5 Mose 5 - ŊMALƐ KRƆŊKRƆŊ LƐ

Kitãi Nyɔŋma lɛ

¹ Mose tsɛ Israelbii lɛ fɛɛ kɛbakpe, ni ekɛɛ amɛ akɛ, “Israelbii, nyɛboa akpɔi kɛ mlai ni mibajaje mawo nyɛtoiiaŋ ŋmɛnɛ nɛɛ toi; nyɛkasea ni nyɛjwɛŋa nɔ jogbaŋŋ ni nyɛye nɔ.

² Yehowa, wɔNyɔŋmɔ lɛ, kɛ wɔ kpãŋ yɛ Sinai.

³ Jeee wɔblematsɛmɛi lɛ kɛkɛ Yehowa kɛkpãŋ nɛkɛ kpãŋmɔ nɛɛ lɛ; shi moŋ wɔ fɛɛ ni wɔyɔɔ wala mli ŋmɛnɛ gbi nɛɛ lɛ, wɔ ekɛkpãŋ lɛ.

⁴ Yehowa jɛ la lɛ teŋ yɛ gɔŋ lɛ nɔ ni ekɛ nyɛ wie hiɛ kɛ hiɛ.

⁵ Mi lɛ, nakai be lɛ mli lɛ, midamɔ Yehowa kɛ nyɛ teŋ koni majaje Yehowa wiemɔi lɛ matsɔ̃ɔ nyɛ, ejaakɛ la lɛ hewɔ lɛ nyɛshe gbeyei, ni nyɛkwɔɔɔ gɔŋ lɛ. “Yehowa kɛɛ akɛ,

⁶ ‘Mi ji Yehowa, oNyɔŋmɔ lɛ, mi mijie bo yɛ nyɔŋyeli mli kɛje Ijipt shikpɔŋ lɛ nɔ lɛ.

⁷ “‘Kaana nyɔŋmɔ kroko ko yɛ misɛɛ.

⁸ “‘Kaafee amãgã ko ni ji nɔ ko ni tamɔ nii ni yɔɔ ŋwɛi loo nii ni yɔɔ shikpɔŋ lɛ nɔ, loo nii ni yɔɔ nu mli yɛ shikpɔŋ lɛ shishi henɔ ohã ohe.

⁹ Kaaja nibii nɛɛ, ni kaasɔ̃mɔ amɛ hu, ejaakɛ mi Yehowa, oNyɔŋmɔ lɛ, Nyɔŋmɔ ni yeɔ awuŋã ji mi; ni miwoɔ tsɛmɛi kɛ bii nyɔmɔ yɛ tsɛmɛi lɛ atɔ̃mɔi lɛ ahewɔ, kɛyashiɔ yinɔ ni ji etɛ̃ kɛ yinɔ ni ji ejwɛ tete ni nyɛɔ mi lɛ nɔ.

¹⁰ Shi mɛi akpei abɔ fɛɛ ni sumɔɔ mi, ni amɛyeɔ mikitãi anɔ lɛ, misumɔɔ amɛ kɛ suɔmɔ ni tsakeee, ni minaa amɛ mɔbɔ hu.’

¹¹ “Kaahiɛ Yehowa, oNyɔŋmɔ lɛ gbɛi mli yakayaka; ejaakɛ Yehowa ebuŋ mɔ ni hiɛɔ egbɛi mli yakayaka lɛ bem.

¹² “Buu hejɔɔmɔ gbi lɛ, ni oye lɛ akɛ gbi krɔŋkrɔŋ tamɔ bɔ ni Yehowa, oNyɔŋmɔ lɛ, ewo bo kitã lɛ.

¹³ Otsu nii gbii ekpaa, ni ofee onii fɛɛ,

¹⁴ shi gbi ni ji kpawo lɛ hejɔɔmɔ gbi ni hã Yehowa, oNyɔŋmɔ lɛ. No nɔ lɛ okatsu nɔ ko, bo jio, obinuu jio, obiyoo jio, owenuu jio, oweyoo jio, otsinanuu jio, oteji jio, oshĩa kooloo kroko jio, loo gbɔ ni yɔɔ ogboi lɛ amli; bɔ ni afee ni bo kɛ otsuji hii kɛ otsuji yei ajɔɔ amɛhe tamɔ bo nɔŋŋ.

¹⁵ Nyɛkaia akɛ nyɛ hu nyɔji ji nyɛ yɛ Ijipt shikpɔŋ lɛ nɔ, ni Yehowa, nyɛNyɔŋmɔ lɛ, kɛ nineshiwalɛ yakpɔ̃ nyɛ kɛje jɛi yɛ ehewalɛ naa. No hewɔ ni Yehowa, nyɛNyɔŋmɔ lɛ, wo nyɛ kitã akɛ nyɛye hejɔɔmɔ gbi lɛ akɛ gbi krɔŋkrɔŋ lɛ.

¹⁶ “Wo otsɛ kɛ onyɛ tamɔ bɔ ni Yehowa, oNyɔŋmɔ lɛ, ewo bo kitã lɛ, koni owala sɛɛ atsɛ; asaŋ koni ahi ahã bo yɛ shikpɔŋ lɛ ni Yehowa, oNyɔŋmɔ, kɛhãa bo lɛ nɔ.

¹⁷ “Kaagbe gbɔmɔ.

¹⁸ “Kaafite gbãlã.

¹⁹ “Kaaju.

²⁰ “Kaaye amale odase yɛ onaanyo he.

²¹ “‘Ohiɛ akakɔ̃ onaanyo nɔ ko nɔ ko nɔ; eŋa jio, eshĩa jio, eshikpɔŋ jio, ewenuu jio, eweyoo jio, etsina jio, eteji jio, nɔ fɛɛ nɔ ni ji onaanyo nɔ nɔ.’

²² “Nɛkɛ kitãi nɛɛ Yehowa kɛ gbee ni wa jɛ la lɛ kɛ atatu kpii lɛ mli ewo nyɛsafo muu lɛ fɛɛ yɛ gɔŋ lɛ nɔ; ni ekɛ nɔ ko fataaa he. Kɛkɛ ni eŋma ewo tɛi tɛtɛrɛbii enyɔ nɔ, ni ekɛhã mi.”

Maŋbii lɛ she gbeyei

²³ “Be ni nyɛnu gbee lɛ kɛjɛ duŋ kpii lɛ mli, be mli ni gɔŋ lɛ tsoɔ kɛ la lɛ, nyɛtsi nyɛbɛŋkɛ mi, nyɛ kɛ akutseiatsɛmɛi kɛ nyɛmaŋ onukpai lɛ fɛɛ,

²⁴ ni nyɛkɛɛ mi akɛ, ‘Naa, Yehowa, wɔNyɔŋmɔ lɛ, ehã wɔna enunyam kɛ egbojee, ni ehã wɔnu egbee hu kɛjɛ la lɛ mli. Ŋmɛnɛ gbi nɛɛ nɔ lɛ, wɔna wɔle akɛ Nyɔŋmɔ kɛ gbɔmɔ adesa wieɔ, ni mɔ lɛ yi naa wala kɛ̃.

²⁵ Belɛ agbɛnɛ mɛni hewɔ wɔɔgboi? Ejaakɛ nɛkɛ la kpeteŋkple nɛɛ aaaŋala wɔ wɛɛ. Wɔbaagboi kɛji wɔnu Yehowa, wɔNyɔŋmɔ lɛ, gbee ekoŋŋ lɛ.

²⁶ Ejaakɛ mɛɛ gbɔmɔ adesa enu Nyɔŋmɔ hiɛkãalɔ lɛ gbee ni miiwie kɛjɛ la teŋ tamɔ wɔnu nɛɛ, ni eyi ena wala dã?

²⁷ No hewɔ lɛ, bo tsi obɛŋkɛ Yehowa koni obo nɔ fɛɛ nɔ ni wɔNyɔŋmɔ lɛ aaakɛɛ lɛ toi ni obakɛɛ wɔ nɔ fɛɛ nɔ ni Yehowa, wɔNyɔŋmɔ lɛ, kɛ bo aaawie. Wɔbaabo toi, ni wɔbaafee hu.’

²⁸ “Be ni nyɛkɛ mi wie nɛkɛ lɛ, Yehowa nu wiemɔi lɛ, ni ekɛɛ mi akɛ, ‘Minu wiemɔi ni maŋbii lɛ kɛ bo wie lɛ; amɛgbee lɛ ja.

²⁹ Mina ni kulɛ amɛyɛ nɛkɛ jwɛŋmɔ daa koni amɛkɛye mikitãi lɛ fɛɛ nɔ, bɔ ni afee ni ehi ehã amɛ kɛ amɛshwiei kɛya naanɔ.

³⁰ Yaa ni oyakɛɛ amɛ koni amɛkpale kɛya amɛbui lɛ amli.

³¹ Shi bo lɛ, daamɔ biɛ yɛ mimasɛi, ni matsɔ̃ɔ bo kitãi lɛ kɛ akpɔi lɛ kɛ mlai lɛ fɛɛ, koni oyatsɔ̃ɔ maŋ lɛ akɛ amɛye nɔ yɛ shikpɔŋ ni mikɛhãa amɛ akɛ amɛnɔ lɛ nɔ.’

³² “No hewɔ lɛ, nyɛjwɛŋa nɔ jogbaŋŋ koni nyɛye kitãi ni Yehowa, nyɛNyɔŋmɔ lɛ, ewo nyɛ lɛ nɔ pɛpɛɛpɛ; nyɛkagbaa kɛyaa ninejurɔgbɛ, ni nyɛkagbaa kɛyaa abɛkugbɛ hu.

³³ Nyɛbaa nyɛjeŋ tamɔ bɔ ni Yehowa, nyɛNyɔŋmɔ lɛ, etsɔ̃ɔ nyɛ lɛ, koni nyɛna wala yɛ shikpɔŋ ni nyɛyaa nyɛyaŋɔ lɛ nɔ.”