5 Mose 4 - ŊMALƐ KRƆŊKRƆŊ LƐ

Mose bi Israelbii lɛ koni amɛye mlai lɛ anɔ

¹ Agbɛnɛ Mose kɛɛ Israelbii lɛ akɛ, “Nyɛyea akpɔi kɛ mlai ni mitsɔ̃ɔ nyɛ lɛ anɔ koni nyɛyi ana wala koni nyɛya nyɛyaŋɔ shikpɔŋ ni Yehowa, nyɛtsɛmɛi aNyɔŋmɔ lɛ, kɛhãa nyɛ lɛ.

² Nyɛkɛ nɔ ko akafataa mlai ni miwoɔ nyɛ nɛɛ ahe, ni asaŋ nyɛkajiea nɔ ko yɛ mli hu. Nyɛyea Yehowa, nyɛNyɔŋmɔ lɛ, mlai ni miwoɔ nyɛ nɛɛ nɔ.

³ Nyɛna kɛ nyɛ diɛŋtsɛ nyɛhiŋmɛii nɔ ni Yehowa fee yɛ Peor Gɔŋ lɛ he lɛ, bɔ ni mɔ fɛɛ mɔ ni ja Baal lɛ, Yehowa nyɛNyɔŋmɔ lɛ, kpãtã ehiɛ yɛ nyɛteŋ lɛ;

⁴ shi nyɛ mɛi ni nyɛye Yehowa, nyɛNyɔŋmɔ lɛ, anɔkwa lɛ, nyɛ fɛɛ tswɛm nyɛyi ena wala kɛbashi ŋmɛnɛ.

⁵ “Naa, mitsɔ̃ɔ nyɛ akpɔi kɛ mlai lɛ bɔ ni Yehowa, miNyɔŋmɔ lɛ, fã akɛ mifee lɛ, koni nyɛye nɔ yɛ shikpɔŋ ni nyɛyaa nyɛyaŋɔ lɛ nɔ.

⁶ Nyɛyea nɔ; nyɛbaa nyɛjeŋ ejaakɛ no nɔŋŋ baahã nyɛnilee kɛ nyɛhiɛshikamɔ abakã shi faŋŋ yɛ maji krokomɛi lɛ ahiɛ. Kɛji amɛnu nɛkɛ akpɔi nɛɛ lɛ, amɛaakɛɛ akɛ, ‘Anɔkwa akɛ maŋ nɛɛ mli bii lɛ le nii, ni amɛnuɔ nii ashishi; maŋ kpeteŋkple nɛ.’

⁷ “Ejaakɛ mɛɛ maŋ wulu kroko yɔɔ dɔŋŋ ni yɔɔ nyɔŋmɔ ko ni bɛŋkɛɔ amɛ tamɔ bɔ ni Yehowa, wɔNyɔŋmɔ lɛ, bɛŋkɛɔ wɔ be fɛɛ be ni wɔɔtsɛ lɛ lɛ?

⁸ Ni mɛɛ maŋ wulu kroko yɔɔ dɔŋŋ ni yɔɔ akpɔi kɛ mlai ni ja tamɔ nɛkɛ mlai nɛɛ fɛɛ ni mikɛshwieɔ nyɛhiɛ ŋmɛnɛ nɛɛ lɛ?

⁹ Shi moŋ, nyɛkwɛa ni ahia kɛkɛ koni nyɛhiɛ ahia nyɛhe nɔ jogbaŋŋ, bɔ ni afee ni nyɛhiɛ akaje nibii ni nyɛna kɛ nyɛ diɛŋtsɛ nyɛhiŋmɛii nɛɛ anɔ nyɛwala gbii abɔ fɛɛ. Ni nyɛgbaa nyɛbii kɛ nyɛnabii lɛ,

¹⁰ titri lɛ, sane ni ba gbi ni nyɛdamɔ Yehowa, nyɛNyɔŋmɔ lɛ hiɛ yɛ Sinai Gɔŋ lɛ he lɛ, be ni Yehowa kɛɛ mi akɛ, ‘Buamɔ maŋ lɛ naa ohã mi, shi miitao akɛ mahã amɛnu nɔ ni makɛɛ koni amɛkɛkase mi gbeyeishemɔ gbii abɔ ni amɛyɔɔ jeŋ lɛ, asaŋ koni amɛgba amɛbii hu.’

¹¹ “Nyɛgbaa nyɛbii lɛ bɔ ni nyɛtsi nyɛbɛŋkɛ, ni nyɛbadamɔ gɔŋ lɛ shishi, kɛ bɔ ni gɔŋ lɛ here kɛ la kɛtee ŋwɛi shɔŋŋ, ni atatu kpii ko ha gɔŋ lɛ he fɛɛ kpula.

¹² Nyɛgbaa amɛ bɔ ni Yehowa kɛ nyɛ wie kɛjɛ la lɛ mli; bɔ ni nyɛnu wiemɔi lɛ shi nyɛnaaa lɛ diɛŋtsɛ kwraa, fe akɛ egbee lɛ kɛkɛ nyɛnu;

¹³ bɔ ni egbala ekpãŋmɔ lɛ mli etsɔ̃ɔ nyɛ, ni efã akɛ nyɛye nɔ, no ji kitãi nyɔŋma lɛ ni eŋmala ewo tɛi tɛtɛrɛbii enyɔ anɔ lɛ.

¹⁴ Yehowa wo mi kitã yɛ nakai be lɛ mli akɛ mitsɔ̃ɔ nyɛ akpɔi lɛ kɛ mlai lɛ, bɔ ni afee ni nyɛye nɔ yɛ shikpɔŋ ni nyɛfoɔ mli kɛya ni nyɛyaŋɔ lɛ nɔ.

Abɔ kɔkɔ akɛ akakwa Nyɔŋmɔ

¹⁵ “No hewɔ lɛ, nyɛkwɛa nyɛhenɔ ni ahia. Kɛji gbi nɔ ni Yehowa jɛ la lɛ mli ekɛ nyɛ wie yɛ Sinai Gɔŋ lɛ shishi lɛ, nyɛnaaa lɛ diɛŋtsɛ lɛ,

¹⁶ no lɛ nyɛkwɛa jogbaŋŋ koni nyɛkafee amãgã ko ni tamɔ nuu loo yoo henɔ nyɛhã nyɛhe, koni nyɛtɔ̃.

¹⁷ Kooloo naji ejwɛtsɛ jio, loofɔlɔ jio,

¹⁸ waamɔ kooloo jio, nu mli loo jio, nyɛkafea eko eko henɔ.

¹⁹ Kɛji nyɛwo nyɛhiɛ nɔ kɛtee ŋwɛi ni nyɛkwɛ hulu kɛ nyɔɔŋtsere kɛ ŋulamii lɛ ni ji ŋwɛiniiaŋ nibii lɛ, nyɛkahãa amɛgbalaa nyɛ ni nyɛjaa amɛ, ni nyɛsɔmɔa amɛ, ejaakɛ Yehowa nyɛNyɔŋmɔ lɛ, saa nomɛi eto ehã maji krokomɛi lɛ koni amɛ, amɛja nomɛi.

²⁰ Shi nyɛ lɛ, Yehowa yakpɔ̃ nyɛ yɛ Ijipt, kɛje dade flɔnɔɔ lɛ mli, koni nyɛbatsɔ̃ lɛ diɛŋtsɛ ewebii tamɔ bɔ ni nyɛyɔɔ ŋmɛnɛ gbi nɛɛ lɛ.

²¹ Nyɛhewɔ lɛ Yehowa na mi mlifu, ni ewo shi akɛ mifoŋ Yordan Faa lɛ, ni miyaŋ shikpɔŋ kpakpa ni baa nii, ni Yehowa, nyɛNyɔŋmɔ lɛ, kɛhãa nyɛ akɛ nyɛnɔ lɛ nɔ.

²² Ejaakɛ mi lɛ, mibagbo yɛ biɛ shikpɔŋ nɛɛ nɔ, ni mifoŋ Yordan lɛ; shi nyɛ lɛ, nyɛbaafo faa lɛ koni nyɛyaŋɔ nakai shikpɔŋ kpakpa ni baa nii lɛ.

²³ Nyɛkwɛa nyɛhenɔ ni ahia koni nyɛhiɛ akaje kpãŋmɔ ni Yehowa, nyɛNyɔŋmɔ lɛ, kɛ nyɛ kpãŋ lɛ nɔ, ni nyɛyafee nɔ ko henɔ amãgã tamɔ bɔ ni Yehowa, nyɛNyɔŋmɔ lɛ, egu nyɛ lɛ;

²⁴ ejaakɛ Yehowa, nyɛNyɔŋmɔ lɛ, etamɔ la grigri ni shãa nii wɛɛ; ni Nyɔŋmɔ ni yeɔ awuŋã ni.

²⁵ “Kɛji nyɛfɔ bii ni nyɛna nabii tete, ni nyɛgbɔlɔ yɛ shikpɔŋ lɛ nɔ, shi nyɛyeee anɔkwa, ni nyɛfee nɔ ko henɔ amãgã, ni nyɛkɛfee efɔŋ yɛ Yehowa, nyɛNyɔŋmɔ lɛ, hiɛ, ni nyɛwo emli la lɛ,

²⁶ no lɛ miitsɛ ŋwɛi kɛ shikpɔŋ ŋmɛnɛ koni amɛye odase amɛshi nyɛ akɛ etsɛŋ ni aaakpãtã nyɛhiɛ yɛ shikpɔŋ ni nyɛbaafo Yordan lɛ kɛya ni nyɛyaŋɔ lɛ nɔ. Nyɛyeŋ be ko yɛ nɔ ni abaakpãtã nyɛhiɛ kwrakwra.

²⁷ Yehowa aaagbɛ nyɛ ashwã maji krokomɛi anɔ, ni nyɛyi fioo kɛkɛ aaashwɛ yɛ maji ni Yehowa aaagbɛ nyɛ ashwã kɛaatee lɛ anɔ.

²⁸ “Nyɛbaaya nyɛyaja nyɔŋmɔi ni ji tsei kɛ tɛi ni gbɔmɔ kɛ enine fee; amɛnaaa nii lɛ, amɛnuuu nii hu, amɛyeee nii, ni amɛnuuu nii fu hu.

²⁹ Nyɛbaaye Yehowa, nyɛNyɔŋmɔ lɛ, he kumai yɛ jɛi; ni kɛji nyɛtao esɛɛgbɛ kɛ nyɛtsui fɛɛ kɛ nyɛnyɛmɔ fɛɛ lɛ nyɛbaana lɛ.

³⁰ “Kɛji enɛɛmɛi fɛɛ eba nyɛnɔ, ni nyɛyɛ nɔnaa mli lɛ, nakai gbii lɛ amli nyɛaakpale kɛba Yehowa nyɛNyɔŋmɔ lɛ, ŋɔɔ, ni nyɛaabo lɛ toi,

³¹ ejaakɛ Yehowa, nyɛNyɔŋmɔ lɛ, musuŋtsɔlɔ ji lɛ; ekwaŋ nyɛ, ni asaŋ ekpãtãŋ nyɛhiɛ; ni ehiɛ kpaŋ kpãŋmɔ ni ekɛ nyɛtsɛmɛi lɛ kpãŋ lɛ nɔ, nɔ ni ekã he kitã ehã amɛ lɛ.

³² “Nyɛbia blema gbii ni eho dani afɔ nyɛ lɛ mli sane akɛ kɛjɛ gbi nɔ ni Nyɔŋmɔ bɔ gbɔmɔ adesa yɛ shikpɔŋ lɛ nɔ nɛɛ lɛ, nɔ ko kpeteŋkple tamɔ nɛkɛ sane eba dã lo? Aloo nyɛbia kɛjɛa ŋwɛi naagbeehe kome kɛyashia ŋwɛi naagbeehe kome hu akɛ anu sane ko ni tamɔ enɛ dã lo?

³³ Ani maŋ ko nɔ bii enu nyɔŋmɔ ko gbee ni miiwie kɛmiijɛ la mli yɛ amɛhiɛ dã, tamɔ bɔ ni nyɛ lɛ nyɛnu, ni nyɛhiɛ kã nɛɛ lɛ?

³⁴ Aloo nyɛnu nyɔŋmɔ ko eka dã akɛ eeeya maŋ ko nɔ, ni eyakpɔ̃ mɛi komɛi kɛje nakai maŋ lɛ mli ni ebafee mɛi lɛ lɛ diɛŋtsɛ emɛi tamɔ bɔ ni Yehowa, nyɛNyɔŋmɔ lɛ, tsɔ̃ kai kɛ okadii kɛ naakpɛɛ nii, kɛ ta kɛ nineshiwalɛ kɛ hewalɛ kpeteŋkple nɔ efee ehã nyɛ yɛ Ijipt, yɛ nyɛ diɛŋtsɛ nyɛhiŋmɛiiaŋ lɛ?

³⁵ Ahã nyɛna nibii nɛɛ koni nyɛkɛle akɛ Yehowa koome ji Nyɔŋmɔ, ni lɛ esɛɛ lɛ nyɔŋmɔ ko bɛ dɔŋŋ.

³⁶ Ŋwɛi tɔ̃ɔ ehã nyɛnu egbee kɛjɛ koni ekɛtsɔse nyɛ; ni ehã nyɛna ela kpeteŋkple lɛ yɛ shikpɔŋ lɛ nɔ, ni nyɛnu ewiemɔ kɛjɛ la mli.

³⁷ Ni akɛni esumɔ nyɛtsɛmɛi lɛ hewɔ lɛ, eŋɔ amɛshwiei ni ba yɛ amɛsɛɛ lɛ, ni ekɛ lɛ diɛŋtsɛ ehewalɛ kpeteŋkple lɛ yakpɔ̃ nyɛ yɛ Ijipt.

³⁸ Eshwie maji wuji ni ahe wa kwraa fe nyɛ yɛ nyɛhiɛ, bɔ ni afee ni ekɛ nyɛ aba ni eŋɔ amɛshikpɔŋ lɛ ehã nyɛ akɛ nyɛnɔ tamɔ bɔ ni eba mli ŋmɛnɛ nɛɛ lɛ.

³⁹ No hewɔ lɛ, nyɛnaa nyɛlea ŋmɛnɛ, ni nyɛkɛtoa nyɛyiŋ, akɛ Yehowa ji ŋwɛi kɛ shikpɔŋ lɛ fɛɛ Nyɔŋmɔ; lɛ esɛɛ lɛ mɔ ko bɛ dɔŋŋ.

⁴⁰ No hewɔ lɛ, nyɛyea Yehowa akpɔi kɛ kitãi ni miwoɔ nyɛ ŋmɛnɛ gbi nɛɛ nɔ, koni ahi ahã nyɛ kɛ nyɛbii ni baa yɛ nyɛsɛɛ lɛ, bɔ ni afee ni nyɛtsɛ yɛ shikpɔŋ ni Yehowa, nyɛNyɔŋmɔ lɛ, kɛhãa nyɛ lɛ nɔ.”

Abobaa maji ni yɔɔ Yordan bokãgbɛ lɛ

⁴¹ Kɛkɛ ni Mose hala maji etɛ̃ yɛ Yordan Faa lɛ bokãgbɛ lɛ,

⁴² akɛ abobaa maji koni gbɔmɔgbelɔ ni enine eyakpa yɛ enaanyo nɔ, be mli ni jeee nyɛɛ ni enyɛɔ mɔ lɛ eto momo hewɔ, ajo foi kɛya maji nɛɛ ateŋ eko mli koni ekɛhere eyiwala.

⁴³ Eŋɔ Bezor maŋ ni yɔɔ ŋa lɛ nɔ shikpɔŋ trɛnɛɛ lɛ nɔ lɛ, ni ekɛhã Rubenbii lɛ; ni eŋɔ Ramot yɛ Gilead ekɛhã Gadbii lɛ, ni eŋɔ Golan yɛ Bashan ekɛhã Manasebii lɛ.

Mose tsɔɔ Nyɔŋmɔ Mla lɛ naa

⁴⁴ Nyɔŋmɔ mlai ni Mose kɛshwie Israelbii lɛ ahiɛ lɛ nɛ:

⁴⁵ no mɛi odaseyeli saji kɛ akpɔi kɛ mlai ni ejaje etsɔ̃ɔ Israelbii be ni amɛjɛ Ijipt amɛbaa,

⁴⁶ ni amɛbashɛ jɔɔ ni kã Yordan Faa lɛ bokãgbɛ lɛ mli, yɛ Betpeor maŋ lɛ ŋlɛnɔ lɛ. Nɛkɛ be mli lɛ, Israelbii lɛ yɛ Amorbii amaŋtsɛ Sihon ni hi Heshbon, mɔ ni Mose kɛ Israelbii lɛ ye enɔ kunim, be ni amɛnyiɛ gbɛ kɛjɛ Ijipt amɛbaa lɛ, shikpɔŋ lɛ nɔ lɛ.

⁴⁷ Israelbii lɛ shɔ̃ Maŋtsɛ Sihon shikpɔŋ lɛ, ni amɛshɔ̃ Bashan maŋtsɛ Og ni ji Amorbii amaŋtsɛ kroko ni yɔɔ Yordan bokãgbɛ lɛ hu shikpɔŋ lɛ,

⁴⁸ kɛjɛ Aroer maŋ lɛ ni kã Arnon Faa lɛ jɔɔ lɛ toi kɛtee kooyigbɛ aahu kɛyashi Sirion ni ji Hermon Gɔŋ lɛ he.

⁴⁹ Ŋa kplenee lɛ fɛɛ ni yɔɔ Yordan lɛ bokãgbɛ lɛ kɛtee wuoyigbɛ kɛyanina Ŋoo Ŋshɔ lɛ, kɛtee bokãgbɛ kɛyashi Pisga Gɔŋ lɛ shishi fɛɛ fata shikpɔŋ nɛɛ he.