5 Mose 31 - ŊMALƐ KRƆŊKRƆŊ LƐ

Yoshua ye Mose sɛɛ akɛ Hiɛnyiɛlɔ

¹ Mose tee nɔ ekɛ Israelbii lɛ wie,

² ni ekɛɛ amɛ akɛ, “Miye afii oha kɛ nyɔŋmai enyɔ amrɔ nɛɛ; minyɛɛɛ yaakɛbaa lɛ dɔŋŋ, asaŋ Yehowa, ekɛɛ mi akɛ, ‘Ofoŋ nɛkɛ Yordan Faa nɛɛ’.

³ Yehowa, nyɛNyɔŋmɔ lɛ, diɛŋtsɛ aaanyiɛ nyɛhiɛ kɛfo faa lɛ; ni lɛ nɔŋŋ ebaakpãtã majimaji lɛ ahiɛ yɛ nyɛhiɛ koni nyɛŋɔ. Yɛ Yehowa wiemɔ naa lɛ, Yoshua aaanyiɛ nyɛhiɛ kɛfo Yordan Faa lɛ.

⁴ Yehowa aaafee maji lɛ bɔ pɛ ni efee Amorbii amaŋtsɛmɛi Sihon kɛ Og kɛ amɛshikpɔŋ lɛ be ni ekpãtã amɛhiɛ lɛ.

⁵ Yehowa aaatu amɛ awo nyɛdɛŋ; ni nyɛfee amɛ bɔ ni mitsɔ̃ɔ nyɛ akɛ nyɛfee amɛ lɛ pɛpɛɛpɛ.

⁶ Nyɛhe awaa, ni nyɛfea ekãa; nyɛkashea gbeyei lɛ, nyɛtsui akafãa hu yɛ amɛhewɔ, ejaakɛ Yehowa, nyɛNyɔŋmɔ lɛ, ji mɔ ni kɛ nyɛ nyiɛ kɛyaa lɛ; eshiŋ nyɛ, ni ekwaŋ nyɛ hu.”

⁷ Kɛkɛ ni Mose tsɛ Yoshua kɛba eŋɔɔ, ni ekɛɛ lɛ yɛ Israel maŋ muu lɛ fɛɛ hiɛ akɛ, “Ohe awa, ni ofee ekãa, ejaakɛ bo okɛ nɛkɛ maŋ nɛɛ baaya shikpɔŋ lɛ ni Yehowa ewo amɛtsɛmɛi lɛ he shi akɛ ekɛbaahã amɛ lɛ nɔ, ni bo nɔŋŋ oooja shikpɔŋ lɛ ohã amɛ akɛ amɛgbɛfaŋnɔ.

⁸ Yehowa ji mɔ ni aaanyiɛ ohiɛ kɛya; ni ekɛ bo aaahi shi; ehaŋ onine anyɛ shi lɛ, eshiŋ bo hu. Kaashe gbeyei, ni otsui akafã hu.”

Akane Mla Wolo lɛ shi kome daa afii kpawo

⁹ Kɛkɛ ni Mose ŋma mla lɛ ewo wolo mli, ni ekɛhã osɔfoi lɛ, ni ji Levi shwiei, mɛi ni tereɔ Yehowa Kpãŋmɔ Adeka lɛ, kɛ Israelbii lɛ amaŋ onukpai lɛ fɛɛ.

¹⁰ Mose kɛɛ amɛ akɛ, “Daa afii kpawo naagbee, ni ji heyeli be ni akɛ nyɔmɔ keɔ lɛ, kɛji eshɛ Asesei Agbijurɔyeli lɛ,

¹¹ be ni Israel maŋtso muu fɛɛ ebapue yɛ Yehowa, nyɛNyɔŋmɔ lɛ, hiɛ yɛ he ni lɛ eŋɔ akɛ jɛi aja lɛ yɛ lɛ, akane nɛkɛ mlai nɛɛ fɛɛ yɛ Israel fɛɛ hiɛ awo amɛtoiiaŋ.

¹² Abua maŋ lɛ fɛɛ naa kɛkpe, hii kɛ yei kɛ gbekɛbii kɛ gbɔi ni yɔɔ nyɛmaji lɛ amli lɛ, koni amɛbo mlai lɛ atoi ni amɛkase bɔ ni afee ni amɛshe Yehowa, nyɛNyɔŋmɔ lɛ, gbeyei koni amɛjwɛŋ nɔ ni amɛye mla nɛɛ mli wiemɔi lɛ fɛɛ anɔ.

¹³ Kɛkɛ lɛ amɛbii hu ni leee mlai nɛɛ amɛto lɛ akase ni amɛshe Yehowa, nyɛNyɔŋmɔ lɛ, gbeyei bei abɔ fɛɛ ni nyɛyɔɔ shikpɔŋ ni nyɛyaafo Yordan Faa lɛ ni nyɛyaŋɔ lɛ nɔ lɛ.”

Naagbee fãmɔ ni Yehowa fã Mose

¹⁴ Kɛkɛ ni Yehowa kɛɛ Mose akɛ, “Naa, ogbele be eshɛ etã. Tsɛ Yoshua kɛba koni bo, okɛ lɛ fɛɛ nyɛbadamɔ Kpee Buu lɛ mli koni matu nitsumɔ lɛ mawo edɛŋ.” Mose kɛ Yoshua tee, ni amɛyadamɔ Kpee Buu lɛ mli.

¹⁵ Yehowa bapue yɛ Buu lɛ mli yɛ atatu kutuu mli, ni atatu lɛ badamɔ Kpee Buu lɛ shinaa lɛ shi.

¹⁶ Kɛkɛ ni Yehowa kɛɛ Mose akɛ, “Naa, eshwɛ fioo ni obaagbo, ni ogbele sɛɛ lɛ maŋ nɛɛ baakwa mi, ni amɛbaaja nyɔŋmɔi krokomɛi ni amɛyaanina yɛ shikpɔŋ ni amɛyaa nɔ lɛ nɔ lɛ. Amɛbaakwa mi, ni amɛaaku kpãŋmɔ ni mi kɛ amɛ ekpãŋ lɛ mli.

¹⁷ Kɛji eba mli nakai lɛ mimli aaawo amɛ la yɛ nakai be lɛ mli; ni mibakwa amɛ, ni mifeŋ amɛ ejurɔ, ni aaaye amɛnɔ. Saji fɔ̃ji babaoo kɛ haomɔi baaba amɛnɔ, ni ebaahã amɛbi yɛ nakai be lɛ mli akɛ, ‘Kwɛɛ jeee Yehowa, wɔNyɔŋmɔ lɛ, ni bɛ wɔteŋ dɔŋŋ lɛ hewɔ ni nɛkɛ nifɔɔjianii nɛɛ eba wɔnɔ nɛɛ?’

¹⁸ Anɔkwa, nakai be lɛŋ lɛ mifeŋ amɛ ejurɔ yɛ nifɔɔjianii fɛɛ ni amɛfee lɛ ahewɔ, ejaakɛ amɛtee amɛmiija nyɔŋmɔi krokomɛi.

¹⁹ “No hewɔ lɛ, agbɛnɛ ŋmaa nɛkɛ lala nɛɛ, ni otsɔ̃ɔ Israelbii lɛ. Lala lɛ ahi amɛdaaŋ. Enɛ baaye mi kɛ Israelbii ateŋ odase.

²⁰ Ejaakɛ kɛji mikɛ amɛ yashɛ shikpɔŋ kpakpa ni baa nii lɛ nɔ, nɔ ni mikã amɛtsɛmɛi lɛ kitã yɛ he akɛ mikɛbaahã amɛ lɛ, ni amɛna nii amɛye ni amɛtɔrɔ, ni amɛshwishwii lɛ, amɛbaakpale kɛyanyiɛ nyɔŋmɔi krokomɛi asɛɛ, ni amɛaaya amɛyasɔmɔ amɛ, ni amɛaagbe mihe guɔ moŋ, ni amɛaaku mi kɛ amɛteŋ kpãŋmɔ lɛ mli.

²¹ Kɛji saji fɔ̃ji kɛ hejaramɔ babaoo eba amɛnɔ lɛ, lala nɛɛ aaaye mi kɛ amɛteŋ odase, ejaakɛ amɛshwiei ahiɛ kpaŋ lala nɛɛ nɔ, ni lala lɛ aaahi amɛdaaŋ daa. Amrɔmrɔ nɛɛ po, dani mikɛ amɛ aaaya ayashɛ shikpɔŋ lɛ ni mikã he kitã akɛ mikɛbaahã amɛ lɛ nɔ lɛ, mile yiŋ ni amɛtoɔ momo.”

²² No hewɔ lɛ, Mose ŋma nɛkɛ lala nɛɛ yɛ nakai gbi lɛ nɔ nɔŋŋ ni etsɔ̃ɔ Israelbii lɛ.

²³ Kɛkɛ ni Yehowa tu nitsumɔ lɛ ewo Yoshua, Nun binuu lɛ, dɛŋ, ni ekɛɛ lɛ akɛ, “Ohe awa, ni ofee ekãa, ejaakɛ bo ji mɔ ni okɛ Israelbii lɛ baaya shikpɔŋ lɛ ni miwo he shi akɛ mikɛbaahã amɛ lɛ nɔ; mikɛ bo baahi shi.”

²⁴ Be ni Mose eŋma mla nɛɛ mli wiemɔi lɛ ewo wolo mli egbe naa owura kosɛɛ lɛ,

²⁵ Mose fã Levibii osɔfoi ni tereɔ Yehowa Kpãŋmɔ Adeka lɛ, ni ekɛɛ amɛ akɛ,

²⁶ “Nyɛŋɔa nɛkɛ Mla Wolo nɛɛ ni nyɛkɛŋmɛa Yehowa, nyɛNyɔŋmɔ lɛ, Kpãŋmɔ Adeka lɛ masɛi koni eye nyɛhe odase yɛ jɛi.

²⁷ Mile bɔ ni nyɛtseɔ atua kɛ bɔ ni nyɛkuɛŋ ti hã hu. Nyɛmiitse Yehowa hiɛ atua amrɔ nɛɛ po ni mihiɛ kã ni mi kɛ nyɛ yɔɔ nɛɛ, shi migbele sɛɛ lɛ te aaatamɔ tɛŋŋ mɔ?

²⁸ Nyɛtsɛa nyɛkutseiatsɛmɛi lɛ fɛɛ kɛ nyɛmaŋ nitsulɔi onukpai lɛ hu kɛbaa miŋɔɔ bɔ ni afee ni mawie nɛkɛ wiemɔi nɛɛ mawo amɛtoii amli koni matsɛ ŋwɛi kɛ shikpɔŋ koni amɛbaye mi kɛ amɛteŋ odase.

²⁹ Ejaakɛ mile faŋŋ akɛ migbele sɛɛ lɛ, nyɛbaafite kwraa, ni nyɛbaŋ nyɛjeŋ bɔ ni mitsɔ̃ɔ nyɛ lɛ. No hewɔ lɛ, wɔsɛɛ aahu lɛ, efɔŋ ji nɔ ni baaba nyɛnɔ, ejaakɛ nyɛbaafee efɔŋ yɛ Yehowa hiɛ; ni nyɛkɛ nyɛnifeemɔnii baawo emli la.”

Mose Lala lɛ

³⁰ Kɛkɛ ni Mose wie nɛkɛ lala ni baa nɛɛ mli wiemɔi lɛ fɛɛ ewo Israel asafo muu lɛ fɛɛ toiiaŋ kɛyashi egbe naa.