Abe̱i 14 - ŊMALƐ KRƆŊKRƆŊ LƐ

¹ Yoo nilelɔ kpɛɔ eshĩa; shi yoo kwashia jwaa eshĩa.

² Mɔ ni sheɔ Yehowa gbeyei lɛ efeɔ jalɛnii; shi mɔ ni gbeɔ Yehowa he guɔ lɛ efeee jalɛ nii.

³ Buulu daaŋ wiemɔ gwaoɔ lɛ; shi nilelɔ daaŋ wiemɔ baa eyi.

⁴ He ni tsina hii bɛ lɛ, niyenii bɛ jɛi; shi he ni tsinanuu hewalɔ yɔɔ lɛ jɛi ŋmãa babaoo yɔɔ.

⁵ Odasefonyo anɔkwafo maleee; shi apasa odasefonyo maleɔ pam.

⁶ Hefɛoyelɔ taoɔ nilee, shi enaaa; shi nilee taomɔ waaa hãaa niiashishinulɔ.

⁷ Jee kwashia hiɛ; ejaakɛ onaŋ nilee wiemɔ yɛ edaaŋ.

⁸ Mɔ ni yɔɔ jwɛŋmɔ ni ehiɛ tɛ̃ lɛ, ele he ni eyaa; shi kwashiai abuulufeemɔ hãa amɛduɔ gbɛ.

⁹ Kwashia ebuuu eshafeemɔ akɛ eji nɔ fɔŋ; shi jalɔi tiuɔ eshaifaa sɛɛ.

¹⁰ Tsui pɛ ni le enidɔɔnii; ni nɔ ni ji emiishɛɛ lɛ ekɛ mɔ ko mɔ ko ejaaa.

¹¹ Mɔ fɔŋ we hiɛ aaakpãtã; shi jalɔ we aaashwere.

¹² Gbɛ ko yɛ ni ja yɛ gbɔmɔ hiɛ; shi enaagbee lɛ gbele gbɛ ni.

¹³ Ŋmɔlɔ mli tete lɛ, tsui werɛ hoɔ ehe; ni miishɛɛ naagbee lɛ ŋkɔmɔyeli baa.

¹⁴ Mɔ fɔŋ lɛ eeena ejeŋba he nyɔmɔwoo; ni mɔ kpakpa lɛ, eeena enifeemɔnii kpakpa he nyɔmɔwoo.

¹⁵ Mɔ ni jwɛŋmɔ mli kwɔɔɔ heɔ nɔ fɛɛ nɔ eyeɔ; shi hiɛtɛ̃lɔ leɔ enanenaa kwɛmɔ.

¹⁶ Nilelɔ sheɔ ehe gbeyei, ni ewiɔ ehe kɛjeɔ efɔŋ he; shi kwashia feɔ kakampu ni efeɔ anyagbã.

¹⁷ Mɔ ni mli etsɛɛɛ fumɔ lɛ, efeɔ kwashiaianii, ni yitsofɔŋtsɛ lɛ anyɛɔ lɛ.

¹⁸ Mɔ ni jwɛŋmɔ mli kwɔɔɔ lɛ, abuɔ lɛ buulu fai; shi nilelɔ lɛ afiɔ lɛ nilee akekre.

¹⁹ Mɛi fɔ̃ji kotoɔ mɛi kpakpai, ni efɔŋfeelɔi kotoɔ jalɔi yɛ agboi anaa.

²⁰ Ohiafo lɛ, enaanyo tete sumɔɔɔ lɛ, shi niiatsɛ lɛ, esuɔlɔi faa babaoo.

²¹ Mɔ ni nyaŋeɔ enaanyo lɛ, eshafeelɔ ni; shi mɔ ni feɔ ohiafo ekpakpa lɛ ajɔɔ lɛ.

²² Mɔ ni tsɔ̃ɔ ŋaa fɔŋ lɛ ani jeee tɔ̃ etɔ̃ɔ lɛ lo? Shi mɔ ni toɔ ŋaa kpakpa lɛ, afiɔ esɛɛ, ni ayeɔ lɛ anɔkwa.

²³ Sɛɛnamɔ yɛ deŋmegbomɔ mli; shi ohia kɛkɛ ji nɔ ni yɔɔ naabu folo wiemɔ mli.

²⁴ Nilelɔi akekre ji amɛnilee. Shi kwashiai akekre ji amɛbuulufeemɔ.

²⁵ Anɔkwa odasefonyo lɛ ehereɔ gbɔmɛi ayiwala; shi amalelɔ lɛ mɔsɛɛgbɛtsɔ̃ɔlɔ ni.

²⁶ Yehowa gbeyeishemɔ mli hiɛnɔkãmɔ ni mli wa yɔɔ; ni mɔ ni yɔɔ no lɛ ebii naa abobaahe.

²⁷ Yehowa gbeyeishemɔ lɛ nuhiŋmɛi ni hãa wala ni, ejieɔ mɔ kɛjeɔ gbele tsɔnei amli.

²⁸ Maŋbii ayifalɛ ji maŋtsɛ anunyam; shi kɛji maŋbii bɛ lɛ, lumɔ hiɛkpãtãmɔ ni.

²⁹ Mɔ ni mli fuuu mra lɛ, eyɛ niiashishinumɔ kpele; shi mɔ ni mli fuɔ mramra lɛ ejieɔ ebuulufeemɔ kpo.

³⁰ Toiŋjɔlɛ hãa gbɔmɔtso naa hewalɛ; shi awuŋayeli woɔ wuiaŋ hela.

³¹ Mɔ ni waa ohiafo yi lɛ, eebɔ Nyɔŋmɔ ahora; shi mɔ ni naa ohiafo mɔbɔ lɛ, eewo Nyɔŋmɔ hiɛ nyam.

³² Mɔ fɔŋ lɛ, enifɔjianii lɛ nɔŋŋ butuɔ lɛ; shi jalɔ lɛ, ejalɛ ji ebobaahe.

³³ Mɔ ni yɔɔ niiashishinumɔ lɛ ele nii; shi kwashia lɛ, ebɛ niiashishinumɔ.

³⁴ Jalɛ woɔ maŋ nɔ; shi esha lɛ, maŋ ahorabɔɔ ni.

³⁵ Tsulɔ nilelɔ lɛ, maŋtsɛ hiɛ sɔɔ lɛ; shi mɔ ni feɔ hiɛgbejianii lɛ, emli fuɔ lɛ.