5 Mose 30 - ŊMALƐ KRƆŊKRƆŊ LƐ

Nɔ ni baahã kpãtãmɔ kɛ jɔɔmɔ aba

¹ “Mikɛ saji nɛɛ ni ji jɔɔmɔ kɛ loomɔ miishwie nyɛhiɛ; kɛ ena eba nyɛnɔ beiaŋ ni nyɛyɔɔ maji anɔ fɛɛ ni Yehowa, nyɛNyɔŋmɔ lɛ, eshwie nyɛ kɛtee lɛ, ni nyɛaakai nɔ ni mikɛɛ nyɛfee lɛ,

² ni nyɛ kɛ nyɛbii nyɛaakpale kɛba Yehowa, nyɛNyɔŋmɔ lɛ, ŋɔɔ, ni nyɛkɛ nyɛtsuii kɛ nyɛnyɛmɔ fɛɛ aaaye egbee nɔ, bɔ ni miwo nyɛ kitã ŋmɛnɛ gbi nɛɛ akɛ nyɛfee lɛ,

³ no lɛ Yehowa, nyɛNyɔŋmɔ lɛ aaana nyɛ mɔbɔ ekoŋŋ. Emusuŋ aaatsɔ̃ lɛ, ni eeeku sɛɛ ebua nyɛnaa kɛaajɛ majimaji anɔ hei fɛɛ ni Yehowa, nyɛNyɔŋmɔ lɛ, egbɛ nyɛ eshwã lɛ kɛaaba.

⁴ Nyɛteŋ mɛi ni eeeshɛrɛ amɛ ashwie je lɛ mli naagbeehei tete po lɛ, Yehowa, nyɛNyɔŋmɔ lɛ, aaabaŋɔ amɛ kɛaaje jɛi kɛaaba.

⁵ Yehowa, nyɛNyɔŋmɔ lɛ, kɛ nyɛ aaaba nyɛtsɛmɛi lɛ ashikpɔŋ lɛ nɔ koni nyɛbaŋɔ. Yehowa aaahã nyɛshwere, ni nyɛyi aaafa hu fe nyɛtsɛmɛi lɛ.

⁶ Yehowa, nyɛNyɔŋmɔ lɛ, aaahã nyɛ kɛ nyɛshwiei hu atsake nyɛtsui bɔ ni afee ni nyɛkɛ nyɛtsui kɛ nyɛnyɛmɔ fɛɛ asumɔ Yehowa, nyɛNyɔŋmɔ lɛ, koni nyɛyi ana wala.

⁷ Kɛkɛ lɛ Yehowa, nyɛNyɔŋmɔ lɛ, aaahã nɛkɛ loomɔi nɛɛ fɛɛ abashwie nyɛhenyɛlɔi kɛ nyɛhetsɛ̃lɔi ni waa nyɛ yi lɛ anɔ;

⁸ ni nyɛ lɛ nyɛaaku sɛɛ nyɛbo Yehowa toi, ni nyɛaaye ekitãi fɛɛ ni miwoɔ nyɛ ŋmɛnɛ gbi nɛɛ lɛ anɔ.

⁹ Yehowa, nyɛNyɔŋmɔ lɛ, aaahã nyɛnine naa nitsumɔi fɛɛ ashwere, ni nyɛmusuŋ bii kɛ nyɛtsinai abii kɛ nyɛŋmɔshi nibaanii fɛɛ hu ashwere babaoo ahã nyɛ; ejaakɛ Yehowa aaana nyɛhe miishɛɛ ni eeehã nyɛshwere ekoŋŋ tamɔ bɔ ni ena nyɛtsɛmɛi lɛ ahe tsuijurɔ lɛ.

¹⁰ Ebaafee nakai kɛji nyɛaabo Yehowa, nyɛNyɔŋmɔ lɛ, toi, ni nyɛaaye ekitãi lɛ kɛ ekpɔi lɛ ni aŋma yɛ nɛkɛ Mla Wolo nɛɛ mli lɛ anɔ, ni nyɛaakpale kɛ nyɛtsui kɛ nyɛnyɛmɔ fɛɛ kɛaaba Yehowa, nyɛNyɔŋmɔ lɛ, ŋɔɔ lɛ.

¹¹ “Kitã ni miwoɔ nyɛ ŋmɛnɛ nɛɛ lɛ, ejeee nɔ ko ni wa tsɔ̃ hã nyɛ, ni ebɛ shɔŋŋ hu.

¹² Jeee ŋwɛi eyɔɔ ni no hewɔ lɛ, nyɛaakɛɛ akɛ, ‘namɔ aaakwɔ kɛya ŋwɛi ahã wɔ koni eyaŋɔ ekɛbahã wɔ, ni wɔnu ni wɔye nɔ?’

¹³ Ni jeee ŋshɔ sɛɛ hu eyɔɔ ni nyɛaakɛɛ akɛ, ‘namɔ aaafo ŋshɔ koni eyaŋɔ ekɛbahã wɔ, ni wɔnu ni wɔye nɔ?’

¹⁴ Dabida, wiemɔ lɛ bɛŋkɛ nyɛ kpaakpa; eyɛ nyɛdaaŋ ni eyɛ nyɛtsuii amli hu, no hewɔ lɛ, nyɛaanyɛ nɔ nyɛye aahu.

¹⁵ “Naa, ŋmɛnɛ gbi nɛɛ lɛ, mikɛ wala kɛ gbele kɛ ekpakpa kɛ efɔŋ fɛɛ miishwie nyɛhiɛ.

¹⁶ Kɛji nyɛaaye Yehowa, nyɛNyɔŋmɔ lɛ, kitãi ni miwoɔ nyɛ ŋmɛnɛ gbi nɛɛ nɔ lɛ anɔ, ni nyɛaaba nyɛjeŋ bɔ ni Yehowa taoɔ, ni nyɛaaye ekitãi kɛ ekpɔi lɛ kɛ emlai lɛ anɔ lɛ, no lɛ nyɛyi aaana wala. Nyɛyi aaafa, ni Yehowa, nyɛNyɔŋmɔ lɛ, aaajɔɔ nyɛ yɛ shikpɔŋ lɛ ni nyɛyaa nyɛyaŋɔ lɛ nɔ.

¹⁷ Shi kɛji nyɛtsui yagba afã, ni nyɛgbo toi, ni alaka nyɛ, ni nyɛyaja nyɔŋmɔi krokomɛi, ni nyɛsɔmɔ amɛ lɛ,

¹⁸ no lɛ miigba mli kpoo miikɛɛ nyɛ ŋmɛnɛ gbi nɛɛ akɛ nyɛhiɛ aaakpãtã, ni nyɛwala sɛɛ etsɛŋ yɛ shikpɔŋ ni nyɛfoɔ Yordan Faa lɛ ni nyɛyaŋɔ lɛ nɔ.

¹⁹ Miitsɛ ŋwɛi kɛ shikpɔŋ ŋmɛnɛ gbi nɛɛ koni amɛbaye he odase akɛ mikɛ wala kɛ gbele, kɛ jɔɔmɔ kɛ loomɔ hu eshwie nyɛhiɛ. No hewɔ lɛ, nyɛkɔa wala bɔ ni afee ni nyɛ kɛ nyɛshwiei fɛɛ ayi ana wala.

²⁰ Nyɛsumɔa Yehowa, nyɛNyɔŋmɔ lɛ, ni nyɛboa lɛ toi, ni nyɛkpɛtɛa lɛ. Ejaakɛ no aaahã nyɛyi ana wala ni nyɛtsɛ yɛ jeŋ koni nyɛhi shikpɔŋ lɛ ni Yehowa kã nyɛtsɛmɛi Abraham kɛ Isak kɛ Yakob he kitã akɛ ekɛaahã amɛ lɛ nɔ.”