5 Mose 33 - ŊMALƐ KRƆŊKRƆŊ LƐ

Mose jɔɔ Israel Akutsei lɛ

¹ Jɔɔmɔ ni Nyɔŋmɔ gbɔmɔ Mose kɛjɔɔ Israelbii lɛ dani egbo lɛ nɛ.

² Ekɛɛ akɛ, “Yehowa jɛ Sinai Gɔŋ lɛ nɔ ekpɛ kɛjɛ Edom eshwie wɔnɔ; ekpɛ kɛjɛ Paran Gɔŋ lɛ nɔ; ejɛ mɛi krɔŋkrɔŋi akpei nyɔŋma lɛ aŋɔɔ kɛ la plamplam ni ma eninejurɔ nɔ.

³ “Anɔkwa, edɔɔ emɛi ahe, ehiɛ emɛi krɔŋkrɔŋi lɛ yɛ edɛŋ, no hewɔ lɛ, wɔkula enaji anaa ni wɔmiibo egbɛtsɔ̃ɔmɔ toi.

⁴ Wɔyeɔ Mla lɛ ni Mose kɛhã wɔ lɛ nɔ; ejaakɛ no ji Yakob shwiei agboshinii.

⁵ Belɛ Yehowa tsɔ̃ maŋtsɛ yɛ Israel be ni maŋbii babua amɛhe naa ni Israel akutsei lɛ fɛɛ naa kpe shi lɛ.

⁶ Mose kɛɛ yɛ Ruben akutso lɛ he akɛ, ‘Ruben yi ana wala, eshishi akabule; emli hii anɔ akagbɔ.’ ”

⁷ Ekɛɛ yɛ Yuda akutso lɛ he akɛ, “Yehowa, bo Yuda toi; kplamɔ lɛ kɛbafata akutsei krokomɛi lɛ ahe. Nuŋtsɔ, bo diɛŋtsɛ wuu ohã Yuda koni oye obua lɛ ni enyɛ ehenyɛlɔi ekɛwu.”

⁸ Ekɛɛ yɛ Levi akutso lɛ he akɛ, “Bo Yehowa, hã Urim kɛ Tumim ajie osuɔmɔnaa nii kpo atsɔ̃ɔ omaŋ lɛ, kɛtsɔ̃ omɛi krɔŋkrɔŋi ni ji Levibii lɛ anɔ. Oka amɛ okwɛ yɛ Masa, ni okɛ amɛ taa naa yɛ Meriba nu lɛ he.

⁹ Amɛkɛɛ yɛ amɛtsɛ kɛ amɛnyɛ he akɛ, ‘Wɔbuuu amɛ, ni amɛkwa amɛnyɛmimɛi, ni amɛshi amɛmusuŋbii asɛɛ, ejaakɛ amɛmɔ owiemɔ lɛ mli, ni amɛye okpãŋmɔ lɛ nɔ.

¹⁰ Amɛ amɛbaatsɔ̃ɔ Yakob shwiei okpɔi lɛ, kɛ Israel omla lɛ. Amɛ amɛbaashã tsofakɛŋma yɛ ohiɛ kɛ shãa afɔle muu yɛ afɔleshãa latɛ lɛ nɔ.’

¹¹ Ao! Yehowa, jɔɔmɔ Levi shwiei lɛ, ni amɛninenaa nitsumɔ asa ohiɛ; tswiamɔ amɛhenyɛlɔi kɛ mɛi ni nyɛɔ amɛ lɛ nii, koni amɛkanyɛ shi amɛte dɔŋŋ.”

¹² Mose kɛɛ yɛ Benyamin akutso lɛ he akɛ, “Mɔ ni Yehowa sumɔɔ lɛ lɛ, ehiɔ Yehowa masɛi shweshweeshwe. Ebuɔ ehe gbi muu lɛ fɛɛ, ni ekpɔkɔiaŋ ji ekamɔhe.”

¹³ Mose kɛɛ yɛ Yosef akutso lɛ he akɛ, “Yehowa ajɔɔ oshikpɔŋ lɛ kɛ bɔ, ŋwɛi nikeenii ni jara wa fe fɛɛ lɛ, kɛ shikpɔŋ lɛ shishi nu hu.

¹⁴ Yehowa ajɔɔ Yosef kɛ tsoyibii kpakpai diɛŋtsɛ ejɔɔ lɛ kɛ ŋmɔshinii kpakpai babaoo ni baa yɛ be ni sa mli.

¹⁵ Ehã ŋmɔshinii kpakpai akwɛ̃ yɛ eblema gɔji lɛ anɔ; ni naanɔ gɔ̃ŋkpɔi lɛ hu aba nii babaoo.

¹⁶ Yehowa ajɔɔ eshikpɔŋ lɛ koni eba nii babaoo, bɔ ni shikpɔŋ nyɛɔ ebaa nii. Mɔ ni hi ŋmeitso lɛ mli lɛ ana Yosef akutso lɛ he miishɛɛ. Akɛ enɛɛmɛi fɛɛ aduro Yosef; jɔɔmɔ aba ekekre ni fi eyitso lɛ nɔ, Lɛ mɔ ni ji lumɔ yɛ enyɛmimɛi lɛ ateŋ lɛ.

¹⁷ Yosef kromɔbi lɛ je agbo tamɔ tsinanuu; ni ekoji ni ji ehewalɛ lɛ tamɔ ŋaŋ tsinanuu nɔ; nomɛi ji Efraim mɛi akpei nyɔŋma, kɛ Manase akpei nyɔŋma ni amɛkɛbaashimɔ maji lɛ fɛɛ, ni amɛaatsirɛ amɛ kɛaatee jeŋ naagbeehei lɛ.”

¹⁸ Ni ekɛɛ yɛ Zebulon akutso lɛ he akɛ: “Zebulon, nya yɛ ŋshɔ hiɛ jarayeli hewɔ; ni bo Isakar hu, nya onii ni ona yɛ shĩa lɛ hewɔ.

¹⁹ Amɛaatsɛ mɛi kɛaaya amɛgɔ̃ŋ lɛ nɔ: jɛi amɛaashã afɔlei ni sa yɛ, ejaakɛ amɛna nii kɛjɛ ŋshɔ hiɛ, ni amɛna shĩa mli jwetri ni akɛtee lɛ hu.”

²⁰ Nɔ ni Mose kɛɛ yɛ Gad akutso lɛ he nɛ: “Akafo Nyɔŋmɔ mɔ ni lɛɔ Gad husui lɛ amli lɛ. Gad bu shi tamɔ jata ni miiwɔ, ni etserɛɔ mɛi aniji, ni ekpɔɔ yitso heloo.

²¹ Ekɔ shikpɔŋ lɛ he ni hi fe fɛɛ lɛ ehã ehe, ejaakɛ jɛi tatsɛ gbɛnaa shikpɔŋ ni afo ato lɛ kã. Kɛkɛ ni eba maŋ onukpai lɛ aŋɔɔ ni ebafata Israel he, ni akɛ Yehowa mlai lɛ kɛ akpɔi lɛ kojo maŋ lɛ yɛ jalɛ naa.”

²² Nɔ ni Mose kɛɛ yɛ Dan akutso lɛ he nɛ: “Dan lɛ jatabi ni tumɔɔ kɛjɛ Bashan ni.”

²³ Nɔ ni Mose kɛɛ yɛ Naftali akutso lɛ he nɛ: “Naftali, bo lɛ aduro bo naakpa, Yehowa ejɔɔ bo jogbaŋŋ; ŋɔɔ wuoyigbɛ kɛ Galilea Kpaakpo lɛ ofee onɔ.”

²⁴ Nɔ ni Mose kɛɛ yɛ Asher akutso lɛ he nɛ: “Ajɔɔ Asher fe fɛɛ yɛ bii ateŋ, ni enyɛmimɛi lɛ aaasumɔ esane; ni eshikpɔŋ lɛ aaashwere kɛ mu tso.

²⁵ Akɛ dade kɛ akɔɔble adabãi aaalalaa omaŋ agboi asɛɛ; ni bɔ ni ogbii falɛ yɔɔ lɛ, nakai nɔŋŋ ohewalɛ aaahi.

²⁶ Mɔ ko mɔ ko bɛ ni tamɔ Israel Nyɔŋmɔ lɛ, mɔ ni taa okpɔŋɔ nɔ kɛnyiɛɔ ŋwɛi, ni ekɛ agbojee tsɔ̃ɔ atatuiaŋ kɛbayeɔ ebuaa bo lɛ.

²⁷ Naanɔ Nyɔŋmɔ lɛ ji obobaahe, ni enaanɔ niji lɛ hiɛ omli. Eshwie henyɛlɔi lɛ kɛje ohiɛ, ni ekɛɛ bo akɛ, ‘Kpãtãmɔ amɛhiɛ’.

²⁸ No hewɔ lɛ, Israelbii lɛ, aaahi shi shweshweeshwe. Yakob nubu lɛ aaahi shikpɔŋ ni abele kɛ wain pii baa yɛ nɔ, ni ŋwɛi bɔ nyɔɔ kɛjɛɔ ŋwɛi shwieɔ nɔ lɛ nɔ.

²⁹ Israel, omii ashɛ ohe! Namɔ tamɔ bo, maŋ ni Yehowa ehere oyiwala? Mɔ ni ji oyelikɛbuamɔ tsɛŋ kɛ okunimyeli klante lɛ? Ohenyɛlɔi aaashwie amɛnaa shi amɛhã bo, ni obaanaanaa amɛhei grɔŋŋi lɛ anɔ.”