŋmɔ lɛ, etiuɔ nilee sɛɛgbɛ; shi kwashiai anaabu tiuɔ buulufeemɔ sɛɛgbɛ.

¹⁵ Nɔnalɔ gbii fɛɛ lɛ, gbii fɔ̃ji sɔŋŋ ni; shi mɔ ni tsui enyɔ emli lɛ, lɛ lɛ daa nɛɛ eeye gbijurɔ.

¹⁶ Nii fioo ni Yehowa he gbeyeishemɔ yɔɔ he lɛ, ehi fe jwetri babaoo ni haomɔ yɔɔ he.

¹⁷ Shwie folo ni akɛŋmɛ okplɔ̃ ni suɔmɔ yɔɔ he lɛ, ehi fe tsina ni ewo fɔ ni nyɛɛ yɔɔ he.

¹⁸ Mlilatsɛ teɔ bei shi; shi mɔ ni mli fuuu mra lɛ, ekpãtãa bei.

¹⁹ Anihaolɔ gbɛ tsaa kɛ ŋmei; shi jalɔ gbɛ lɛ gbɛjegbɛ ni.

²⁰ Bi nilelɔ hãa etsɛ naa miishɛɛ; shi kwashia gbeɔ enyɛ he guɔ.

²¹ Mɔ ni bɛ jwɛŋmɔ lɛ, buulufeemɔ feɔ lɛ miishɛɛ; shi mɔ ni yɔɔ jwɛŋmɔ lɛ, ebaa ejeŋ jogbaŋŋ.

²² He ni ajinatoo bɛ lɛ, yiŋtoi feɔ yaka; shi ŋaawolɔi pii hãa yiŋtoi yeɔ omanye.

²³ Wiemɔ hetoohãmɔ ni sa lɛ, ehãa mɔ naa miishɛɛ; ni wiemɔ ni awie yɛ be ni sa mli lɛ, ehi pam.

²⁴ Nilelɔ gbɛ lɛ, wala gbɛ ni kɛ mɔ yaa ŋwɛi ni; ni ejieɔ mɔ kɛjeɔ gbohiiaje bu lɛ mli.

²⁵ Yehowa wuleɔ hewolɔ we; shi ehãa okulafo husu hiɔ shi.

²⁶ Mɛi fɔ̃ji ayiŋtoi lɛ, Yehowa miihi; shi wiemɔi ni he tse lɛ, enaa he miishɛɛ.

²⁷ Hiɛjoolɔ hãa haomɔ baa ewe nɔ; shi mɔ ni sumɔɔɔ nyɔɔŋnii hemɔ lɛ, eyi aaana wala.

²⁸ Jalɔ jwɛŋɔ bɔ ni eeehã sane hetoo ehã; shi wiemɔi gbohii jɛɔ mɛi fɔ̃ji adaaŋ.

²⁹ Yehowa kɛ mɛi fɔ̃ji ateŋ jɛkɛ; shi eboɔ jalɔi afaikpamɔ toi.

³⁰ Hiɛtsemɔ kɛ mɔhamɔ lɛ, ehãa mɔ mii shɛɔ ehe; ni sanekpakpa hãa mɔ wuiaŋ woɔ fɔ.

³¹ Mɔ ni boɔ kãmɔ krɔŋŋ toi lɛ, ehiɔ nilelɔi ateŋ.

³² Mɔ ni booo tsɔsemɔ toi lɛ, egbeɔ lɛ diɛŋtsɛ ehe guɔ; shi mɔ ni boɔ kãmɔ toi lɛ, enaa niiashishinumɔ.

³³ Yehowa gbeyeishemɔ ji tsɔsemɔ ni hãa mɔ leɔ nii; ni anunyam yɔɔ nɛɛ heshibaa nyiɛɔ ehiɛ.