5 Mose 8 - ŊMALƐ KRƆŊKRƆŊ LƐ

Shikpɔŋ Kpakpa ni ayaaŋɔ lɛ

¹ “Kitãi fɛɛ ni miwoɔ nyɛ ŋmɛnɛ nɛɛ lɛ, nyɛjwɛŋa nɔ, ni nyɛyea nɔ koni nyɛyi ana wala, ni nyɛshwere, ni nyɛyaa nyɛyaŋɔa shikpɔŋ lɛ ni Yehowa, nyɛNyɔŋmɔ lɛ, wo nyɛtsɛmɛi lɛ shi yɛ he lɛ.

² Nyɛkaia gbɛ ni Yehowa, nyɛNyɔŋmɔ lɛ, kɛ nyɛ tsɔ̃ nɔ lɛ fɛɛ, yɛ shiaŋa lɛ nɔ afii nyɔŋmai ejwɛ nɛɛ mli lɛ, koni ekɛhã nyɛhumi shi, ni asaŋ koni etsɔ̃ nɔ ekɛka nyɛ ekwɛ ni ekɛle nɔ ni yɔɔ nyɛtsuiiaŋ akɛ nyɛaaye ekitãi lɛ anɔ lo, aloo nyɛyeŋ nɔ.

³ Ehã hɔmɔ ye nyɛ, ni ehã nyɛhumi shi; ni ehã nyɛ mana ni nyɛye, niyenii ko ni nyɛleee, ni nyɛtsɛmɛi hu tete leee nɔ ni ji lɛ, koni nyɛkɛna nyɛle akɛ jeee aboloo pɛ hãa gbɔmɔ yi naa wala, shi moŋ wiemɔ fɛɛ wiemɔ ni jɛɔ Yehowa daaŋ lɛ hãa gbɔmɔ yi naa wala.

⁴ Nɛkɛ afii nyɔŋmai ejwɛ nɛɛ fɛɛ lɛ nyɛtadei tserɛɛɛ yɛ nyɛhe lɛ, nyɛnaji efuufuu hu.

⁵ Belɛ nyɛnaa nyɛlea akɛ Yehowa, nyɛNyɔŋmɔ lɛ, miitsɔse nyɛ tamɔ bɔ ni mɔ tsɔseɔ ebi.

⁶ No hewɔ lɛ, nyɛyea Yehowa, nyɛNyɔŋmɔ lɛ, kitãi lɛ anɔ; nyɛbaa nyɛjeŋ bɔ ni etsɔ̃ɔ nyɛ lɛ, ni nyɛshea lɛ gbeyei.

⁷ Ejaakɛ Yehowa, nyɛNyɔŋmɔ lɛ, kɛ nyɛ miiya shikpɔŋ kpakpa nɔ, shikpɔŋ kɛ enɔ fai kɛ kpaakpoi kɛ shikpɔŋ nu ni tueɔ kɛjɛɔ jɔi kɛ gɔji amli;

⁸ shikpɔŋ ni ebaa ŋmãa kɛ abele kɛ wainyibii kɛ agbãmi kɛ akutu kɛ mutso kɛ wo hu.

⁹ Daaŋŋmãa ni nyɛaaye he esɛŋ, ni nɔ ko nɔ ko he ehiaŋ nyɛ yɛ shikpɔŋ nɛɛ nɔ. Dade yɛ emli tɛi lɛ amli; ni nyɛaana akɔɔble hu nyɛtsa yɛ shikpɔŋ nɛɛ nɔ gɔji lɛ amli.

¹⁰ Nyɛbaaye nii nyɛtɔrɔ, ni nyɛbaajie Yehowa, nyɛNyɔŋmɔ lɛ, yi yɛ shikpɔŋ kpakpa ni ehã nyɛ lɛ hewɔ.

Hiɛ akakpa Yehowa nɔ kɔkɔɔkɔ

¹¹ “Nyɛkwɛa nyɛhe ni ahia koni nyɛhiɛ akakpa Yehowa nyɛNyɔŋmɔ lɛ nɔ, ni no hã nyɛyeee ekitãi kɛ emlai kɛ ekpɔi ni miwoɔ nyɛ ŋmɛnɛ nɛɛ nɔ.

¹² Kɛji nyɛna nii nyɛye nyɛtɔrɔ, ni nyɛmamɔ shĩai fɛɛfɛji nyɛhi mli,

¹³ ni nyɛtoi kɛ tsinai kɛ nyɛjwiɛtɛi kɛ nyɛshika kɛ nyɛnibii krokomɛi lɛ fɛɛ shwere lɛ,

¹⁴ nyɛkwɛa ni ahia koni nyɛkawo nyɛhe nɔ ni nyɛhiɛ miikpa Yehowa, nyɛNyɔŋmɔ lɛ nɔ. Lɛ mɔ ni ejie nyɛ kɛje Ijipt shikpɔŋ lɛ nɔ he ni aye nyɛ nyɔŋ yɛ lɛ.

¹⁵ Lɛ ji mɔ ni kpala nyɛ kɛtsɔ̃ shiaŋa kpeteŋkple ni nɔ yɔɔ gbeyei lɛ nɔ lɛ, he ni onufui ni naa jaraa kɛ nyɔŋmɔŋkrakroi kɛ nu hɔmɔ yɔɔ lɛ. Lɛ ehã nu tue kɛjɛ tswɛrɛbo tɛsaa mli hã nyɛ, ni nyɛna nyɛnu;

¹⁶ ni ekɛ mana ni nyɛtsɛmɛi lɛ tete leee lɛ, lɛ nyɛ yɛ shiaŋa lɛ nɔ koni ehã nyɛhumi shi, ni asaŋ koni ekɛka nyɛ ekwɛ, koni naagbee mli lɛ efee nyɛ ejurɔ.

¹⁷ No hewɔ lɛ, nyɛkwɛa ni ahia koni nyɛkakɛɛ yɛ nyɛtsuiŋ yɛ he akɛ, ‘Wɔ diɛŋtsɛ wɔhewalɛ kɛ nyɛmɔ naa hã wɔshwere nɛkɛ nɛɛ.’

¹⁸ Shi moŋ nyɛkaia akɛ Yehowa, nyɛNyɔŋmɔ lɛ, lɛ ji mɔ ni duro nyɛ hewalɛ ni nyɛkɛna nii ni nyɛyɔɔ lɛ, koni ehã ekpãŋmɔ ni ekã nyɛtsɛmɛi lɛ kitã yɛ he lɛ ama shi, tamɔ nyɛnaa ŋmɛnɛ nɛɛ lɛ.

¹⁹ Shi naa, kɛji nyɛhiɛ je Yehowa, nyɛNyɔŋmɔ lɛ, nɔ, ni nyɛshi lɛ sɛɛ, ni nyɛtee nyɛyasɔmɔ ni nyɛja nyɔŋmɔi krokomɛi lɛ, no lɛ, miigba mli kpoo miikɛɛ nyɛ ŋmɛnɛ gbi nɛɛ akɛ kpãtãmɔ kɛ̃ nyɛhiɛ aaakpãtã.

²⁰ Bɔ ni Yehowa baahã maji ni nyɛkɛaakpe lɛ ahiɛ akpãtã lɛ, nakai nɔŋŋ nyɛ hu nyɛhiɛ aaakpãtã kɛji nyɛbooo Yehowa, nyɛNyɔŋmɔ lɛ wiemɔ toi lɛ.”