Abe̱i 13 - ŊMALƐ KRƆŊKRƆŊ LƐ

¹ Bi nilelɔ boɔ etsɛ tsɔsemɔ toi; hefɛoyelɔ lɛ ebooo kãmɔ toi.

² Gbɔmɔ kpakpa daaŋ wiemɔ aaahã etɔ kɛ nii kpakpai; shi nɔ ni kutumpɔfoi taoɔ ji basabasafeemɔ.

³ Mɔ ni mɔɔ enaabu mli lɛ, eebaa ewala yi; shi mɔ ni mɔɔɔ enaabu mli lɛ, eekpãtã lɛ diɛŋtsɛ ehe hiɛ.

⁴ Hejɔ̃lɔ shweɔ nɔ ko, ni enaaa; shi mɔdɛŋbɔlɔ naa nii kɛtekeɔ nɔ.

⁵ Jalɔ miihi amale, shi mɔ fɔŋ feɔ hiɛgbejianii, ni ebɔɔ ehe ahora.

⁶ Jalɛ buɔ mɔ ni baa ejeŋ jogbaŋŋ he; shi eshafeemɔ butuɔ mɔ fɔŋ.

⁷ Mɔ ko yɛ ni feɔ ehe niiatsɛ, tsɛbelɛ ebɛ nɔ ko nɔ ko; mɔ ko hu yɛ ni feɔ ehe ohiafo, tsɛbelɛ eyɛ nii babaoo.

⁸ Gbɔmɔ kpɔ̃mɔ nii ji enii ni eyɔɔ; shi ohiafo bɛ nɔ ko ni ekɛkpɔ̃ɔ ehe.

⁹ Jalɔi akane tsoɔ hɛŋŋ; shi mɛi fɔ̃ji akane lɛ aaagbo.

¹⁰ Hewoo lɛ bei kɛkɛ ekɛbaa; shi mɛi ni boɔ ŋaawoo toi lɛ, amɛleɔ nii.

¹¹ Nii ni anaa oya lɛ, ehiɛ kpãtãa; shi nii ni akpɛteɔ shi anaa lɛ eshwereɔ.

¹² Hiɛnɔkãmɔ ni baaa mli mra lɛ, ewoɔ mɔ tsui hela; shi kɛji nɔ ni ashweɔ lɛ na ba mli lɛ, ehãa wala.

¹³ Mɔ ni gbeɔ wiemɔ lɛ he guɔ lɛ, ekpãtãa lɛ diɛŋtsɛ ehe hiɛ; shi mɔ ni buɔ kitã lɛ, ebaana he sɛɛ.

¹⁴ Nilelɔ nitsɔɔmɔ lɛ, wala nubu ni; ejieɔ mɔ kɛjɛɔ gbele akpa mli.

¹⁵ Nilee kpakpa hãa mɔ hiɛ baa nyam; shi kutumpɔfoi agbɛ lɛ ekpãtãa amɛ nɔŋŋ amɛhiɛ.

¹⁶ Nɔ fɛɛ nɔ mli lɛ hiɛtɛ̃lɔ feɔ enii kɛ nilee; shi kwashia gbɛɔ ebuulufeemɔ eshwãa.

¹⁷ Tsulɔ fɔŋ lɛ ekɛ mɛi woɔ haomɔ mli; shi bɔfo anɔkwafo lɛ ekɛ toiŋjɔlɛ baa.

¹⁸ Mɔ ni ekpɛlɛ̃ɛɛ tsɔsemɔ lɛ ohia kɛ hiɛgbele ji enɔ; shi mɔ ni buɔ kãmɔ lɛ awoɔ ehiɛ nyam.

¹⁹ Kɛji susuma na nɔ ni etaoɔ lɛ, enaa miishɛɛ; shi kwashiai sumɔɔɔ akɛ amɛjeɔ efɔŋ he.

²⁰ Mɔ ni kɛ nilelɔ nyiɛɔ lɛ, etsɔ̃ɔ nilelɔ; shi mɔ ni kɛ kwashiai bɔɔ lɛ eeena jaramɔ.

²¹ Eshafeelɔi lɛ efɔŋ nyiɛɔ amɛsɛɛ; shi jalɔi lɛ amɛshwereɔ.

²² Gbɔmɔ kpakpa shiɔ gboshinii ehãa ebii abii; shi eshafeelɔ nii lɛ jalɔ atiaa ahãa.

²³ Ohiafoi ashikpɔŋ ni kã shi efolo baa niyenii pii; shi jalɛ sane ni ayeee hewɔ lɛ, nii lɛ ŋmɛɔ amɛ.

²⁴ Mɔ ni emiii ni etsɔseɔ ebi kɛ kpãa lɛ, eenyɛ ebi lɛ; shi mɔ ni sumɔɔ ebi lɛ, ejeɔ mra etsɔseɔ lɛ.

²⁵ Jalɔ yɛ nii pii ni eyeɔ etɔɔ; shi mɔ fɔŋ lɛ musuŋ hɔmɔ po yeɔ lɛ.