5 Mose 9 - ŊMALƐ KRƆŊKRƆŊ LƐ

Maŋ lɛ gbo toi

¹ “Nyɛboa toi, Israelbii! Nyɛbaafo Yordan Faa lɛ ŋmɛnɛ gbi nɛɛ koni nyɛya nyɛyaŋɔ shikpɔji yɛ maji ni dara, ni asaŋ amɛhe wa hu fe nyɛ adɛŋ, shikpɔji kɛ amɛnɔ maji wuji kɛ amɛhe gbogboi ni atswa kɛtee ŋwɛi shɔŋŋ akɛwaje amɛ.

² Shikpɔji nɛɛ anɔ gbɔmɛi lɛ dara ni amɛkwɔlɔ hu. Anakbii lɛ ashwiei ji amɛ, ni tamɔ nyɛle momo lɛ, nyɛnuɔ akɛ akɛɔ yɛ amɛhe akɛ, ‘Namɔ baanyɛ Anakbii lɛ ahiɛ adamɔ?’

³ Shi moŋ nyɛnaa nyɛlea ŋmɛnɛ gbi nɛɛ akɛ mɔ ni nyiɛ nyɛhiɛ kɛyaa lɛ etamɔ la grigri ni kpãtãa nii ahiɛ. Lɛ ji Yehowa, nyɛNyɔŋmɔ lɛ. Ebaaye amɛnɔ, ni ebaajɔɔ amɛhe yɛ nyɛhiɛ koni nyɛshwie amɛ yɛ shikpɔŋ lɛ nɔ, ni nyɛkpãtã amɛhiɛ oya tamɔ bɔ ni lɛ Yehowa ewo nyɛ shi eto momo lɛ.

⁴ “Kɛji Yehowa, nyɛNyɔŋmɔ lɛ, eshwie amɛ kɛje nyɛhiɛ lɛ, nyɛkakɛa yɛ nyɛtsuiŋ akɛ, ‘Ja ni wɔja hewɔ ni Yehowa kɛ wɔ ba koni wɔbaŋɔ shikpɔŋ nɛɛ lɛ.’ Dabida! Ejaakɛ Yehowa baashwie gbɔmɛi nɛɛ kɛje nyɛhiɛ yɛ amɛnifɔɔjianii ni amɛfeɔ lɛ hewɔ.

⁵ Jeee nyɛjalɛ loo nyɛtsuiŋ ni yɔɔ krɔŋkrɔŋ hewɔ ni nyɛyaa nyɛyaŋɔ gbɔmɛi nɛɛ ashikpɔŋ lɛ; shi moŋ Yehowa, nyɛNyɔŋmɔ lɛ, miishwie amɛ kɛje nyɛhiɛ yɛ amɛnifɔɔjianii ni amɛfeɔ lɛ hewɔ, bɔ ni afee ni, shi ni lɛ Yehowa ewo nyɛtsɛmɛi Abraham kɛ Isak kɛ Yakob lɛ ema nɔ mi.

⁶ No hewɔ lɛ, nyɛnaa nyɛlea akɛ jeee nyɛjalɛ hewɔ ni Yehowa, nyɛNyɔŋmɔ lɛ, kɛ nɛkɛ shikpɔŋ kpakpa nɛɛ hãa nyɛ koni nyɛŋɔ lɛ, ejaakɛ nyɛ tuuŋtu lɛ maŋ ni kuɛŋ ti ji nyɛ.

⁷ “Nyɛkaia, ni nyɛhiɛ akakpaa nɔ, bɔ ni nyɛtsɔ̃ nyɛwo Yehowa, nyɛNyɔŋmɔ lɛ, mlifu nyɛhã be mli ni nyɛyɔɔ shiaŋa lɛ nɔ lɛ. Kɛjɛ gbi nɔ ni nyɛshi Ijipt shikpɔŋ lɛ nɔ aahu kɛbashi nyɛbashɛ biɛ nɛɛ lɛ, Yehowa hiɛ atua sɔŋŋ kɛkɛ nyɛtseɔ.

⁸ Nyɛwo Yehowa mli la yɛ Sinai Gɔŋ lɛ he hu, ni emli fu nyɛ, ni kulɛ eehe nyɛhiɛ ekpãtã.

⁹ Be ni mikwɔ gɔŋ lɛ koni miyahe tɛi tɛtɛrɛbii lɛ ni aŋma kpãŋmɔ ni Yehowa kɛ nyɛ kpãŋ lɛ yɛ nɔ lɛ; mihi gɔŋ lɛ nɔ shwaneshwane kɛ nyɔɔŋnyɔɔŋ gbii nyɔŋmai ejwɛ; miyeee nii lɛ, minuuu nu hu.

¹⁰ Ni Yehowa kɛ tɛi tɛtɛrɛbii enyɔ lɛ hã mi, nɔ nɔ ni Nyɔŋmɔ kɛ lɛ diɛŋtsɛ ewao eŋma wiemɔi lɛ fɛɛ yɛ lɛ, wiemɔ ni Yehowa jɛ la lɛ teŋ ekɛ nyɛ wie kɛjɛ gɔŋ lɛ nɔ lɛ, gbi nɔ ni maŋ lɛ kpe kpee wulu lɛ.

¹¹ Shwaneshwane kɛ nyɔɔŋnyɔɔŋ gbii nyɔŋmai ejwɛ lɛ anaagbee lɛ, Yehowa kɛ tɛi tɛtɛrɛbii enyɔ lɛ, nɔ nɔ ni aŋma kpãŋmɔ lɛ yɛ lɛ, hã mi.

¹² “Kɛkɛ ni Yehowa kɛɛ mi akɛ, ‘Kpelekemɔ shi oya ni oya, ejaakɛ omaŋbii lɛ ni okpala kɛjɛ Ijipt lɛ eye sane fɔŋ. Yeee be ko kwraa nɛɛ lɛ, amɛkwa bɔ ni miwo amɛ kitã akɛ amɛhi shi amɛhã lɛ, ni amɛshwie amãgã amɛhã amɛhe.’

¹³ “Yehowa kɛɛ hu akɛ, ‘Mikwɛ nɛkɛ gbɔmɛi nɛɛ aahu, ni mina akɛ amɛkuɛŋ ti.

¹⁴ No hewɔ lɛ, ŋmɛɛ mi gbɛ koni makpãtã amɛhiɛ, ni mabule amɛshishi kwraa yɛ je lɛ mli. No sɛɛ lɛ, mahã oshwiei ashwere ni efɛo ni etsɔ̃ jaku ni da, ni yɛ hewalɛ fe amɛ.’

¹⁵ “No hewɔ lɛ, mitsɔ̃ mihe, ni mikpeleke gɔŋ lɛ, ni mihiɛ tɛi tɛtɛrɛbii enyɔ lɛ ni aŋma kpãŋmɔ lɛ yɛ nɔ lɛ kɛ miniji enyɔ. Nakai be mli fɛɛ lɛ gɔŋ lɛ miitso kɛ la.

¹⁶ Ni mikwɛ, ni naa nyɛfee Yehowa, nyɛNyɔŋmɔ lɛ shishi esha; nyɛfee tsina ni ashwie; amrɔ nɛɛ nyɛkpale kɛjɛ gbɛ ni Yehowa ewo nyɛ he kitã lɛ nɔ.

¹⁷ Kɛkɛ ni mikɛ tɛi tɛtɛrɛbii enyɔ lɛ ni mihiɛ kɛ miniji enyɔ lɛ tswia shi, ni mijwara amɛ yɛ nyɛhiɛ.

¹⁸ Kɛkɛ ni mitee ekoŋŋ, ni miyagbee shi yɛ Yehowa hiɛ, tamɔ tsuutsu lɛ. Miye nyɔɔŋnyɔɔŋ kɛ shwaneshwane gbii nyɔŋmai ejwɛ ni miyeee nii lɛ, minuuu nu hu, yɛ nyɛtoigbele kɛ efɔŋ ni nyɛfee Yehowa ni nyɛkɛwo emli la lɛ hewɔ.

¹⁹ Mishe gbeyei akɛ Yehowa kɛ emlifu ni naa wa lɛ baakpãtã nyɛhiɛ, ejaakɛ Yehowa efee kralo akɛ ebaafee nakai. Shi naagbee lɛ Yehowa bo mi toi nakai be lɛ hu.

²⁰ Yehowa mli fu Aaron hu jogbaŋŋ diɛŋtsɛ, bɔ ni he eheɔ lɛ egbe nɛɛ. Shi mikpa fai mihã Aaron hu.

²¹ Kɛkɛ ni miwo tsina amãgã ni nyɛshwie lɛ, nɔ ni nyɛkɛtɔ̃ Yehowa nɔ lɛ, ni mishã, ni fee sɛɛ lɛ mishimɔ, ni miwiɛ lɛ kɛyashi efee munyɔmunyɔ tamɔ mlu, ni mitsi mlu nɛɛ mishwie faa ni jɛɔ gɔŋ lɛ nɔ hoɔ lɛ mli.

²² Nyɛku sɛɛ nyɛwo Yehowa mlifu yɛ Tabera kɛ Masa kɛ Kibrot Hataava fɛɛ.

²³ Ni be ni Yehowa wo nyɛ gbɛ yɛ Kadesh Barnea akɛ nyɛya koni nyɛyaŋɔ shikpɔŋ ni ekɛhãa nyɛ akɛ nyɛŋɔ lɛ, no mli hu nyɛtse Yehowa, nyɛNyɔŋmɔ lɛ, hiɛ atua, ni nyɛheee lɛ nyɛyeee, ni nyɛbooo lɛ toi hu.

²⁴ Yehowa hiɛ atua sɔŋŋ kɛkɛ nyɛtseɔ kɛjɛ gbi nɔ ni mile nyɛ lɛ.

²⁵ “Miho mikã shi yɛ Yehowa hiɛ nyɔɔŋnyɔɔŋ kɛ shwaneshwane gbii nyɔŋmai ejwɛ, ejaakɛ Yehowa ekɛɛ akɛ ebaakpãtã nyɛhiɛ.

²⁶ Mikpa Yehowa fai mikɛɛ akɛ, ‘Nuŋtsɔ Nyɔŋmɔ, kaakpãtã bo diɛŋtsɛ omɛi lɛ, ni ji gbɔmɛi ni oyakpɔ̃ yɛ Ijipt shikpɔŋ lɛ nɔ kɛ nineshiwalɛ kɛ ohewalɛ lɛ ahiɛ.

²⁷ Kwɛmɔ otsuji Abraham kɛ Isak kɛ Yakob ahewɔ; kaadi gbɔmɛi nɛɛ akuɛŋtilɛ loo amɛnifɔɔjianii kɛ nishaianii lɛ asɛɛ,’

²⁸ koni shikpɔŋ ni oyakpɔ̃ wɔ kɛje nɔ lɛ nɔ bii lɛ akakɛɛ akɛ, ‘Nyɛ ni Yehowa nyɛɛɛ ekɛ amɛ ayashɛ shikpɔŋ lɛ ni ewo amɛ shi yɛ he lɛ nɔ, kɛ agbɛnɛ hu nyɛ ni enyɛɔ amɛ moŋ hewɔ ni eyakpala amɛ kɛtee lɛ, koni eyagbe amɛ yɛ shiaŋa lɛ nɔ.

²⁹ Bɔ fɛɛ bɔ ni fee lɛ, bo diɛŋtsɛ omɛi ni oje gbɛ oŋɔ ji amɛ, ni oyakpɔ̃ amɛ yɛ Ijipt shikpɔŋ lɛ nɔ kɛ nineshiwalɛ yɛ ohewalɛ lɛ naa.’