5 Mose 7 - ŊMALƐ KRƆŊKRƆŊ LƐ

Nuŋtsɔ lɛ diɛŋtsɛ Webii lɛ

¹ “Yehowa, nyɛNyɔŋmɔ lɛ, kɛ nyɛ baaya ayashɛ shikpɔŋ ni nyɛyaa nyɛyaŋɔ lɛ nɔ. Ebaashwie maji kpawo ni dara, asaŋ ni amɛhe wa fe nyɛ kɛje nyɛhiɛ. Maji nɛɛ ji Hitbii lɛ kɛ Girgashbii lɛ kɛ Amorbii lɛ kɛ Kanaanbii lɛ kɛ Perizbii lɛ kɛ Hivbii lɛ kɛ Yebusbii amaji lɛ.

² Kɛji Yehowa, nyɛNyɔŋmɔ lɛ, kɛ amɛwo nyɛdɛŋ nɛkɛ lɛ, nyɛkpãtãa amɛhiɛ kwraa. Nyɛ kɛ amɛ akakpãŋa kpãŋmɔ ko, ni asaŋ nyɛkanaa amɛ mɔbɔ.

³ Nyɛkɛ amɛ akabotea gbãlãshihilɛ mli; nyɛkɛ nyɛbiyei akahãa amɛbihii gbãlã lɛ, nyɛkaŋɔa amɛbiyei nyɛhãa nyɛbihii hu gbãlã.

⁴ Ejaakɛ amɛbiyei lɛ aaahã nyɛbihii lɛ akpale yɛ misɛɛ ni amɛyasɔmɔ nyɔŋmɔi krokomɛi. Enɛ baahã Yehowa mli awo nyɛ la, ni eeekpãtã nyɛhiɛ.

⁵ Bɔ ni nyɛkɛ amɛ aye ahã moŋ nɛ: amɛfɔleshãa latɛi lɛ nyɛkumɔa, ni amɛshiui ni amɛmamɔ lɛ nyɛjwaraa, ni amɛwɔŋkoi lɛ nyɛgbaa nyɛshwiea shi, ni amɛmãgãi lɛ nyɛmamɔa amɛnaa la nyɛshãa.

⁶ “Nyɛfea nakai ejaakɛ Yehowa, nyɛNyɔŋmɔ lɛ, eŋɔ nyɛ ehã ehe akɛ emɛi krɔŋkrɔŋ. Eje gbɛ ni eŋɔ nyɛ yɛ majimaji lɛ fɛɛ ateŋ yɛ shikpɔŋ lɛ nɔ koni nyɛtsɔ̃ lɛ diɛŋtsɛ ewebii krɛdɛɛ.

⁷ Jeee fa ni nyɛyi fa fe maji fɛɛ hewɔ ni Yehowa sumɔ nyɛ, ni eŋɔ nyɛ akɛ ewebii lɛ; ejaakɛ nyɛ moŋ po ji mɛi komɛi ni nyɛyi faaa kwraa yɛ maji fɛɛ ateŋ.

⁸ Shi moŋ suɔmɔ ni esumɔɔ nyɛ hewɔ, shi bɔ ni afee ni eye shi ni ewo nyɛtsɛmɛi lɛ nɔ lɛ, no hewɔ ni Yehowa kɛ nineshiwalɛ jie nyɛ, ni ekpɔ̃ nyɛ kɛje nyɔŋ ni Ijipt maŋtsɛ lɛ yeɔ nyɛ lɛ mli lɛ.

⁹ No hewɔ lɛ, nyɛnaa nyɛlea akɛ Yehowa, nyɛNyɔŋmɔ lɛ, lɛ ji Nyɔŋmɔ koome lɛ, Nyɔŋmɔ anɔkwafo, mɔ ni yeɔ shi ni ewo nɔ, asaŋ ni esuɔmɔ tsakeee yɛ mɛi ni esumɔɔ ni amɛyeɔ ekitãi anɔ kɛyashiɔ amɛshwiei ni ji akpe lɛ ayinɔ tɔ̃ɔ lɛ.

¹⁰ Shi mɛi ni nyɛɔ lɛ lɛ, egbalaa amɛtoi, ni amɛnaa kɛ amɛhiŋmɛi; ekɛ mɔ ni nyɛɔ lɛ lɛ toigbalamɔ lɛ eŋmɛɛɛ shi; shi efeɔ, ni mɔ lɛ naa.

¹¹ No hewɔ lɛ, kitãi kɛ akpɔi kɛ mlai ni miwoɔ nyɛ ŋmɛnɛ gbi nɛɛ lɛ, nyɛkwɛa jogbaŋŋ koni nyɛyea nɔ.”

Toiboo sɛɛ jɔɔmɔi

¹² “Kɛji nyɛbo nɛkɛ mlai nɛɛ toi, ni nyɛye nɔ lɛ, no lɛ Yehowa, nyɛNyɔŋmɔ lɛ, baaye kpãŋmɔ ni ekɛ nyɛ ekpãŋ lɛ nɔ, ni ebaasumɔ nyɛ kɛ suɔmɔ ni tsakeee tamɔ bɔ ni ewo nyɛtsɛmɛi lɛ shi eto lɛ.

¹³ Ebaasumɔ nyɛ, ni ebaajɔɔ nyɛ, ni ebaahã nyɛyi afa. Ebaajɔɔ nyɛmusuŋbii hu kɛ nyɛŋmɔshi nibaanii bɔ ni nyɛbele kɛ nyɛwaintsei kɛ mu kɛ nyɛtsinai kɛ nyɛtoi baashwere yɛ shikpɔŋ lɛ ni ewo nyɛtsɛmɛi lɛ shi yɛ he akɛ ekɛbaahã nyɛ lɛ nɔ.

¹⁴ Aaajɔɔ nyɛ fe jeŋ maji fɛɛ; nyɛteŋ nuu ko loo yoo ko ehiŋ shi ni efɔŋ; nakai nɔŋŋ nyɛkooloo ko hu ehiŋ shi ni efɔŋ.

¹⁵ Ni Yehowa baajie helai fɛɛ kɛje nyɛteŋ; ehaŋ Ijipt helai fɔ̃ji lɛ eko kwraa aye nyɛ; shi moŋ ebaahã helai nɛɛ aye nyɛhenyɛlɔi lɛ fɛɛ.

¹⁶ Maji fɛɛ ni Yehowa, nyɛNyɔŋmɔ lɛ, aaatu awo nyɛdɛŋ lɛ, nyɛkpãtãa amɛhiɛ ni mɔbɔnalɛ bɛ mli; ni nyɛkajaa amɛnyɔŋmɔi lɛ, ejaakɛ no baahã nyɛdu tsɔne.

¹⁷ “Nyɛkakɛa nyɛhe akɛ, ‘Maji nɛɛ ayi fa fe wɔ; te wɔɔfee tɛŋŋ ni wɔnyɛ amɛ wɔshwie lɛ?’

¹⁸ Nyɛkashea amɛ gbeyei, shi moŋ nyɛkaia nɔ ni Yehowa, nyɛNyɔŋmɔ lɛ, fee Ijipt maŋtsɛ lɛ kɛ emaŋbii lɛ fɛɛ lɛ.

¹⁹ Nyɛkaia helai wuji kɛ okadii kɛ naakpɛɛnii ni nyɛna kɛ nyɛhiŋmɛii lɛ kɛ nineshiwalɛ kɛ hewalɛ ni Yehowa, nyɛNyɔŋmɔ lɛ, kɛkpɔ̃ nyɛ lɛ. Nakai pɛpɛɛpɛ Yehowa, nyɛNyɔŋmɔ lɛ, baafee maji fɛɛ ni nyɛ lɛ nyɛsheɔ amɛ gbeyei lɛ.

²⁰ Yehowa, nyɛNyɔŋmɔ lɛ, baahã sosomootii ababote amɛteŋ kɛbahao amɛ kɛyaashi beyinɔ ni amɛteiaŋ mɛi ni baajo nyɛnaa foi amɛyatee amɛhe lɛ tete ahiɛ aaakpãtã.

²¹ Nyɛtsui akafãa yɛ amɛhewɔ, ejaakɛ Yehowa, nyɛNyɔŋmɔ lɛ, ni ji Nyɔŋmɔ kpeteŋkple ni he yɔɔ gbeyei lɛ, ji mɔ ni yɔɔ nyɛteŋ lɛ.

²² Shi fiofio ni Yehowa, nyɛNyɔŋmɔ lɛ, baashwie maji nɛɛ kɛje nyɛhiɛ. Nyɛnyɛŋ nyɛkpãtã amɛ fɛɛ amɛhiɛ shi kome, no lɛ ŋa nɔ kooloi lɛ ayi baafa fe nine awo nyɛ.

²³ Yehowa, nyɛNyɔŋmɔ lɛ, baatu amɛ awo nyɛdɛŋ, ni ebaahã amɛ jijaa jijaamɔ wulu kɛyashi beyinɔ ni amɛhiɛ aaakpãtã.

²⁴ Ebaatu maji lɛ amaŋtsɛmɛi lɛ ewo nyɛdɛŋ; ni nyɛaagbe amɛ, ni amɛgbɛii baalaaje yɛ jeŋ. Amɛteŋ mɔ ko mɔ ko nyɛŋ nyɛhiɛ adamɔ kɛyaashi beyinɔ ni nyɛaakpãtã amɛhiɛ.

²⁵ Nyɛmamɔa amɛnyɔŋmɔi ni ji amãgãi lɛ anaa la nyɛshãa. Nyɛhiɛ akakɔ̃a jwiɛtɛi loo shika ni yɔɔ nibii nɛɛ ahe lɛ anɔ ni nyɛŋɔ eko nyɛhã nyɛhe, koni no akafee kaa miihã nyɛ, ejaakɛ musu nii ni hã Yehowa, nyɛNyɔŋmɔ lɛ.

²⁶ Nyɛkɛ musu nii ko akayaa nyɛshĩai amli ni no hã nyɛloo musu tamɔ nii lɛ nɔŋŋ. Nyaŋemɔ nyɛnyaŋea, ni hi nyɛhia amɛ, ejaakɛ alomɔ amɛ.