Abe̱i 11 - ŊMALƐ KRƆŊKRƆŊ LƐ

¹ Yehowa miihi shishiumɔ nsɛni, shi nsɛnitɛ shishiishi lɛ enaa he miishɛɛ.

² Kɛ hewoo ba pɛ, hiɛgbele nyiɛɔ esɛɛ, shi heshibalɔ lɛ nilelɔ ni.

³ Jalɔ lɛ enɔkwayeli tsɔ̃ɔ lɛ gbɛ; shi kutumpɔfo lɛ eshishiumɔ lɛ nɔŋŋ kpãtãa ehiɛ.

⁴ Mlifu gbi lɛ nɔ lɛ, ninamɔ he bɛ sɛɛnamɔ ko; shi jalɛ jieɔ mɔ kɛjɛɔ gbele dɛŋ.

⁵ Jalɔ lɛ enɔkwayeli hãa egbɛ jaa ehãa lɛ; shi mɔ fɔŋ lɛ, enifɔjianii lɛ gbeɔ lɛ shi.

⁶ Mɛi ni ja lɛ amɛjalɛ lɛ aajie amɛ, shi kutumpɔfoi lɛ, amɛkɔnɔ ŋɔɔ amɛ nom.

⁷ Kɛ mɔ fɔŋ gbo lɛ; ehiɛnɔkãmɔ laajeɔ; ni mɔ ni leee Nyɔŋmɔ hiɛnɔkãmɔ lɛ efeɔ yaka.

⁸ Ajieɔ jalɔi kɛjɛɔ haomɔ mli; shi mɛi fɔ̃ji yanyɔɔ haomɔ mli.

⁹ Mɛi ni leee Nyɔŋmɔ lɛ, amɛkɛ amɛdaaŋ wiemɔi fiteɔ amɛnanemɛi; shi atsɔ̃ɔ nilee nɔ, ni ajieɔ jalɔi.

¹⁰ Kɛji nɔ fɛɛ nɔ tee nɔ jogbaŋŋ hã jalɔ lɛ maŋ fɛɛ nyaa; ni kɛji mɛi fɔ̃ji ahiɛ kpãtã lɛ, maŋ fɛɛ bɔɔ oshe kɛ miishɛɛ.

¹¹ Jalɔi adɛŋ jɔɔmɔ woɔ maŋ nɔ; shi mɛi fɔ̃ji anaabu butuɔ maŋ.

¹² Mɔ ni gbeɔ enaanyo he guɔ lɛ, ebɛ yitsoŋ; shi mɔ ni yɔɔ jwɛŋmɔ lɛ efeɔ diŋŋ.

¹³ Mɔ ni tãa sane kɛfoɔ shi lɛ, ejieɔ teemɔŋ saji akpo; shi mɔ ni yɔɔ anɔkwale mumɔ lɛ etsimɔɔ sane nɔ.

¹⁴ He ni maŋ kudɔmɔ bɛ lɛ, maŋ gbeɔ shi; shi he ni ŋaawolɔi pii yɔɔ lɛ, maŋ feɔ shweshweeshwe.

¹⁵ Mɔ ni damɔɔ gbɔ sɛɛ lɛ, eeeshwa ehe; shi mɔ ni kɛ ehe wooo mli lɛ ehi hã lɛ.

¹⁶ Yoo ni hiɛ yɔɔ nyam tiuɔ woo sɛɛ, ni nuu yiwalɔ tiuɔ ninamɔ sɛɛ.

¹⁷ Mɔ ni naa mɔbɔ lɛ, lɛ diɛŋtsɛ ehe ejurɔ efeɔ; shi mɔ ni yitsoŋ wa lɛ, lɛ diɛŋtsɛ ehe efɔŋ efeɔ.

¹⁸ Mɔ fɔŋ naa shishiumɔ mli nyɔmɔwoo; shi mɔ ni feɔ jalɛ nii lɛ enaa anɔkwale mli nyɔmɔwoo.

¹⁹ Mɔ ni fiɔ shi shiŋŋ yɛ jalɛ mli lɛ, eyi aaana wala; shi mɔ ni nyiɛɔ efɔŋfeemɔ sɛɛ lɛ egboɔ.

²⁰ Yehowa miihi mɛi ni hiɛ yitso fɔŋ; shi Yehowa sumɔɔ mɛi ni shwamɔ bɛ amɛjeŋba he.

²¹ Na ole akɛ bɔ fɛɛ bɔ ni fee lɛ efɔŋfeelɔ yeŋ ehe; shi jalɔ lɛ aaahere eyiwala.

²² Yoo ni he yɔɔ fɛo ni ebɛ jeŋba kpakpa lɛ etamɔ kplotoo ni awo egugɔ mli shika ga.

²³ Jalɔi shweɔ nibii kpakpai sɔŋŋ; shi mɛi fɔ̃ji agbɛkwɛmɔnii lɛ mlifu ni.

²⁴ Mɔ ko yɛ ni edɛŋ kpɔɔ, shi eyaa nɔ eshwereɔ kɛtekeɔ nɔ kɛ̃, mɔ ko hu feɔ kpɛkpɛɛ, shi eyeɔ ohia moŋ.

²⁵ Mɔ ni edɛŋ kpɔɔ lɛ, enaa nii, ni mɔ ni hãa mɛi tɔrɔɔ lɛ, lɛ hu etɔɔ.

²⁶ Mɔ ni tiaa abele etoɔ lɛ, maŋ lomɔɔ lɛ; shi mɔ ni hɔ̃ɔ nɔŋŋ lɛ maŋ jɔɔ lɛ.

²⁷ Mɔ ni tiuɔ nɔ kpakpa sɛɛ kɛ hiɛdɔɔ naa nɔ kpakpa; shi mɔ ni diɔ efɔŋ sɛɛ lɛ efɔŋ blaa lɛ.

²⁸ Mɔ ni kɛ ehiɛ fɔ̃ɔ eninamɔ nɔ lɛ, etamɔ baa gbiŋ ni kpalaa; shi jalɔ aaafrɔke tamɔ baa ŋmɔŋ.

²⁹ Mɔ ni gbaa lɛ diɛŋtsɛ eshĩaŋbii anaa lɛ, eyeɔ kɔɔyɔɔ abɔ; ni buulu tsɔ̃ɔ tsulɔ hãa nilelɔ be fɛɛ be.

³⁰ Jalɛ yibii lɛ wala ni; shi mla kwamɔ lɛ wala hiɛkpãtãmɔ ni.

³¹ Kɛji jalɔ lɛ enaa enyɔmɔwoo yɛ je nɛɛ mli lɛ, mɔ fɔŋ kɛ eshafeelɔ lɛ te amɛnyɔmɔwoo aaatamɔ tɛŋŋ?