Abe̱i 1 - ŊMALƐ KRƆŊKRƆŊ LƐ

Abɛi ahe sɛɛnamɔ

¹ Israel Maŋtsɛ Solomon, David bi lɛ, abɛi nɛ.

² Abɛi nɛɛ tsɔ̃ɔ mɔ nilee, ni amɛhãa mɔ naa tsɔsemɔ. Amɛhãa mɔ nuɔ wiemɔi ni jwɛŋmɔ yɔɔ mli ashishi faŋŋ hu.

³ Amɛhãa mɔ leɔ nii, eleɔ nɔ ni ja, ni eleɔ anɔkwayeli.

⁴ Abɛi nɛɛ tsɔ̃ɔ mɛi ni nako jwɛŋmɔ lɛ hiɛtɛ̃ɛ; ni amɛtsɔ̃ɔ oblanyo hu nilee kɛ jwɛŋmɔ.

⁵ Nilelɔ hu nuɔ, ni ekaseɔ nii efataa enilee he. Amɛhãa mɔ ni nuɔ niiashishi hu leɔ ŋaa.

⁶ Ebaanu abɛi kɛ wiemɔi ni amɛshishinumɔ wa kɛ nilelɔi awiemɔi kɛ amɛjenui ashishi.

Ŋaawoo kɛhã oblahii

⁷ Nilee fɛɛ shishijee ji Yehowa gbeyeishemɔ; shi kwashiai gbeɔ nilee kɛ tsɔsemɔ he guɔ.

⁸ Mibi, bo otsɛ tsɔsemɔ toi, ni kaashɛ mla ni onyɛ woɔ bo lɛ ofɔ̃.

⁹ Ejaakɛ nomɛi ji anunyam akekre ni fi oyitso kɛ kɔsɔŋkɔsɔ ni kã okuɛ.

¹⁰ Mibi, kɛji eshafeelɔi miilaka bo lɛ, kaakpɛlɛ̃.

¹¹ Kɛji amɛkɛɛ bo akɛ, “Ba wɔtee ni wɔyawo mɔ ko antɛo, ni wɔyawo mɔ ko lá ni efeko nɔ ko fɔŋ ko ka yakatswaa lɛ kaakpɛlɛ̃.

¹² Kɛji amɛaakɛɛ bo akɛ hã wɔmĩĩ amɛ hiɛkãalɔi tamɔ bɔ ni gbohiiaje mĩiɔ mɛi emuu, aloo tamɔ akpelekeɔ shi aboteɔ gbonyobu mli, ni akuuu sɛɛ abaaa dɔŋŋ lɛ.

¹³ Kɛji amɛaakɛɛ akɛ no wɔbaana nibii srɔtoi wɔwo wɔshĩai amli obɔ̃bɔ̃ lɛ kaakpɛlɛ̃.

¹⁴ Kɛji amɛaakɛɛ akɛ bo lɛ kɛ ohe abɔ wɔhe kɛkɛ; wɔ fɛɛ wɔbaato fotro kome, ni nɔ ni wɔbaana lɛ wɔbaaja lɛ pɛpɛɛpɛ lɛ kaakpɛlɛ̃.”

¹⁵ Mibi, okɛ nɛkɛ gbɔmɛi akabɔ. Tsi ohe kɛje amɛhe kwraa.

¹⁶ Gbɔmɛi ni tamɔ nɛkɛ lɛ, amɛhe yɛ oya kɛ efɔŋfeemɔ; amɛhe feɔ oya kɛ láshishwiemɔ.

¹⁷ Eji yaka nɔ ko feemɔ akɛ aaatsɔ̃ loofɔlɔ tsɔne be mli ni eekwɛ.

¹⁸ Nɛkɛ gbɔmɛi lɛ amɛ diɛŋtsɛ amɛhe tsɔne amɛtsɔ̃ɔ lɛ, amɛwoɔ amɛ diɛŋtsɛ amɛwala antɛo.

¹⁹ Mɛi fɛɛ ni shɔ̃ɔ nii ekãa naa yɛ mɛi adɛŋ lɛ, bɔ ni amɛnaagbee tamɔ nɛ, nɔ ni amɛkɛ hiɛkɔ̃ɔ diɔ sɛɛ lɛ, no nɔŋŋ gbeɔ amɛ.

Nilee miitsɛ kwashiai

²⁰ Bo toi! Nilee miibolɔ waa yɛ blohuiaŋ, ni eewo egbee yɛ jaji anɔ.

²¹ Ebolɔɔ yɛ maŋ lɛ agboi lɛ anaa kɛ he fɛɛ he ni mɛi ebua amɛhe naa kutuu yɛ.

²² Oo, nyɛ mɛi ni nyɛjwɛŋmɔ naa waaa, mɛɛ beyinɔ nɔŋŋ nyɛaahiɛ nyɛkwashiafeemɔ nɛɛ mli kɛyashi? Ni mɛɛ beyinɔ nɔŋŋ kwashiai hu aaanyɛ nilee kɛyashi?

²³ Kɛji mikã nyɛ lɛ, nyɛboa toi. Naa, mafɔse mimumɔ mawo nyɛmli, ni mahã nyɛyoo minilee wiemɔi lɛ hu.

²⁴ Mitsɛ nyɛ, ni nyɛbooo mi toi; mikpã miniji amli ni mɔ ko mɔ ko mɔɔɔ mli.

²⁵ Miŋaawoo lɛ hu nyɛkwa fɛɛ, ni nyɛbuuu mikãmɔ lɛ.

²⁶ No hewɔ lɛ, mi hu nyɛmanehulu mli lɛ, maŋmɔ nyɛ; ni kɛji gbeyei nɔ ko ba lɛ, maye nyɛhe fɛo.

²⁷ Kɛji tsuifãa nɔ ko batua nyɛ tamɔ ahum, ni nyɛmanehulu te shi tamɔ lasuogbele; ni kɛji hejaramɔ kɛ tsuiyeli ba nyɛnɔ lɛ,

²⁸ no mli lɛ nyɛaatsɛ mi, shi mihereŋ nɔ; nyɛaatao misɛɛgbɛ kpɛ̃kpɛ̃ɛkpɛ̃, shi nyɛnaŋ mi.

²⁹ Akɛni amɛsumɔɔ nilee, ni amɛsheee Yehowa gbeyei;

³⁰ asaŋ akɛni amɛsumɔ̃ɔɔ ŋaa ni miwoɔ amɛ lɛ ekoeko, ni amɛgbe mikãmɔ lɛ fɛɛ he guɔ

³¹ hewɔ lɛ, nɔ ni amɛdu lɛ, no yibii amɛaakpa, ni ŋaa ni amɛtotoo lɛ he sɛɛ amɛaana.

³² Mɛi ni jwɛŋmɔ naa waaa kpaleɔ kɛjeɔ nilee he kɛyaa nɔ kroko he, ni no nɔŋŋ gbeɔ amɛ; ni jwɛŋmɔ ni kwashiai jwɛŋɔ akɛ amɛyɛ shweshweeshwe lɛ, no nɔŋŋ kpãtãa amɛhiɛ.

³³ Shi mɔ fɛɛ mɔ ni boɔ mi toi lɛ eeehi shi shweshweeshwe, ehe aaajɔ lɛ, ni esheŋ efɔŋ ko gbeyei.